#قصة_ زحف ٨
#زينب _الموسوي
اني مثل اي بنيه تتصور الخطوبه والزواج حل لكل مشاكلها والوسيله الي تحقق احلامها بيها وتتحول من بيت اهلها لبيت مليان حب وسعاده ومثل كل بنيه تبدي بفترة الخطوبه تنصدم بالواقع وتتخلى عن حلم بعد حلم الى توصل الى نتيجة انتقلت من بيت اهلها الى بيت ثاني يسموه بيت رجلها وكل الصور الخياليه الي رسمتها ماالها وجود بعد مرجع مهدي للعراق وياه امه وحچى ويه اخواني وفهمهم هو شافني عند الدكتور لمن وصلنا وتمت خطوبتنا وحلوا المشكله ويه ابن عمي بالفلوس اول شي صدمني ام مهدي مره متكبره متعاليه كلامها جارح اول مشافتني عبالك شافت حشره دققت من راسي لرجليه وحچيه كله احنا ماعدنا هيچ لاتسووين هيچ الشي الثاني الي صدمني مهدي ما يحب طلعات وميقبل اي عذر نطلع واني هدفي من الزواج كله اطلع البس اشوف ناس وتشوفني وقنعت نفسي بعد الزواج اگدر اغيره حتى تجهيز العرس مخلاني اطلع كانت امي وامه يطلعن ومرات ندى وامه كل مااراويها شي بالموبايل اگلها جيبيلي مثلها تجاوبني عوع ذوق معدان خلصت الخطوبه الي هي شهرين ابچي فكرت مية مره افسخ وگلت لمهدي مااگدر هيچ انت چنت تگول اهلچ حابسيچ اشو انت هم تريد تحبسني اكو عروس متختار جهازها شنو ماخذيني فصل. فروحه احنا هذا طبعا حتى بامريكا بناتنا ماتطلع بس دكتور والاشياء الضروريه وليش مگلت من البدايه. هسه گتلچ.بكيفچ. اذا بكيفي مااريد هيچ زواج تريدين تعوفيني اموت غير مهدي ميصير هيچ البنات تنتظر الخطوبه حتى تطلع وانتم سوگ متخلوني اروح. زين بعد الزواج نطلع اني وياچ. هم راح اصدگ وهسه تشوف اذا مو نفس النتيجه. كان مهدي كل ميحس بيه اريد اتراجع ردة فعله تكون يدز هدايا وملابس وذهب حتى اذا اني ماسكت اهلي يسكتون كنت افرح بالهدايا والبسها گبال المرايه واضمها محد يشوفني بيها يعني تحولت من بنيه محبوسه وماعدها حاجات وملابس الى بنيه محبوسه خزانتها مليانه ملابس وحاجات صار يوم عرسنا اول مره ادخل صالون وشايفين صالونات العراق شيسوون بوجهه العروس لوحه مال الوان متنعرف منين تبدي ومنين تنتهي والتسريحات الصاروخيه الي يخترعنها خصله طايره وخصله سبريه وخصله على الوجهه اني جنت فرحانه بلي يسونه بس لمن انتهن حسيت بوجهي ماكو ملامح بس الوان لمن صارت الزفه وشافتني ام مهدي گالت شنو هاي شمسويات بيها وحتى مهدي من دخل للهول مال اهلي وشافني انصدم ومعرف شيگول يمكن اني اختاريت الصالون الخطا مهدي كان عنده بيت هو مقر الشركه مالته وفوگاه شقه زغيره هو عايش بيها وهي تزوجنا بيها لمن خلصت الزفه دخلت للغرفه اريد امسح المصايب الي خالتها على وجهي بالزايد لصت الدنيا لحد مدخل مهدي شنو هاي من كل عقلچ هذا مكياج وين وجهچ شايفه الالوان فوگ عيونچ كم لون احسبيهن وظل يحچي لحد بچاني والدموع الي نزلت لونها اسود يعني كارثه على وجهي واول مره اشوفه عصبي گلي ادخلي للحمام ومسحيه كله دخلت للحمام شعري مخشب ميلزم من السبري واشوف الالوان الي تنزل ويه المي احمر وازرگ واخضر شايفين الرصيف من يصبغوه وتمطر الدنيا ساعه ونص بالحمام اغسل بوجهي وشعري واريد امنع نفسي من البچي مااگدر لمن طلعت مهدي حس على نفسه واتندم على الصياح والحچي الي گاله بس اني رحت نمت وعفته حتى مره ثانيه يخلي مجال للتفاهم واذا اقبل اعتذاره راح كل مره يغلط ويعتذر للفجر اتصالحنا وصار الي مفروض يصير بهاليله ثاني يوم مهدي وصاني اتحمل امه وگلي شمتگول لاتردين عليها واذا غلطت بحقچ احسبيها عليه واني اعتذر امي طيبه بس تحملت مسؤولية من وكت والدي مات وعافها لذلك هي عصبيه اعتبريها امچ لخاطري جاوبته صار ولاتسمع احچايه مني ابد مهدي اكبر اخوانه الولد عنده اخوات اثنين اكبر منه متزوجات بامريكا واخوان اثنين حسنين ومحمد متزوجين وبيوتهم قريبه من بيت امهم ومهدي ويه امه واخواته اثنين ممتزوجات وحچالي عنهم كلهم طلعت اشوف امه واسوي ريوگ اول مشافتني خالتي تعاي شمسويه بروحچ البارحه فشلتينا صدوگ مشايفه وشفتي. الحچايه كانت قاسيه بس گلت يله. اي خاله صدوگ هاي ام الصالون يمكن غارت مني شافتني حلوه وزغيره بس همزين مهدي محچى شي واني مسحته قبل ليدخل. خلي انشوف شگد تطولين ويه مهدي الي قبلج نسوان وهجن. اني ماهچ شعندي غيره اتحمله هو حتى عصبيته حلوه بيها الخير اخذي هاي هديتچ انطتني تراچي رحت على المطبخ بيني وبين نفسي اني شسويت مهدي گلي لاتردين الظاهر اني اخذني الغرور شفت الرجال ميت عليه گلت خلي اطغي حرام هاي امه هو اني صدگ لاعبه بنفسي جوله البارحه. خليت الريوگ گدامها وبستها براسها واعتذرت خاله ام مهدي مو قصدي ارد عليچ انتي امي ميصير اجاوبچ اسفه وبعد متسمعين صوتي. مبين عليچ مو سهله. هو مهدي ماعنده حظ وحده امر من الثانيه. مجاوبتها وگعدنا نتريگ لاحظتها حتى ويه مهدي اسلوبها هجومي وبس تنتقد..يتبع
