90 يوم

البارت العاشر

البارت العاشر
🎀 90 يوم 🎀
#بقلمي_شمس

گال گوم بويه وصلنا البر الامان ..
ساعدني وطلعت .. اتباوعت گتله احنه وين ..
گال اطلع گبل بويه الك وماتمشي ..

تلگي هناك محلات ابعد عنهن .. دور شوفلك سياره ..
اي سياره تلگيها اصعد بيها ..
وهو يوصلك ..

كرار .. يعني احنا طلعنا تكريت ..
سالم .. اي بويه طلعنا انت هسا بالامان ..
ومد ايده ع جيبه طلع فلوس وخلاهن بيدي ..

كرار .. رحم الله والديك عمي اني بس يصير عندي مجال ارجعهن الك ..
سالم .. بويه محلل وموهب مااريدهن اهم شي سلامتك وترجع الاهلك وناسك ..
حظنته وگتله عمي اريد الله يجازيك بالدنيا والاخره ان شاء الله ..

مشيت ورجليه تركض .. مامصدگ راح ارجع الاهلي ..
وساعه اوگف واريد ارجع ..
اذا وصلت شنو اگلهم . لو سألوني عن حيدر ومحمد ..

اكو ولد من محافضتنا هم شفتهم انعدموا ..
هذولي لو اهلهم دروا بيه اني انهزمت من داعش وسبايكر ..
هم يجون يسألون ع اولادهم ..
شراح اگلهم ..

اخذت الطريق كله تفكير .. واني بعالم ثاني وماحسيت ع روحي وين اني ..
التفتت اتباوعت المحلات الگال عليهن صارن ورايه بهواي ..
بقيت واگف ردت سياره ماكو ..
صار الظهر والشمس تكتل .. بقيت امشي وسمعت سياره ورايه ..
التفتت وگف السايق .. وين رايح البغداد ..
گتله لا ..
گال اصعد خويه واني اوصلك وين متريد ..
صعدت وخايف ..
مااعرف اثق بأحد بعد الي شفته ..
احس كل الناس وي داعش ..

مع انه الولد حباب .. والطريق كله يسولف ويضحك ..
بس اني مااعرف اضحك .. احس نسيت الضحكه والمزح

مع انه كنت اكثر واحد يضحك ..
حتى الولد گال .. لازم انت من النوع الي ميحبون يحجون بالطريق ..
هزيت براسي واعتذرت منه ..

الطريق صار شطوله .. احس قربت من المحافظه ..
گتله نزلني هنا ..
ماردت يعرف وين عايش ماادري ليش اخاف ومن منو ..
واني اعرف الدواعش مايجون لهنا ..

بس ماادري ليش هيج احساسي ..
نزلت نطيته العندي من فلوس .. گال خليها علينا خويه واني من بغداد واحنه كلنا اهل ..
تشكرت منه واعتذرت منه وگتله سامحني خاف ثگلت عليك بالطريق ..
نطيته العندي ومااعرفهن شگد .. وراح

مشيت شويه .. أجرت سياره نطيته العنوان .
گال سبعه ..
گتله وصلني والي تريده حاظر ..
اني ماعندي فلوس بس گلت اوصل اخلي اهلي يدفعون ..

مشيت وحسيت الموعد قرب وراح اشوف اهلي ..
ياترى .. ناصبين فاتحتي هسا ..
لابسين اسود علينا .. #بقلمي_شمس

السيارة تمشي واني اتباوع ع الشوارع وحابس دموعي
لازم الشباك واتباوع عبالك اول مره اشوف المناطق
بس ماكنت متوقع يوم ارجع ..
بعد 90 يوم من الالم والوجع ..
وصلت شارعنا وقربت من بيت نور صارت عيني عليه
بس مااعرف ليش ماحسيت بمشاعر ..
احس مشاعري ميته ..

نزلت يم بيتنا مسدود واحسه اظلم رغم احنا بالعصريات
وگفت بالباب شافوني ولد جيرانا يلعبون طوبه بالمتوسطه اعمارهم هيج ..

عرفوني بسرعه رغم مااني ضعفان ولحيتي طويله ..
بدوا يبشرون ويعيطون ..
كرار عايش .. كرار رجع ..
افتهمت من كلامه يعني عبالهم ميت اني ..

دگيت الباب طلع ابويه .. كبران حيل ومكسور ..
نزلت دموعي حظني وگام يعيط ..
يابويه وليدي .. ليش هيج موتونا عليكم مااتحمل ووگع بالگاع شلته وسندته بأديه
گال انتوا سندي ورحتوا مابقالي سند ويبجي . الحمد لله ياالهي من رجعتهم .. گال ..
.. واخوك وين ويباوع للسياره ..

سكتت گتله بويه حاسب السايق ماعندي فلوس ..
نطاه فلوس وراح السايق بس شفت دموعه تنزل ع الموقف ..

الشارع كله تجمع علينا بهذي الدقايق والناس تبجي وتعيط والي يهلهل ..
مااشوف بس هوسه .. دخلت وسمعت صوت عياط وراي
كراااااار ..
التفتت لگيت نور تركض بعبايتها واجت حظنتني وتبحي وتتلمس بوجهي ..
انت كرار اي كرار .  تضحك وتبجي ..
وربي گلتلهم كرار عايش مايتركني .. شوف حتى مالبست اسود .. كلها لبست واني وعمتي مالبسنا گلنا بعدكم عايشين ..
حاظنها واشم بريحتها اشتاقيتلها حيل ..

بس مااگدر اعبر عن مشاعري .. لأن احسها ماتت احس روحي تعبان ..
گلتلها نور تعاي خلي ندخل الوادم التمت علينا ..

نور…..  اني دا اغسل بالطرمه مالتنا وسمعت اولاد الشارع يصيحون ..
كرار ابن ابو حيدر رجع ..
كرار عايش ..
گلبي گام يرجف ويدگ حيل . لبست حجابي اتباوعت من الباب ..
شفت الناس هوسه يم بيت عمتي ..ركضت للبيت اعيط وفرحانه وابجي ..
بابا بابا .. كسرت باب الغرفه ..
فتحت الباب ماما ..
شكو شبيج تخبلتي ..
اتباوعت بابا گاعد يباوع تلفزيون ..
گتله بابا كرار رجع .. كرار عايش ..
ماما .. لا هله ..
اتباوعتلها بغضب .. گلتلها مع الاسف ..
اخذت عباتي وركضت .. وهي بقت تعيط وراي ماسمعتها وتركت بابا يلبس دشداشته ..
گال انتضريني . طلعت وماسمعته ..

دخلنا البيت عمتي وحضنته وشميته واتلمس بوجهه ضعفان واللحيه كبيره ..
واحسه مكسور مو ذاك كرار الي اعرفه ..
مو كرار الي احبه ..

بس مااهتميت المهم .. رجعلي وعايش ..

دخلنا تلگتنا عمتي بالمطبخ خطيه بعدهم تمرضت وماتگدر تمشي ..
وگعت ركض كرار الها وگعدوا بالگاع متحاضنين ويبجون
وكولنا نبجي ..
وهي تگله ليش هيج يمه عفتوني ..
واتباوع للباب وتگله اخوك وينه مااجه ..

كرار .. ماعرفت شنو اجاوب .. گومتها ورحنا للصاله گعدنا وهي تتلمس بوجهي وحاضنتني والناس انگلبت علينا ..

الاستقبال كله رجال .. والنسوان تدخل للصاله تطش جكليت .. وفرحانين برجوعي ..
#بقلمي_شمس
يتبع… .

……………………………

لاتنسون التصويت حبايب #شمس❤