#مذكرات_مراهقة
للكاتبة ميار الشمري
الجزء العاشر
صلاح،،،بقيت افكر اواجهة وافسخ والي يصير يصير بس جنت كل مااشوف اهلي شلون فرحانين وديجهزون لعرسي وممصدكين يفرحون بية واهلها وشلون راح ينكسرون اذا فسخت وتركت بنتهم والي هية بنت عمي
جنت حتى بشغلي مااركز
حسن،،،صلاح بيك شي الظاهر مو نايم زين ومدتركز
صلاح،،،لا ليش ؟
حسن،،،مريض القلب الي بغرفة 18 انت كاتب بالطبلة مالتة علاج غلط ولو الممرضات ماشين عليه جان راح بيها الرجال
صلاح،،، صدك تحجي؟؟
حتى مااذكر شنو كتبتلة صح اني تعبان هاليومين وراح اخذ اجازة
رجعت البيت وجانت جاية غرفة الاخشاب الي اختارتها اختي وجانت هدية زواجي منها شفتهم ديشدون بيها والكل فرحان بس اني مااحس بأي فرح
نور،،،،مرت الأيام ورجع صلاح لطبعة وكأنه ماوعدني يتغير طلب مني ماالح عليه وفعلا تركتة على راحتة
وورة 5 ايام اجتي خالتي ام صلاح واختة الجبيرة وكالت خلي نروح نشتري الذهب ونجهز لنويرة شنو محتاجة
نور،،،ظليت بس اباوع ومستغربة همست خالة وصلاح !!!
ام صلاح،،،،تلبكت وانحرجت وردت بخجل والله صلاح جان متمني كلش يجي وتختارون سوة بس يعتذر منكم عندة شغل ومكدر يجي
وكملت اختة حبي هاي حياة الدكاترة شغلتهم صعبة ووقتهم مو الهم الله يعينهم وانتي لازم تقدرين
نور ،،، دنكت وهنا حسيت بالمأساة الي راح اعيشها وبحجم المعاناة الي تنتظرني بعد زواجي صعدت حتى اغير ملابسي واتصلت بي مارد كالعادة
رحنة وجانوا همة يختارولي لان جنت مامهتمة واحس الدنيا كلها طالعة من عيني ماقصرت خالتي وكلشي راقي وحلو تاخذلياه بس مجان بعيني شي
اتصل بيهم صلاح واحنا بالسوك وخالتي بعدت عنة وظلت تحجي وياه وبعدين رجعت ورسمت على وجهة ابتسامة صفرة وكأنها محرجة
كالت صلاح خابر ديسألني شنو جبنالج ووصاني مااخلي شي بنفسج واذا خلص من وكت يلحكنة لسوك
نور،،،بقيت ساكتة ومقتنعت بكلام خالتي
صلاح،،،،جنت ماخذ اجازة ومدد بفراشي واباوع للغرفة وشلون ترتبت شكد جنت منتظر هيج يوم كأي شاب يكمل نص دينة وياخذ الي يحبها والي يرسم وياها مستقبلهم سوة
فكرت بكل الي صار وحاولت اتجاوزة فكرت انه قد تكون نزوة او حب مراهقة وماطول البنت مشفت شي عليها بعد خطوبتنا يعتبر كلة من الماضي وفعلا مافد يوم اتصلت بيها لكتة مشغول او انتظار والي يعجبني دتسوي ومافد يوم عارضتني واني احبها وراح تصير زوجتي لازم افتح صفحة جديدة واتغاضى عن كلشي منو بينة بهل حياة معصوم عن الغلط اتصلت بأمي وسألتها كملتوا لو بعد
ام صلاح،،،لا بعد وصلاح على فكرة تصرفاتك غلط ومدأفهمها يعني اذا انت ماخذ اجازة وكاعد بالبيت مو جان المفروض انت تاخذنا وتشتري لخطيبتك تجهيزات العرس البنية مكسور خاطرها ومابعينها اي شي
صلاح،،،اوك اني جاي انتو وين هسة؟؟
نور،،،صارت الساعة ب1 الظهر واتصل بية صلاح استغربت رفعتة
صلاح،،،،نورة اني اعتذر لان مااجيت وياكم من الصبح بس ...
نور،،،بس شنو صلاح
صلاح،،،مااعرف شنو اكولج بس اني وراكم صرت هسة اصف السيارة واجي
نور،،،كمت اتلفت والجهاز على اذني مامصدكة واخيرا اجيت
صلاح،،،نزلت وسلمت عليهم جانوا شايلين اغراض كومة خليتها بالسيارة وكتلهم خلي نتغدة بأقرب مطعم ونكمل
ورحنة تغدينا وكل ميدك جهازها واسمع اغنية اول حب بعمرك اني مااعرف شنو يصير بية
نور،،،من اجة صلاح تغيرت نفسيتي نوعا ما وكملنا تجهيزات ورجعنا المغرب
بيومها اتصل بية وظلينا نحجي جان احسن من قبل بس مو صلاح الي اعرفة ابد وكأنه ديمثل او يجاملني
صلاح،،،سوت نور قبل 3 ايام من زواجنا هي حفلة مهر هي حنة وعزمت كل اقاربها وصديقاتها اني رفضت وكتلها من البداية شرطت اذا تسون حفلة مااحضرها
بجت نور وزعلت وجانت دموعها نقطة ضعفي كتلها ماشي رحت نهاية الحفلة جانت ماشاء الله طالعة تخبل بدلة لون ماروني غامق الشعر والمكياج فد شي كصينا الكيكة ولبستها الذهب مكدرت مااكوللها طالعة تطيرين العقل
اخذنا صور وانا اباوعلها واكول بكلبي تبارك الخلاق ودعيت من ربي كون انسى كل الي صار وافتح صفحة جديدة وارجع اتقبلها مثل قبل
نور ،،،جنت فرحانة كلش بيومها وكل صديقاتي اجوي الي يحبوني فرحولي والكل جان حاسدني على صلاح وخاصة بنات عماتي جانوا كاعدين يمي ويتعمدون يسمعوني انه الله يعينها صح دكتور وحلو بس يكولون متشوفة بالسنة حسنة والثانية ترد اوي خطية الله يعينها صلاح من قديم جدي وتفكيرة صعب معقد
متشوفين حبي اخذ من أمهات التسعينات
حتى تكون على كد ايدة وبلا شخصية
نور،،،،كلامهم خرب فرحتي وخلاني اشيل هم وافكر بحياتي وياه ياترى راح اظل على هالصبر لو صبري يخلص بعد الزواج معقولة اكدر اتحمل طبعة هذا لو معاناتي راح تكبر بعد الزواج !!!
وللقصة بقية ،،،،،
