حرز الحب

حرز الحب ١٢

اخر بارت هذا اليوم اكمل بكرا #حرز_الحب١١
#زينب_الموسوي#
مرت ساعه انتظر اتصال امي واني اغلي
رن تلفوني
امي خير يمه ذكرى تگول عصبي
سنان يمه اسمعيني زين تحاولين تطلعون بشقه واي علاقه بغسان واهله مااريد ليش هيج ماما تركين ذكرى تطلع وتطب ويه ولد غريب
تدرين گلبي راد يوگف من عرفت طالعه وياه
امي يمه. وياهم اخته وطلعت تشتري ملابس سباحه وهو وصلهم
سنان ماما ياسباحه مو تعرفين بيها مريضه متگدر. والدكتور اخذتيها اله عرفتي النتائج
امي والله راحت عن بالي ميصير تسبح والدكتور عنده موتمر بفيينا من يرجع يبلغنا قراره
سنان وليش مااتصلتي بيه وبلغتيني تدري بيه على نار
امي التهيت بمعاملتك والله يمه واريد اسوق حتى مااكلف العالم اكثر
سنان وشصار من معاملتي
امي قدمناها وعدونا خير.
سنان ماما لخاطر الله انتبهي على ذكرى من غسان لاتموتيني قهر
امي اسم عليك يمه الولد حباب وماشفنه من الا كل خير وكلها يومين ونطلع بشقه المنظمه ديجهزوها النا
مر اسبوع اتصل بامي عرفت طلعت بشقه وذكرى متقبل تحجي ويايه
سنان ليش ذكرى متحجي ويايه
امي اثگل عليها لان هي كل يوم تسالني عليك تگولي بعده ضايج اگوله ئي
سنان شتگول عني ماما تتذكرني لو نستني
امي وروح ابوك الغالي تحجي عنك دوم وحتى من تاكل تتذكرك وقسم عليه بس تتعالج ازوجها الك لو اعرف اربطها بحبل
سنان اشتاقيت الها هواي
امي واني ولك مااشتاقيت لي
سنان انتي الخير والبركه يمه منو عندي غيرج
امي هسه من تجي من المدرسه اگولها سنان مريض اتصلي بيه وانت تمارض من تخابرك
سنان ياريت اريد اسمع صوتها
امي سنان يمه تفطر گلبي من احسك تتحسر عليها
سنان والله لو اگولج اغلى من عمري متصدگين
سديت التلفون وانتظرت تخابرني
ومن خابرت نسيت زعلي عليها وتذكرت حبي الها وبس
ذكرى سلامتك سنن ماما تگول مريض
سنان مريض وتعبان وانتي ماسالتي عليه
ذكرى والله يوميه اريد اتصل واگول اخاف بعده عصبي عليه
سنان چان خابرتي وشفتي عصبي لو لا
ذكرى وانت بعدك عصبي حبيبي
سمعت الكلمه اتمنيت اگولها عيديها خليت راسي على الحايط وسكتت عندي امل تكررها
ذكرى الووو. سنن وين رحت
سنان موجود ذكوره گوليلي صحتج شلونها
ذكرى اسكت لاتذكرني انطوني علاج يخليني احلم. احلام عجيبه غريبه البارحه حلمت منطيني گلب حصان وماخذين گلبي وابچي
سنان ههههه شنو هذا من حلم والمدرسه شلونج
ذكرى زينه بس حرامات انطوني اعفاء من الرياضه عمو ابو ريام گال احسن حتى يصدگون انتي مريضه ويجيبون سنان

بعدها عرفت من ماما الدكتور راجع ومبلغهم ان العمليه متصير الا بعد سنه من علاج معين وايضا لازم يستبدلون شريان بسمك اكبر والعمليه بيها نسبه من الخطوره خابرتني من كانت ذكرى بالمدرسه
سنان اخاف متتحمل سنه وگلبها يتوقف
امي الدكتور قرر كل شهر فحص والعلاج متعوفه لحد تخلص السنه وهي زينه على العلاج
رضخنا للامر الواقع ننتظر سنه
عدت ايام واسابيع وشهور بين الاشتياق والخوف والامل كملت كفالة ابو ريام وارسلها اليه وقابلت بالقنصليه الامريكيه وحصلت موافقه على سفري
بلغت امي وذكرى بالخبر
سمعت ذكرى تهلهل
وامي ظلت تبچي صدوك يمه اشوفك
من جديد صعدت الطائره اتمنى اسابقها في السرعه الرحله طويله اتعبتني والشوق للقاء ذكرى وامي اضناني
وصلت يوم اربعاء كانت امي وذكرى بالمطار شفتهم عرفت ذكرى راح تركض اشرتلها من بعيد وصحت
لاتركضين اذبحج والله
التقينا بعناق مع دموع وابتسامات ثلاثتنا
امي كانت تسوق وصلنا على الشقه
كل تركيزي اعرف ذكرى كيف عايشه مشاعرها علاقاتها وكثير من الامور الي دور بفكري وفكر اي شخص يعيش الحب بالخفاء وتستعر نار الغيره بگلبه
سنان تعالي ذكوره يمي احجيلي عن حياتج علاجج
ذكرى ماكو داعي احجيلك حتعيش ويانا وتعرف كلشي انت حجيلي امورك شراح تسووي هنا
سنان اول شي اسويه انام وبعدين اگعد اكل وانام من جديد
ذكرى ههههه يله تعال شوف سريرك اني رتبته وخليته قريب من الشباك حتى تشوف المنظر يجنن
سنان يله تعالي ويايه راويني غرفتي
كانت الشقه غرفتين ماما وذكرى بغرفه والثانيه اليه
من رادت تطلع من الغرفه ذكرى اندارت بنهاية الغرفه
ذكرى متغير سنن وشعرك بيه شيب بس بعدك احلى الناس واغلاهم عندي
سنان تعالي لج تعالي وينه الشيب
ذكرى كم شيبه متاثر من نخطبلك اصبغهم
باليوم الثاني زارنا امين وحسام وغسان امي عزمتهم على غدى كانوا ناس طيبين ماعدا غسان ماحبيته والظهر قبل الغدى اجوي بناته الهام وريام امين كان يعمل بيع وشراء العقارات واتفق وياي يعلمني العمل واعمل معاه واخذ شهاده العقارات خلال ست اشهر حسام كان معاون دكتور وخاطب بنيه من العراق وغسان يدرس علًوم حاسوب سولفنا عن العراق الانفجارات الحرب الاهليه بيه
رجعت ذكرى من المدرسه سلمت عليهم
هلوو شلونكم راقبت نظراتها من سلمت على غسان ابتسمت وهو ابتسم وطلعت راحت على الغرفه استاذنت ورحت وراها
كانت تخلي ميكب وتريد تغير ملابسها
سنان شنو هذا الي بوجهچ مو عيب
ذكرى شويه حمره مصار شي
سنان امسحيه مااقبل گدام ولد شباب تعرضين نفسچ عيب
سكتت ومسحت المكياج ردت اطلع من الغرفه البسي شي عريض يله تطلعين ولاتوزعين ابتسامات
الغيره اكلت گلبي لو عندي القدره افتح گلبها واشوف تحب غسان وشنو هالسرعه كل معرفتها بيه سبع اشهر. اني صارلي عمر مگابلها ليش محبتني
طلعوا شغلت تحقيق مع ذكرى
سنان منو كان يوصلچ للمدرسه قبل من كانت ماما متسوق
ذكرى مرات غسان ومرات ريام حسب جدولهم غسان يبدي دوامه بثمانيه ومرات ماعنده دوام
سنان وشلون عرفتي دوامه
ترددت تجاوب هو گالي على الجدول
سنان عندج رقم تلفونه اريد اساله عن اشياء تخص الدراسه
ذكرى عندي رقم ريام على طول تتصل بيه
سنان اريد رقم غسان قابل اتصل بريام البنيه اليوم عرفتها
ذكرى اتصل اني بريام واخذ الرقم دقيقتين
راحت للغرفه وجابت الرقم مكتوب بورقه
سنان انطيني تلفونج اتصل منه
اخذت التلفون ومبين عليها الاحراج
اول مكتبت اسمه طلع رقمه مخزن عدها
سنان مره ثانيه لتگذبين مااحب الكذابين
انطيتها التلفون وجواي جحيم مشتعل
ليلي مانمته افكر بيها كيف بهذي السرعه حبت غسان وارجع اطرد الافكار من راسي ذكرى زغيره متفكر بهذا الشي
الصبح طلع اني مانايم دخلت ذكرى بيدها ملابس .
ذكرى صباح الخير سنن هذي القمصان عجبني واشتريتهم الك قبل كم يوم راح ارتبهم بالمخزن قبل لااروح للمدرسه. شوف. حتى قياسك اعرفه
مارديت عليها رفعت البرده وتركت عيوني تبحث عن اجابه لعقلي خارج النافذه
ذكرى زعلان مني مو باالله
جتي گعدت يمي زعلان گول حتى اصالحك
سنان شنو بينج وبين غسان
ذكرى ماكو شي رقمه عندي لان كان يوصلني يتصل عليه يكولي اني بالباب استعجلي وهيچ سوالف وبس
سنان وليش كذبتي من طلبت الرقم
ذكرى طريقتك كانت توحي بالشك بيه اگدر انطيك الدليل
سمعت كلمة الدليل مثل غركان وفجاءه ايد انمدت اله تنقذه
سنان شنو الدليل
ذكرى شوف طول المكالمات بينا اقل من دقيقه اكو اثنين مكالمتهم تطول اقل من دقيقه اذا يحبون بعض
سنان (اثلجت قلبي ) بس هم ميصير تكذبين
ذكرى اسفه لايصير دمك ثگيل سامحني وتعال ساعدني ارتب ملابسك
رتبنا الملابس عيوني. كانت تراقبها بكل حركه والتفاته وبسمه
كبرت واستنفذت كل جهدي في اخفاء حبي الها بعد مااگدر اخبي ليش متحس بيه بغيرتي بلهفتي بخوفي عليها
بديت مشوار حياتي الجديده هنا
واخذت الاجازه السياقه باشرت عمل ودراسه حتى اخذ اجازه بيع وشراء العقارات تابعت علاج ذكرى مع الاطباء
الدكتور كل الي نگدر نسويه بالوقت الحالي هو العلاج ومتابعة حالتها بالفحوصات والعلاج حتى نزيد سمك الشرايين بعدها نقرر العمليه ويمكن نستبدل الشريان امر ضروري
سنان وخلال هذي السنه شنو الي يظمن سلامتها
دكتور مافي شي يضمن قلبها ممكن يعجز او يتوقف العلاج هو وسيله لتنشيطه واحنا. منبهينها عاى عدة نشاطات تتركها
سنان بلي اني لاحظت في ساعات لنومها وفي اكل معين تلتزم بيه ومراقبه وزنها
دكتور. نعم وفي شغلة الگابه الي تسببها الادويه حاول تخفف عنها بنشاطات اجتماعيه خليها بتجمعات شبابيه گروبات نفسيه
طلعت من الدكتور على الاعداديه صرت اني اخذها واجيبها كلام الدكتور رعبني وبديت افرض حمايتي عليها احاسبها على التاخير السهر. ادقق بعلاقاتها مع صديقاتها
سنان انتظرج هنا بنهاية الدوام لاتتاخرين
ذكرى بعد الدوام في تجمع للطلبه اگدر ابقى
سنان لا تعرفين رائي بهذي الاجتماعات بعد الدوام مافيها رقابه وكلشي يصير
ذكرى صديقاتي كلهم يبقون شمعنى اني
سنان رديت بسرعه. صديقاتج ما عدهم وسكتت ردت اگول ماعدهم مرض
ذكرى ماعدهم شنو سنان انت ماعندك ثقه بيه وتعبت من شكك بيه
سنان عندي ثقه بيج بس اخاف عليج
فتحت الباب وطلعت
صحت وراها لاتركضين باوعتني عيونها ودها تذبحني
كانت تتصور اشك بيها وكنت اتضايق من معاملتي الها واتمنى تفهم خوفي سببه مرضها الي ممكن يحرمني منها باي لحظه مع ذلك بقى امر مرضها مخفي هنها وحاولت اطلعها من الحبسه الي هي بيها
انظمينا اثنينا لمنظمه تعتني بالبيئه لان ذكرى كانت تحب الاشجار والورد كل سبت واحد نروح نزرع ورد نقوم بحمله تشجير ارسم على جدران لوحات مناظر طبيعيه اقتربت منها اكثر دخلت عالمها يمكن. تحس بيه وتفكر بيه مو فقط اخ
لكن ذكرى اعلنت التمرد عليه
رجعت بيوم من دوامي المفروض تكون بالبيت قبلي بنص ساعه
سنان ماما وين ذكرى
امي ماادري اني هسه دخلت كنت بمشوار مع ام ريام
اتصلت بذكرى ردت
سنان الوووو ذكرى وينج اليوم مگدرت اجي عليچ اوصلج
ذكرى ئي انتظرتك بعدين رحت ويه صديقاتي نتغدى بالمطعم
سنان وليش مگلتي قبل لتروحين
ذكرى ترى اني مارايحه المريخ هو مطعم قريب
سنان شنو. هالرد هسه جاي عليچ اخذج شنو. اسم المطعم
ذكرى سنان اذا اجيت وحرجتني گدام صديقاتي والله ماارجع للبيت
سنان بسيطه يا ذكرى اعرف شغلي وياج
استغربت ردها عليه اعرف اني حابسها ومقيد. حريتها بدافع الخوف عليها ذكرى كل الي يربطها بالحياه حبة دواء تجعل قلبها ينبض واي اهمال ممكن يعرضها للموت
مرت ساعات واني انتظر امي تحاول تهدأني
امي كافي تحرگ بنفسك ذكرى ملت من الادويه والمرض وشافت البنات الي بعمرها تطلع تسوق تسهر وهي محبوسه
سنان غير من خوفي عليها هي. لو تدري حالتها شگد خطيره كان بقت بالفراش وماخطت خطوه برى البيت
امي گولها حالتها وخليها تراعي مرضها
سنان مااگدر معناها اتركها تنتظر الموت بكل لحظه
امي احسن مابقيه تتصور حابسها ومسيطر. عليها وتاليتها تكرهك
رجعت الساعه ثمانيه وفاتت سلمت وتريد تدخل للغرفه
سنان تعالي لج وين جنتي سبع ساعات
ذكرى ويه صديقاتي تغدينا ورحنا للمول تونست ورجعت بيها شي
سنان وليش مگلتي واني اخذج. للمول
ذكرى سنان فدوه اروحلك انت عندك اصدقاء وتطلع وياهم واني هم عندي صديقات ترى مليت من حكمك اذا اريد اشتري قراصه لشعري انت تاخذني وتجيبني شنو. سجن
سنان شنو. هالاسلوب الي تحجين بيه ويايه اشو صايره بلا. ادب
ذكرى اشكرك خيي ماقصرت شوف البنات بعمري شلون عايشات واني ممنوعه حتى من الرياضه
سنان لان مريضه نخاف عليج
ذكر ى هذي حجه اشو من تاخذني لمنظمة البيئه كلها شياب وعجايز متگول مريضه سنان كافي تخاف عليه وروح اتزوج وسوي اطفال حتى تلتهي وياهم
مااعرف شلون ايدي انرفعت وضربتها على وجهها امي ركضت واخذتها للغرفه
من ضربتها فزت مكانت متوقعه اضربها طلعت من البيت عندي صديق اسمه داوود يعرف كل قصتي ويه ذكرى اتصلت بيه والتقينا گتله ضربتها الغضب عماني
داوود دير بالك سنان هذي مراهقه وهنا الضرب ممنوع ترى تترك البيت ومو من حقك تحجي وتعترض
سنان والله حتى ايدي مااعرف شلون وصلت وضربتها
داوود تريد نصيحتي احجي وياها بصراحه كولها. انتي مريضه واني. احبچ. وباقي بلا زواج. علمودج
سنان. واذا گالت انت اخويه شلون اكمل بقية عمري وياها
داوود تزوج وانساها
سنان اقسم باالله الف مره قررت اخطب واتزوج والصبح بس اشوفها ارجع بقراري كانما الله حرم عليه كل نساء الارض الا ذكرى
داوود والحل سنان امك تشكي منك على طول. وانت عمرك ضاع خليني اني اعرفك على بنيه اهلها ناس محترمين. وتدرس ويانا
سنان لاتعرفني ولااعرفك خليني احب ذكرى. بصمت
رجعت للبيت امي گالت نايمه الصبح احجي وياها
سنان واني انتظر للصبح هسه اگعدها واصالحها
امي وتاليتك شنو. لا طايل جنه ولانار
سنان ماما مو وقتها هسه اني محمل هموم الليله
دخلت غرفتها لگيتها گاعده بسريرها وعيونها تتوعدني بعقاب قاسي
ذكرى ها شعندك هنا لو جاي تضرب مره ثانيه
سنان هو اني جاي عليچ اريد انام بفراش ماما انتي منو. بحالج ام لسان
دخلت بفراش امي ومركز نظري عليها
ذكرى شكو تباوع مشايفني لو. مضيع
سنان تعرفين شنو. معنى واحد يگول لشخص اموت عليك
ذكرى شمدريني شنو معناها
سنان معناها العمر ميسوا بدونك الموت والحياة يتساوون اذا فقد هذا الشخص
ذكرى. خير. انشاالله شارب شي وجاي
سنان ههههه ذكوره اموت عليج لاتعگدين حواجبج والله خايف عليج من المرض ياخذج مني وتتساوا عندي الحياة والموت
ذكرى وين ماما خلي تجي ابنها اليوم شبيه مصخن شارب
سنان مابيه شي ذكوره اسف لان ضربتج ليكون اذيتج
دنگت ماردت تركت فراش امي وگعدت يمها هنا ضربتج صح
لثمت خدها بقبله بيه اثر كل عطشي وصبري انرسمت الدهشه على ملامح وجهها
صار اكثر من سنه من تبوسني براسي واني ابوسها بگصتها لان كبرت كنت على وشك ابوسها مره ثانيه فاجأني صوتها
ذكرى شبيك سنان اليوم
سنان ندمان لان ضربتج باوعيني وگولي سامحتك
ذكرى اسامحك اذا تخليني اشتغل
سنان شنو تشتغلين ليش محتاجه فلوس گولي وتدللي
ذكرى والله ممحتاجه الدكتور الي يعالجني طلب مني اشتغل عنده اساعده امور نسخ ومراسلات حتى اتعرف على المرضى والعلاج وغيرها
سنان هو عنده سكرتيره
ذكرى هو اني اساعد السكرتيره لان متلحگ ترد على كل الرسائل والاتصالات فدوه وافق بروح نجمه الذابح روحك عليها
سنان موافق بس ترى اني تعلقت بنجمه من كنت مراهق هسه نسيتها
ذكرى مااصدك الا اشوفك متزوج وتحب زوجتك
سنان شوفي اني اكو وحده ابالي لو هيه لو مااتزوج ولاتساليني منو.لان مااگول گومي نتعشى اني وياج
ذكرى الله عليك كوم منو زين اول حرف من اسمها
سنان مااگول لو تذبحين روحج مااگول
ذكرى بسيطه ياسنان اذا مااعرفتها خلال يومين هسه تشوف
سنان ياريت تعرفيها كان نحلت هواي امور
ذكرى زين ليش متخطبها شنو منتظر
سنان غير توافق لج اذا وافقت مااخطبها راسا نتزوج
ذكرى وهي ليش متوافق ليش تلگه احسن منك
سنان كافي ذكرى سدي هذا الموضوع لان يضوجني
الصبح امي گالتلي ذكرى محققه وياها منو البنيه الي يحبها سنان وامي ناصبها عليها گايلتلها امريكيه
لگيت ذكرى واگفه بالباب تنتظرني اوصلها
ذكرى بالله مو عيب تحب وحده امريكيه صدوك ماتوقعتها منك والله لو تبقى بدون زواج احسن متاخذ زبالة غيرك لا وچماله هي مقابله
حرگت گلبي سنان
ذكرى منو گالج هذا الحجي
ذكرى ماما خطيه تالي عمرها جنتها لاعبه وبعدهاممعتزله
سنان ترى مااقبل تحجين عليها
ذكرى اگولك لااحجي عليها ولا ادوخ نفسي اذا تزوجتها اني وامي نطلع بغير شقه نعيش
سنان اشو ذابحتج الغيره منها.
ذكرى مااريد. احجي وياك زين
سنان صار يابه لاتحجين بس اريد اگولج
وافقت على الشغل
ذكرى حتى لو هم مااحاجيك الا تگطع علاقتك بهذي الامريكيه وتخليني اني اختارلك
سنان صار راح اگطع علاقتي بيها
بعد يومين جتي عليه
ذكرى سنن اخويه ضوى عيوني منو اختك حبيبتك
سنان حفظتها هاي الكليشه گولي شرايده
ذكرى فدوه لطولك خلي اسوق والله مااروح لاي مكان بدون علمك وروح حبيبة الگلب نجمه الله يرحمها ويجمعك بيها بالجنه بعد عمر طويل انشاالله
سنان هههههه لخاطرج انتي العصر نروح اختارلج سياره وبطلي تحلفيني بروح نجمه الله يرحمها حلفيني بحياة وحدها ميت عليها
ذكرى وحده جديده گول عراقيه
سنان مراح اگول لج اموت عليها بسهي متفتهم حماره ثوله حشاج حتى لو اگعد. گبالها واگلها. احبچ مراح تفتهم
ذكرى هاي صدوك ثوله بس منو هي غير نشوفها تتصل بيك تطلع وياها اخاف جنيه
سنان لا مو جنيه بنيه حلوه تجنن گوليلي تاخذين علاج لو لا
ذكرى اخذ علاج والدكتور بالفحص البارحه فهم ماما ان صحتي احسن
(هذا الجمله اني وماما متفقين عليها كل فحص نگولها لذكرى حتى متقلق )
وبقت ذكرى كل يوم تحاول تكسر قيد من قيودي عليها وفقدت القدره على منعها من الاندماج مع الناس والحياة
وبدت الخطابه تطرق بابها وماما تفهمهم متتزوج الى ان تكمل دراسه
راودني القلق وقررت ادخل حياتها هالمره بصفة مختلفه