قصة_ زحف1
#زينب _الموسوي
كلمة زحف كلمه حديثه دخلت على اللهجه العراقيه بالسنين الاخيره وصارت بديل عن كلمه المعاكسه او المصارحه اليوم راح احچيلكم قصه من قصص الزحف البناتي وانشالله القصه الي بعدها عن الزحف الولادي نبدي بسم الله الرحمن الرحيم
اني فرح عراقيه من بغداد بس عشت بالبصره بعد ماانتقل بابا شغله بغداد لمصفى الرميله عندي اخوات تلاثه متزوجات بغداد وعندي اخوان اثنين وحيد اكبر اخواني متزوج من ندى وعنده اطفال اثنين وحميد ممتزوج اكبر مني واني ازغر الجميع ابوي توفى قبل سنتين وحيد خلفى مال بيوت بس شغله ويه الناس الفقر يعني الي يبنون بلوك الي يريد حمام بيت اهله ويعزل احنا عائله على گد الحال عدنه تقاعد ابوي مبلغ بسيط وشغل اخوي اني تركت الدراسه قبل الثالث متوسط لان كسلانه والسبب الثاني لان اساعد ندى بالبيت وشغلها وتربية اطفالها عمري ١٩سنه الحياة بيت اهلي كانت بالنسبه الي مثل الغابه الكل يريد يفترس الكل ودائما اني ادفع ثمن المشاكل امي وندى معاركهن مستمره امي اذا وگع ماعون بالگاع تسود عيشتنا اثنينه وندى اذا احد صاح على جهالها تعلن الاضراب العام تلث ايام وتروح لاهلها همه جيرانه فتشوفها يوميه ماخذه هدومه ومرجعتهن وحيد مكان يگدر على امي وزوجته بس يگدر عليه خاصة اذا زوجته راحت لاهلها يصير يگومني بكفخه ويگعدني بكفخه بحجة انتي بس نايمه ومتعرفين تشتغلين واني والله حتى خبز يوم عليه ويوم على ندى ومن اطلب منهم شغله احتاجه اي شي من حاجات البنات لازم اقدم طلب ويصعد للجهات العليا وبعدين يرفض بكلمة انتي گاعده بالبيت شتسوين بيه حتى الموبايل الي عندي هم اختى الكبيره بدلت جهازها وانطتني القديم بيوم اجى وحيد حچى ويه امي عرفت ابن عمي يريد يتزوجني تدرون ابن عمي شيشتغل مطيرچي درجه اولى يعني الطير وهو بالسمى يعرفه نوعه وين رايح وين جاي وبدوا يقنعوني بيه امي سوته عليه بوراك ومالگه احسن منه
يمه صدك انتي تحچين عويد يصير رجلي دشوفي اسمه جنايه
انوب اسمه ماعاجبها عايد من رجع ابوه من حرب ايران امه حبلت بيه وسموه عايد
ساعة السوده الي حبلت بيه امه واني ابتليت يمه فدوه اروحلچ انتي تشوفين وضعي بيتنا بيت ابوي تلفزيون ماالحگ اشوف اذا اريد اسبح ب١١باليل وبيت عمي وضعهم امر بعد اربع چناين وعشر اطفال وفگر وعويد مطيرچي الله يخليچ سدي الموضوع گليلهم فرح مريضه متريد تتزوج
حتى اخوانچ يذبحوچ يمه اذبحوني ارحم من هذا الزواج هاي اني شبابي وحلاتي لعويد لعبت نفسي من الزواج يمه هي روح لو شنو...يتبع
