90 يوم

البارت الخامس

البارت الخامس
🎀 90 يوم 🎀
#بقلمي_شمس

لا استطيع تخيل حياتي من دونك
رغمِ ابتعادك عني الا انني في كل يوم . . اقول . .
ربما اليوم ، ربما غدا ، ربما الشتاء القـادم. . . . سيـعود
لذا تاكدت باني لن امحيك من حياتي . . مهما زدت ابتعادا عني..
ستبقى بالنسبة لقلبي الاقرب ..

كرار مهما طال غيابك ستبقى انت مالك قلبي الوحيد ..
طبعا ماما زادت عليه تجريح بكلامها ..
وتگلي انسي وابدي حياتج ..
واي احد يتقدملج ازوجج مااخليج .. #شمس

نور .. لازم نسيتي اني متزوجه .. وزوجي ع ساعه
يجي ومستحيل اتركه واتزوج غيره ..
مستحيل يلمسني غيره ..

……..كرار…….
بقيت كم يوم مسجون بغرفه وياي شباب مااعرف عددهم شگد يمكن 20 ..
الهم والحزن اكل گلبي والتفكير اكل عقلي .
شنو مصيري ووين اخوي الي لسا مااعرف
مصيره .. وشنو الي صارله ..

شويه وانفتحت الباب اجو مسلحين .. گالو تعالوا الامير يريدكم ..
ياامير مانعرف بس واحد گاعد ورى مكتب وعنده لحيه طويله ..
وداير مدايره مسلحين ..
گال .. ذولي كولهم سنه ..
رد عليه واحد .. گله يامولاي هم يدعون انهم سنه
بس ماكو اي شي يثبت حتى هويه ماعندهم تثبت صحة كلامهم .. #شمس

الامير مالتهم .. گام يسأل ويحجي وي كل واحد ع حدة والي يشك بأمره كذاب ينطي امر قتله ..
وياخذوه للساحه يرمون عليه ..

اني استمريت بكلامي الي تعلمته من صديقي ..
وحتى الساني اخذ عليه لان صار كم يوم اني احجي هيج
بالغرفه حتى محد يشك بيه ..
وخفت لامخلين كاميرات حتى يكشفونا ..

طبعا محد شك بيه .. وصفونا بقوا من عدنا 11 واحد والبقيه قتلوهم ..

احنه گاموا ياخذونه وياهم الكل مكان يطلعوه ..
ومن يسوون اعدامات ..
مااعرف شنو غرضهم بس يمكن حتى يفهمونا انه الي يخطأ وياهم هذا مصيره ..

اني من اشوفهم شلون يحرگون ويقتلون بدم بارد
دمي يفور واقبض ع ايدي حيل .. بس مابيدي شي اسويه .. #شمس

والليل كله اگظيه ابجي ع نفسي .. وع محمد وحيدر الي مااعرف وينه ..
يمكن قتلوه ويمكن بعده مااعرف ..
كنت اتمنى لو مقتول وي محمد ولا عايش هيج ..
مجهول المصير .. مااعرف وين الدهر ياخذنا

كل يوم انام واخاف اصحى ويقتلوني اليوم ..
التفكير بأهلي وشنو مصيرهم واكيد سمعوا بخبرنا
ويمكن سوولنا عزا ..
ونور .. معقوله عبالها متت وتتزوج وتتركني ..
والتفكير الاكبر .. بأخوي وسندي .. خلي الناس يعتبرونا
ميتين مايهم ..
بس الاهم .. اخوي عايش والگاه بيوم وننهزم سويه
هذا الي مصبرني شويه ..

كنت كلما اطلع من المقر اتباوع بالوجوه بلكي اشوف حيدر ..
وبنفس الوقت مااگدر اسألهم عليه لان حيشكون ويقتلوني ..

علموني ع صلاة مااعرف شنو من صلاة لاهي صلاتنا
ولاهي صلاة اخواننا السنه ..

صلاة غريبه عجيبه ولازم نصليها مجبورين ..
كنت كل يوم استغفر ربي 100 مره واكثر
واگله اعرف صلاتي خطأ .. بس مضطرين

وياي ولد سني اسمه عادل .. يگلي بحياتي مشايف هيج صلاة .. #بقلمي_شمس
اني ماحبيت اختلط بأحد اخاف ينكشف امري ..
بس الولد حبابين ..
وحتى اعترظوا ع قتل الدواعش للشيعه ..
وگاموا يبجون ع المنظر الي شافوه وهم ينذبحون ..

غطيت راسي وسويت نفسي نايم مااتحملت كلامهم
وابجي واجه مقابيلي صوره محمد وهم يذبحوه حسيت نفسي اختنگت وبعد مااگدر اتنفس ..

اريد اخذ هوا ماكو .. احس جسمي انشل ..
اجه شريط حياتي مقابيلي ..
شلون كنت عايش وي اهلي وقصه حبنا اني ونور ..
وشلون كنت اوصلها للمدرسه وارجعها ..

وشلون من قدمنا ع القاعده ومن گالوا حيصير هجوم ..
كوله هذا اجه مقابيلي مثل الفلم الى ان ذبحوا محمد ..
شهگت حيل وحسيت روحي نسحبت ..
واغمى عليه مااعرف متت ..

بس صحيت من جديد وكأنه هسا انولدت .. اتباوع الروحي اني وين وانتو منو ..
كل واحد لحيته شطولها .. #شمس

گالوا اسمك .. سكتت مااتذكر حتى اسمي الحقيقي وهمزين متذكرت .. لو گايل بوقتها كان اني هسا مذبوح لو محروگ لو مرمي بالرصاص ..

گال واحد منهم ولابس صدريه مال اطباء ..
الحمد لله والشكر .. يااخي اصبت بنوبة افقدتك الوعي
وكانت روحك على وشك الخروج ..
لكن الله تلطف بك وقد بعثت من جديد..

كلام مافهمت اي شي منه .. بس الي عرفته تعرضت النوبه او جلطه مااعرف ..

گوموني ورحت للغرفه .. تلگوني الولد وللامانه اعتنوا بيه زين ..

بقينا ع هذي الحاله مده شهر وكل يوم  نشوف اشد انواع القتل والارهاب بحق الابرياء ..

تفكيري كله يم حيدر واني مااعرف مصيرة شنو وكلي امل الگاه عايش ..

اهلي مااعرف اخبارهم .. بودي اتصل عليهم واخبرهم اني عايش ..
بس اذا سألوني ع حيدر شنو اگول ..
شنو اجاوبهم واني مااعرف اخويه وين واذا ميت جثته وين ..
اويلي عليك خويه .. ياليت اشم ولو ريحتك اشتاقيتلك
واتذكرت اخر كلماته الي ..
من يگول .. ماابيع ولاية علي حتى لو قتلوني ..

وبقيت الوم نفسي .. معقوله اني بعت ولايه علي معقوله غدرت بديانتي وباهل البيت ..
بس اني كنت مجبور ومضطر .. گمت ادور مبررات النفسي حتى ابرأ نفسي مقابيل ربي العالمين ..

اذا اني حتى صلاتي مااعرف شلون اصليها ..
ومااعرف اذا الله يتقبلها لو لا ..
#بقلمي_شمس
يتبع… ..

…………………………………

احبتي اذا عجبتكم القصه لاتنسون التصويت ..

واذا معجبتكم گولوا حتى اوقفها .. لان دا اشوف التفاعل قليل وميسوي واهس للكتابه ..
القصه حلوه واحداثها هوايه صحيح بيها احداث حزينه .. بس لاتستعجلون .. انتظروا القادم ولاتنسون التصويت
احبكم .. الكاتبة شمس
تصبحون ع خير