فيصل،،،رحنة للمحكمة وعقدنا ونطيتة المبلغ ونطاني استقالة عبير اخذتها وباوعتلى بطرف عيني وعفتة ورجعت للبيت
عبير،،،جابلي عمي العقد مالت الزواج وجنت طالعة من غرفتي الي بالمستشفى وكاعدة اني وامي يم ابوية جان لسانة ثكيل ومو كلشي ينفهم عليه ظليت حاضنة ايدة وابجي واكول شلون هيج انكلبت حياتنة من جابلي العقد عمي وكلي بأي لحظة ممكن يجي ياخذج جنت اباوع لابوية وامي واحس الحسرة والقهر بعيونهم بنتهم الوحيدة هيج يصير بيها وهيج ترتبط جنت مابين فرحان لان ارتبطت بفيصل الي ماحبيت ولا حسيت هالاحاسيس لغيرة وبين اهلي ووضعهم وشلون ممتقبلي لفيصل وويلي عمي الي صغرني وحسيتة فرضني عليه فرض وويلي فيصل وشلون دمر مستقبلة من تحت راسي ولو جنت احس فيصل ميفكر بهل طريقة واكيد راح يفرح بأرتباطنة كلت خلي ابيع ثكل ومااكلمة الى ان يهدة وهو يكلمني
مرت الايام ومااتصل فيصل وبابا طلعناه من المستشفى وبدأ يتعالج علاج فيزيائي والتهيت ويا بس جان فراغ فضيع بداخلي على دوامي وتأكدت انه فيصل ماخذ مني موقف بسبب الي صار لان عدة اسبوع من عقدنا وهو لا حس ولا خبر
ومرة كاعدين الظهر ووحدة من القنوات جانوا مسوين روبورتاج عن الفساد والمرشحين للأنتخابات وشلون تاريخهم حافل بالفضائح والجرائم المخلة ومن ضمنهم ذكروا فيصل ونزلوا صورة من جان مكلبش وديدخلوا الشرطة للمركز انقهرت كلش وكمت ابجي عليه كلت اني لازم مااسكت شفت اسم المعد وعرفتة جان زميل الي حاولت ادبر رقمة مالكتة اتصلت بأستاذ عدنان وطلبت منة عنوان القناة دزلياه وكلي عبير اتركي هالموضوع ماطول ماذكروج بالروبورتاج طلعي نفسج من هالقصة ولاتتورطين اكثر
عبير،،،صار زوجي أستاذ عدنان يعني بالحالتين متأذية وهذا ظلم واني صاحبة المشكلة واذا ماابري منو راح يبري وبعدين مو طلع براءة الى متى الصحف الصفراء تصعد وتحقق نجاحها على اكتاف اعلام المجتمع والفاسد الصدك محد يكدر يهوب صوبة
اخذت العنوان ورحت اغير ملابسي
فيصل،،،الظهر اتصلوا بية وكالولي دير للقناة الفلانية وشوف من شفت فار دمي وشمرت الريمونت على الجهاز اتصل بية المحامي مالتي وكلي تكدر ترفع قضية على القناة طعن وتشهير وقذف خاصة من بعد ماثبتت براءتك
فيصل،،،انت وين اعرفلي عنوان القناة اني جايك
غيرت ملابسي وطلعت شفت ابن عمي وصديقي جانوا فايرين على الي صار وكالوا احنة وياك للموت وماراح نعوفك ركبوا وياي ورحنة ماوصلنا الى العصر ومريت للمحامي ورحنا للقناة الولد جانوا حامين ومن طبينة بلشوا يصرخون ويسبون لزموهم الامن وطلعوهم طلبت اتكلم مع صاحب القناة ودخلوني الة جان خايف ومرتبك هلة ومرحب بينة كال هذا الفيديوا تلفنا وراح يتحاسب هذا الصحفي وهو بعدة مبتدأ ويدور شهرة فيصل فار دمي وصرخت تشتهرون على حساب سمعت الناس انتو شنو لا ذمة ولا ضمير
المحامي طول بالك شيخ اني اعرف شلون اخذلك حقك
صاحب القناة بلش يبلع بريكة وطلب عصير وكال متطلعون منا الا وانتو راضين وراح نقدم اعتذار رسمي من القناة ونكررة بأكثر من وقت
فيصل،،،جنت نار والمحامي كل شوي يطبطب على كتفي ويطلب مني مااعصب
بعدين اتصلوا بصاحب القناة وكالولة الصحفية عبير الكناني جاية تريد تقابلك بسبب الي انعرض كال طببوها احنة دنتكلم بنفس الموضوع سد التلفون واندك الباب ماخطرلي انه عبير ممكن تجي دخلت عبير ووكفت على حيلي وهية هم انصدمت من شافتني جانت لابسة بنطلون حصر وقميص شيفون وايدها امبينة منة صعد الدم الى راسي وكمت اخزرها
عبير،،،من طبيت انصدمت بوجود فيصل هناك فرحت بداخلي لان شفتة بس جان متغير ضعفان ومخلي لحية جان يخزر بية بعدين جرني من ايدي وكال اترخص ياجماعة شوي طلعني برة بالكندور وهمس وهو يكز بسنونة ولج شدتسوين هنا ؟؟ وشنو هاللبس هذا بالله عليج ؟؟
عبير،،،همست واني خايفة منة فيصل شفت الخبر عنك اليوم بهاي القناة والمعد الي مفبرك الفيديو اعرفة وجنت،،،،
فيصل،،،قاطعتها عبير اغمض افتح ماالكاج هنا وحسابي وياج بعدين يلا وغمض
عبير،،،خفت كلش وفعلا طلعت واني مصدومة لا مستحيل هذا مو فيصل معقولة شبي اخذت تكسي ورجعت للبيت
فيصل،،،انحرجت وطلعت من القناة وكفت كدام السيارة واباوع على الشارع يمنا ويسرة اتأكدت راحت كلت لازم اجيبها يمي واعرف عبير راح تعبني بس هي زوجتي عجبني او ماعجبني ومحسوبة علية خابرت على عمها وكتلة اريد اخذ زوجتي كلي اي حقك كتلة انطيني عنوانهم كلي راح انتظرك يمهم
رحت ووصلت ظليت كاعد بالسيارة ومتردد بعدين طفيتها ودكيت الباب وطلعلي عمها
عبير،،،من كال عمي حضري نفسج زوجج راح ياخذج خفت كلش وماما كامت تبجي
فيصل،،،دخلت انتظر ودخلت امها جانت لابسة تراكسود وايدها طالعة مكدرت حتى ارفع عيني عليها سلمت واني مدنك
ام عبير وصيتة بعبير وجان ميباوعلي صح جان حليوة ومرتب بس يظل عربي عبير طلعت وسلمت بصوت ناصي وكعدت وكف فيصل وكال لازم
نطلع هسة شوي طريقنا بعيد وهمس بدون ميباوعلي يلا عبير كتلة خلي اجيب اغراضي كلي لااا اتركي كلشي اني اجيبلج اي شي تحتاجي
عبير،،،بس ،،،،
قاطعني وكلي لتركي كلشي بس جيبي اشيائج الضرورية
طلعنة وماحجة شي فيصل وجنت اباوعلة مركز على الطريق بعدين وكف على محل رداءات وكلي نزلي وفتح الباب نزلت مستغربة
طبينة وكلي من اليوم هذا لبسج وجسمج بعد متبرزي ولا يظهر منج شي فهمتي
عبير،،،جان يحجي وعيونة تجدح نار ابتسمت حسيت ديغار فيصل كلت ماشي
فيصل ،،،بصراحة استغربت لان وافقت بسرعة بدون متناقشني جنت متصورها حتعبني
اختاريت عبايات وكلي لفي حجابها ولحكيني لسيارة
عبير لبستها واني اضحك على شكلي وعبالك صرت مثل اهل القرى من طلعت من المحل احس العالم كلها تباوعلي وكل شوي اعثر بيها ركبت بالسيارة وفيصل حابس الضحكة
فيصل،،،جانت طالعة تخبل وج لو شماالبسج تجذبين وطيرين العقل بس خطية جانت كل خطوتين تعثر
وللقصة بقية ،،،،،،
