90 يوم

البارت الحادي عشر

البارت الحادي عشر ..
🎀 90 يوم 🎀
#بقلمي_شمس

البيت متروس ناس وامي حاضنتني متقبل تتركني ..
تالي ..
اتباوعت النور .. وگالت بس هاي الاصيله الي گالت عايش وانتضرتك ..
اتباوعتلها ابتسمت ..
وهي عيونها غرگانات بالدموع ..

شويه ودخلوا خالي ابو نور حظني ويبجي ومرت خالي سلمت عادي .. ادري بيها ماتحبني من زمان ..

گلتلهم اريد اسبح وابدل ..
ام حيدر .. اي يمه اصعد الغرفتك والحمام فوگ يمك ..
يمه نور روحي ساعديه وطلعيله ملابس ..

نور .. صعد كرار . صعدت وراه .  شفته يتباوع للغرفه
حضنته من ضهره وخليت راسي ع كتفه ..
وگتله كل يوم اجي ارتبها وانضفها لان ادري بيوم راح ترجع

التفت عليه وباسني بگصتي .. وگال نور انطيني فتره ..لأن تعبان والي شفته مو شويه ..
مو تزعلين اذا شفتيني بارد وياج ..

نور .. عادي حبيبي اني انتضرتك كل هذي الفتره ومستعده انتضرك عمري كله ..
نطيته ملابسه وراح يسبح ..
وكنت اتمنى يحضني ويشتاقلي مثل اشتياقي ..
بس عذرته لان اكيد مكسور من الي صار وتعبان ..

نزلت لجوه لگيت البنات مخبوصات يركبن ويطبخن لان عمامي وعماتي وعمامهم كولها اجت واكيد عشاهم هنا…
گمت اساعد البنات وغسلت الدجاج وخلينا گدر كبير وبدينا نطبخ ..
والجيران ويانا .. كلها فرحانه بجيته ..

لأن هو محبوب بالمنطقه وكلها تحبه ..
جيرانه گالت عجنت وراح اخبزلكم لتشيلون هم الخبز
بنات عماتي وعمامي هوايه كل وحدها أخذتلها شغله ماحسينا بالعشا ..

سوينا تشريب ودجاج وتمن وتبسي وحلاوه وسلطات وروبه ..
بساعه طبخنا كل هذا لان كل وحده لزمت شي خلصنا بسرعه ..

فرشنا سفرة الرجال بالاستقبال وحدهم ..
والنسوان بالصاله ..
الفرحه كانت مسايعتنا .
بس كان اكو بعد حزن بعيونا . وسؤال كرار يحاول يتجنب الاجابه عليه ..
حيدر وين .. وشنو مصيره هذا الشي الي بعيون الكل ويحاول يسأل بس يخافون من الاجابه ..

او يمكن يخافون ع مشاعر كرار .. لان حالته متسر لا صديق ولا عدو ..

كرار سبح ونزل سلم ع عمامه وخواله بالاستقبال والجيران ..
بس كان يتجنب الكلام .. #بقلمي_شمس

شويه ودخل رافد للمطبخ ..
اتباوعلي .. اتباوعتله وابتسمت .. گوتله .. كرار رجع وعايش الحمد لله ..
رافد .. قرة عينج برجوعه ..
حجاها بحزن ومعصب .. عبالك ضايج لان رجع كرار ..
بس مااهتميت ..
وماخليت شي ينغص فرحتي ..
سويت الجاي وحضرت الاستكانات .. وفرحانه ..

كرار مااكل يمهم طلع ..
گعد يمي بالمطبخ .. گال اكو عشا بقى ..
نور .. هذا خيرات الله .. اصبلك ..
كرار .. ياليت مااريد اكل يمهم ..
صبيت اكل تمن وتبسي ودجاج وسلطه وحلاوه ..

وخليتها ع الطاوله ورحت اشوف الجاي ..
گال .. انتي تعشيتي ..
التفتت وابتسمت .. انت عشاي حبيبي ..
كرار بأبتسامه .. تعالي اكلي وياي افتحي شهيتي
جوعان ومااكدر اكل نفسي مسدوده ..

قهرني .. گعدت مقابيله وگمت اقسم اله دجاج واخلي بحلگه ..
اكل شويه وگال مااگدر بعد شبعت ..

اجت عمتي تغسل وماما ..
عمتي الله يسعدكم يمه ويوفقكم ..
وماما تگرص بيه شبيها ماادري ..

گالي حطلع شويه للحديقه اشم هوا ..

البقيه خلصوا عشا بدوا يشيلون المواعين .. واحنا گمنا نصفي ونغسل ..

ومانحس الا الباب تكسرت ..
اتباوعت .. كرار داخل للاستقبال ماهو بالحديقه ..
طلع رافد يفتح الباب شافني بباب المطبخ ..
ابتسملي ..
تركته ودخلت شگد مزعج .. يعني كرار رجع وهو بعده يلمح ويسوي حركات ..

سمعنا صوت رجال يبجي .. ويصيح يابويه يامحمد كرار وينه اخوك وصديقك ..
تركته واجيت . 
الرجال يعيط ووياه ولد اثنين .. ومريه دخلت وياهم تبجي طلع كرار تلگاهم حظن الرجال وگعدوا بالگاع يبجون ..

احنه نتباوع من شباك المطبخ .. الموقف يبجي ..
الرجال يعاتب كرار ..
يگله محمد وين احجيلي وين راح اخوك .. شلون عفته وحده ..

كرار گام يعيط اتهستر .. ماتركته ماتركته هو التركني وراح .. ذبحوه گدام عيني تعرفون شنو من يذبحون صديقك گبال عينك وماتگدر تحجي ..

تعيش الليالي والايام كلها تتخيل صورته گبال عينك ..
اختنكت وصارت عندي جلطه من ورى محمد ..

بدوا اهله يعيطون وامه وگعت وتصيح .. وليدي ميت ثلاث اشهر مذبوح واني عايشه وگامت تلطم ع راسها
شالوها ولدها وطلعوها ..

عمي ابو حيدر من سمع كرار يحجي ويبجي ..
گاله واخوك وين حيدر وين ..
كرار .. اوووووف يابه حيدر تركني وراح بس ماادري وين وشنو مصيره ..
قسمونا مجاميع واخذونا ..

اني وصيتهم هو ومحمد .. گلتلهم لاتگولون انتو شيعه گولوا احنه سنه .. ماقبلوا ..
وحيدر رزلني وگلي لو اعرف اموت ماابيع ولاية علي ..
من هاي وبعد ماشفته ..
ولااعرف شي عنه .. يعني اني طلعت مو زين وبعت ولايه علي ..
زعل عليه وراح ..
اني ماسويت شي بس ردت انقذ روحي بس مابعت ديني ولا اهل البيت ..

ولكم اني عانيت اكثر منهم .. كولهم ماتوا وارتاحوا ..
واني شفت الويل وكل يوم اتمنى الموت ومااموت ..

كرار گام يبجي ويدگ ع راسه ابوه حضنه ويبجي .. گاله اخوك اذا عايش يرجع مثل مارجعت ..
المهم مو اثنينكم خسرتكم .. واحد منكم رجعلي ..

اتحاضنوا ويبجون ..

اما ابو محمد خطيه تخربط ونقلوه للمستشفى  ..

كرار بس يعيط ويصيح محمد سوده عليه خويه ..

عمتي تخربطت من سمعت ماكو خبر عن حيدر .. وگالت لو ادري بي ميت ع الاقل انصب فاتحته وابجي عليه ..

شفت موبايلي يدگ .. اتباوعت هاي الآء مرت حيدر ..

#بقلمي_شمس
يتبع… .