#قصة_ زحف4
#زينب_ الموسوي
من سديت التلفون اول مره استصغر نفسي طول عمري معتزه بنفسي وكرامتي وبلحظه تنازلت عن كرامتي ليش مااعرف اتصورت هذا هو المنقذ الي راح يخلصني من ظروفي التعبانه بس انصدمت بجدار كلامه مبين رجال واعي وراكز الندم اكلني مگدرت انام صح عجبني هو ثگيل ويعرف الصح والخطا بس ماعجبتني الفكره الي اخذها عني لكن الي يبدي شي لازم ينهيه اتصلت باليل وسلمت عليه اني اگول هلو وهو يرد وعليكم السلام ورحمه الله وبركاته بعدچ ضايجه ترى اني احچي لمصلحتچ مرات تحتاجين شخص تحچين وياه يمكن ظروفچ مبطله من المدرسه ومتطلعين بس هذا راح يخليچ تعالجين الخطا بخطا ثاني اگلك كافي ترى من البارحه لليوم داحس بنفسي وحشي الي كتل الحمزه. دمچ خفيف ليش متكولين منو انتي مااگول مو هسه
على راحتچ تعرفين اسمي مو اي اعرفه اسمك وشغلك وعايش بامريكا. لعد ميصير انتي تعرفين كل هذا عني واني حتى اسمچ مااعرفه اسمي فرح. حلواسمچ فروحه بس انتي صدگ فرح. الحمد لله البارحه گلت مطلگ مرتين ليش. نسوان متگعد راحه مامعقوله اثنينهن السبب لازم انت هم بيك صوچ. اكيد بس اني الي سويته بيهن ردة فعل ليش سويت بيهن. طلگتهن غير. يعني هنه چانن ميتات عليك وانت طلگتهن. لا فروحه اني مره اتزوجت وحده امريكيه على شكلها اول دخولي لامريكا ومتعجب اشوف هيچ شكول اتزوجتها كانت لاحياء ولادين ولاتحترم اني گاعد يمها تلفونها يدگ تگلي صديقي وتطلع بالتسعه بالليل تسهر للفجر ماتحملت طلگتها. ورا خمس سنين قررت اتزوج مره ثانيه اخذت بنيه عربيه مدللة بهذلتني ملابسي اگعد الصبح الگاها بغرفة امي غاسلتهن امي وكاويتهن والخاتون نايمه والعصر تروح ويه صديقاتها وباليل تظل على النت والتلفزيون صارت مشاكل وحاولت اغيرها الاخت رفعت قضيه طلاگ واتهمتني بالسرقه ذهبها وخلتني بالسجن شهرين لحد مااهلي حملوها فلوس حتى تتنازل
هاي قصتك مال فلم هندي والله ماچذب عليچ زين ليش مصار عندك اطفال. هن اني مطايقاتني انوب يجيبن اطفال بس انت هم مبين عصبي. ماكو واحد يصير عصبي بدون سبب زين ليش متجرب تتزوج عراقيه لاعراقيه ولا غيرها خليني عايش لروحي احسن هسه ليش ضوجتيني موقصدي والله بس لان انت مبين انسان محترم ردت اعرف ليش مطلگ وهسه عرفتي وحرگتي دمي وفد شويه تبدي لعبه برشلونه والريال ويحترگ دمي اكثر
بس لو اعرف ليش حارگين دمكم على ذولي خوالكم عمامكم ديري بالچ تحچين عليهم صدگ اكرهچ ولاتشجعين الريال شجعي برشلونه
خلص لخاطرك اشجع برشلونه ولو اني مااعرفهم اثنينهم. شوفي من تخلص اللعبه اذا فازوا برشلونه اتصل بيچ واخليچ تعرفيهم انشالله خلصت اللعبه فازت برشلونه اتصل وبدا يحچي گال مسي وحچى مسي حسيت هو محتاج احد يحچي وياه اكثر مني شخص مجهول يسمعه يشكي ويفضفض بدون ميحكم عليه بقيت اسبوع يوميه اتصل بيه ويوميه يسالني انتي منو ومااجاوبه كنت خايفه لايسمع اسمي من اخواني لكن هو ميشوف اخواني غير بالاسبوع مره يتحاسب وياهم واخواني ميگولون اسمي گدام رجال غريب اتصلت بيه ليله گال باچر مسافر لبغداد بشغل اني واصدقائي ويومين ارجع يعني مااتصل بيك. يمكن يصير احراج اصدقائي وياي من ارجع اخابرچ. هم تزور هناك. اكيد ازور. ادعيلي وياك. صار فروحه ادعيلچ ولو اعرفچ واندل بيتكم اجيبلچ هديه وياي بس انتي متقبلين تگولين منو
الدعاء كافي بلا هدايا. لازم بخيله تخافين تردين الهديه. لا بس الزحف مراحل وبعدنا ماوصلنا لهاي المرحله
بطلي هاي الكلمه ترى اسات للعلاقه بين البنات والولد عمي هاي اللهجه العراقيه الحلوه مالگيتوا غير هاي الكلمه وهواي كلمات صايرين تستخدموها بلا معنى هذا تحديث جديد نزل على اللهجه انت متعرفه بعد لتگوليه الله يخليچ گولي تعارف صداقه بس زحف مو حلوه الله يدري شگد زاحف بحياتك بحيث الكلمه گامت تضوجك. كافي لتگوليها ترى اسد التلفون. هسه اني گايلتها عليك گايلتها على نفسي هم اضوج لتگوليها. خلص بعد مااگول زحف وزاحفه وزواحف وزاحف. روحي فرح بعد لاتتصلين بيه زين بطلي الكلمه الا تتصلين...يتبع
