حرز الحب

حرز الحب ١٨

تصبحون على خير وشكرا للمتابعه
رز_الحب#١٨
#زينب_الموسوي#
وسط الفرحه والهمه لوصول القلب تفاجاءت بتكاليف الشحن وعملية النقل للقلب وحجز صاله العمليات واجور الاطباء لان شركه التامين متدفع مبالغ مثل هذي
مع ذلك مخليت الماده عائق
سنان ماما راح ارهن البيت على البنك واداين من اصدقائي وابيع سيارتي وسيارة ذكرى
امي يمه اخاف هذي الاجراءات تطول
سنان لا متطول في بنوك تنطيني الفلوس بنفس اليوم ادفع القسط الاول للمستشفى واسددلهم بعدين
امي اني احاول اتصل بمحامي عراقي يبيع البيوت والبستان هناك بالعراق
سنان يايمه راسج ابوسها ياريت واني اعوضج والله اشتغل ليل ونهار وافيج
امي ولك ماتستحي انت هي البيوت اول وتالي الك شسوي بيها اشو عايشه بخيرك والحمد لله
سنان الله يحفظج الي يمه وادعي لذكرى
امي توصيني عليها والله طلبتها من الله وبيته الحرام دعيت ميفاركم ابد
سنان ماما مو تحجين شي گدامها اخاف تخاف من العمليه
امي سالتني البارحه گتلها نريد نسويلج فحوصات يمكن يزرعون جهاز جديد
هذا الي فهمناه ل ذكرى جهاز جديد
اخذناها على المستشفى بسيارة امي
ذكرى لعد سيارتك وين
سنان بعتها اريد اشتري احدث
ذكرى سيارتك حديثه ورا زواجنا اخذتها
سنان ماحبيتها اريد غيرها لاتدوخين نفسج انتي
من وصلنا اخذوها الممرضات وامي عملوا الفحوصات وبقينا ننتظر النتيجه بغرفتها
ذكرى ماما شبيج انتي وسنان اشو قلقين
امي غير منتظرين النتيجه يزرعون جهاز جديد لولا
ذكرى انشاالله خير اگعد سنان ليش واكف وتسبح
سنان اهووو اني طالع برى
وگفت بالممر حتى اشوف الدكتور من يطلع طلع من ملامح وجهه عرفت خير ركضت عليه
سنان ها دكتور
الدكتور متطابق بنسبه عاليه والعمليه اليوم الفجر تطول من ست الى سبع ساعات العمليه تبقى مفتوحه لحد نتاكد القلب الجديد بدا يتالقم مع الجسم ويضخ دم
سنان وذكرى راح تعرف
الدكتور بعد العمليه نحجيلها وتبقى مخدره لفتره طويله لان مافي شخص يتحمل يشوف قلبه مفتوح
سنان دكتور ندخل نفهمها دتنتظر هي وامي
دخلنا ابتسمت افتهمت هي وامي
والدكتور حاول يرفع معنوياتها
الدكتور ذكرى راح نزرعلك جهاز جديد. وقوي ويساعدك تستعيدين حياتج ونشاطج
ذكرى ياريت دكتور مو بس حياتي توفقت حياة امي وزوجي
الدكتور اذن كوني شجاعه وقويه الفجر العمليه
ذكرى مستعده الها
بقيت امي بالمستشفى مع ذكرى واني طلعت لصديقي داوود وعدني يدبر مبلغ
داوود هذا المبلغ مني والملبغ الثاني اخوانك العراقيين ماقصروا من عرفوا بالعمليه ابو علي محمد وادريس وعمر كلهم جمعوا ورادوا يگفون وياك
سنان ماانسى وگفتكم انتم صدوك اخوان
داوود ادلل سنان اخوانك وعد عيناك
مرات الشدات تبين معدن الناس
كل العراقيين الي سمعوا بالعمليه ساعدوني والله ناس مااعرفهم وميجمعني بيهم غير العراقيه مجرد سلام بينا حتى اهل صديقتها روان ناس بسطاء ابو ريام وزوجته متركوا المستشفى لحظه كانت الدمعه تفر. من عيني كل مارقم يتصل بيه ويگلي هذا فلوس كل دگة باب ومعاها ضرف بيه فلوس
دفعت المبلغ للمستشفى
رحت على امي معنوياتها هابطه والياس مسيطر عليها
سنان ها يمه ها انتي القويه
امي يمه ذكرى غاليه بغلاتك والله اخاف باچر متنجح العمليه
سنان تفائلي خير جوعانه اروح اجيبلج عشى وجبت لامي عشى وگعدت سولفتلها موقف. الناس بقينا الليل كله نسولف اني وامي وندعي وذكرى نايمه ومتعرف اي شي عن العمليه
امي يمه شلون يگصون گلبها ويخلون واحد بمكانه
سنان اخاف اسال عن التفاصيل اقلق اكثر
امي اني من هسه رجليه متشيلني وشايله هم باچر
سنان ياترى باجر نضحك لو نبچي
امي انشاالله. نضحك
بعدها بساعات امي تعبت راحت للبيت وگالت الفجر ارجع
سنان الله وياج ماما
خلصت الليل بين الصلاة والدعاء
ومااعرف شلون غفيت ومر حلم عليه شفت بيه نجمه واگفه وتباوع على ذكرى وهي عروس فتحت ايدها وانطتني الگلاده نفسها حرز الحب
فزيت مرعوب خايف
اتصلت بامي ماما باچر اذا جيتي جيبي گلاده ذكرى الي اتركتها امها
امي شذكرك بيها هسه
سنان تذكزت جيبيها الله يخليج
صار الفجر وبدا كادر. الاطباء والمساعدين والممرضات يتوافدون على غرفه العمليات ومعنوياتهم عاليه ويضحكون ويشوفوني يبتسمون
الدكتور راح ننطيك زوجه بقلب جديد اطمئن
سنان اگدر احجي وياها شويه
دكتور تفضل لان نريد نبدي بالبنج
دخلت عليها دياخذون ملابسها
سنان صباح الخير ذكرى
ذكرى صباح الخير سنان مبين منايم
سنان مجاني نوم انتي شلونج اريد اسولف وياج
ذكرى اني هم اريد اسولف وياك
سنان حبيبتي مااريدج تخافين غمضي. عيونج وارتاحي تاگدي ربنا موجود ويرعاج انشاالله وطول ماانتي بالعمليه راح اكون ادعي واصلي تطلعين بسلامه وتعيشين
تتذكرين  الگلاده هسه امي تجيبها و البسيها
ذكرى هذي الگلاده تبقى عندك لو عشت البسها واذا لا هديتي لزوجتك من بعدي
سنان شنو هذا الحجي انتي زوجتي والعمليه راح تنجح والكلاده راح البسها اني لحد تطلعين والبسها الج ذكوره اوعديني متخافين وتقاومين ومتستسلمين للموت
ذكرى اوعدك سنان اوعدني انت همين لو متت الكليتين لانگر. مو تتراجع هذي وصيتي وبعد وفاتي تعوض ماما بزواجك وتخلف اطفال متبقى حزين وتنساني وسلملي عليها وگلها لاتحزن عليها
سنان شنو هالحجي انت راح تعيشين
واطفالي انتي امهم بلا دموع كافي
هذا الحرز اني لابسه بالنيابه عنج يحفظج ويحميج
ذكرى طول عمرك انت حرزي ماخليتني احتاج انسان غيرك
اخذوا اديها خلوا بيها اجهزه
بستها حيل براسها وسحبوها بالسرير
ودخلت الغرفه العمليات وعينها عليه
بس انسدت الباب وگعت من البچي وصحت
يارب
بقيت على الارض مااگدر اوگف كل جسمي يرجف
بعدها امي وصلت
امي راحت عليه نومه يمتى اخذوها
سنان قبل ساعه صبري نفذ يمه ودي اضرب راسي بالحايط وارتاح
امي كافي يمه سنان گوم شوف الناس العراقيين المالين المستشفى كلها واگفه وياك هذي رسالة ربنا الك ربنا وياك وسخرلك گلوب البشر وراح يشافي مرتك ويعافيها گوم تشكر من الناس وسلم عليهم
گمت المستشفى صاير تجمع للعراقيين والخبر منشور بجريده عربيه تصدر هنا شدوا من عزمي
هنا مو سهله تترك شغلك يوم لان كلشي محسوب بالوقت شفت لوسي وابنائها من ضمن الناس شباب وياها بالاعداديه مدرسين ناس كثيره لان العمليه خطره ونادره
بقينا بين دعاءوصلاة وتسبيح مرت سبع ساعات واثنين وعشرين دقيقه بدت الممرضات تطلع
ترددنا من الخوف نسال اثر الدم على الجفوف البلاستك. لابساته نزعن الچفوف وذبنها شفت الدكتور طلع
امي سبقتني چلبت بالدكتور رغم هي متحجي انگليزي تبچي بنتي بنتي
جاوبها اوكي اوكي
تجمعنا حوله جاوب
الدكتور العمليه ناجحه بكل المقايس
صارت الصلاوات من العراقيين
الدكتور لسه ما خيطنا الشق لحد نتاكد من عمل القلب المريضه مازالت نايمه وتبقى بالغرفه منريد تتلوث تگدرون تشوفوها من خلف الزجاج
بوست الدكتور وحضنته وكل الموجودين باسوه
حضنت امي واثنينا نبچي تركنا الناس الواگفه ورحنا نشوف ذكرى من خلف الزجاج
محاطه باجهزه واسلاك ومالابسه اي شي تحسرت من شفتها وحجيت ويه الممرضه تسد البردات البلاستيكيه حتى محد يشوفها
الناس سلموا وبدوا يغادرون المستشفى رحت على غرفه ثانيه سجدت شكر لله اتصلت باصفان وخبرته العمليه نجحت وقلب انگر ينبض بصدر ذكرى
اصفان اكيد انگر سعيده الان
سنان اكيد سعيده في الجنه
بعدها بساعتين دخلوا الاطباء تاكدوا القلب يشتغل سدوا الشق وعملوا موتمر صحفي للدكتور حول نجاح عمليه زرع قلب. وباركوا الدكتور نجاح العمليه
بوادر الفرح كانت باديه عليه اني وامي اشترينا كيك للمرضات والكادر واحتفلنا وياهم
طلعت ذكرى من غرفه العمليات الفجر وهي تحت تاثير المخدر
امي لبستها ملابس بس صدرها بقى بدون ملابس الاطباءرايحه جايه وكلهم يطمنونا
سنان دكتور شوكت تصحى
الدكتور مفعول البنج خلص بس هي نايمه خليها ترتاح
سنان ليش لونها اصفر
دكتور قبل العمليه مااكلت لفتره طويله وعمليه القلب مو سهله طلعنا القلب والرئتين وخلينا قلب اصطناعي ورئين لحد زرعنا القلب الجديد ورجعنا الرئتين
سنان الشق مال العمليه على طول صدرها
دكتور طبعا حتى الجراحيين يشتغلون براحتهم بمرور الايام يروح الاثر
سنان راح تطول بالمستشفى هنا
الدكتور مو اقل من اسبوعين وفي علاج تستمرعليه لمده سنتين ونبدي ننطيها سوائل لضغط الدم
سنان الله يساعدها على كل هذا
دكتور ذكرى محظوظه وراح تستعيد حياتك وياها
صحت ذكرى بعد تلث ساعات وجه الصبح تدير براسها يسرى ويمنى شافتني غمضت عينها
ذكرى بعدك واگف
سنان واگف ومنتظرچ
صوتها خافت وگوه تحجي
اكيد عطشانه وجوعانه هزت راسها ئي
انطيتها مي واكل مدت ايدها على العمليه خافت
ذكرى ها شنو الغرز والقطن كله
سنان ذكرى سويتي عملية زرع قلب جديد وسليم
فتحت عيونها ماما وين
تصورت امي مطيتها القلب
سنان موجوده وراحت ترتاح بيتها
ذكرى خابرها اسمع صوتها
سنان حاضر هسه اتصل
اتصلت بامي
امي ها يمه ذكوره الحمد لله على السلامه
ذكرى الله يسلمج ماما تعالي اشوفج
امي جايه يمه اجيبلج شي وياي
ذكرى سلامتج بس تعالي
اندارت عليه منو المتبرع بالقلب
سنان المفروض مااگول بس انتي هسه گلبج سليم
ذكرى احجي سنان
سنان انگر توفت وصيتها انتي تاخذين القلب
ذكرى لا عفيه خطيه
گامت تبچي
سنان جزء منها عايش وياج وراح يبقى عندج رادتج تعيشين وتستمتعين بالحياة بالنيابه عنها
ذكرى الله يرحمها واصفان شمسوي
سنان هو الي اتصل بيه وخبرني ونفذ وصيتها وهو ايضا كان موصي بالقلب الج
ذكرى الله يعينه ويصبره
سنان ذكوره گلبج هسه سليم تگدرين تركضين وتلعبين وبعد ماكو جرعات وغيرها وراح تخلفين اطفال حلويين ونعيش سوا اني وياج
ذكرى الحمد لله يارب
بقت ذكرى واحد وعشرين يوم بالمستشفى طلعت بصحه تامه
الفرحه اكبر منا وصلت على البيت دخلتها امي لغرفتها
امي ارتاحي ذكوره يمه
ذكرى مااريد ارتاح ماما انتي ارتاحي اريد اشتغل واتعب اصعد الدرج وانزله واركض وكلشي اسوي
سنان شويه شويه ذكرى مثل مگالوا الاطباء
دخلت للمطبخ وحضرت الاكل ونظفت واستقبلت الناس الي جاييه تبارك
بالليل كانت بالغرفه بابهى صوره
ذكرى اليوم عرسنا سنان
سنان والله اشو اني ماادري
ذكرى هسه دريت وسوالف الجرعات والاقساط انساها زين هسه گلبي مابيه شي
سنان خلي ننتظر يصير شهر
ذكرى اگولك اشو انت مكيف على هذا الوضع الي چنه بيه لعد المن سوينا العمليه والمصاريف كولها
سنان لو تدرين حتى سياره ماعندي ماكو عراقي بالمدينه ميطلبني
ذكرى صدوك سوده عليه سنان
سنان ولا يهمج هسه بيوت العراق تنباع ونسدد
ذكرى واني بس اخلص الاعداديه اشتغل
سنان عوفينا من هذا الحجي وتعالي راويني العمليه
ذكرى منظرها كولش محلو جبتلك الالوان حتى ترسم عليه
سنان لازم ارسم سور الصين يله يضيع الاثر
ذكرى ارسم عندك الليل كله قابل اني مريضه وتخاف اتعب
سنان اسم الله عليج حبيبتي ذكوره

العمليه اجريت لذكرى ٢٠٠٨
والحمد لله ناحجه بمعنى الكلمه بقت على العلاج سنتين
خلصت اعداديه ودخلت كليه وتخرجت ممرضه تعمل في نفس المستشفى الي اجرالها العمليه وعند نفسك الدكتور
القروض والديون سددناها اني وذكرى
عدنا اطفال اثنين مصطفى وانگر
الاطفال سليمين لحد الان
ماما عايشه ويانا تربي اولادي على الحب الي ربتني عليه
امي المراءه الاولى في حياتي وحياة ذكرى وكذلك مازالت هي الاولى في حياة اطفالي
حرز الحب تلبسه بنتي انگر
اصفان صديق واخ عزيز. نويت اتبرعله بكليه لكن سبقنا متبرع ثاني
زار امريكا مرتين وعرفته على لوسي وعايشين سوا بالنرويج
اني وذكرى سنويا نهدي ختمة قران لروح انگر.
رابطة هديه من ميت اغلقت سنه ٢٠١١بعد ان دخلها اعضاء ينصبون ويبتزون المرضى ويتاجرون بالاعضاء
ذكرى تعرفت على اهل امها عن طريق النت
زرت العراق وصفيت املاكي بيه
الى كل من لايومن بالحب
الى كل من يؤمن بالحب
الى من يعتقد ان التضحيه تورث الخير
الى من ينتظر معجزه
الى من يحب دون امل
وينتظر دون نهايه
اهديكم هذه القصه
نجمه ماتت لانها لم تجد قلب يحبها ويرعاها
ذكرى عاشت بالحب وجدت قلب كان حرزا حافظا لها

اخوكم سنان العراقي
القصه حقيقيه ومنشوره في سنة ٢٠٠٨ بصحيفه امريكيه تتحدث عن عمليه نقل القلب بعنوان هديه من ميت بحثت عن المريضه وعرفت القصه كامله
#زينب_الموسوي#