مساء الخير حبايب..
طيف عاشق
البارت الحادي عشر
فكان يحميني
حتى من نفسه
حتى من غضبه
فأحسست بحبه
حتى سميته
ولقبته
بــ طـــيـــفــي الـــعـــاشــــق
لكيت نفسي اسرد بالفصحى مثل طيفي العاشق نفس اسلوبة ونفس وطريقته بالكلام
سيد ابو قيم جلن صافن عليه وماما تباوعلي بأستغراب
خجلت وراسا دنكت راسي مادري يمكن حجيت شي رومانسي او غزل تغزلت بالطيف
ابو قيم ـ واضح عليج هواي متأثرة بهالطيف
ام يوسف ـ كل هالمصايب من جوة راسج يا ام البلة ليش ليش ناقصني هموم ووجع راس حتى تجيبلي جني ولج لييشش
ـ ميفيد الملامة ام يوسف اهم شي التزمو بالتحصينات النطيتهه الكم وهسة ادز علي يوسف وافهمة شيسوي
من طلعنة من حجي أبو قيم
صاح الأخوي يوسف يحجي وياه بس طول شوي يمه
بقت امي طول هالوقت تحجي عليه و تذم بية سمعتني حجي كلش ثكيل بقيت منزلة راسي وخجلانة منهه
ـ بلة اني اروح احضر فواتح واوجب الناس ومأمنة اعوفج انتي وهذنيج بالبيت تالي تخونن الثقة وهيج تسووون
ـ يمة فدوة الناس لاتسمعج شتكول علية شنو خنت الثقة
ـ ليش هي أخانة الثقة بس صداقة الولد ولج هاي همين تخونين ثقتي اني وابوج من تتملعبن بتحضر جني وصخام بوجهجن بس خلي يصبرن عليه الطايحات الحظ خواتج وخالاتج خلي اوصل للبيت اذا ماطيح حظهن اذا ما ااعلكج واعلكهن من شعرهن فلا اني اااام يوسف…
طلع يوسف ما حجى اي شي بس كال يلة دنروح وصعدنة بسيارة صديقة الجابنة
امي كل شوي تنفخ وطالعه روحهه خابرتهه اختي ام كرار راسا سدت التلفون بوجهه وشمرت تلفونهه بالجنطة حسيت بس نوصل امي للبيت امي تشبعني كتل
التفتت اباوع من الجامة على المحلات بالشارع صار حادث كدامنة سيارتين اصادمن وانسد الشارع التفتت اشوف وية امي ويوسف من الجامة الرئيسية للسيارة لمحت صديق يوسف السايق يباوع عليه بالمراية الصغيرة .. كلت يجوز عينة اجتي بعيني مو متقصد
ضل الشارع مسدود بين ما تجو الشرطة وصديق يوسف ابد منزل عينة مني
كلش ضجت من عنده طول الوكت مانزل عينه ولاخجل من نفسة يباوع لاخت صديقة التفتت على الجهة اليمي وعفتة ..
ماانتبهت على شكله زين بس عيونه لونهن بني وكبار ورموشة طوال
كأن عيونه بيها شي مااعرفة شنو… بس اكو شي جذبني
اباوع لامي الزم كلبي من الخوف اشوف شرار يطاير من عيونهه.. اخوية ساكت طول الطريق الا جم حجاية وية صديقة بلة امي عرفت شبيهه بس يوسف شنو كلة ابو قيم وهيج صار مادري
عقلي من التفكير احس رح يوكف هواي اسئله براسي ما الهه جواب…
الطيف ومصيري شنو مادري احس للمجهول طريقي
ماعرف شنو جنت احس من سويت "دعوة الجن"
من غير ماما وكلامها عليه…
أنت تقرأ
طيف عاشق
Mistério / Suspenseالجن ومس الجن وحقيقه تلبسه...حتى اليوم، لا تزال العديد من البلدان والثقافات تفسر السلوك النفسي الناتج عن أعراض بعض الاضطرابات السيكولوجية بأنه نتيجة وجود روح شريرة أو جن يسكن في الإنسان ولا سيما في بعض المناطق الأقل تطوراً في العالم حيث لا تزال مثل...
