لاأعرف لماذا احبها...?

البارت الثالث عشر

البارت الثالث عشر
#لاأعرف_لماذا_أحبها..?
#بقلمي_شمس

كنت أظن أن الكون واسع!! لكنني اكتشفت أنه أضيق مما تخيلت ..!
لم يتسع لفرحي عندما كنت معي ولم يتسع لحزني عندما غادرتي !!

سلمت على عمامي وگعدت منصي راسي ..
عمي حيدر .. بويه اكو واحد مرته نايمه يمه ومايدري شلون طلعت ووين راحت ..

معتز .. عمي اني متأكد رجعت التركيا .. لان طلبت مني ورفضت ..
عمي مصطفى .. وليش ترجع اكو شي صار بيناتكم ..
خاف عندها واحد هناك ..

معتز 😡 عمي شنو هذا الحجي مهما يكون مرتي ومااقبل واحد يحجي عليها هيج ..
وثاني شي هي بنت عمي وعرضي اكو واحد يحجي ع عرضه ..

عمي حيدر .. شغله ماتدخل للعقل .. مره نگعد الصبح مانلگالها اثر ..
طبعا افكارنا تروح وتودي .. وانت تگول ماتنگدر تروح وحدها كلشي ماتندل .. وين راحت ..

معتز .. هو هذا الي محيرني .. هي بره المزرعه ماتطلع شلون گدرت تجيب تأشيره وتحظر كل هذا وتطلع التركيا ..
وهي الباب البيت متطلع ..
لازم اكو احد ساعدها ومن عدنا ..

ابو معتز .. منو منا يساعدها .. بويه هاي الا عندها معارف من تركيا اتصلت بيهم وگضولها السالفه ..

عمي حيدر .. وانتو ليش مصرين راحت التركيا جايز بعدها هنا ..

معتز .. عمي اشو من گعدتوا تلمحون .. زحل عشت وياهه كم شهر بس اعرفها اكثر ممااعرفكم ..
ماعندها سوالف .. انتو ماخذين عليها نظره عايشه بتركيا ومتحرره ..
بس صدگوا اخلاقها احسن من بناتنا المحجبات والمحبوسات بالبيت ..
من تطلع وياي عينها متشيلها وتباوع الواحد ..

اعترضوا عمامي ع كلامي وگالوا شنو قصدك بناتنا مو زينات ولافوا الموضوع غير جهة ..

معتز .. يابه انت جايب عمامي يحلون مشكلتي لو يذمون بعرضي ..

عمي مصطفى .. ابني عرضك هو عرضنا شلون نذم بي ..
بس انت انطينا حل واحنا وياك ..

معتز .. عمي راح اثبتلكم زحل مو مثل ممتوقعين .  وهذا مو دفاع .. بالعكس اني اكثر واحد شايل عليها لان تركتني وخلتني بهيج موقف ..
بس لاتنسون انتو الي جبرتوها عليه وجبرتوني عليها وخليتوني احبها واتعلق بيها .. #بقلمي_شمس

ابو معتز .. احجي وليدي شناوي تسوي .  كلنا وياك

معتز .. اني راح ارتب دوامي واخذ اجازه بدون راتب واطلع التركيا ..
ولو اعرف ادورها بيت بيت .. الگاهه واعرف ليش تركتني ..
ومنو الي ساعدها حتى ارتاح وترتاحون ..
وماارجع الا وهي بيدي ..

عمي حيدر .. ههههههه مو اخاف هي تاخذك وماترجع مثل عمك علي ..

معتز .. اني معتز عمي لاتتوهم ..
خليته يسكت لان صدگ داس ببطني .. عبالك يتشمت بيه .. لان ابوي خطبلي بنته واني رفضت وتزوجت البنيه وعندها جهال وهو شايل عليه ..
عبالك الزواج جبر .. وهو نفسه الي جبرني ع زحل وهسا جاي يحجي عليها ويتشمت ..

اففففف يازحل .. خليتي اليسوة والمايسوة.
يتشمت بيه ..

عفت عمامي ودخلت للبيت تلگتني امي .. هايمه شسويتوا ..
معتز .. يمه مو وكتها اريد ارتاح ..
صعدت الغرفتي تعبان واني اتذكر كل لحظه عشناهه ..
اتباوعت الجهاز الرياضه ..
مثل هيج وكت هي دا تلعب رياضه .. وجسمها عرگان والخاولي ع كتفها ولابسه شورت وفانيلا ..
گمت اتخيل شكلها واتلمس بالحهاز ..

اريد اي شي من ريحتها گمت ادور الغرفه كولها .. شفت يم السرير التشيرت مال التراك كانت لابسته بالليل ومن نمنا نزعته .. وبقى بالگاع ..

اخذته واشم بي عطرها يخبل .. اتباوعت ع الميز ماخذها عطرها ..
هيج ياظالمه حتى العطر .. استرخصتي عليه .  خاف اتذكرج بي ..

نمت ع السرير واشم بمخدتها واتلمس مكانهه واخذت التشيرت حضنته ..
زحل شسويتي بيه .. موتيني ..

اخذتلي غفه شويه .. اجتني رساله صوتيه ..
رف گلبي عليها ..
شفتها من زحل طفرت .. اتذكرت بعدين هي متعرف تكتب عربي بس تحجي ..
لهذا دزتلي رساله صوتيه ..

فتحتها .. واسمع صوتها ردتلي روحي ..
غمضت واسمع صوتها ..  #بقلمي_شمس

مرهبا معتز .. اشتاقيتلك .. اني اسفه لان تركتك من غير اذنك .. لكن صدگني بعد مااتحمل اعيش هناك اكثر ..
وانت اعرف متترك اهلك وتجي تعيش بتركيا ..
ومردت احرمك من اهلك .. سافرت من غير مااگولك لان اعرف متقبل ..
وصارت عليه ضغوطات هوايه لدرجه بعد مااتحمل اعيش وياكم .. اني ممتعوده اعيش بهيج طريقه ..
راح اروح البيت اهلي واخلي جدتي ام ماما تعيش وياي ..
واكمل دراستي واشتغل ..
لاتقلق عليه وراح ابقى اتذكرك وماانساك وخاصه من اگول اولماز .. باي جانم ( روحي).. زحل

رجعت اتصلت بسرعه لگيته مغلق ..

بقيت كل ساعه اعيد التسجيل واسمعه .. حفظت كل كلمه تگولها ..
معقوله هيج بسهوله تراضيني بكلمات .. ماارتاح اذا مااصير مقابيلج واعرف ليش سويتي هيج ..

صوتها وكلماتها متفارقني كل كم دقيقه اشغله ..
نزلت سمعته الابويه ..
گال .. وهسا شنو ناوي .. گوتله اروح التركيا ..
ابو معتز .. بويه شلون تروح ووين تندل بيتهم ..
واللغه صعبه شلون راح تتحاور وياهم ..

معتز .. لتخاف يابه العنوان اني اعرفه مره گالته هي الي ووصفت منطقتهم وبيتهم .. وعمي حيدر هم يعرفه

وعندي ولد صديقي يعرف لغات ويشتغل مترجم . 
دايما يستأجروه الناس من تروح للهند او الايران بخصوص. العلاج .. حتى الامريكا ماخذيه ..

راح اتصل بي واشوفه اذا يعرف تركي .. وباجر ان شاء الله من الصبح طالع .. اسوي جوازي واحجز التركيا ..

ابو معتز .. توكل ابني .. واي شي تريده اني حاظر .. بس لاتنسى اسطنبول كبيره وتضيع بيها ..
ظبط امورك يله تسافر وفكر زين ولاتتهور ..

#بقلمي_شمس
يتبع… .