#مذكرات_مراهقة
للكاتبة ميار الشمري
الجزء 13
صلاح،،،كعدت ثاني يوم ب11 لكت نور محضرتلي الريوك ودتجهز بنفسها حتى اوديها لأهلها
نور ،،،باوعتلة والابتسامة تارسة وجهي وكلت صباح الخير حبي
صلاح،،،رديت من ورة خشمي صباح النور ودخلت الحمام
اغسل بوجهي بالحمام واني اباوع بالمراية واحاجي نفسي واكول هاي شنو قصتها الي يشوفها هسة ميعرفها البارحة من دفعتني وصدتني عمي لو تجيب مليون رجال ديفهم لمرة وحدة ماراح يفهمها 😒
نور،،،حسيت صلاح مستغرب لتصرفاتي كلت اشرب من كاس الي شربتني منة حتى تحس بمرارتة
جان يعز علية حالتنة بس ماجان بأيدي شي
جنت مشتاقة لأهلي ومامصدكة شوكت اشوفهم
صلاح،،،جنت واكف على ميز التواليت والبس بقميصي واباوعلها دتريد تلبس شالها
نور،،،جان ماخذ كل المرايا اجي من اليمين ايدة تغطيني ارفع نفسي واوكف على طرف اصابيعي ماابين انزل نفسي من جوة ايدة مااشوف المرايا
صلاح،،،،اشوف نور تلوب على مكان حتى تباوع لنفسها بالمرايا ماكو جنت اضحك عليها همست اني غير ماخذ قزومة
نور،،،اني مو قزومة انت الي اطول من اللزوم 😕
صلاح،،،جريتها من ايدها وخليتها كدامي وكتلها شفتي طولج زين شلون مو قزومة
نور،،،،اي يمعود دنطيني مجال من ساعة جان هسة مخلصة عفية الشال ساعة ديضبط بأيدي
صلاح،،،لزمتها من خصرها وكتلها يلا بلة دأشوف شلون ساعة ديضبط وكمت اراقبها وهية ترتب بشالها واتقرب منها اكثر
نور،،،ايدة على خصري وديراقبني وعيونة تسحر حاولت استعجل لان حسيت نفسي راح اضعف واني مااريد اضعف
صلاح،،،وج نور تعبت من الوكفة صدك جذب لفة شالج تاخذ وقت اكثر من استأصال الزائدة الدودية هههههه
نور ،،،،هههههه اوك كملت يلا طلعنا ووكف صلاح بالطريق وجاب لأهلي علب شوكولاتة وكيك وكال ميصير نطبلهم وايدنا فارغة
صلاح،،،من وصلنا لمنطقتهم جانت اكو هوسة ولمة رياجيل على باب بيت الشخص الي جان مع نور وناس تصارخ وناس شايلة سلاح والوضع مو طبيعي جنت اباوع لنور ولا مهتمة ولا يمها الموضوع جانت متلهفة تنزل لأهلها شكد ماجانت مشتاقتلهم
طفيت السيارة وبقيت كاعد بيها واباوع لوجوه الواكفين لعل وعسى اشوفة لكن ماشفتة بيناتهم
نور ،،،نزلت من السيارة وهمست صلاح ....صلاح
صلاح نعم
نور،،،انزل
صلاح،،،اها اخذي الاغراض وطبي هسة الحكج
طبت نور
ونزلت من السيارة واني اباوعلهم اريد افتهم شنو القصة مافهمت جان حمودي واكف وياهم ومن شافني اجاني وبوسني ودخلني للبيت
كمت اضرب اخماس بأسداس شنو القضية شنو صاير ومن بعد السلام والسؤال عن الحال والاحوال جنت اني وحمودي وام نور كاعدين
سألت حمودي شنو القصة شصاير برة
الظاهر ام نور هم مجانت تعرف شصاير كالت مااعرف
حمودي ،،،يوم هذا ياسر ابن حرام وربج وكعة بشر اعمالة كامز على سطح جوارينة الي بظهرنة البارحة على بنتهم واهلها لازمينة دك كتل وهسة جايبي وصايرة كعدة عشائر وعشيرتة كلها ملتمة
ام نور ،،،ياستار ربي الله يحفظنا ويستر علينا
صلاح،،،امبين ابن حرام هذا اني اكثر من مرة اشوفة واكف على سطح بيتهم
حمودي ،،،اي مطيرجي نذل ابن حرام جنت اشوفة بالعين الجبيرة وامنت بي وخليتة خط لنور تالي
ام نور،،،،قاطعتة وليدي الله ينتقم منة هسة لويش تفتح صفحات عتيكة زوج اختك هسة اجة وتلكيتة بهل اخبار الي تقبض القلب
صلاح ،،،لا لا خالة خلي يكمل شنو قصتة ياسر
حمودي ،،،شأكمل هو اني اعرف وين وصلت
صلاح،،،ياعمي وصلت لحد ماخليتة خط لنور وطلع ابن حرام شسوة يعني
حمودي ،،،مرة طلعوهم من المعهد من وكت وماجان عدهم دوام والبنات الوياها خامس وعدهم تطبيق هو بمكان ميرجعها للبيت ماخذها على السوك يشربها عصير
صلاح،،،لحظة لحظة شوي شوي علية هاي شوكت هذا الحجي
حمودي ،،،والله مااعرف شوكت لان ماحجولي الا قبل فترة والله لو حاجيلي بساعتها لأشرب من دمة والله
صلاح،،،باوعت لخالتي شوكت هالحجي
ام نور،،،بفترة الي تزوج بيها انور وجانت ماخذة اجازة نور بوكتها لوما قلبت عليه العصير وصارخت بي جان مارجعها اجتي مرعوبة بعد امها
صلاح،،،بس بيومها اني اجيتكم وكتيلي ب11 ونص قبل شوي اجتي من الدوام !!!!
ام نور،،،اي والله خفنة من ردة فعل اخوتها وابوها ومحجينا لأحد وهي ماحبت تحجيلك حتى لتشيل همها وينشغل بالك عليها كتلها يوم سدي الموضوع ماطول عدت على خير وخلي حمودي ياخذج ويجيبج وفعلا حمودي بدأ يوصلها ويجيبها
صلاح،،،،كمت اضرب على رجلي ياخير خالة شلون عدت على خير الله لايوفقك ياحيوان
بهذا الحجي وتدخل نور لديوانية شايلة رسل تبوس بيها وايدها الثانية لازمة فطومة وفرحانة بيهم كلش
نور ،،،طبيت واشوفهم منزعجين وديتناقشون كلت شكو شصاير
حمودي،،،نويرة ماشفتي الهوسة برة
نور،،،لا منتبهت ليش شصاير ؟؟
حمودي ،،،ربج يمهل ولا يهمل سكتي عن حقج وخفتي علينا من المشاكل وسكتي عن هذا الحقير ياسر وهسة انطب خوش طبة لزموا ،،،،،،الخ
نور،،،حيل بي وابو زايد الله لا يوفقة بيومها الليل مانمتة من الخوف
صلاح،،،اباوعلها وعقلي راح يطير مني ليش محجيتيلي شصاير وياج بوكتها نور ليش؟؟؟
نور،،،والله محجيت بس لأمي خفت من المشاكل وهو هددني اذا احجي يطلع حجي علية بالمنطقة وبعدين صلاح ليش احجيلك واشغل بالك اني اعرفك شكد تخاف علية
وبعدين بيومها انت جنت تعبان وماالك خلك شلون اكملها عليك واحجيلك هيج شي
صلاح،،،جانت خانكتني العبرة وحسيت بنفسي شكد جنت غبي وضيعت احلى ايام عمري وياها بالتفكير والوسواس والشك اكل كلبي ودمرني جنت حتى راح اخسرها
صلاح،،،وين بيومها اخذج على اي شارع
نور،،،وصفتلة الشارع والمكان والزمان وكتلة شلون صار وكعدت ليكدام
صلاح،،،،تحجي واني جنت اسمعلها وميت حسرة وقهر
نور،،،استغربت كد مالح صلاح وعلق على الموضوع تغدينة وصلاح جان مو على بعضة ومارفع عينة عني
صلاح،،،،طلعت تغسل ايدها نور بالحمام ولحكتها
نور اريدج تسامحيني عن كل الي صار والي ماصار بيناتنة
اوووف بكلبي كومة حجي وحسرة وقهر مااعرف منوين ابدي ومنوين انتهي
نور،،،وكفت كدامة اول مرة اشوف صلاح بهل حالة همست سلامتك يعمري ليش هيج تحجي شصاير وياك افتحلي كلبك
صلاح،،،بعدين نور بس اريد نرجع لبيتنة هسة مشتاكلج كد رحمة الله اريد نعوض كل الي فاتنة
نور،،،هسة نرجع ؟؟؟ بعد وكت حبي ماصارلنا ساعتين من جينا بعدني مشبعت من اهلي
صلاح،،،لزمت ايدها فدوة حبيبي خلي نرجع هسة اوعدج اجيبج غير يوم والله راح اتخبل عليج مشتاقلج ضيعت اجمل ايام مني بعد ما اضيع ثانية بلياج
نور،،،اسمع كلام صلاح ومصدومة هذا الرجال راح يخبلني كتلة اوك ركبنة وطول الطريق مابطل غزل بية ومابطل بوس بأيدي وصلنا البيت وطبب السيارة للكراج فتحت الباب كلي لتنزلين ديري بالج
نور،،،يا ليش ماانزل ؟؟
صلاح،،،نزلت وفتحتلها الباب وشلتها نونتي الي مثلج متمشي على الكاع الي مثلج تنشال على الراس وبين العيون
نور ،،،اني اضحك واكولة نزلني حبيبي عيب من اهلك ...نزلني صلاح متكدر تصعدني ...نزلني حبيبي تعبت
صلاح،،،جنت مامصدك شوكت اصل الغرفة وكل درجتين اصعدها سوة
من وصلت قفلت الباب حسيت نورة خافت وارتبكت من شافت حماسي كعدتها وبقيت اشوي احاجيها وتعذرت منها عن الي صار قبل 7 ايام
نور،،،ياريت اعرف شنو سبب تغيرك صلاح
صلاح،،،خليت ايدي على حلكها فدوة لعمرج بعدين مو هسة والله كل مااتذكر ينقبض كلبي بوست ايدها وخدها ونزعتها حذائها وبست قدمها
نور،،،لا حبيبي لا
صلاح،،،اش مااريدج تحجين كلمة خليني براحتي
كمت انزعها قطعة قطعة ودخت صرت بغير عالم وجانت بأحضاني مثل الطفلة ماوعيت الا على دموعها خايفة من انتهينا طلعت بنوتي متعرف اصلا شنو عذرية وبالها انها تأذت
صلاح،،،شنو نور تحجين صدك لو تشاقين ؟؟
ابجي طين عليج وعلى برائتج يمة من فدوة اروحلج فهمتها وحجيتلها وكتلها مسألة طبيعية لتخافين اقتنعت ونامت على صدري دمعت عيني وهمست نور شكد نذل لعد اني ومااستاهلج
نور،،،لا حبيبي لتحجي هيج على نفسك والله انت وردة مال الله واحبك بكد الدنيا واكثر هسة احسك صلاح الي عرفتة وحبيتة
بس راح اموت واعرف سبب تغيرك ذيج الفترة علية فدوة مو وعدتني تحجيلي
صلاح،،،اوك بس خلي نسبح طبينة سبحنا ومن طلعنا حجيتلها وياريتني ماحجيت مجنت متوقع ردة فعلها تكون هالكد قوية جانت تصارخ بطريقة هيستيرية وتبجي وكل مااحاول المسها او اهديها تصرخ دير بالك تلمسني او تحاجيني وكسرت اجهزتي وساعتي ونظارتي واي شي يصير كدامها
نور،،،لا ياظالم دمرتني وحطمتني وعيشتني بجحيم الشهور الي فاتت وضيعت اجمل ايام عمرنا من ورة شكوك من عقل مريض مثل عقلك وتبجي بطريقة هيستيرية
صلاح،،،نور اهدي الله يخليج مو كتلج سامحيني جنت غلطان بحقج
نور،،،بعدددددددد عني ودير بالك تلمسني لا الم المنطقة كلها عليكم
ولك من بعد ماعيشتني بجحيم لا اني بسما ولا اني بكاع انت متعرف شعور عروس تنام بدلة عرسها وبنصبتها لان بكل سهولة حبيبها تركها وكعد بالحمام الى ان نامت صلاح اني حتى كلمة مبروك منك ماسمعت
دكلي هسة اسف!!!!
شنو تسوي كلمة اسف كدام الي جنت احسة واعيشة صلاح عن شنو تريدني احجيلك انت متعرف شنو جنت احس او بشنو جنت امر الفترة الي راحت كلها ودموعها تصب صلاح انت خليتني اكره حالي تعرف معنى انثى تشك بأنوثتها من تحس زوجها وحبيبها وفارس احلامها يشمئز منها وكعدت بالارض وانهارت وجانت تغص بجيها
صلاح ،،،كعدت كدامها واسمعها وكلبي يتقطع مع كل كلمة دكولها
نور،،،وبكل بساطة استخسرت بية تحجيلي هذا الموضوع قبل لاتاخذ الي تريدة مني شلون الك نفس شلون الك عين ياظالم
الله يخليك مااريد اشوفك ولا اسمع صوتك اطلع برة الغرفة او خليني اني اطلع
صلاح،،،الله يخليج اهدي واسمعيني ولتسوين هيج بنفسج واوعدج ماابات يمج اليوم حتى اذا اكطع اجازتي والزم خفر بالمستشفى بس اهدي
نور ،،،صرخت وايدي على اذني اطلع برة مااريد اسمعك
وللقصة بقية ،،،،،
