حرز الحب

حرز الحب ١٤

#حرز_الحب١٤
#زينب_الموسوي#
بمرور الايام توطدت علاقتي بلوسي وعرفت هي ام عازبه يعني اطفالها بدون زواج وصديقها تاركها وعايشه على النفقه من والد اطفالها ومساعدات الدوله
لوسي صار شهر ونص اعرفك ليش مطلبت مني علاقه
سنان يمكن معاجبتني
لوسي احجي الحقيقه ليش
سنان شنو هدفج من علاقه ويايه
لوسي نستمتع نلهو.
سنان الاستمتاع واللهو عدنا بشروط لازم زواج وبصراحه اني اريد اتزوج عربيه
لوسي عنصري
سنان لا واقعي في فرق انطيج مثال انتي من تفتحين الباب لرجل بعد كلمتين تگوليله تفضل احنا المراءه عدنا اذا گالتها تطير رگاب
لوسي اكيد تبالغ
سنان هذي الحقيقه العربيه تفهمني وافهمها انتي صديقه اكثر من هذا مااگدر
صار شهرين على معرفتنا وهي تحاول  تجذبني كنت اگدر اتزوجها زواج مؤقت لكن اعرف لوسي تريد طفل ثالث ومن رجل غني حتى يصرف عليها والسبب الاقوى مااريد استبدل حب حقيقي حتى لو كان من طرف واحد بعلاقه عابره  لذلك حددت علاقتي بيها شخص يسمعني واسمعه اساعدها مرات حتى ماديا ومرات نطلع سوا مع اطفالها  الاطفال احيانا يهدونك السعاده بمجرد تراقبهم يلعبون ويضحكون
اتصلت بامي اسال عليهم
امي يمتى تخابرني وتگلي لگيت زوجه
سنان هههه اكو امريكيه وعدها اطفال اثنين يعني تجي جاهزه حتى اطفال جايبه وياها
امي تصنف حضرتك ولك عمرك خلص
سنان الله كريم ذكرى داومت
امي داومت بس متطلع الا للضروره من عرفت بمرضها تخاف حتى تتحرك
سنان لعد ليش اني ضميت عليها سنين هذا السبب
گوليلي ماما هم تسال عليه
امي يوميه ليش متخابرها
سنان لا ماما مااتصل هي مناقصه واني مناقص
ذكرى بعدك تحبها ابن اسيا
سنان وداعة اسيا امي الغاليه مانسيتها لحظه واضحك على روحي بهذا البعد الي بالگلب بالگلب حتى لو نموت
امي الله يعينك حاسه بيك
مرت الاشهر واقترب  عيد الشكر  عطله خمس ايام بامريكا وهذي المناسبه الكل يرجع لاهله يزورهم كنت متردد قبل يوم اروح اشوف امي وذكرى
دخلت الموظفه عليه
الموظفه ابنيه موجوده تريد تشوفك
سنان شنو اسمها
الموظفه ذكرى
سنان ذكرى هنا مامعقوله وينها
گمت من الكرسي فتحت الباب كانت واگفه وتباوع لصوري بالمكتب مبين عليها التعب وزنها نازل وعيونها حزينه تخفي عنفوان الشباب بداخلها بجاكيت طويل وغطاء للراس (كبوس)

سنان هلووو ذكرى شلونج
ذكرى زين تتذكر اسمي
سنان تعالي للمكتب شجابج انتي مريضه
ذكرى وهي تدخل مكتبي اذا تعرف مريضه ليش متسال عليه
گعدنا جنب بعض على قنفه
سنان تعرفين ليش تصرفت خطا وطحت. من عينج اذا ابقى بنفس البيت كل كلمه ونظره وحركه مني راح تفسريها غير تفسير. انهزمت هنا
ذكرى افتقدك سنان مو بس انت افتقد حياتي ياريت ماعرفت اني مريضه اريد اعيش بدون مااخاف گلبي يوگف اريد انام بدون ماافكر بالجهاز يمكن يعطل  واموت تعبت خليك يمي اذا اموت اريدك يمي الله يخليك سنان انت مو بس اب واخ انت روحي والله
كانت تحجي وايدها كامشه قميصي ماعرفت اجاوبها  الگابه واضحه عليها
لكن ذكرى محتاجتني بغض النظر عن مشاعري
سنان ذكوره ليش تبچين البچي ياذيج
ذكرى اذا ماابچي والعب واركض المن. عايشه
سنان عايشه النا منستاهل تمضين بالحياة لخاطرنا اني وماما
ذكرى تستاهلون عيوني
سنان عيونج هاي الحلوه اويلي
يله تعالي ويايه نرجع للبيت انتي اجيتي تسوقين
ذكرى لا ماما متقبل اسوق صديقتي وصلتني وراحت
سنان نروح على الشقه اخذ ملابسي ونروح للبيت يم ماما
طلعنا گعدت بالسياره
سنان ليش هالگد ضعفانه ذكوره
ذكرى الادويه تسد الشهيه ومرات اخاف اكل الدكتور كل زياره ينطيني قائمة ممنوعات
كانت احاديثنا عامه ومع ذلك كان مجرد سماع صوتها المليان رجفه وحزن كان حافز كل مابيه يحس بالفرح  وعرفت محتاجتني
ياكل امنياتي ذكرياتي صلواتي
أ ياتي يوم تكونين لي ؟
وصلنا على الشقه كانت لوسي مع اطفالها
لوسي هاي منو هذي البنيه
ترددت اگول اختي مااحب الكلمه
ذكرى انتي منو.
لوسي صديقته وجارته
ذكرى جارته ممكن لكن صديقته مااعتقد
باوعتلي لوسي وسالت
هذي الفتاة العربيه  الي تريد تتزوجها
ذكرى هذي خصوصيات وطفلج ديركض على الشارع روحي شوفيه
يله سنان  نفوت جوا
دخلنا
ذكرى منو هذي القرج وين لگيتها لك ماما اذا عرفت تتخبل
سنان هههه ترى جارتي لااكثر ولااقل
ذكرى وتسال وتحقق وماخذه ميانه
سنان تعرفين الامريكان بدقيقتين يصادقوك
ذكرى من هاي متسال وگاطع عرفنا السبب
سنان ولج والله ماعندي شي اصلا من الوحده ردت اربي بزونه
ذكرى لا ربي فاره احسن
سنان فاره وبزونه حتى اتفرج عليهم مثل توم وجيري ههههه
ذكرى ههههه بايخه يله نرجع وين ملابسك ارتبهم الك
انطيتها الجنطه وبدت ترتب وتراقب لوسي من الشباك وتدردم عليها
ذكرى شوف هاي المستهتره لابسه شورت بعز البرد وتحجي ويه الرايح والجاي
سنان شعلينا منها هذي حياتها
ذكرى عابت هيج حياة هسه لو سيقان حلوه گلنا تتباهى بيها الا تلعب النفس الله عليك مو تلعب النفس
سنان لحظه اشوفها واحكم
ذكرى شتشوف روح اگعد بمكانك لا والله اگول لماما يباوع على النسوان
سنان لعد اباوع على الرياجيل تريديني
ذكرى لاتباوع وخلص يريد يحرگ دمي
سنان اسم عليج ذكوره
نظرتلي وسكتت عرفت مستغربه گلت ذكوره كل مره ذكوره حبيبتي
مشاعرها غريبه وغيرتها عليه اول مره احس بيها يمكن غيرة اخت على اخوها لا ابني احلام وتطير بالهوا خليني اتاكد وفي طريقه اتاكد بيها
سنان ذكوره صايره محلوه قبل كنتي حلوه
سنان وانت صاير ماعندك ذوق متعرف ميصير تگول لبنيه بوجهها محلوه
سنان لعد اگول من وراها حرام  داشاقى بعدچ  حلوه
ذكرى منو  الاحلى اني لو نجمه
سنان الله يرحمها نجمه الشجره وانتي الثمر  واكيد الثمر احلى
ماردت بس ابتسمت
سنان راح اطلع شويه بين متخلصين الملابس
ذكرى لاتتاخر قربت اخلص
هي كانت قريبه من الشباك اتصلت ب لوسي تجي للحديقه اجتي
وگفنا گبال الشباك
سنان لوسي احنا اصدقاء صح
لوسي صح ليش تسال
سنان محتاجج بعمل انساني شفتي ذكرى اريد اتاكد من مشاعرها اريد اثير غيرتها ساعديني هي دتشوفنا من الشباك لاتباوعين
لوسي خلت اديها حول رقبتي
لوسي شگد تدفع
سنان منختلف بس علميني شلون
لوسي نبدي بقبله طويله وهي تتفرج  وبعدها تدفع لي خمسين دولار
سنان ليش راح ابوس منو انجلينا جولي مثلا
لوسي لاتفوت الفرصه
بستها واني خايف ذكرى ليوگف گلبها
لوسي شنو رائيك بوحده ثانيه واسويلك خصم
سنان لا شكرا اني اريدها تغار مو تموت قهر  يله باي واتصلي بيه كل شويه من اسافر ودزي رسائل واغاني بليز
لوسي وين الخمسين تعال
سنان انطيجياها جوا مو هنا گدامها
انطيتها ١٥٠دولارحتى تبقى تخابرني وتراسلني هذي فائدة الصديقه الامريكيه تساعد بكلشي
دخلت على الشقه ذكرى گاعده على الكرسي ومبينه تفور قهر
ذكرى يله. نطلع تاخرنا
سنان يله ذكوره
بالسياره حجت ويايه
ذكرى ماما اذا عرفت. بعلاقتك بلوسي تتخبل هي تريدك تتزوج مو ...
سنان مو شنو
ذكرى مو تتونس ويه هاي وذيچ وصايرلي امريكي تبوسها بالشارع
شفتك ترى
سنان اسف موقصدي تشوفين
ظلت الطريق كله تنصح وتوعظ واني اضحك بداخلي عليها
من وصلنا
سنان لاتگولين لماما على لوسي اعرف متقبل
ذكرى سنان انت من كل عقلك تتزوج هذي امريكيه وعدها اطفال اثنين بدون زواج
سنان مو بيدي محتاجها
ذكرى انت تريد تخبلني محتاجها شنو ليش احنا عايشين بجزيره ماكو بنات اوادم وعوائل محترمه
سنان انشاالله الگه بت اوادم واترك لوسي
اندزت رساله من لوسي اخذت التلفون ذكرى فتحت الرساله وقراتها بصوت عالي
وصلت حبيبي اتصل بيك بالليل ودازتلك ايموجي بوسه
سنان ههههه كتبيلها وصلت  البوسه
شمرت التلفون عليه اكتبلها انت
هاي شبيها ليش تغار
دخلنا على ماما حضنتني وبوستني
سنان محتاج حظنج يمه
امي. لعد متجي تسال
سنان هذي اني اجيت وانوب كل اسبوع اجي عدكم
ذكرى شنو كل اسبوع ليش راح ترجع هناك
سنان لازم ذكوره المكتب جديد لازم واحد يتابعه
ذكرى لعد نروح وياك السنه اتخرج من الاعداديه وننتقل هناك
امي وبيتنا هذا وصديقاتي وطلعاتنا والمنظمه
سنان يامنظمه هذي ماما
امي اني وكم وحده اسسنا منظمه صديقات عبر العالم نتسلى ونجمع تبرعات نساعد بيها الاطفال حول العالم
ذكرى شفت سنان انت عايشه بمدينه ثانيه وماما ملتهيه بالمنظمه واني تاركيني لوحدي
سنان ماادري بهذا الوضع احاول الگه بديل عني وارجع هنا
امي شفتي حتى تگولين سنان نساني وميفكر بيه
راحت امي وذكرى للمطبخ يحضرون اكل للعشى ولوسي رسائلها مستمره
مارديت وانشغلت املي عيوني بشوفة ذكرى
گعدنا ناكل شفت ذكرى تشرب حبوب
وتاكل قليل
سنان ذكوره اذا تحبين اجيبلج اكل من المطعم يمكن تشتهي اكثر
ذكرى لاتشغل بالك اني هذا اكلي
من رفعوا المواعين ساعدتهم
وبعدها گعدنا نتفرج تلفزيون لان عطله بعدها بدات ذكرى تتثاوب
وگامت
ذكرى تصبحون على خير  اروح انام
اني وامي تصبحين على خير
دخلت غرفتها
سنان حيل متغيره ذكرى
امي تفكر بالمرض وتخاف من الموت
سنان اووووف گوليلي ماما بيت ام ريام بعد مااتصلوا بيكم
امي غسان اتصل بيه وگال اني احبها بس اهلي ميقبلون اتزوجها وهي حاضره رقمه ورقم ريام
سنان وهي تحبه مسالتيها
امي سالتها گالت اني مو بحاله وحال اهله وانت شنو تاليتك
سنان يمه احبها والله موبيدي متتصورين فرحتي من شفتها اليوم بالمكتب
امي والنهايه شنو. يايمه
سنان ادعيلي يمه فدوه دعاء الام مستجاب اريدها  ادعيلي اتزوجها
امي نفرض اتزوجتها اطفال متريد
سنان كلشي مااريد هي وبس
امي اني اريد اشوف اطفالك يايمه
سنان يمه متدرين الله شكاتب يجوز يصير حل والله راح اموت عليها

امي اسم الله عليك يمه ماادري  گلبك شنو ماتحرك على وحده غيرها
راحت امي نامت وبقيت گاعد لوحدي شفت الضوى بغرفة ذكرى مفتوح گلت  ادخل احجي وياها
دگيت الباب ودخلت
هلووو. ذكوره اشو گاعده
ذكرى اراسل صديقتي بالنرويج على طول هيج وقت نتراسل انام وبعدين اوقت التلفون حتى احجي وياها لان فرق التوقيت
وشنو هالصداقه القويه الي تخليج تگعدين من نومج علمود تحجين وياها
ذكرى هذي صداقه من نوع ثاني اگعد احجيلك
سنان گعدنا احجي
ذكرى انگر بنيه نرويجيه تعاني من عجز في الكلى حياتها بخطر مثلي تعرفت عليها عن طريق رابطه اسمها هدية من ميت
سنان شنو هذا الاسم الي يخوف
ذكرى كل الي بالرابطه مهددين بالموت في اي لحظه ويتعاهدون في حالة وفاتهم يتبرعون لشخص بالرابطه بعضو الي يحتاجه اني اذا متت كتبت وصيه اتبرع بالكليتين لانغر في حالة موتي
سنان انتي شدتسوين هذي عصابات متاجره بالاعضاء عبر النت شلون تتبرعين بكليتين
ذكرى هذي مو عصابات هذولي بشر ملوا من العمليات والعلاج والمستشفيات ونعرف نهايتنا الموت ليش منخلي غيرنا يعيش شسوي بكليتين ياكلهم الدود بعد موتي اتبرع بيها لانسان ثاني حتى يعيش انكر شابه عمرها ٢٣سنه
تعال تفرج هذي العمليه
طلعت فديو نقل عين من ام متوفيه لابنها الاعمى
ذكرى شوف هذا ستيف الماني امه ماتت وقبل لتموت وصت بعيونها اله
هذي قسمت ايرانيه تبرعت بالنسيج النخاعي لاخوها المشلول كانت موصيه قبل لتموت
سنان هذي منظمه حكوميه لو ناس مسويها
ذكرى ناس مرض مثلي
سنان بس عمليه نقل الاعضاء لازم تطابق يصير بيها
ذكرى في حالة عدم التطابق تروح لشخص ثاني
سنان ذكرى لاتفكرين بالموت انتي بعدج زغيره
ذكرى الموت حق سواء كنا اكبار او صغار 
سنان وانگر  تبرعت الج بالقلب اذا ماتت
ذكرى ممنوع تگلي اتبرعلج او اگلها تبرعتلج الوصيه تبقى سريه حتى تبقى صداقتنا نظيفه ومحد يتمنى الموت للثاني نتبرع ونترك وصيه
دگ تلفوني
ذكرى لازم لوسي اشتاقتلك
سنان خلي تولي هذا تلفوني قفلته بعد شتريدين
ذكرى اني شعليه راسلها اذا تريد
سنان لا مااريد خليني يمج
سكتت شويه وبعدين گالت
بالمكتب اليوم گلت كلمه مگدرت ارد عليها
سنان ياكلمه
ذكرى گلت طحت من عينچ  لاتصدگ بيوم تتغير مكانتك عندي لو تذبحني هم ابقى احبك
سنان ماادري شرد عليج صعب اسمع كلمه احبك من عندج وماارد عليج
ذكرى رد ليش خايف
سنان الحب الي عندي غير الي عندج
ذكرى راح اطفي الضوى ونحجي بصراحه كانما نحجي ويه نفسنا
سنان ليش تطفين الضوى
ذكرى اولا حتى مااحس بالخجل وثانيا  كانما الغرفه فارغه بس اني بيها وداحجي ويه نفسي
سنان ها نفس المسلسلات العراقيه من الممثل يحجي ويه روحه
ذكرى هههههه بالضبط
طفت الضوى وگعدت قريب مني
سنان متحجين داحس نفسي شبح
ذكرى لاتصنف واحجي انت اني بعدين
سنان اوكي صار ١٧ سنه من دخلتي حياتي تعرفين القصه ربيتج وحبيتج مثل طفلتي كبرتي وصرتي تصيحين اسمي وتتلگيني حبيتج مثل اختي
نضجتي وحليتي حبيبتج حب ماله مثيل ذكرى صار ١٧سنه احلم بيج
بقيت ساكت اخاف اخسرج من تعرفين حبي الج غرام وعشق
يله ردي عليه ارحميني من اوهامي
ذكرى اني وعيت على الدنيا مااعرف غيرك من احتاج اب انت موجود من احتاج اخ انت موجود دللتني وراعيتني واهتميت بيه حتى الغربه هنا كانت علمودي حتى اتعالج
مااعرف اميز بالمشاعر وعيت على الدنيا الكل يگول سنان اخوج وصدگت وكل احساس كنت احسه اتجاهك افسره لان اخويه جربت احب شخص اي واحد حتى اعرف الفرق بمشاعري بينك وبينه لگيت كل رسائلي واتصالاتي ويه هذا الشخص عنك انت بحيث هو نفسه بدا يلاحظ هذا الشي  غسان كان طريق جربت امشيه واختبر مشاعري
تحسرت وسكتت
سنان ذكرى يعني تحبيني مثل مااني احبج
ذكرى الشهريين الي غبتهم عن البيت وعلمي بمرضي كانوا اقسى عليه من الموت معظم وقتي اگعد بالظلمه واتصور احجي وياك مثل هسه مرات اعتذر منك ومرات اعترفلك ومرات اعاتبك
حسيت بنفسها اقترب مني
ذكرى مااگدر اگولها سنان استحي
وفجائتني تبوسني ونزلت راسها على صدري وگالت
من شفتك تبوس لوسي اليوم گلبي وگف وعيوني انعمت
درت اديه حواليها وبستها براسها
وكانني ابتهلت الى الله في ليلة القدر
فستجاب لي ولو بعد حين
اطلقت هواء حسراتي في الفضاء
ليكتب نهاية عذابي
سنان ذكرى ترى البوسه كانت تمثيليه بخمسين دولار وداعتج يعني اني لو اريد ابوسها الا گبال الشباك عدها شقه وروحلها
ذكرى صدوك شلون فاتتني وانت ليش تريد تقهرني ها
سنان مثل ماقهرتيني بغسان
ذكرى يعني متعادلين
سنان دفتحي الضوى اريد اشوفج
ذكرى اني اذا اگوم اوگع من طولي گلبي ديرجف
فتحت الضوى گانت لازمه گلبها
سنان ها ذكرى گلبج شبيه
ذكرى ماادري ديدگ سريع وانت گلبك يدگ
سنان لاتخافين عادي اني هم گلبي يدگ راح اگعد امي اگولها ذكرى تحبني
ذكرى لاعفيه سنان مااتحمل هذا الاحراج
سنان لعد اگولها خطبتها وافقت
ذكرى سنان الخطوبه والزواج بيها تفاصيل لازم نفتهمها من اخصائيه تعرف گلبي ميتحمل واني سالت الدكتوره جاوبتني تگدرين تتزوجين حسب تعليمات
سنان نروح اثنينا ونفتهم منها
ذكرى لا عيني استحي شنو مواضيع عيب
سنان ياعيب انتي درستيها بالاعداديه صوت وصوره بعد شكو
ذكرى ئي بس مو گدامك استحي منك وحتى من اصير مرتك هم استحي
سنان شتصيرين لخاطر الله گوليها مره ثانيه مرتك
ذكرى كافي سنان گلبي شراح يخلصها وياك
سنان خلص مراح احجي شي بس ابقى يمج لحد الصبح وروح ابشر امي
ذكرى شتبشرها اشو راح تاخذ وحده مريضه وميصير تخلف
سنان ميخالف قابل وهسه الحب يشفيج اني متاكد
ذكرى اذا تزوجنا لاتلغي بقية ادوارك بحياتي ابقى اب يدفعني للاحسن واخ يدللني
سنان كل هاي واكثر وداعتج اكون زوج يحبچ وروح تحميج وتفداچ
ذكرى ليش مگلت من الاول والله حرام عليك
سنان اويلي يابه صدوگ تحجين يعني
لو گايل متكرهيني
ذكرى لو تاركني اصير لغيرك كرهتك
سنان والله لو اعرف ارتكب جريمه ومااعوفج تصيرين لغيري
ليش جنتي دائما  تگولين اتزوج
ذكرى اختبرك واستفزك وكل مره مااوصل لنتيجه
خلت ايدها على راسها وگالت
ذكرى  يله سنان اطلع اريد انام الادويه ساطرتني
سنان مااطلع بكيفي
گامت من مكانها وظلت تدفع بيها اطلع شنو لزگه اطلع
طلعتني وسدت الباب طلعت للصاله ودي ادبك من الفرح ذكرى تصير زوجتي يمكن اموت والله لااسوي عرس تحجي الناس بيه والله لاالبسها  بدله محد لابسه مثلها  والله لااخذها شهر عسل تحلم بيه الاميرات
اويلي احلامي اكبر من هذا العالم
لازم اشوف الدكتوره قبل لااخطط للعرس اخاف گلبها ميتحمل والتزم بحجيهم بس شلون التزم بليلة عرسي   واني صابر سنين
لخاطر. ذكرى اتحمل بقيت بحالة استغراق في الخيال والاحلام لحد غفيت على القنفه
الصبح سمعت صوت ذكرى وامي گعدت
امي سوده عليه لو عندك مره مانمت على القنفه
دنگت ذكرى
سنان ليش مگالتلج ذكرى غير خطبتها وافقت
امي صدوك تحجي انت وليش ولج متگولين
ذكرى استحي ماما والله
امي ولج صار سنين انتظر اسمع هذا الخبر  ازوجكم اثنينكم وافتك
رحت على امي وبوستها وذكرى راحت بحضنها
امي اگولكم هي تصير چنتي لو انت تصير نسيبي
ذكرى هو نسيبج انتي امي
سنان لاعيني هي جنتج  انتي امي قبلها