90 يوم

البارت السادس

البارت السادس
🎀 90 يوم 🎀
#بقلمي_شمس

نور………

احنا هسا برمضان .. مر شهر وكرار وحيدر مالهم اثر
عمو ابو حيدر گام يتقبل العزاء بيهم ..
وكولها گامت تقرألهم الفاتحه ..
الا اني وعمتي ماتقبلنا .. اني اگول كرار عايش ..
وعمتي تگول اولادي ماماتو عايشين لحد يعزيني بيهم ..

اما الاء مرت حيدر .. فلبست اسود وگالت خلص حيدر استشهد .. ولازم الزم عدة اله .. #شمس
وفعلا .. راحت الاهلها ولزمت عدة .. واستسلمت للوضع

اني مستحيل البس اسود .. كرار عايش وراح ابقى انتضره عمري كوله ..

ماما زادت ملحتها عليه .. وتگول بس يطلع الاربعين مالهم ..
اروح استشرع واذا يعتبر انتي ارمله ..
اني ازوجج الابن اختي هو رايدج من زمان

نور .. يمه انسي ولو يبقى اخر يوم بعمري مااتزوج احمد المخنث المدلل ومتباهي بفلوسه ..

ام نور .. وشبي مخنث احسن من الفگر الي كتلتي روحج عليه وتالي سواج ارمله ..
ومانعرف عايش لو ميت .. #شمس

نور .. شفتي انتي گلتي .. ماندري عايش لو ميت يعني مامتأكدين .. لعد شلون ترديني اتزوج غيره..

ام نور .. مو لزمتيها عليه .. هسا مات وشبع موت ماقريتي كلهم عدموهم ..

نور .. ماما رحمه الاهلج كاااافي ترى راح اموت ..
كل يوم نفس الاسطوانه ..

آسيا .. ع كيفج عيني لتعيطين .. غير امج وخايفه عليج لتعنسين ..
ناويه تبقين هنا طول عمرج .. #شمس

نور .. اي ابقى بيت ابوي .. مو بيت واحد ..
اسيا .. هجم بيتج ع هذا البطر .. مجلبه ببيت ابوها ..
وعايفه ابن خالتها ابن العز والدلال وبيت وحدج ..

نور .. اووووه اني صوجي اگعد يمكم .. رايحة البيت عمتي ..

ام نور .. اي كلما احاجيج .. تنهزمين الهم .. فد مرة اخذي ملابسج وروحي اگعدي عندهم ..

نور .. طلعت بالشارع مهضومه ومقهوره من ماما واسيا الي تفرح من ماما تحجي عليه ..

مااتحملت گعدت ع الرصيف ابجي وكان ظهر وصايمه كان نهاية رمضان وهاي الايام صعبه ..
واني اصلا مااكل حتى ضعفت ..
كان شهر السابع تموز .. والشمس ع راسي ..
منصيه راسي وابجي .. اجت مره ماعرفتني منو اني لان مغطيه وجهي .. #شمس

يا خاله ليش گاعده هنا وبالشمس .. انتي وين بيتكم ..
حجت وحجت تالي مشت ..
استحيت گمت رحت البيت عمتي بعد كم بيت عنا ..
فتحت الباب ودخلت .. غسلت وجهي بالحديقه
مااريد عمتي تشوفني ابجي تنقهر خطيه ..

دخلت للبيت لگيت زينب وزهراء دا يجهزن يردن يسون فطور ..
گعدت يمهن اساعدهن .
زينب .. فاطمة راح تجينا اليوم وامي اليوم مالها خلگ
واني مو هالگد اعرف التمن . #شمس

نور .. لتهتمين انتي وزهراء سون مقبلات وشوربه واني راح اسوي تمن وباميه وتشريب دجاج ..

ركبت وطبخت والبنات يسون مقبلات ..

شويه وگعدت عمتي .. شافتني ..
سوده عليه يعمه انتي كلما تجين تبتلين بينا ..
نور .. حضنتها لاعمه لتگولين هيج .. انتي امي وام الغالي ..
عمه اني من اجي هنا ارتاح ..
عمتي .. الله يحفظج الي يااصيله .. انتي خطيبته وماايستي وتركتيه ..
ومرت حيدر عافتني وراحت الاهلها بحجه العدة .. وحامل بابنه ..

نور .. عمه لتشيلين هم .. والآء هم حقها تفكر بي لهذا سوتله عده .. وهنا ماتگدر عمي وولد عمو رايحين وراجعين .. ماتگدر ..

جاي نسولف ودخلت فاطمه واولادها .. سلمت علينا وحظنت امها وتبجي كلما تجي وتدخل البيت تذكر اخوتها وتبجي ..

اني كملت الاكل .. وسويت حلاوه .. ردت اطلع عمتي مارضت گالت فطورج يمنا ..

جهزنا السفره .. وصبينا وگعدنا ننتظر الاذان .. وتذكرت كرار برمضان الي فات ..
كان يخلي اللبن والتمر مقابيله ويگول هذا فطوري اني
نزلت دموعي لااراديا ..

هسا صايم هو وياكل لو لا .. وشنو مصيره ..
اذن الذان فطرنا وكملنا وشلت المواعين غسلناها ورجعت البيت اهلي ..
تلگتني ماما .. #شمس

بيتج ماتطبخين الفطور .. وترحين لهناك تكربين وتطبخين وتغسلين مواعين .. مسويج خدامه عدهم ..
بس مااكول غير اهمداج ياثوله .. فرحانه ع الخدمه والتعب كل يوم ..
وتاركه العز والدلال ..

نور .. دخلت الغرفتي من غير مااحجي ..
شويه ودخلت اسيا گالت .. گومي اغسلي المواعين
اني طبخت الفطور وتعبانه اريد اصعد ..

نور.. هسا گايمه ..
گمت غسلت المواعين ونظفت المطبخ ..
گالت ماما .. اثرمي وياج كباب للسحور من هسا ..

اووووف ياالهي .. اريد اصلي . هذا وقت مناجاتي الرب العالمين يرجعلي كرار بالسلامه ..
اني كل يوم من ورى الفطور لل 12 صلاة ودعاء وقرآن الكرار ..

ثرمت وخلصت .. توضيت ورحت الغرفتي قفلتها وگعدت اصلي واستنجد بربي .. وابجي واتوسل ..

شويه واندگت الباب .. فتحتها لگيت اسيا گالت هنا بيت عمج ابو رافد ..
ويردوج .. #شمس

سديت القراآن ورفعت المصلايه وگلت بعد السحور الاذان الفجر اكمل ..
نزعت ملف الصلاة ولفيت شالي وطلعت ..
سلمت ع عمو ومرت عمو وجاي وياهم رافد بس ..
كانوا عند بيت عمه ام حيدر واجونا ..

گالت ماما سوي جاي .. رحت للمطبخ .. خليت القوري ع النار ..
حسيت احد واگف ورايه .. التفتت .. شفت رافد مكتف ايديه ويبتسم ..
رافد .. شلونج
نور .. الحمد لله تمام ..
رافد .. الى متى تبقين هيج ..
نور .. ليش شبيه
رافد.. انت شايفه روحج شلون ضعفانه ومتغيره ..
ترى حتى اهله يئسو وسوولهم عزا ..
وانتي لسا عندج امل ..
نور .. اني ماعندي امل .. وانما متأكده يرجع بيوم ويلگاني منتظرته ..
رافد .. واذا مارجع ..
#بقلمي_شمس
يتبع…