#مذكرات_مراهقة
للكاتبة ميار الشمري
الجزء 14
صلاح،،،تركتها من بعد ماحسيتها شوي هدت وقبل مااطلع للمستشفى كلت لأهلي طالبيني بالمستشفى واحتمال الزم خفارة اليوم ونور شوي ضاجت لان راح اداوم طلعت ومنظرها مجان يروح من بالي وهي منهارة ودتبجي
بقيت الوم بنفسي على الي صار ولأن حجيتلها وصارحتها جان المفروض اكفر عن ذنبي واعوضها على الي فاتنة بدون مااحجيلها شكوكي بيها
نور،،،طلع صلاح وبجيت من قلبي على الفترة الي عيشني بيها بالحيرة والتفكير وهو طلع يشك بية والي قهرني بفترتها حتى دفاع عن نفسي منطاني الحق انه ادافع عن نفسي او سألني حتى ابرر الصار وعيش نفسة بوهم وبمرض اسمة الشك وعيشني بتعاسة بأيام المفروض تكون اجمل ايام بعمري وعمرة
جنت كل مااحس بخالة اجتي دتشوفني اخلي نفسي نايمة
ومانزلت ولا تعشيت
صلاح،،،كعدت بغرفتي بالمستشفى وقفلت الباب وكعدت حاير والوب عليها ومااعرف شلون حتسامحني طلعت اجهزتي واحد جان منتهي ومفلشتة تفليش الثاني جانت مكسورة الشاشة لكن جان بي روح و يشتغل كمت اكتبلها رسائل اعتذار لان اعرف ماراح ترد اذا اتصلت بيها ...
نور الله يخليج سامحيني متأكد لو بمكاني جان تصرفتي مثل متصرفت واكثر ومتأكد لو شخص غيري جان نهى كلشي بس اني احبج ومتخليت عنج ولو بكلمة ماغثيتج ولا اذيتج وجنت كل هالمدة آكل بروحي وبعدين ياعمري اتذكري انه بساعة الحادثة اجيتج للبيت حتى أتأكد واستفسر عن الي صار واعرف الحقيقة منكم وانتو الي جذبتوا علية وضميتوا عني وزودتوا شكوكي وزدتوا الطين بلة وانتي اكدتيلي انه حمودي يوديج ويجيبج اني حتى اذا جان عندج خط مجنت اعرف وصارت امور كومة القدر وضعها امامي حتى يكبر الشك بداخلي
اني سبق وحجيتلج انه حبيت برائتج وطهارة قلبج ونظافة تفكيرج وحسيتج تشبهيني وحجيتلج انه ماتقربت لبنت بحياتي لانه نفسي متتقبل المس بنت غيري لمسها وهذا الشي خارج عن ارادتي وسيطرتي وحاولت الله يشهد اتقبلج مثل ماانتي ونعيش حياة زوجية طبيعية بس مكدرت وانتي جنتي تشوفين بعينج
لتصدكين اني جنت مرتاح لعذابج وللي جان ديصير وياج لان جنت اتعذب ضعفج وجنت امر بأيام بس رب العالمين يعلم بيها ومتعرفين مدى سعادتي اليوم من عرفت الحقيقة لانج حب عمري وانظلمتي وجنتي على نياتج ورب العالمين ميرضى بالظلم وبانت الحقيقة واتمنى تسامحيني حبيبي والله اتمنيت الموت ولا اشوفج بهل حالة الي شفتج بيها اليوم ،،،،سامحيني فدوة لكلبج الطيب احبج نونتي
نور،،،،جان تلفوني ميهدة وكل شوي يجيني مسج شكل تأثرت بكلامة وبالرغم مااحقد ولا بطبعي اطول بالزعل بس حسيت بيومها انه بعدة كلبي شايل منة مارديتلة وعفتة
صلاح،،،مانمت طول الليل ومجانت تردلي ومن طلعت الشمس دزيتلها نور خلص ياعمري والله مانمت الليل كلة انتظر منج رد هديتي؟؟ اجي للبيت لو لا ؟؟
نور،،،كعدت الصبح بطني تلويني ووجع مو طبيعي اسفل ضهري وبطني
اجتي خالتي وشافتني وكعدت يمي
شبيج ماما شنو اليوجعج
نور،،،خالة بطني دتكطعني من الوجع
ام صلاح،،،هي موعدها لو متقدمة
نور،،،لا متقدمة بس اول مرة تجيني بهيج وجع
ام صلاح،،،ميخالف يوم مسألة طبيعية الوحدة من تتزوج كلشي بيها يتغير ميبقى شي على حالة وابتسمت
زين صلاح شنو كالج ماحجيتيلة
نور،،،مارديت وجنت اون من الوجع
ام صلاح،،،ادري ياحظي منو المتزوجة دكتور اني لو انتي يلا ماما هسة اجيبلج بونستان وشي دافي
نزلت وجبتلها بونستان وحليب دافي لكتها نامت خليتة على الكومدي يمها وغطيتها ونزلت
خابرت على صلاح وكتلة شنو ماراح تجي تتغدة راح يأذن الظهر
صلاح،،،جاي ماما بالطريق
ام صلاح،،،سديتة وياه بدون مااحجيلة توقعتة اكيد راح يعرف ومن يجي راح دكولة نور
صلاح،،،طبيت وسلمت على امي جانت دتحضر بالغدة صعدت فوك شفت نور نايمة ويمها حليب وشريط بونستان نزلت لأمي يوم شبيها نور ليش شاربة بونستان ؟؟
ام صلاح،،،شمعرفني اني اسألك لو انت تسألني زوجتك لو زوجتي 🤔
صلاح،،،ماما شلون اعرف واني جنت خفر وبايت برة البيت
ام صلاح،،،على اساس لو جنت موجود يمها راح تعرف وضحكت
صلاح،،،باوعت لأمي بأستغراب واشوف ضحكتها وكأنها تعرف كلشي
ام صلاح،،،لا عبالك اني مااعرف شي ابن بطني وافهمك كلش زين سبحان الله الي خلقك خلق ابوك هم اسبوع يلا انحلت حقدتة حتى بهاي وراثة سبحان الله 😉
صلاح،،، طلعت من المطبخ ومجنت اعرف شنو ارد جان ابوية واكف بظهري ومبتسم والظاهر سمع كلشي طلعت الحجية تقصف بالجملة كل الجبهات 😒
صعدت على نور وكعدت يمها خليت ايدي على راسها جانت حرارتها عالية
نور،،،باوعتلة ومن الوجع نسيت كل زعلي منة همست صلاح بطني توجعني كلش
صلاح،،،بعد روحي سلامتج وين الوجع بالضبط
نور،،،همست اسفل بطني
صلاح،،،مديت ايدي حتى اتفحصها من تحت الملابس
نور،،،بعدت ايدة شدتسوي ؟؟
صلاح،،،حبي دأتفحص مكان الالم هاي شغلتي دأفحصج كدكتور ومريضة 😅
نور،،،لا بلة وان شاء الله هيج تفحص مريضاتك خوش شغلة هاي 😒
صلاح،،،اي وافحص داخلي شعبالج
ولج الي عدها شغلة نسائية شيجيبها علية تروح لأستشارية نسائية لو تجيني 😁
نور،،،درت وجهي عنة
صلاح،،،خليت ايدي وهمست حبيبي كل مرة هيج
نور،،،لا اول مرة هيج
صلاح،،،حبيبي اتوقع عندج التهابات اليوم اخذج لدكتورة عواطف بعيادتها
الخاصة كلش تفتهم
نزلت جبتلها غدة وتغدينة سوة جنت اوكلها بأيدي صح بعدها زعلانة مني بس كلت شوي شوي ان شاء الله تسامحني
نور،،،العصر رحنة لدكتورة وكل الطريق مابطل غزل ودلع بس جنت رافعة خشمي ومالي خلك من الوجع وطلع عندي التهابات ونطتني علاج
ومن طلعنا مارجعني للبيت
وللقصة بقية ،،،،،
