فرات ،،،مااهتموا لزهور راحوا ركض لفيصل وشالوه للمستشفى واخوها الصغير جرها من حجابها وسحلها وطلعها صرخت بعد مانريد نشوفج ابد وانتي موتي بالنسبة النا واذا صار شي على الشيخ اقسم بالله اخنكج بأيدي يلي ماعندج مخافة الله وابجي
عبير ،،،اتصلت بية فرات مثل المجنونة تحجي وتبجي وتهمس راح يروح من ايدنا الشيخ دخيلج عبير صار يمكم بالمستشفى لاتتركي زهور راح تموت الشيخ
عبير،،،كلبي وجعني عليه بالبداية كلت مااروح بعدين مالكت نفسي الا غيرت ملابسي مثل المجنونة ورحت للمستشفى ودموعي نزلت شلال على وجهي
زهور،،،،وصلني اخوية سحل للبيت وجان يضرب بية مثل المجنون لكت اهلي متخبلين ويخمشون بوجوهم طلع ابوية مجلوط بالمستشفى من شاف حالة فيصل والي صار بي من تحت راسي
صار دمي بطولي من كل مكان كلي اخوي كولي بنت الحرام ام السحورة منو الي جان يعلمج على هالدرب
زهور،،،جنت مكدر احجي همست ام وزان
اخذ سلاحة وطلع يركض وامي تخمش وتضرب بية وخواتي يبجون داير ميدوري
راح اخوي عليهم ومتعارك معاهم وضارب ابنهم وزان طلقة وميت واخذوه لأخوية الشرطة وانهزمت أم وزان بعد ماالها اثر
عبير ،،،وصلت للمستشفى اني وامي وامشي مثل المخبلة عيوني دور اهل فيصل بكل مكان شفت ولد عمة اثنين وابن خالتة واكفين والي كاعد ومجتفين وعلى اعصابهم رحتلهم ابجي وهمست شلون فيصل طمنوني وابجي
واحد يباوع لثاني وكالوا بعدة بالعناية المشددة وماطلعوا الدكاترة
عبير ظليت كاعدة وابجي وامي حاضنتني وكلبي مثل النار ورة ساعة طلع الدكتور وكال صاير عندة تسمم والسم متشبع بجسمة سونالة غسيل معدة ودرنالة دم وحاليا غائب عن الوعي و24 ساعة الجاية يظل تحت المراقبة والي علينا سويناه والاعمار بيد الله
عبير،،،صرخت ودموعي تنزل والعبرة خنكتني لا عفية الله يخليكم لدكولولي ممكن اخسرة مكدر اعيش باوعت لأمي مكدر يمة اعيش دونة لحظة والله اذا صار بي شي اموت يمة من تلاكينة اني وياه ماشفنة راحة ليش هيج الدنيا ويانة
حضنتني امي وجانوا ولد عمة يبجوون بحركة ظلينة ننتظر ومانشفت دموعنا جنت اتمنى بس اشوفة لو لحظة حتى لو من بعيد ومجانوا يوافقون
كلمات اغنيه انطيني وعد للموت علي الحميد
انطيني وعد للموت
روح بروحك تشدني
كلي راح اضل وياك
بس الموت يبعدني
واحلفلي بشرف الجروح
ما تنساني اوعدني
لو بجوني كول الناس
اريدك انتا تسعدني
واذا يمك طلبت ارتاح
كلي ابشر ولتردني
واذا يتبرى مني الكون
اريددك تبقى ساندني
سكف واني انستر جواه
خاف الناس تطردني
كون انتا اماني تصير
اذا حزني يهددني
ليغرك بشر وتروح
وبنص البجي تهدني
لو من هسا الله وياك
لو للموت رايدني
زهور ،،،حبست نفسي بالغرفة لان من بعد ماانجلط ابوية وانسجن اخوية من تحت راسي اهلي انكلب بيتهم كلب وجانو كل ميشوفوني يتفلون بوجهي من سمعت بالشيخ تسمم من تحت راسي اتخبلت وظليت الوم بنفسي واعض اصابيعي ندم
كنت اريد احصل عليه بأي طريقة حتى وان كان بالحرام تالي جنت اموت بي واني مااعرف والمصيبة اقتل بي وبفلوسة هم
كمت مكدر انام من كد الكوابيس الي تجيني اكعد اصرخ نوب اشوف عبير تخنك بية ونوب اشوف ام وزان تعذب بفيصل ونوب اشوف فيصل ميت ويكولي ابني يتمتي قبل ليجي للدنيا واكعد مثل المخبلة وتأنيب الضمير دمرني وعذب حالي
وبعد مكدر اصلي واحس نفسي مربطة اثناء الصلاة ومن اوكف على السجادة انسى كلشي لا ذكر ولا دعاء ولا حتى الايات عبالك رب العالمين طردني من رحمتة وبعد حتى توبة ميقبل مني
كمت اكعد بالزاوية وبس ابجي واشوف واتخيل اشياء مو حلوة وعبالك ضرب عقلي
الحجية ،،،جنة كل شوي نتصل بيهم لأول مرة بحياتي اتحسر واتمنى رجلي تشيلني واكدر اوصلك وليدي فيصل واحضنك كون بية ولا بيك
دائما جنت اباوع لفيصل واحسة ابن آخرة اظل الليل كلة اصلي وادعي كون ربي يفرح كلبي ويسلمة من كل شر وابجي ندم انه فرضت عليه زهور فرض وهي الي وصلتة للي هو بي
وغمضت عيني دقائق واني على سجادتي شفت الشيخ ابو فيصل يهمسلي انه مكدرت احافظ على فيصل ولا كدرت اخلي ينسعد جان لابس كلة ابيض وكلي راح اكعدة اخذة وياي جنت اتوسلة يتركة عزوة وذخر الي ولخيتة
وجان يحاول يفيق بفيصل حتى ياخذة ويا فزيت اصرخ وابجي
فرات ،،،اسم الله عليج يمة كابوس هذا صلي على النبي وابجي واكول بكلبي اوف يمة شلون اصبر بيج قلب والدة وابنج بين الحياة والموت جانت صورتة وهو يتألم ويكلي فرات معدتي تكطعني متروح من بالي جنت اول مرة اشوف فيصل ضعيف ويتألم ومكسور سودة علية خوية كون يومي قبل يومك
