Written Poetry

Hiling Ko Sana

Sa pagsapit ng pasko,
Hiling ko ang kaligayahan mo
Sa bagong babaeng nagpatibok ng iyong puso
Kahit ang babaeng 'yon ay hindi na ako

Sa pagtupad ng hiling na ito,
Pinapanalangin ko sa mga tala
Na itong mararamdaman ko
Ay tuluyan nang maglaho't mawala

Sana'y matupad ang hiling ko

Ibig kong mawala
Ang hapdi nitong puso
Ang ngiting pinipilit ipakita
At ang pagbagsak ng mundo ko

Dahil napagtanto ko na ang ikaw at ako
Kailanman ay hindi na magiging totoo
Niloloko ko lang ang sarili ko
Kung ako'y patuloy na magnanais sa himig ng "tayo"

Kaya sa pasko, luluhod ako kay Bathala
Ipapanalangin na ang "ako nalang sana"
Ay mapapalitan ng "masaya ako sa inyong dalawa"
Ayoko nang ipilit ang hindi nagkakasya

Sa pagsapit ng bagong taon, hiling ko'y pagbabago
Ninanais kong mag-iba naman ang ihip ng panahon
Yung hindi na pangalan mo ang sinisigaw ng puso
Yung hindi na ikaw ang unang iniisip pagkagising ko

Hiling ko'y magbago ang pagtibok nitong puso ko
Ang pagbilis nito sa tuwing ika'y naaalala
Ang pagtigil nito tuwing nasisilayan ang iyong mukha
Ang pagsigaw nito ng pangalan mo sa bawat minuto

Ang isip ko ay umaayaw na sa'yo
Pero bakit tinatraydor pa rin ako ng damdamin ko?
Kaya dalangin ko sa bagong taon
Sana, iba na ang kinikilala ng puso ko

Sana'y matupad ang hiling ko

Sa pagsapit ng iyong kaarawan,
Hiling ko ang kaligayahan ko
Na kahit alam kong hindi na ako
Ang iyong makakasama
Magawa kong maging masaya

Kahit na nakagawian na nating
I-celebrate ang birthday mo
Doon sa munting isla
Kung saan tayo unang nagkita,

Sana, kung saan ka pupunta at
Kung siya man ang kasama,
Huwag mo sanang malimutan
Ang ating munting isla

Isla kung saan lahat nagsimula
At napuno ng ating mga ala-ala

Mga pangakong napako
Ngiting hindi ko na makita
At pagmamahalan na nauwi sa wala

Hiling ko sana ito'y iyong maalala

Sa pagsapit sa araw ng mga puso,
Hiling ko'y puso ko ay titibok pa
Kahit wala nang nag-iingat nito

Hiling ko na ang puso ko ay masigla at malusog pa

Kasabay nito, hiling ko rin sana
Na patawarin mo ako sa mga kasalanang sinadya ko

Patawarin mo ako sa hindi na pagsipot sa mga gala
At sa minsa'y hindi pagsagot sa iyong mga tawag

Hiling ko'y mapatawad mo ako
Sa hindi pagbukas ng pinto
Nang ikaw ay kumakatok
At luha'y umaagos sa pisngi mo

Pagpasensyahan mo na ako
Kung hinayaan kita sa labas
Habang ang ulan ay bumabagsak
At puso mo'y winawasak

Sana'y matupad ang hiling ko

Sa pagsapit ng araw na ako'y mawawala
Alam kong ikaw pa rin ang ititibok sa huling pitik nito
Kahit gaano kalakas ang panalangin ko,
Sayo'ng sa'yo pa rin ang puso ko, mahal ko

Kaya sa pagsapit ng araw na ako'y papanaw,
Hiling kong hindi makita ang pag-iyak mo
Ibig kong ikaw ay maging malaya at masaya

Sana'y matupad ang hiling ko

Sa pagsapit ng araw na mababasa mo ito,
Ako ay wala na sa mundong ginagalawan mo

Kaya hiling ko sana,
Tumahan ka na
Huwag ka nang humikbi

Dahil nandiyan naman ang bestfriend ko sa tabi mo
Hindi ka niyan iiwan kailanman, sigurado ako

Kaya please lang,
Tuparin mo ang hiling ko
Maging masaya ka sa babaeng mahal mo