90 يوم

البارت التاسع

البارت التاسع
🎀 90 يوم 🎀
#بقلمي_شمس

ماما .. اتزوجي واثبتيلي مابيج شي ..
نور .. هههههه هسا عرفت لوين تردين توصلين ..
كل هذي الهوسه واللطم . وتهمتيني باطل حتى تجبريني اتزوج ..
مستحيل اتزوج غير كرار .  انسي يوم ..
واذا تردين ترتاحين .. باجر نروح الدكتوره اذا هذا الشي يريحج .. #شمس
وهسا من رخصتج ماما .. اريد اقرأ وورايه صلاة الليل اصليها .. ( هذي الصلاة من راح كرار لحد الان ماتركتها نذرتها الكرار واذا رجع هم مااتركها ) ..

خليتها تطلع قفلت الباب .  وگعدت ابجي ع حظي اذا امي هيج تتهمني ومتصدگ بيه ..
ولو اني اعرفها لعبه حتى تجبرني اتزوج ابن امه جلال ..

بقت الكل تضغط عليه وحتى عماتي وعمامي ..
كل يوم رافد دازله واحد حتى اوافق ..
بس كنت دايما اخجلهم .. ومااقبل واكو يطلعون زعلانين عليه ..
هاي مشكلتهم .. دا اگلهم كرار زوجي ومااتزوج غيره بس هم مصرين يعاندون ويفتحون الموضوع بكل زياره النا ..
صار همي الوحيد الدراسه وبس .. طبعا بعد كرار لان الاولويه الحبيبي ❤️

…………………………………………………

كرار .. اليوم صار 90 يوم ع المآسي والاعتقال الي صار بسبايكر ..
اجو گعدونا من الصبح ..
گالوا الامير يريدكم .. #شمس
رحنا للامير يفتر بالساحه ..
طلعنا عيونه غمضناها لان الشمس قويه واحنه صار اسبوعين مشايفين شمس ..
گال .. احنه آسفين لان خليناكم كل هذي الفتره .
بس ردنا نتأكد ..
واليوم راح نحرركم .. واكو سياره حتوصلكم للگراج
وترحون الاهلكم ..
بس الي اطلبه منكم .. انه تحسنون صورتنا مقابيل اهلكم وعشيرتكم ..

وتگولولهم عاملناكم بالحسنى .. ونطلب دعمهم النا ..

ركبونا بسياره وطلعنا ..
بداخلي بين فرحان وبين حزنان ..
اذا وصلت الاهلي شنو اگلهم ..
وشراح اگول الاهل محمد .. #شمس

اجيت فرحان لان اداوم بالقاعده ..
وهسا راح اطلع من تكريت .. انسان محطم مكسور ضلعه من جهه اخوه ومن جهه صديق عمره ..
غير الي شفته من قتل وتعذيب .. احس نفسيتي متدمره
اني مو كرار اني انسان ثاني .. نسيت نفسي وضحكتي وحياتي ..
وماببالي بس ذكرياتي السوده بهذي الفتره .. 90 يوم من المعاناة والقهر والالم .. الم الروح مو الجسد
90 يوم كبرني 90 سنه ( بقلم الكاتبه شمس)
احس نفسي عشت بفترة شيخوخه مبكره ووصلت للنهايه

انتبهت ع الطريق وفكرت .. اذا وصلنا للگراج راح يسألون وين تروح واكيد هناك مليان دواعش ومسلحين ..

قررت انهزم من السياره وادخل ع المزارع والبساتين واطلع ..
جازفت ومااعرف مصيري ..
فعلا اتباوعت الولد كلها غافيه .. طفرت من السياره
وركضت بين المزارع والاشجار ضيعت روحي ..

بقيت امشي وامشي الى ان وصلت المزرعه وشفت رجال كبير بيها .. #شمس

شافني گال ابشر وليدي . محتاج شي ..
اتقربت يمه ..
گتله اني وين هسا ..
گال اني عمك سالم .. من الجبور .. واي مساعده اني حاظر ..
ارتبكت خفت يسلمني الداعش ..
گتله اني من بيجي وكنت اداوم بسبايكر واليوم حرروني وتيهت الطريق ..

گال من طلاب سبايكر الله يساعدكم وليدي ..
ويرحم الراحوا ..
دمعت عيني .. ومسحتها بسرعه لاينتبه ..

گال تعال وليدي ارتاح واتغدا ..
واني وين تريد اوصلك .. #بقلمي_شمس

گتله .. مشكور عمي .. بس دلني ع الطريق واني اروح
خفت بداخلي .. گلت يريد يلهيني بالغدا وتالي يخبر عني

گال .. لاتخاف بويه ادخل واني يمك مااتحرك ..
دخلت بعد الحاح منه .. غسلت وجاب الغدا وگعد مقابيلي بعدني اول لگمه ..

گال .. انت مو سني ومو من بيجي .. انت شيعي
ارتبكت وگمت من الاكل ردت انهزم
لزم ايدي ..
سالم..  يابويه لاتخاف انت بأمان اني كم ولد اجو منا هم منهزمين من سبايكر بس هذا الحجي اول مااخذوكم
الله نجاهم وانهزموا واجوا لهنا واني وصلتهم البر الامان

يابويه اني اسلم روحي ومااسلمكم .. افديكم بروحي
اني وي المظلوم ع الظالم ..

ارتاحيت من حجى وحسيت من كلامه صادق ..
انفجرت بالبجي ..
دموع كنت خازنها 90 يوم طلعتها هسا ..
گتله اخويه مختفي مااعرف اخباره ..
وصديقي ذبحوه مقابيلي ..
واني ادعيت انه سنني وتركوني .  بس بعد أسر وسجن
90 يوم .. #شمس

سالم .. شد حيلك وليدي . الله يرحم الماتو ذوله شهداء
واحياء عند ربهم .. واذا اخوك عايش الله يجمعكم سويه ..

باوع وليدي هسا مو وكت طلعه انت ابقى اليوم هنا وباجر من الفجر اهربك ..
لان هسا الدواعش يفترون ومانگدر نتحرك ..

فرشلي وگلي نام ولاتخاف ..
البيت فارغ يمكن بس هو وزوجته بي ..
نمت بالفراش والمبرده مقابيلي ..
غفيت وحسيت روحي اول مره انام

هناك نومتي كلها بقلق واحس كل ساعه اجو يقتلونا
هنا حسيت بالامان وخاصه كلام عمي سالم ووجهه منور ويريح النفس .. #شمس

صحيح نمت مرتاح .. بس كل ساعه افز واطفر خايف لو احلم بمحمد لو بحيدر لو عبالي بعدني بالمقر مال دواعش ..

احس روحي تخبلت وگمت اهلوس ..
مااعرف شلون خلص الليل واجه الفجر صلينا وطلعنا ..
الرجال عنده كيه حمل صغيره ..
وبيها انواع المخضر والفواكه .. وحتى گواني علف
خلاني جواهن وغطاني وخله الصناديق فوگاي ..

خاف يلاگينا احد من الدواعش ..
الطريق كله يمشي واني جوه ماادري وين وصلنا ووين راح نروح ..
مشينا هواي واني نايم جو الغراض حسيت روحي اختنگت ..
الى ان وگفنا بمكان .
وسحب الصناديق وطلعني . گلي گوم بويه وصلنا ..
#بقلمي_شمس
يتبع… .