#مذكرات_مراهقة
للكاتبة ميار الشمري
الجزء 12
نور،،،،من بعد هاي الليلة انكسرت كسرة عمري وحسيت شي بداخلي انكسر
الغريب انه جان تعامل صلاح وياي كلش حلو ويحترمني وماغثني لو بكلمة بالعكس جان حباب وطيوب كلش وياي
جان يومنا يعدي طبيعي حجينا جان رسمي شوي
صلاح،،،،جنت اتهرب منها واختنك اذا اكون وياها بغرفة وحدة
جنت بداية الليل امثل اني نايم لاني جنت متعود على السهر وماانام من وكت ومن اتنام نور اقضي الليل كلة اتأملها هي ونايمة والوم بنفسي على الي ديصير واعاتب بيها على الي عرفتة وغيرني عليها
نور،،،جان ينام قبلي مرات ويتأخر الى الظهر بالنوم استغربت شكد ميحب ينام
جنت انزل مع خالتي اساعدها واكثر وقتي اقضي وياها
جانت تعلمني وتنصحني وتحجيلي شكد صلاح موسوس ونظايفي وادواتة واشياءة خاصة بي بس ماكو احد يستخدمها ولا هو يستخدم غيرها وحتى منظفاتة ومعقمات خاصة الة لأستخدماتة الخاصة
هنا جنت اخذ على نفسي من جنت اسمع هيج عنة
وشكد مجنت مرتبة حالي ونظيفة صرت ارتب وانظف واوسوس على كلشي مثلة واكثر
و4 يوم زواجنا جانت اختة وزوجها يمنا تعشت وتعللت وتونسنا معاها ومع اطفالها ومن راحت شفت صلاح صعد كدامي لغرفتنا سلمت على خالة وعمي وصعدت طبيت استغربت صلاح نايم كلت شنو هالرجال مو طبيعي ليلة مع نهارة نايم شنو قصتة وشنو هالسرعة نام
جنت اخجل اغير ملابسي كدامة ومجنت البس ملابس نوم فبيومها غيرت ملابسي لان شفتة نايم ولبست دشداشة قصيرة قلع وبيها لولو كاتي سودة بحمرة
مددت يمة وفتحت شعري وجنت اتقلب
فتحت جهازي شفت ماما متصلة بية مرتين اووف يمة ياريت اكدر احاجيج هسة واشكيلج الي بكلبي شكد مشتاكتلج ومشتاقة لراحتي يمكم
صلاح،،، مجان عندي حل الا اتظاهر بالنوم قبل لتجي نور اجتي ونزعت كدامي غيرت ملابسها جانت منطيتني ظهرها وتلبس مددت يمي واني كوة دأتنفس وعطرها تغلغل بية دقائق وحسيت نور دتتنفس بسرعة وكأنها دتبجي بخنيك بلا صوت باوعتلها جانت مخليه ايدها اثنينها على وجهة وتبجي
صلاح،،،هاي شنو نورة ليش دتبجين؟؟ كمت كعدت يمها وحضنتها همست ولج ليش دتبجين لتعذبيني فدوة
نور،،،صلاح تعبت اريد ارجع لأهلي مشتاقتلهم
صلاح،،،والله اوديج الهم ان شاء الله باجر واخليج تشوفيهم بس لتبجين
حسيت شكد آلمتها بالرغم هذا الشي مو بأيدي نور جانت صح تعبانة وضايجة من الوضع
قررت ادوس على نفسي واعاملها كزوجة وتصير علاقتنا كأي زوجين مسحت دمعتها وكتلها يمة الخشة يمة صارت حمرة بستها منها وهي ضحكت وكمت اهمس كلمات حب وغزل بأذنها بلا وعي ولا جنت اتذكر او اميز شنو دأحجي وكأنه لسان قلبي ديتكلم
نور،،،جنت ممصدكة الي دأسمعة من صلاح صرت بغير عالم وبغير دنيا وتجاوبت وياه
صلاح،،،حاولت ابوسها بلا ماافكر بشي واشيل من راسي اي وساوس واتفاعل وياها ماحسيت بنفسي الا دافعها عني ودخلت الحمام وكمت اتقيء مدأكدر لخاطر الله مااكدر غسلت وعفتها وطلعت من الغرفة
نور ،،،بجيت مدأفهم الي ديصير شنو؟ ليش هيج صلاح دينفر مني وكأنه مسحور
جنت اتمنى يصارحني بوضعة او يحاجيني على الاقل
ومن لحظتها قررت انه لهنا وبس احس اشياء حلوة بداخلي دتموت قررت اعيش لنفسي وبعد ماافكر بغيري وان كان صلاح اني تعبت وتعذبت ومجنت اعرف طريق الة او سبب لتصرفاتة وياي
حسيت نفسي صرت اصلب واقوة من قبل والي صار صنع مني انسانة ثانية
وكأني كبرت 10 سنين ليكدام
صلاح،،، نزلت شلون وضعية سخيفة حطيت نفسي بيها اني اعرف حالي ماراح أتقبل هيج وضع من البداية جان المفروض انسحب وافسخ والي يصير يصير حتى لو طلب الامر تتقاطع العائلتين وبلا هالعذاب الي دنعيشة اثنينة
بيومها نمت بالصالة ومن اذن الفجر توضيت وصليت ورجعت للغرفة حتى مينتبهون ابوية وامي اني نمت بالصالة بيومها مكدرت اواجه نور وكمت اتهرب منها
جنت اتمنى اكطع اجازتي وارجع اداوم واطلع من جو البيت والموقف الي حطيت نفسي بي بس جان بعد لأجازتي يومين
كعدت ب11 ومجانت نور موجودة بالغرفة غيرت ملابسي ونزلت لكتها دتلف دولمة مع امي كتلهم اني طالع معزوم على الغدة مع اصدقائي
نور سمعتة ومااهتميت
ام صلاح،،،مصدومة واباوعلهم اثنينهم ومااعرف شنو اكول كتلة الله وياك ماما
صلاح،،،طلعت ومجنت اعرف وين اروح كمت اخابر على اصدقائي واجمع بيهم جنت مختنك واريد انسى الي بية
الي جان مشغول والي بالدوام واعتذر والي اجوي انجمعنا وحاولت انسى واندمج وياهم تغدينة بمطعم جنت مااستنظف اكل الا بي وجان نفسة الي تغدينة بي بيوم الي جنة نجهز جنت اباوع للمكان الي جانت كاعدة بي بيومها هي كلت عفية نور وين مااروح اكو شي يذكرني بيج وين مااهرب منج الكيج
وصادفت انه جانوا مخلين نفس اغنية حسام الرسام اول حب بعمرك اني ،،،،
صلاح،،،ادري شنو قصة هالاغنية وين مااروح اسمعها حتى بأحلامي كامت تطلعلي شنو قصة هالعالم اذا لطشو بأغنية !!!
كالولي هاي نازلة جديد لحسام ونصرت البدر بالعكس حلوة صلاح
صلاح،،،احنا وكاعدين واذا بواحد من الولد كال شباب هاي الي كاعدة مع شاب كدامنا مو حبيبة احمد سعيد؟؟
كالوا اي بس مع منو كاعدة هاي
صلاح،،،هسة يجوز يطلع اخوها
اواقاربها ولو جنس حواء متوفي الا لحطب جهنم عوفونا منها
تعكر مزاجي اكثر وقريب العصر كالوا تروح ويانة للكهوة نشرب اركيلة ولو انت ماالك واهس بيها
صلاح،،،لا اروح نجرب مخسرانين شي
نور،،،كمت احقد عليه بداخلي والي قهرني اكثر انه وعدني يوديني لأهلي وانتظرت الى قريب المغرب ومااجى
بيومها اني الي خليت نفسي نايمة وماردت اشوفة
صلاح،،،من رجعت حاولت امي تستفسر اذا صاير بيني وبين نور شي واكدتلها ماكو شي
كالتلي ترة البنية ماقبلت تتعشى
طبيت الغرفة شفتها نايمة بيومها شكد استخطيتها وحسيت ظلمتها وظلمت نفسي بالرغم شي مو بأيدي وخارج عن ارادتي
نور،،،ثاني بوم نزلت من وكت وجانت خالتي تريد تروح لدوامها لانها موظفة بالبريد وعمي طالع همست صباح الخير خالة
ام صلاح،،، صباح النور بنتي ليش كاعدة من وكت ارجعي لحضن زوجج ماما
اني طبخت الغدة وطالعة لدوام بس يبقى التمن اذا تأخرت طبخي انتي
نور،،،ان شاء الله خالة الله وياج
راحت خالتي وقفلت الباب ورجعت افتر بالبيت حسيت بوحشة واشتاقيت لأهلي ولبيتنا اشتاقيت لخباثة فطومة ولأم لسان رسولة
من الضوجة كمت ارتب بالبيت ونظفتة ومسحتة طلعت للمواشي غسلتها ومكدرت اغسل الطرمة لان سيارة صلاح بيها كمت ارش بالحديقة واباوع للزرع والعب بالمي
صلاح،،،كعدت ب10 ومالكتها يمي وظليت اتكلب جريت مخدتها نمت عليها افيش ريحة شعرها وعطرها تارس المخدة ياربي شكد احبج نور وشكد اتمنى ارجع اتقبلج مثل قبل وتنشال من راسي هالوساوس
طبيت للحمام فرشت وغسلت ونزلت جان ماكو احد بالبيت ناديت امي ماكو اتوقعتها بالدوام همست اكثر من مرة نور ،،،،نور ،،،،نور واني ادورها باوعت من باب المطبخ وجان الجام بي مظلل شفتها بالحديقة دترشها وتلعب بالمي وجانت متبللة ملابسها
جنت اباوعلها مبتسم ونسيت حتى نفسي
نور سديت المي وجنت متبللة وبردت كلش كلت خلي اغير ملابسي لزكت علية طبيت من المطبخ شفت صلاح واكف ديباوعلي ومبتسم كلت صباح الخير وصعدت
صلاح،،،صباح النور تريكتي نور
نور،،،رديت واني اصعد على الدرج لا متريكت
صلاح،،،لعد انتظرج نتريك سوة
نور،،،طبيت سبحت ولبست برمودة وردي ورفعت شعري وخليت مكياج بسيط جان يطب صلاح للغرفة وبأيدة الريوك
صلاح،،،تأخرتي واني جعت ههههه
جبتة يمج
نور،،،باوعتلة شنو هذا بي انفصام راح يخبلني همست اكل انت صلاح اني مو جوعانة كلش
صلاح،،،لا ناكل سوة وبعدين انتي مدتاكلين مديعجبني اكلج يلا تعاي
نور ،،،كعدت اكل وهو مانزل عينة عني
صلاح،،،اباوعلها صدقة لهل وجه وهل حسن اول مرة اشوف كيمر وعسل تاكل كيمر وعسل
نور،،،نظراتة اربكتني واحس كلبي بدأت تتسارع نبضاتة بس خليت نفسي مامهتمة
خلصنا اكل ونزلت الريوك ورتبت كلشي بمكانة وطبخت التمن لان خالة تأخرت وظليت جوة ماصعدت وورة الغدة من تغدينة ساعدت خالة بالمطبخ ومجنت حابة اصعد
صعدت وشفت صلاح كاعد ديتابع فلم كعدت يمة واتصلت بماما وحجيت وياها واشرلي صلاح انه اليوم ياخذني الهم
من سديتة كتلة باجر عازمينة على الغدة نروح باجر ان شاء الله
صلاح،،،اوك براحتج
صلاح،،،باوعتلها نور انتي زعلانة مني ؟؟
نور ،،،لا ليش حتى ازعل ماكو شي يسوة
صلاح،،،رفعت حاجبي وكتلها اقصد لان ماوفيت بوعدي واخذتج لأهلج البارحة
نور،،،اعرف فهمتك وكتلك ماكو شي يسوة الزعل مارحت البارحة اروح باجر شنو القصة يعني
صلاح،،،استغربت بطريقة كلام نور وياي
رجعت اتابع الفلم جانت كل متطلع لقطة رومانسية بالفلم اثنينة نغلس ونظاهر ممهتمين
نور،،،عفتة وجنت صح تعبانة لان كعدت من الصبح ونمت
صلاح،،،بيومها حسيت نور مو نور الي اعرفها بعد مامهتمة ولا شايفتني كدامها ولا كأني موجود
بيومها بالليل مااجانا نوم وبقينا نسولف واحجيلها على مواقف طريفة مرت بية وهية تضحك وكل متضحك تاخذ قطعة من كلبي وكأنها طفلة
ماحسيت على نفسي الا نايم عليها وابوسها بلا وعي
نور ،،،دفعتة كل قوتي ونطيتة ظهري ونمت حسيت انه لازم ارد ولو جزء من اعتباري هنا وصلني جزء من حقي
صلاح،،،،انصدمت ممصدك نور تصدني بهل طريقة معقولة!!!
جانت تذوب اذا المسها وتجاوب بسرعة
بيومها صار عندي ارق وانقهرت وبقيت افكر بالي ديصير وليش هيج تصرفت وياي
وللقصة بقية ،،،،،،
