ملهوفة عليه
ملهوفه عليه مش عارفه ليه
أصله يا ناس حبيبى وما ليّه إلا ليّه
أعمل إيه فى حبه أعمل إيه
ده مغلبنى يا ناس وتاعبنى وشاغلنى بيه
ما أنا أصلى ملهوفه عليه مش عارفه ليه
بستنّى يجى ويطل عليّا بس بعنيه
بستنّى أشوفه حتى من بعيد
بستنّى يشعر بقلبى اللى هو مش حاسس بيه
طب أعمل إيه قولولى أعمل إيه
آه لو شوفتوا بيكتب وبيقول إيه
ده كأنه شايفنى قصاد عنيه
ما هو أصله هو حتّة منى وأنا كلى ليه
قلبى على طول بيدوّر عليه بينط من الفرحه لما بيلاقيه
ويستنّى أول ما يشوفه ويجرى عليه
ما هو له طلّه أجمل ما فيه
طب أعمل إيه قولولى أعمل إيه
ما أنا يا ناس ملهوفه عليه
امتى هيجى بقى وأروحله وأكلمه وأقرب ليه
منا عارفه إنه هيجى بس هستنى حَبة حَبة عليه
ما هو عارف إنى بحبه و واثقه فيه
ده أنا مليش إلا عنيه ومبحكيش إلا عليه
نفسى أعرف بيعمل إيه وهو بعيد لما مش بلاقيه
يا ترى بيفكر فيّة وإلا إيه اللى ملهيه
ده على طول معايا وبفكر فيه
طب أعمل إيه قولولى أعمل إيه
ما أنا يا ناس ملهوفه عليه
نفسى أشوف عيونه وأشوف هتقولى إيه
نفسى أسمع كلامه وأفهم إحساسه اللى فيه
نفسى أشوف ضحكته اللى مخليانى دايبه فيه
خلاص بقى أنا بعترف بحبه اللى كنت بخبيه
خفة دمه مخليانى مش عارفه أعمل إيه
رقّته وحنيته خلتنى مش عارفه أعمل إيه أنا فيه
ماهو أنا يا ناس مش عارفه أعمل إيه أنا فيه
ما أنا أصلى يا ناس ملهوفه عليه
بشوف ضحكته من بعيد وأنا بكتبله و بوصّل له إحساسى بيه
ما أصله وهو بيقرأ عارف قصدى وعارفنى أنا بقول إيه
ما هو قريب من قلبى وقلبى قريب ليه
حتى لو المسافه بينا بعدت وكانت طويله قوى قوى عليه
ما أصلى موجودة فى دمه اللى جوه قلبه ماشى فيه
شوفتوا بقه أنا قد إيه مش عارفه أعمل إيه أنا فيه
ما أنا أصلى يا ناس ملهوفه عليه
غيرانه عليه من كل اللى حواليه
عايزه أبعدهم عنه وأقولهم إنتم مالكم بيه
ده حبيبى أنا إنتم عايزين بقه إيه
طب أعمل إيه قولولى أعمل إيه أنا فيه
مش عارفه خالص بعيد عن عيونهم أخبيه
بحبه بحبه وفى قلبى ساكن حبه وهو روحى وبحس بيه
شايفه فى عنيه سعاده
ما أنا أصلى خلتها عاده
مش كده والا ايه
مش أنا يا حبيبى سكر زياده
طب قولولى أعمل إيه
ما أنا أصلى ملهوفه عليه
ملهوفة عليه
أنت تقرأ
أوراق و قلم✔
Poesíaكلنا نَمُر بلحظات نشعر فيها بالحب و سرعان ما يتحول إلى عشق، فنسعد بها و منها ما يكون حقيقة و منها ما يصبح خيال و منها ما يتحول إلى ذكرى. *هذه كتاباتي و لا اسمح بأي نقل او إقتباس لأي جملة قام بعمل الغلاف: @menna_official قام بالنسخ: @menna_official...
