#قصة_ زحف2
#زينب _الموسوي
تطورت سالفة ابن عمي واجتي امه فتحت الموضوع واخواني وحيد وحميد ضربوني بس بقيت معانده گدرت ااثر على ندى واخليها تصير وياي اني مچنت رافضه فكرة الزواج بس مااريد ابدل الحبسه وعدم الاحترام والكبت الي عايشته بيت اهلي بزواج من واحد اعرف تصرفاته مثل اخواني ضرب وغلط واخلف اطفال يعيشون نفس الواقع الي عشته اريد وضع احسن رجال مثقف يفتهم يحترم يطلعني حتى لو مره بالشهر نسهر اني وياه على فلم مسلسل لعبة كرة قدم واعرف ابن عمي كل هاي المواصفات مابيه مخلصها بالسطح وجهه محروگ من الشمس واذا اسبح اهله يوزعون ثواب للعالم مفاد وي اهلي كانت اختي علياء جايه خطار توسلت بامي اروح وياها لبغداد ازور واسبوع وارجع وعلياء هم گالت محتاجتها نشيل فراش الشتى رحت وياها اول مو صلت اتصلت بامي گتلها بعد ماارجع لو تذبحوني الا تفضوها وي عويد بقيت عند اختي لحد مااخواني فهموا عويد مااريده عمي متعارك وياهم ومهددهم الا اخليها گاعده محد ياخذها خليني گاعده ولا هذا الزواج رجعت لاهلي امي متحچي وياي وحميد لزمني من شعري وجرني بحيث خصل شعري اجتي بايده وكمل الحدث التذاكري الي مااگدر انساه وحيد بضرب بالحزام بقيت باليل اريد احرك جسمي مااگدر درجة حرارتي صعدت ظليت اهذي تلث ايام اني بالفراش بذاك اليوم عرفت بيت ابوي بعد مالي عيشه بيه وامي بس تريد تزوجني واخواني عبالك حمل شايلينه واذا امي حاولت تدافع عني يردون عليها انتي متدرين شيصير بالشارع ومتدرين بمصايب العالم زوجيها وارتاحي يعني ماكو متزوجات يغلطن ويمشن بدروب سوء قررت بعد ما تحسنت صحتي حچيت ويه امي
يمه اريد امتحن ثالث خارجي
اخوانچ ميقبلون هو انتي للسوگ ميخلوچ انوب مدرسه ليش بطلتي
ماافتهم تندمت هسه يمه ترى هاي مو عيشه كل ممنوع
لو متزوجه چان هسه بكيفچ شتسوين تسوين بيت رجلچ
الي يسمعچ يگول بيت عمي سبع غرف نوم وتلث حمامات وحديقه يمه عويد غرفته بلوك فوگ السطح لان ميگدر يفارك الحمام والطيور وحمام واحد يدخللون اله بحجز مسبق
دظلي لاعويد ولاغيره وكل يوم مبسوطه بسطه ولچ اني اريد اخليچ بذمة رجال قبل لااموت منو الچ
وعويد يمه الي تخليني عنده وتطمئنين عليه وياه
عوفي عويد علي ابن سعوده الحفافه شبيه عند ستوته ويوميته خمسه وعشرين الف
يبوووووه على حظي الاسود علي ستوته هذا الي كاتب عليها الحب ضياع والله شوفته ضياع يمه شسويت عندك ربي اشو لا صادقت ولد لاخابرت طلعه مااطلع هاي الي يجوني يمه فدوه ليش سميتيني فرح اريد اعرف وين الفرح
شتريدين منو الي ياخذچ وزير
لا يمه مو وزير فدوه بس هاي النماذج مو مال عرس مال وحده مأيسه من حياتها يمه انتي تگولين اني حلوه واني ادري بروحي حلوه عويد وعلي مامعترضه على شكولهم انگعهم بالقاصر يومين ينظفون بس ذولي وينه مستقبلهم ومامعترضه عليه لان عنده ستتوته بس الفرع كله يدري بيه يكبسل كافي يمه لااريد دراسه ولازواج اگوم الشغلي احنا كنا نسكن بمنطقه شعبيه بالبصره وناسها على گد حالهم بس بيهم شباب مؤدبين متربين اهلهم ناس طيبه بس ذولي كانوا يريدون زوجات موظفات...يتبع
