الموءودة

الــبــارت " ⁴ الــرابـــع ⁴ "

امل : القرب الـ بيني و بينه  خلخل توازني ..

هو وخر  ع السريع مشيت و طبيت للممر مالتنا و كعدت
حتى مفرغت محفظتي من اقلام ..شديصير بية ربي ..؟؟

حيل ارتبكت و حيلي يرجف
  شديصير بية فدواتك ربي ..
لا اسمع و لا اشوف صارت مثل صوت صفارة براسي  كمت اقرا المعوذات و اتنفس بعمق حتى ارتاح ..

مروة : امول طلعي اقلامج و ودي محفظتج هناك اشوو كااعده ..؟

امل : اي نسيت ..

مروة : حقج دايخة هلكد متقرين ..

امل : طلعت اقلامي ع السريع و وديت المحفظة و رجعت كعدت .. كمت ماكدر اخذ راحتي بالحركه لان هوو موجود ..

مرت ساعه و نص و تركيزي كله بالحل .. كمت اراجع و لان اخر يوم ما صار عندي ملل من المراجعه ..

اكو شي بداخلي يريد يشوف الولد احساس اتعطش له ...!! غريب

لاا  لاا ما ارفع راسي
مكدرت الا رفعت راسي شفته هوو همين ملتفت صفح و يباوع علية بقيت اباوع عليه بس احس كولشي بية مسلوب اسمع انفاسي و دكات گلبي نزلت عيوني عنه رغم عنها عيوني مرادت تشيح عن عيونه نظرها .. لازم ارجع لعقلي شبيةةة

كمت انطيت الدفتر و طلعت بدون مافكر بشي .. اصلاا عقلي فرغ من كل فكره ..

مروة : ولججج جان بقيتي لليل

امل : هاا ..

مروة : اخر يوم يا ظالمة النفس لزكتي جوااا .. بسلااا زيدون راااح 

امل : هوو اخر يوم شكو طالعة تركضين

مروة : ولج اريد اشوووفه اخر يوم

امل : امشي يمكن ينتظرج بالطريق مثل كل يوم

مروة : اي صحيح امشي امشي هسة تعبن رجليه

امل : طلعنا و مثل متوقعت جان واكف بالشارع ينتظرها و طبعا وصلنا لبيتهم يمشي ع مسافه ..

بوستها و تحاضنا اني وياها لان اخر يوم شبعنا قهر

مروة : اموولتي راح اشتاقلج مكروها

امل : اني همين

توادعنا و شكد محلو الوداع  مشيت الطريق كله وجه الولد ابالي  عيونه الكبار حواجبه اشكد ثخينات
مادري ليش شفته يختلف
بس هوو شفته ولد .. مجنت اشوف احد .. وصلت للبيت و مادري بروحي من التفكير ..

و مرت ايام و اسابيع و شغل بالي منوو هوو؟؟  لا اعرف اسمه لا منين ..؟

يمكن مو من مدرسه الولد الدوام الثاني ..!
اي اكيد لان مجنت اشوفه بالطريق ماعتقد من المنطقه اليمنة  اصلا مشايفته قبل ..

رند : امولة تعالي ساعديني بالفراش

امل : اي جاية ..

رند : احب الصيف لان ننام بالسطح و اتخبل من كعده الصبح و الذبان ملتم عليج ولج لو اغسل بنفط
الصبح لازم يهجم الذبان علية و اني نايمة