#مذكرات_مراهقة
للكاتبة ميار الشمري
الجزء الثامن
نور،،،بمرور الايام حسيت اني ارتبطت بشخص ثاني مو صلاح ابن عمي الي حبيتة وحبيت لهفتة وغزلة ورومانسيتة جان كل ميهرب مني ويبتعد تعلقي بي يزيد وحبي الة واشتاقي يكبر كنت اتعذب بداخلي وكل مجنت استفسر عن اهمالة يكولي ماكو شي مشغول او تعبان او ميكدر يحجي اثناء الدوام
تعبت ومجنت اشكي او احجي لأي احد ضعفت كلش وكام يطلعلي حب بصدري وبظهري وبكتفي اذاني يمكن كثرة التفكير وتأثير نفسيتي جان صلاح ميتصل ولا يسأل لو ابقى اسبوع الا اني اتصل بي واغلب كلامنا رسميات
ماما شافت جسمي شصاير بي وتخبلت وج نورة ليش هيج ماما ليش محجيتي حتى نوديج لدكتور جلدية
نور،،،مااريد اطلع لأي مكان ولا اريد اراجع دكاترة
ام نور،،،اقلها شوفي لخطيبج مو دكتور !!
نور،،،دنكت مااعرف شنو ارد هو صلاح يدري عني او حتى يسأل
ثاني يوم اصر ابوية وامي ياخذوني للمستشفى لصلاح
ابوية،،،صلاح افضل اقلها اذا ماكدر يعالجها يدلينا على دكتور زين هو اعرف من عدنا
نور،،،مجنت حابة اروح ورحت على اعصابي نزلنا بابا لباب المستشفى وكال انزلوا قبلي اني اصف السيارة واجيكم
صلاح،،،جنة كاعدين بوحدة من الغرف كلنا دكتورات ودكاترة دفعتنا وشقة وسوالف وضحك شفت خالتي ونور انصدمت ورحتلهم مستغرب سلمت عليهم واخذتهم لغرفتي جانت نور لابسة تنورة سودة وقميص ابيض وسترة سودة وشال ماروني جانت صح ضعفانة ومتغير شكلها رحبت بيهم وكعدتهم بغرفتي وجنت مستغرب جيتهم
صلاح،،،شلونكم خالة اخباركم خوماكو شي
ام نور،،،الحمدلله بعد خالتك ماكو الا العافية بس جبنا نويرة بلكي دلينة على دكتور جلدية هنا او طمنا انت اذا مابيها شي
صلاح،،،ليش اسم الله شبيها نور وباوعتلها بأستغراب
ام نور،،،شو احسها ماالها خلك هالايام واكل متاكل شعرها ديتساقط هالفترة وديطلعلها حب هواية بصدرها وظهرها وكتوفها
صلاح،،،اباوع لنور واسمع كلام خالتي مستغرب كلت لا هاي ان شاء الله خفيفة
لبست نظارتي الطبية وكلت منو جابكم صدك؟؟
ام نور ،،،والله عمك جابنا بس شو تأخر خلي اشوفة وين صار هسة ارجع
نور،،،طلعت امي وخلتني مع صلاح تقرب بالكرسي المتحرك وصار كدامي
صلاح،،،تقربت منها شكد مشتاقلها ياربي همست شبيج نور من شنو دتشكين ؟؟
نور،،،درت وجهي وهمست تعبانة صلاح كل الي ديصير بية بسببك
صلاح،،،ليش نور بسببي وشنو الي متعبج بشنو دتفكرين ؟؟؟
نور،،،صلاح شنو الي مغيرك علية وبشنو اني مزعلتك حتى تجافيني وتعاملني هالمعاملة معقولة جنت تمثل علية ومتحبني
صلاح،،،وج اني مااحبج ؟؟ حب الدنيا كلها بقلبي الج مايحبج مخلوق كد نص حبي الج ليش هيج تفكرين
نور انتي لازم تفهمين هاي حياة الدكتور وانتي لازم تقدرين وتتفهمين هالشي وقتنا مو النا وحياتنا صعبة تختلف عن غيرنا واذا ميعجبج وضعي .....
نور،،،اجتي امي وسكتنا
ام نور،،،ابو علي راح يفول السيارة بانزين شوي وراجع
صلاح ،،،هاا على خير ان شاء الله باوعت لنور يلا خلي اشوف مكان الحب نور
نور،،،باوعت لأمي ولصلاح وكلت حب عادي يعني
ام نور،،،عادي يوم دخلي يشوفة بعد زوجج هو ودكتور وهاي شغلتة
صلاح،،،فتحت نور اول دكمتين من القميص كتلها يكفي بس من فوك باوعت جان صدرها عبارة عن قطعة ثلج ولابسة حمالات بيضة كوة بلعت ريكي وارتبكت وهمست نفس الشي بظهرج وبكتفج؟؟
نور،،،هزيت براسي واني دأسد بالازرار
صلاح ،،،وكفت كتلهم شغلتة بسيطة ميخوف راح اروح استفسر واتأكد من العلاج عند دكتور الجلدية الاختصاص بالاستشارية وراجع
ام نور،،،يعني محاجة يكشف عليها الدكتور
صلاح ،،،لا ابد محاجة استريحي خالة ثواني وراجع واكول بكلبي شيكشف عليها اني جان راح يغمى عليه حتى انجلط اذا غيري يشوف هالمنظر
طلعت وشفت عمي وسلمت عليه وكتلة استريح ثواني بالغرفة وراجع
رحت اتأكدت من العلاج وجبتة وجبتلهم عصير ورجعت فهمتها على طريقة استعمالة من جانت كاعدة نور اجوي دكتورات زميلاتي وعرفتهم على نور واهلها وكتلهم خطيبتي
وحدة من الدكتورات ،،،عاش ذوقك دكتور ماشاء الله عليها زين ماحجيتلنا زميلة هي لو شنو اختصاصها
صلاح،،،لا الحمدلله بعيدة كل البعد عنا طالبة معهد معلمات
الدكتورات ،،،وحدة تباوع لثانية ها اي اتشرفنا يلا نترخص
طلعن الدكتورات يتبسبسن وطبوا للغرفة
الدكتورات ،،،،من دخلوا متصدكون هاي البنية الي اجتي قبل شوي هية وامها تكون خطيبة دكتور صلاح والله انصدمنا
دكتور حسن صديق صلاح المقرب،،،وليش تنصدمن جمال واخلاق وحسب ونسب وبنت عمة شنو يريد قابل الرجال اذا يتزوج احسن من هيج مواصفات
وحدة منهم ،،،يمعود اي جمال عادية كلش وصغيرة لا والنوب معهد معلمات ياحظي
احمد،،،اويلي منجن مترضن على احد سكتوا اشش عبروا من كدامنا باوعنالهم وصلاح ديمشي وياهم
احمد،،،،صرخت بيهن عمي دروحن الي يكول عنوز والله صاكة خطيبتة متخلي عقل
حسن،،،عيب احمد حتصير زوجة صديقنا واخونا ميصير هيج تحجي عنها
صلاح،،،ودعتهم وراحوا تأثرت بوضع نور وبقيت افكر بيها
وحرت مابين قلبي الي يحبها ومتعلق بيها وعقلي الي مدايستوعب فكرة ارتباطي بوحدة عدها علاقة قبلي ومااعرف مجرد التفكير انه ممكن يكون لمس شعرة منها هذا بحد ذاتة شي قاتل
نور،،،رجعت للبيت واني حايرة بتصرفات صلاح الغريبة يعني يحبني زين ليش هيج ديتصرف وهو مو هيج طبعة
انتظرت الليل كلة يتصل بية حتى يطمن علية ويسأل عني حضنت جهازي وبجيت الى ان نمت ومااتصل
صلاح ،،،،جنت اتابع فلم بالتلفزيون وكل مااخذ الجهاز حتى اتصل بيها احس فد شي بداخلي يمنعني وارجع اشمرة
بيومها اجتي كعدت يمي امي وظلينة نسولف وكالت شنو رأئيك تزوج بالعيد الجاي
صلاح،،،جلست كعدتي قصدج بعد اسبوعين؟؟
ام صلاح،،،اي وضحكت مو جنت مستعجل كلش
صلاح،،،مااختلفنا بس شنلحك بهل اسبوعين!!!
ام صلاح ،،،نلحك اترك كلشي علية بس باجر راح نفرغ غرفتك دنصبغها
صلاح،،،تنهدت وكلت الله كريم
ام صلاح،،،صلوحي يوم شو مدتروح تشوف خطيبتك
صلاح ،،،باوعتلها وكلت بقلبي ياربي كل مااحاول اتناساها كلشي حوالية يذكرني بيها كلت يوم انتي اكثر وحدة تعرفين شكد مشغول ماعندي وقت
ام صلاح،،،،علية صلاح !!! يعني بمكان متطلع تتعلل مرات مع اصدقائك فد يوم روح اتعلل بيت عمك او بيوم الاوف مالتك اروح اتغدة يمهم واخذلها فد هدية عيب يوم شيكولون اهلها علينة
صلاح،،،الله كريم
ام صلاح،،،انت عكس الدنيا قبل الخطوبة سكنتهم واحترت شنو تجيبلها موبايل وملابس من ارقى كماليات بالمنصور ومن تخطب تكطعها فد نوب
صلاح ،،،،لحظة لحظة يوم شعرفج بالجهاز والملابس الي جبتها لنور 😒
ام صلاح،،،بالصدفة شفت الفواتير بجيوبك من دأريد اغسل ملابسك هههههه
صلاح ،،،ايباخ والله اشك بيج يوم الج عرك بأستخبارات الامن الداخلي 🤔
نور ،،،،ثاني يوم خابرني صلاح الصبح وكلي راح يجي على الغدة اذا طلع من الدوام من وكت وسألني شلون صرت ودأستخدم العلاج او لا حجينا شوي ومن قفلتة شوي ارتاحيت
كمت احضر نفسي بس جنت كل مااطلع فد شي دألبسة ارجعة واكول هسة ميعجبة اذا قصير او قلع
ظليت محتارة الى ان لبست تراكسود وبقيت بي
اجة تغدة يمنا ومكدرنة نكعد بوحدنا لان كل الوقت جان مع ابوية واخوتي وحدد وياهم موعد زواجنا بالعيد وسألوني كلت الي تشوفوه
ورة الظهر ابوية نام وكل واحد من اخوتي راح لغرفتة
رحت لديوانية وكعدت بنفس القنفة الي كاعد بيها هو بس بعيد عنة اباوعلة واكول بكلبي ياربي شكد مشتاقتلك وشكد دااحبك وداأتعلق بيك يوم عن يوم اكثر
وللقصة بقية ،،،،،،
