مياده

السابع

ثاني يوم
مياده:كعدت الصبح بعدني نايمه ومحاسه على نفسي گلت عدي وخر شويه دا اروح للحمام من انداريت شفت نفسي نايمه بحضن شاهين صحيت بفزه ليكون سمعني أتأكدت بعده نايم .......الحمد لله مسمعني لازم انتبه على الاسم وافصل حياتي السابقه عن حياتي الحاليه
نزلت من فراشي غسلت وشلت شعري لگيته بعده نايم نزلت للمطبخ احضر الريوك طلعت من المطبخ دا اصعد اكعد شاهين
وصلت للدرج شفته دينزل مبتسم ما ادري من وسامته وحركاته الرجوليه يخلي قلبي يدك وصل يمي شالني گلي صباح الخير ياحلوه
جاوبته صباح النور حاولت اكسر الحواجز بيناتنا گتله اول مره اشوف واحد يكعد من النوم احلى من صاحي
شاهين :مو يگولون من عاشر السعيد يسعد والي تنام بحضنه حلوه يحلو
ريگيني حتى اتصل بعمار يجيب الولد نفسه ونعقد ما عندي صبر البارحه الليل كله مكدرت انام بسببج
مياده :ليش
شاهين :ليش يعني غمزتلها مفهمتي...... ابتسمت خجلانه.....
مياده :نزلني الريوك حاضر
شاهين:يله حبيبتي ....نزلتها مشت كدامي تتمايل بخطوتين سريعه لحگتها حضنتها..... بوستها من خدها ......اندارت عليه گلتلي شاهين مو تتغير بعد فتره من زواجنا مثل مصار ويا عدي
جاوبتها مغثوث مياده كافي تقارنين وتذكرين حياتج ويا عدي وما اتقبل اتجيبين اسمه على لسانج كدامي صار مفهوم
مياده:شاهين لتزعل والله مو قصدي بس نفسيتي تعبانه بعد ما اتحمل اعيش تجربه ثانيه فاشله ودا اخاف من اسلوبك كله حب وعاطفه وتودد سريع اخاف ليكون بدافع الرغبه بمجرد ما تاخذ حقوقك
وتتعود اني الك .....تتغير وتصير بارد وجاف بالتعامل ويايه
شاهين :حبيبتي اولا لتخافين من تصرفاتي لان احنه مصارلنا كم يوم من اتعرفنا وكل يوم احس نفسي دا اتعلق بيج وبديت احبج فأكيد احاول اعبر عن هالحب والشغله الثانيه اذا انت ريحتيني ومليتي عيني وقلبي ليش ما ابادلج المشاعر ....طبعا اكيد راح نصادف مشاكل ونختلف وممكن خلال المسؤوليه ورا ميصير عدنا اطفال يقل الحب من ناحية الكلام لكن يبقى واضح من خلال التصرفات
لتشغلين بالج بهيج امور منو مأمن على عمره يجوز اموت
مياده :لا اسم الله ان شاء الله عمرك طويل
شاهين ترى الاكل برد
شاهين :ورا ما خلصت الريوك طلعت من المطبخ اتصلت بعمار واتفقت وياه يجيب المأذون والشاهد
ورا ساعة ونص
اجى عمار وصديقه والمأذون عقدت مره ثانيه
عمار سألني بالبدايه ليش دتعقد مره لخ بالاول جاوبته بعدين تعرف
ورا ما عقدت سألني مكتلي ليش عقدت مره لخ جاوبته لان جنت ناوي ابقي مياده على ذمتي بزواج مؤكد مابي نية طلاك ومن حجيت لغزوان خلى قلبي يلعب من العقد الاول ليكون باطل لان جان بصيغة محلل واني بداخلي جنت ماخذها زوجه الي
بدون نية طلاك لكن مياده متعرف جنت متفق وياها نبقى شهر سوا
عمار :شاهين راح تورطني ويا عدي وعيب هو صديقي
شاهين :انت ذبها براسي واطلع منها گله غدرت بيك واتخاربت ويايه ......حتى متجيك حجايه منه
عمار: دغدوني لعد صارت مياده مرت اخويه امون عليها
شاهين :عموري عزيمتك غير وكت يله حبيبي اخذ الجماعه وانتظر مني تلفون اعزمك هالايام
عمار :لك انت صدك ميغزر بيك لك عود انت تربية شيوخ شو متعرف بالاصول غير تجلب بيه على الغدا
شاهين :عموري ترى لحيت شايف الباب تندله لو ادليك عليه المره دتنتظرني فوك خلي عندك ذوق
عمار :ها لعد اذا هيج رايح بس انطيني فلوس اني اعزم نفسي بمطعم بدل منك
شاهين :دقيقه
صعدت اجيب محفظتي من الغرفه الي بصف غرفة مياده
اخذتها ومن دا انزل فتحت باب غرفتها ملگيتها نزلت انطيت لعمار فلوس راحوا
صحت مياده وينج. ماكو جواب
رجعت صعدت فتحت باب غرفتها لگيتها دتمشط شعرها سابحه گتلها نعيما
جاوبتني شكرا بدل ملابسك عازمتك نطلع للمول وبعدها نتغدا لان محتاجه كم شغله
شاهين :رحت وگفت قريب عليها مبتسم العصر نطلع .....هسه انتِ الي ......اخذت ايدها
مياده: ورا ما تم وصرت مرته فعليا ......بلحظه من اللحظات جنت بين ايد شاهين ناسيه الدنيا غلطت بأسمه وطلع من حلگي اسم عدي
زعل وگام من يمي بعصبيه ركع الباب وطلع دخل لغرفته

خلاف

بقيت بالفراش الوم نفسي على غبائي والخوف اكلني خايفه من رد فعله
ردت اروح اتأسف منه بس خفت من عصبيته گلت خلي يبرد وينسى يله احجي وياه
شاهين:جنت كلش فرحان لان حسيتها متجاوبه ويايه واتوقعتهابدت تاخذ عليه وتبادلني المشاعر لكن من طلع اسم عدي حسيت سجين ودخلتها بقلبي يعني جانت تتخيلني عدي والمشاعر هاي كلها اله مو الي جنت ناوي اضربها بس لزمت نفسي وطلعت من الغرفه كاره نفسي وكارها اني الي ضحكت على روحي وخليت نفسي بهالموقف وحده تحب زوجها و لو ما تحبه متقبل تزوج مره لخ حتى ترجعله هي حاليا مجروحه منه ......لكن بمرور الايام تحن لحياتها وياه
بقيت مختنگ معقوله حبيتها لدرجة نار شابه بقلبي
بدلت ملابسي وطلعت
مياده :عرفته طلع لبست ملابسي ونزلت للهول اتصلت على امي حجيتلها كل الي صار ويايه
بقت مصدومه ورزلتني لان منطيتهم علم سابقا
بأي شي صاير ويايه بقيت ابچي خلصت تلفون ويا امي من التعب
نمت على القنفه فزيت ساعه عشره ونص بالليل شاهين بعده برا البيت
دزيتله مسج (شاهين والله اسفه والاسم مجرد تعويد وغلطت بي والله جنت وياك وحاسه بيك انت لتعاقبيني على كلمه طلعت مني بدون ما احس والله عدي مديجي على بالي )
شاهين :جنت كاعد ويا عمار ابن عمي بكافيه واجاني مسج من مياده قريته بس بعدني متأذي ومعصب منها مكدرت امشيلها هالغلطه واصدك بكلامها بقيت ويا عمار الى ساعه وحده ونص رجعت للبيت فتحتلي الباب مباوعت حتى بوجها صعدت للغرفه سديت الضوه ونمت
مياده :من فتحتله الباب جنت خجلانه وخايفه منه بس هو معبرني صعد للغرفه
بقيت كاعده للصبح مكدرت انام للسبعه الصبح يله نعست ونمت
شاهين:ثاني يوم نزلت بالعشره لگيتها نايمه على القنفه
صعدت جبتلها چرچف وغطيتها.... بقيت ما اعرف اتصرف وخفت من نفسي لان اكثر من مره اقرر انفصل عنهاقبل لا اتعلق بيها اكثر ...وهي قلبها ويا غيري مدا اتحمل هالفكره من تجي براسي
صعدت غيرت ملابسي وطلعت بوجهي حجزت لبغداد