لاأعرف لماذا احبها...?

البارت الثاني عشر

البارت الثاني عشر
#لاأعرف_لماذا_أحبها..?
#بقلمي_شمس

اخذتني النومه واني عندي دوام .. گعدت ع دگت باب الغرفه ..
فتحتها .. رحيق .. معتز يالة حنتأخر .. لگيتها مبدله وكمله ..
معتز .. لعد ليش مگعدتيني اول مگعدتي هسا دقايق بس اسبح وانزل ..
اتباوعت للسرير لگيت زحل ماكو .. معقوله تگعد من الصبح مو عوايدها ..
اتذكرت ليلة البارحه ابتسمت ..
بسرعه سبحت وبدلت نشفت شعري بالشسوار ورتبته ونزلت واني البس بساعتي .. #بقلمي_شمس

لگيت امي بالمطبخ تسوي بالريوك والبنات منتضراتني ..
گالت تعال يمه اتريك .. بوست راسها وگلتلها لايوم اتأخرت اكل بالمدرسه وابتسم ..

ام معتز .. وجهك اليوم يضحك ..
معتز .. واني مبتسم .. لعد زحل وين اشو گاعده من وقت ..
ام معتز .. لايمه مانزلت بعدهي نايمه ..
معتز .. اتخربطت احوالي .. يمه اني هسا نزلت من الغرفه ماكو احد بالغرفه نازله .. خاف بغرفه البنات ..

رحيق.. لا ماكو هسا اني كنت بالغرفه ..
طلعت مثل المخبل اتباوع بالحديقه . 
معقوله طلعت من الصبح تتمشى .. طلعت فريت المزرعه كلها ماكو ..
دور اركض بالبساتين والناس تباوعلي ..
رجعت للبيت واني دايخ وين راحت ..
صعدت للغرفه .. السرير فارغ وجوه السرير ماكو الحمام هم ماكو ..
عبالك ابره وضاعت ادور بكل مكان ..

اخر شي فتحت الكنتور .. اتباوع جنطتهه ماكو وملابسها كولها ماكو ماعدا الي اشتريتهن الها اني ..

گعدت ع حيلي بالگاع مصدوم ..
لا مستحيل تسويها .. مستحيل تتركني وتروح البارحه عيشتني احلى ليله .. #بقلمي_شمس
صحيح هي صارلها فتره تحجي بالرجوع التركيا ..

بس بعد الي صار البارحه .. شلون تتركني وتروح ..
ليش تنطيني امل وتتركني ..

لاااااااااااا ياربي لاتختبرني هيج .. نسيت نفسي واعيط وصوتي وصل الاخر المزرعه ..

مخلي ملابسها البقن بحظني ومنصي راسي واحجي وي روحي ..
اجه ابويه وامي واخواتي كلهن التموا بالغرفه ..

ابو معتز .. بويه معتز شصاير گول ..
اتباوعتله بحسره .. راحت تركتني وراحت يابه ..

ابو معتز .. منو زحل ووين راحت .
امي تدگ وتلطم واتباوع بعيون مرت ابوي الشماته ..

گلتلهم اطلعوا مااريد احد يمي ..
ابو معتز .. اطلعن ومااريد واحد يدري ..
رحيق . اتأخرنا ع المدرسه .. #بقلمي_شمس

ابو معتز .. لاتخليني انزل ابو المدرسه روحن اليوم ماكو دوام يله ولن ..

معتز .. ابويه يحجي وياي واني بعالم ثاني .. والسؤال الي ببالي .. ليش ?? وشلون ..

ابو معتز .. گوم وليدي لاتضعف .. مو احنه الي نضعف عمود مره ..
هسا اجمع عمامك ونشوف وين راحت .. هي ماتندل وحدها لازم اكو احد ساعدها ..

معتز .. صدوگ هي متعرف تروح وحدها .. لازم اكو احد ساعدها بس منو .. منو الي تجرأ واخذ مرتي مني ..

تباوعت لمستمسكاتها .. ماخذه الجواز والجنسيه التركيه ومبقيه الجنسيه العراقيه ..
اكيد هسا بعدها مطالعه .. اتباوعت للساعه تسعه الا ربع ..
اخذت مفاتيح السياره والموبايل وطرت للمطار ..
صاحوا ورايه ابويه والحراس ماكو ..

الطريق صار شطوله .. وصلت للمطار بالقوه خلوني ادخل ..
سألت الاستعلامات واتباوع بالوجوه .. وكلي امل الگيها ..
تالي گالت موضفه الاستعلامات . طيارة تركيا طلعت بالتسعه…
اتباوعت للساعه بالتسعه ونص ..
اوووف فرق نص ساعه وملحگت طبعا اذا الطريق شطوله من المزرعه للمطار ..

رجعت وكولي خيبة امل والطريق كوله افكر .. اني للفجر منمت اتباوعلها شبسرعه گعدت وحظرت جنطتها وطلعت من الصبح ..
اكيد محظرتها من قبل ومجهزه امورها ..
وكانت تضحك عليه ..
اذا ناويه تروح ومقرره لعد ليش خلتني اعيش ليله من العمر ..
رجعت بكل سرعتي والجو مغيم لان بدايه شتا ..

ليش هيج زحل .. لج حبيت الشتا عمودج لان المطر وصوت الرعد همه الي جمعونه ..

وصلت البيت .. صعدت گبل الغرفتي .. كسرت كولشي وگعدت ابجي مثل الطفل ..
اني معتز الي الناس كولها تسولف بكبريائي وشخصيتي
تالي زحل تكسرني وتكسر گلبي هيج ..

كسرت كلشي يذكرني بيها .. اندگت الباب .  امي ..
معتز .. يمه اطلعي مااريد احد يشوفني بهيج حاله .

ام معتز .. يمه سمي بالرحمن . ابوك وعمامك منتضريك بالمضيف ودزوا عليك ..
روح شوفهم .. الخبر طش بسرعه ومن الصبح التلفونات ماسكتت ..
معتز .. ومنو الي طشه ..
ام معتز .. گوم يمه عساس ماتعرفها لو ماعيب كان شغلت اغاني من الصبح .. #بقلمي_شمس

معتز غسلت وجهي ونزلت .. شفت ام فرح گدام ..

ها. يامعتز عافتك التركيه .. هي هاي الگلبت البيت عمودها ..
عافتك وانهزمت والله اليعلم وي منو راحت .

معتز .. من گالت هيج الدم صعد الراسي .. ورفعت ايدي بعد مااشوف بعيني .. ودي اكتلها ..
مهما يكون زحل مرتي وعرضي ومااسمحلها تجيبها بالعاطل ..
ردت اضربها عاطت امي .. معتتتتتز ..
وعيت ع روحي وضربت الحايط بوكس .. وگلتلها اتقي شري لان انسى انتي مره كبيره وماتدرين شسوي ..

اني مو معتز الي تغلطين عليه ويسكت .. دور اذا ادخل للبيت انتي ودنيا مااريدجن گبالي لان انتن السبب بكل شي صار ..

گامت تعيط وتملخ بروحها .. معتز يريد يموتنا يمد ايده عليه اليوم الا اوصلها للشيخ ..
اذا بيك حظ روح ضب مرتك واكتلها .. مو تركتك وانهزمت هاي لو بناتي مسوياتها كان موتتهن ..

تركتها وطلعت لان اذا ابقى ابتلي بيها .. مو مره بلوه ماتحترم شيباتها وتگعد ..

رحت للمضيف لگيت عمامي كولهم وولد عمي .. استحيت ع روحي شأكلهم مرتي انهزمت ..
#بقلمي_شمس
يتبع… .