صباح الخير
#طيف_عاشق
الجزء الخامس عشر
مرة الايام بسرعه ورغم صعوبة ضروفي الصحية والنفسية لكن الحمد لله نجحت ودخلت جامعه جانت اول ايام صعبة عليه ماكدرت اتأقلم بسرعه لان اني ماردت اداوم بس اهلي جبروني وخلوني تحت الضغط حتى اداوم واطلع من حالتي
اول اسابيع بالجامعه جنت شاردة الذهن ماركز هواي بالمادة يادوب احضر المحاضرة بس عقلي مو يمهم
الطيف شاغل تفكيري ماكو اختفى تماما كلهم اختفو
اصفن على نفسي هاي شبية لازم افرح اكون سعيدة اني بخير وحالتي الصحية بتطور بس ليش هيج ادور الطيف ليش هيج بعدني محتاجة اله
هواي ايام احس رسيس حقيقي بشر مو من عالم الجان الشي الوحيد اليوقفني ويخليني اصدك هو جان من ياخذني لعالمة…
ملهوفة عليه اتمنى اعرف اخبارة اتمنى اشوفة ولو لمحة بس اطمئن عليه
اشهك بجي من اتذكر عيونة المقلوعه وايدة المبتورة ادك بكلبي دك
كلماته التحفر بذهني من يكلي اقسى المخلوقات هم البشر
حقة والله حقة شسويت بي دمرته
هواي ايام جنت المح وجهه بالاساتذة وطلاب الجامعات صرت اروح لحمامات الجامعة ابجي حتى لاينتبهون عليه واغسل وجهي واطلع
صرت اشوفة بوجوه الاساتذة ويايه
ماعرف شلون اتحملت هالتعب والضغط النفسي
حسيت رسيس يعاقبني لان مديضهرلي لان هواي ايام احس بوجودة رغم انقطاعه عني احس بي
مرة اجه اخوية يوسف عليه وكف على السايد الثاني مكدر يستدير بالسيارة لان يم الجامعه جانت هوسة سيارات وخطوط الطالبات فماكو مكان يوكف وبقى بالسايد الثاني
شفتة وعبرت عليه
بعدني ممخلصة الشارع ومادري طلعتلي سيارة برنس دايو جانت تمشي كلش سريع بيني وبينهه اقل من متر يعني مستحيل اخلص منهه الا وهي ضاربتني لكن اندفعت بطريقة غريبة حتى يوسف انتبه عليه كأنو احد سحبني وطرت وانشمرت ومن وكعت متأذيت ابد كأنو وكعت علي دوشك
راسا اتذكرت رسيس من كلي جدتي سكنه وكعت من الحصان وهو لزمهه حتى لا تتأذة
ارتجيت على سيارة اخوية الم نفسي اعدل حجابي ما اسمع اصوات الناس اليمي ولا اعرف شديحجيون
بس احس رسيس يمي على موجود يحميني اتمنيت احجي واكولة وينك رسيس اضهرلي
وكفت السيارات عبالهم اتأذيت وابو البرنس نزل يصرخ والله ماوصلتهه مادعمتهه شلون طارت هالبنية
اخوية تعارك وية ابو البرنس والتمو الناس والشرطة واني كاعدة بمكاني حتى جرح منجرحت ولا تأذيت بشي اجو الناس عليه والتمو الطالبات ويايه بالجامعه يشوفوني واني كاعدة على الرصيف
أنت تقرأ
طيف عاشق
Misterio / Suspensoالجن ومس الجن وحقيقه تلبسه...حتى اليوم، لا تزال العديد من البلدان والثقافات تفسر السلوك النفسي الناتج عن أعراض بعض الاضطرابات السيكولوجية بأنه نتيجة وجود روح شريرة أو جن يسكن في الإنسان ولا سيما في بعض المناطق الأقل تطوراً في العالم حيث لا تزال مثل...
