مياده

الرابع

#مياده
#بقلم_الكاتبه_اماسي_الليل
#الجزء_الرابع
العقد
شاهين :ثاني يوم اتصل عدي گلي رتبت كلشي
العصر تعقدون  گتله ماشي
للعصر بدلت واخذت عمار ورحنا لبيت مياده لان عدي مراد يجي
طبعا اني ارتاحيت  مراح يجي
دكينا الباب ويانا ولد ثاني زوج صبا اخت عمار  جايبه شاهد وياه
من فتحت الباب جانت كلشي ممخليه مكياج ولابسه بنطرون چينز وقميص قصير   شعور التملك الي حسيت بي لو بيدي وعندي سلطه عليها اخليها تروح تغير ملابسها.. سلمنا ودخلنا للصاله
بين ميجي المأذون  .....گالت شنو تشربون
كلنا جاوبنا  لا شكرا 
بقيت ابادلها النظرات وهي تبتسم وبداخلي اگلها
عدي اذا غبي ومقدر هالجمال خلي يتحمل نتيجة استهتاره وياج
ورا شويه  دگ الجرس راحت تفتحه
دخلت ودخل وياها المأذون   عقدنا وكملنا العقد   گتلها حضري نفسج امرلج فد ساعه    اروح احجز بأوتيل 
مياده :لا ميحتاج ابقى ويايه هنا بيت اهلي اني ادري انت  كاعد بيت عمك هالايام بين مترجع لبغداد
شاهين :لا راح أأجر بيت هاليومين على كد المده الي نبقى بيها سوا
مياده :ادري بيك متقبلها على نفسك تكعد بيت مره بس هذا مو بيتي بيت اهلي والله متروك واحسن من ما انأجر نكعد بي هالفتره والحقيقه اني اكون مرتاحه هنا اكثر لان متعلمه على المكان مو مثل من راح اكعد وياك بيت غريب عليه
شاهين :ماشي براحتج  راح اروح هسه بس ارجعلج بليل  رحت وگفت قريب عليها ارتبكت ومرفعت راسها نزلت شاورتها ترى صرتي مرتي رفعي راسج خليني اشوف هالوجه الحلو
رفعت وجها بأيدي   رفعت نظرها وصارت عينها بعيني 
اني متوقع اخذ وحده حلوه بس مو بهالجمال
هي ابتسمت
لو مو الولد ولازم اجيب جنطتي جان بقيت وياج بس ما اتأخر ساعتين وارجع اشوف هالوجه الحلو
مياده :بقيت ساكته مخدره على كلامه شكد حلو بس اكو حاجر مدا اتقبله دا احس نفسي مثل الوحده المرتبطه ودتخون زوجها احس بعدني ارتباطي بعدي مدا اكدر انطي مجال لشاهين بينما بالحقيقه هو شاهين الي زوجي وعدي طليقي يعني حتى حرام افكر بي واني بذمة رجال ثاني لازم يكون كل تفكيري يمه
من طلع  شاهين بقيت اباوع عليه كلش حلو لدرجه اي بنيه غيري تشوفه راح تنعجب بي وتحبه بس اني وضعي وياه مؤقت بهاللحظه مجان عندي اي مشاعر تجاه عدي لان وصل لمرحله حتى غيره ما بقت عنده ووصلني لمرحله بزعني من سوالفه وادري بي مراح يتغير بس مسألة يوميه مطلگني تخليني ابطل احبه بس ما ردت الناس تعرف اطلگت ....وما اريد يجيني حجي ....اسمي مطلقه كافي يخلي الناس اشكال تحجي عليه بالاخص اني صغيره محد راح يذب الصوج بالرجال
واهلي ميعرفون بيه مطلگه مرتين سابقا جنت اضم عليهم هالموضوع  وهالمره جنت ناويه ابلغهم لكن عدي لعب بعقلي وقنعني بشغلت المحلل  يرجعني قبل ميعرفون
وتالي عرفت بي تحايل عليه من گلي بدون دخول وطلع لازم يدخل عليه والولد شاهين جان صادق اكثر منه ومع هذا ماعندي اي مشاعر تجاهه
يمكن تأثير موضوع الطلاك وحالتي النفسيه وتعب هالسنين والتأثير السلبي الي ملى تفكيري وحياتي بسبب الضروف الي عشتها ويا عدي خلتني ما افكر صح وصرت انسانه ثانيه ماعندي هدف ولاطموح اي شخص يكدر يتخذ القرار عني واني اطيع بدون تفكير ....صحيت على نفسي
وين مياده القديمه الي كلمتها بيت اهلها متصير اثنين والكل يحترم قرارها ...جنت عايشه حياتي بأعتدال وحاسه بكل لحظه وعندي ذكريات حلوه
حتى صديقاتي واقربائي فقدتهم من ارتبطت بعدي وكعدت بالبيت مثل اي قطعة اثاث شوكت متدخل مزاجه يحركها حتى يشبع رغباته واني جنت ويا كل هالتهميش راضيه وقانعه جان قمة طموحي احافظ على بيتي وزوجي لكن الزوج ما قدر ولا فكر بقى يجرحني ومحترم عشرتي وياه لدرجه فضل عليه اصدقاءه وونسته ودربه الاعوج
قررت انسى حياتي ويا عدي وابدي حياتي ويا شاهين كأنه اول مره اتزوج بعدها اقرر شلون راح  تمشي حياتي
ورا نص ساعة دخلت سبحت ولبست نفنوف قصير نص ردن  وخليت مكياج وتعطرت
نزلت للمطبخ حضرت شغلات اسويها للعشا سمعت صوت الجرس وخرت شويه من بردة المطبخ شفت عدي
مكدرت افتحله اولا لان مشاعري كلها مخربطه وثانيا لان حاليا على ذمة رجال ثاني حرام التقي  بي

Um.m amasy night