90 يوم

البارت الثالث

البارت الثالث
🎀 90 يوم 🎀
#بقلمي_شمس

جردونا من كولشي نملكه .. فلوس خواتم حلقات محفضاتنا مخلوا شي مااخذوه ..
ولد ويانا ماقبل ينزع الخاتمه . ضربوه طلقه براسه
واخذوه ..
بهذي اللحظه عرفت هاي نهايتنا ..
حيدر گاعد يتشاهد .. ومستسلم ..
كرار .. انتو تحجون صدگ مستحيل استسلم ..
حيدر .. ماكو مهرب ..
كرار .. نغير اسمنا نگول احنه سنه ..
حيدر .. لو اموت مااسويها ..
مدام آني من شيعة علي
ميهمني حتى اذا قتلوني ..
حاولت وياه ..مقبل وگال :
اذا تبيع ولاية علي فأنت جبان ومو شيعي ..
ضجت حيل من كلامه ..
وهذا اخر كلام بينا .. #شمس
لان اجو مسلحين ونزلونا .. قسمونا مجموعات ..
واخذوا حيدر من يمي وي المجموعه الي قبلي ..
هو عينه عليه ..
عيونه بيها ثقه وماكو خوف ..
بس بيهن ضعف اتجاهيلان فرقونا ..
نضرته ماگدرت افسرها ..
ضربه المسلح ع راسه وگله ..
نصي راسك لاترفعه .. وامشوا لگدام ..

احنه صعدونا ووياي محمد .. اخذونا ع نهر دجله ..
والبقيه اخذوهم للقصور الرئاسيه ..
بس حيدر ماشفت ولاعرفت وين اخذوه ..
بقى بالي يمه وتفكيري  ..

وصلنا ع ضفة نهر دجله ..
قريب من القصور الرئاسيه ..
اكو منصه تطل ع النهر ..
الدواعش سووها مذبح لطلاب
القوه الجويه .. طلاب سبايكر

الي كل واحد بيهم عنده عائله
والي بيهم متزوجين وعندهم اطفال
وحيدر واحد منهم .. #شمس

سوونا صف واحد .. ويسحلون بينا
واحد واحد ..
وكل الي يلزموه يذبحوه بدم بارد ..
ويشمروه بالنهر ..
دجله صار عباره عن لون احمر بدمهم .

شفت الموت قريب عليه .. ولازم اسوي شي
گمت اعيط واحجي وي الي ورايه ..
يولو ع كيفك .. عجل كولنا حنموت لتستعجل

غيرت لهجتي .. واحد من المسلحين انتبه ع كلامي
جرني من الطابور الي مسويه .

هو لهجته سعوديه او خليجيه مااعرف ..
گلي .. انت شنو اسمك ومن وين
بسرعه اجاني اسمي ببالي لا على التعيين
لان اذا گلت كرار اكيد يعرفوني شيعي
وقتلي يصير لامحال ..
گتله .. اسمي عمار الشمري ..
من عشيرة شمر السنيه ..
گال وين ساكن .. گتله عشيرتي كولهم بالفلوجه
بس اهلي ساكنين ببيجي ..
واحجي وياهم بغير لهجه ..
لان كان واحد صديقي من الغربيه
وحفظت لهجته كانوا ساكنين يمنا
وبعدين رجعوا للفلوجه ..

بقى يسأل ويحاول يتأكد اني سني
او دا اكذب ..
گلي .. شنو الي جابك للقاعده وي الشيعه
گتله .. حالي فقير وردت اصير بالقوه الجويه
واجيت قدمت .. ليش هي القاعده خاصه بالشيعه ??
سويت نفسي غشيم ..
گتله عدنا هوايه سنه بالقاعده ..

هو استغرب .. انطه اوامر گال اتأكدوا منهم قبل
لتقتلوهم لان اكو سنه ..
واحنه نريدهم معانا مو ضدنا ..

گلي انت تصلي ..
گتله .. لا .. خفت لايگلي صلي واني مااعرف السنه
شلون يصلون ..
صاح .. ابو عبد الله علموا للصلاة بعد مننهي امر
هؤلاء الخونه .. #شمس

حسيت بطمأنينه .. بس بقت عيني ع محمد
هو منصي راسه وميشوفني
بس اني اشوفه
جروه گدامي وهو يرعش .. وبلا رحمه ذبحه
اي ذبحه گدام عيني .. من عمت عيني ياخوي
ولااشوفك مذبوح ..
جسمه بقى يرافس وحده .. والدم يطفر ..
واني عيوني غورگت بالدموع
بس حبستهن بالگوه ..
دفعوه برجليهم بالنهر..

اخوي وصديقي راح گدام عيني ..
گلبي ينزف دم وعيوني صارن جبده حمره ..
درت وجهي ماردت اشوف
اصدقائي وااخواني صحيح
عشت وياهم فتره قليله بس ذوله مسلمين
وقبل كولشي روح .. شلون يكون
موقفك وانت تشوف شخص مذبوح
ويرافس گدامك ..#شمس

ياربي ذولي شنو ماعندهم گلب
شلون هيج يقتلون بدم بارد ..
كلما اتخيل محمد .. اموت الف موته
بودي اسحب السلاح منهم وارميهم ..
بس هم اكثر مني ومااگدر ..

اوووف ياخوي يامحمد موتك گبال عيني اخذ حيلي ..
احجي بداخلي وميت ..
وافكر بحيدر وين صار وشنو مصيره ..
بقيت الوم بروحي..
واحس نفسي اناني شلون تركتهم
شلون تركت حيدر ياخذوه واني ساكت ..
وشلون قتلوا محمد گبال عيني واني ساكت ..
ليش مادافعت .. ليش مامتت وياه
شلون نطاني گلبي اشوفهم يرحون
مني واني كولشي مابيه ..
وشنو مصيري ..
معقوله يصدگوني لو يقتلوني ..
كلها اهون .. بس لا يشغلوني وياهم
اقتل نفسي ولاانذل الهم .. #شمس

افكار تاخذني وتجيبني واني عيني ..
ع #دجله_الحمراء
اي هذا الاسم يليق بي لان تلطخ بدم الشهداء
دم الابرياء الي لا حوله ولا قوه الهم ..

شويه واجه هذا السعودي ..
گال اخذوا عمار وياكم للمقر واحتجزوه وي البقيه
وبعدين نشوف شنو قصتهم ..

اخذوني ورحت صعدت بالسياره ..
مرينا من يم القصور الرئاسيه واني عيني
تدور حيدر بلكي اشوفه اطمأن عليه ..

مسويهم مجاميع ومنيميهم بالگاع ويرمون عليهم
بدم بارد .. لعنة الله عليكم ..
الي وياي بالسياره يضحكون بأستهزاء
وكأنه محققين نصر كبير ..

بداخلي .. ولكم ولد…… لو انتو صدگ
رجال كان ماخذتوا سلاحنا منا وواجهتونا
ونخليكم تشوفون النصر ع أصوله…

بذيج اللحظه نسيت اهلي ونور .. #شمس
تفكيري شلون نخلص منا .. وشلون ادور حيدر
ووين الگاه ..
وحتى اذا رجعت الاهلي شنو اگلهم اجيت بلا حيدر
خلصت نفسي وماگدرت اخلص اخوي

واذا سألوني اهل محمد شنو اگلهم ..
شفته انذبح گدامي وماححجيت بقيت ساكت

من حرگتي بقيت اگرص برجلي حسيت الجلد
انخلع من مكانه ..
بس ماكو وسيله اطلع بيها الالم الي بداخلي ..
#بقلمي_شمس
يتبع…
………………………….………………

احبتي صحيح الاحداث الي بالبدايه حزينه .. بس القصه بيها احداث هوايه ..
ولازم اسرد الكم الي صار وي كرار وشلون اثرت ع حالته النفسيه ..
وشلون راح يتجاوز الي شافه ..
لهذا اعتذر اذا سببت الكم بالحزن او قلبت مواجع مجزره سبايكر..
بس هي قضيه ماممكن انه ننساها ولازم تخلد وتذكر

تحياتي الكم احبتي ❤
شمس…