البارت 21
وجع قلبي
بقلمي روسكان
لبيج قصص روسكان
من داومت لليوم ابد ماصار سجاد كبالي صح الماركت مفتوح بس بيد العمال ولا مرة شفته ..
مرت 3اسابيع ع دوامي وصار كبالي سجاد لازم صونده المي وواكف يرش ..ارتبكت بشوفته ..راد يرش عليه المي لان جان صافن سرحان وفجاه حس ع نفسه من راد يرشني بالمي واعتذر بحجايه ..
العفو منج اختي ..
باوعتله وجانت بس عيوني طالعه من النقاب هو بس كال هالكلمتين وابد مباوعلي ولا اني حاولت احجي خاف يعرف صوتي اكيد وصله خبر اني رجعت اداوم بس ميدري وين مدرستي ..
خلص وكتك ..
يالكلشي حلو بوكتك ..
يالي الدنيا ماتسوى اذا ماكو عطر شفتك ..
وجهك جان خارطتي ..
وانت جروحي خارطتك ..
جنت تسافر بدمي ..
واني بدمي ضيعتك ..
خلص وكتك ..
والمفروض من اول اعوفك واني ماعفتك ..
عجبني احساس باحضانك وغصبن عني اخرتك ..
كلت يعقل كلت يكبر ..
كلت يفهم ..
وطالت حيل سالفتك ..
واخيرا قررت اخلص ..
وافارك نارك وجنتك وفاركتك ..
انتهى حبك شي عادي انتهى حبك ..
كلبك جان بي روحي طلعت روحي من كلبك ..
يالي بجرحي وهمومي اعرفك بطل ماجربك ..
يا اسهل بشر شفتك واني جنت الي مصعبك ..
انتهى حبك والمفروض ماطول ..
بس حيل الكلب حبك ..
حبيت القهر والشوگ ..
وگلت الفرگه متعجبك ..
كلت بوسه وبعد بوسه ..
بعد حضنه وجنت مصدگ بجذبك ..
واخيرا قررت انسى ..
وافارك نارك وجنتك وفاركتك ..
ولاتحبني ..
لا رايدني ولاتحبني ..
مدري شبيه بين ايدك جان التعب عاجبني ..
اضعف لو شفت وجهك ..
روحي تنسحب مني ..
اذوبن بين اصابيعك ..
عالم ثاني تاخذني ..
ولاتحبني لاتحلف اذا عفتك تموت وعود تقهرني ..
نسيت ومستحيل ارجع ..
الك وبكيفك تذلني ..
جنت ضايع جنت حاير ..
جنت غلطان ..
همزين الله توبني ..
واخيرا قررت انساك ..
وافارك نارك وجنتك وفاركتك ..
عفته ومشيت ..خانتني دمعه نزلت من عيوني ..ماعرف ليش يمكن بگلبي اله بعد مكان ..طردته من تفكيري وارفض رجوعه لحياتي ..
چان يوم جمعه واني حابسه روحي بغرفتي اخيط وگبت العيطه مال شيرين بس هالمرة صوتهه اعلا من معدل كل مرة طلعت اريد اشوف شبيهم فجأه انفتحت باب غرفتهم نزلهه ضرغام سحل من شعرهه المنظر خلاني من الصدمه ابهت وصافنه ماعرف شلون اتصرف ..
ابويه وامي ع صوتهم العالي طلعوا من غرفتهم وليث ولينا يريدون يوخرون شيرين عن ضرغام راح شعرهه تهلس كوله بين اديه واني لزمتني الصفنه او اني شمتانه بيهه يوميه اسمعهه من زوجهه يطلع العصر ويه اصدقائه تخابر اهلهه وتجيب اسمي بالموزين ..ماخلت شي ماوصلته الهم عني ..
ابويه ظل يصيح عليه يعوفهه المرة راح تموت بيده ..
ظل يضرب ويغلط عليهه الي افتهمته من السالفه سمعهه تحجي ع شرفي يعني كلام كل مرة عليه بس هالمرة مو بس اني سمعتهه هالمرة الله فضحهه وخله زوجهه يسمعهه شتحجي عليه طاب عليهه مفلش مبايلهه ووملخهه تملخ ..
حته ابويه ماكدرله فجأة لزم صدرة ووكع بالكاع عاد اني هنا حسيت ع روحي ركضتله وكلنه انشغلنه بي كمت املخ بروحي ونصيح بابا بابا ميسمع ولايجاوب شاله ضرغام وليث وركضوا بي اني لبست عباتي وطلعت وراهم وامي همين ..
طلعنه بي للشارع ركضت ع بيت جيرانه عنده سيارة تكسي طلبت منه يوصلنه للمستشفى الولد ماقصر ركض ويه اخوتي شالوا ابويه ودخلوه للسيارة ماكفت لان تكسي صغيرة كلت لضرغام روحوا انتو واني وامي ناخذ تكسي نلحككم صاح بيه امشي ارجعي للبيت ماقبل بس اني عاندت همه راحوا وركضنه اني وامي لراس الشارع اخذنه تكسي واخذت تلفون امي وخابرت ليث ردت اشوف يامستشفى راحوا ولحكناهم ..
من وصلنه للطوارئ لكيناهم ماخذينه الاطباء اشعه وفحص وتحاليل ونقلوهه رأسآ للعنايه المركزة ضاربته جلطه وصاير شلل بحلكه وايده ورجله ..
اني انهاريت من البجي واخويه لازمني ..وامي ضغطهه صعد وشكلولهه مغذي ونامت مستشفى ظليت حايرة من غرفه لغرفه بين امي وبين ابويه الي بعده بالعنايه ..
مرت 3ايام واني بالليل ابات بالمستشفى ويه ابويه وبالنهار ارجع اسبح وارتاح واخذلي ساعتين نوم ويرجعوني اخوتي للمستشفى يوم اني وضرغام ويوم امي وضرغام وليوثي رجال البيت لان لينا باقيه وحيدهه تطبخلنه وقايمه بالبيت وذيج الخاتون مخابرة امهه جايه ماخذتهه من اول ما وكع بابا ودخلناه مستشفى ..
اسبوع ياله طلعوا ابويه من العنايه المركزة شفت الويل ياله طلع نشفت دموعي من البجي ومابطلت ادعيه ولساني يلهج بالقران واي سورة حافظتهه .
بدة ابويه يتحسن ..بس ماقبل الطبيب يطلع من المستشفى راد يبقيه بعد يومين اكثر يراقب حالته بين ما تستقر ..
صاروا كرايبنه يجون للمستشفى يزورونه عمامي وعماتي واصدقائه وحته الجيران .. كولهه وكفت ويانه ..
فد يوم جان عليه الدور ابات ويه ابويه شفت سجاد من بعيد ..هستوة طلع من غرفه بابا ..
سرعت بخطواتي صارت اقرب للركض اريد اعرف شرايد جاي هسه ..
اول ماطلع من الغرفه شافني جايه ناحيته ..
اول ماوصلتله كتله ..
................
تكمله بارت 21
انتو شكد ماتستحون
شلون عيون صلفه ..انت شجاي تسوي هنا ؟
لاتصيحين منا عالم ..
مو شغلك شعدك جاي ..جاي تتشمت ..مو كافي ابويه انجلط من ورة اختك الحقيرة ..
لزمني من جتفي وهزني وكالي بعصبيه ..
كتلج كافي نصي صوتج منا عالم ..
وانتو تستحون من العالم علساس ..
طببني لغرفه ابويه هدأت راسا او كفيت مجبورة عن الصياح ع سجاد لان ابويه جان كاعد ..
ظل يباوعلي ويباوع لسجاد ميكدر يحجي حلكه مشلول بس عيونه تحجي ..
درت وجهي دمعت عيوني ..كلت لسجاد بهمس ..
اطلع برة ..لو اجيت مرة ثانيه اسويلك كارثه ..
ظل ساكت يباوعلي ..يباوع بعيوني يمكن مستغرب ..متغيرة ..سمنانه ..ماعرفت افسر نظراته وهدوئه ..جر حسرة وتنهد وعافني وطلع بدون ولا كلمه ..
يومين وطلعوا ابويه من المستشفى الف الحمدلله والشكر ربي ..الاب خيمه متتعوض ..
جنت ماخذه اجازو من دوامي اسبوع وخلصت ورجعت اداوم بس حيييل تعبانه تعب الدوام ومن ارجع الكه خطار يمنه طبخ وتنظيف وتعزيل ومرات خياطه وفوكاهن تعب الحمل الي لسه مكايله لاحد عليه بس شهلاء ومحلفتهه متسولف لاي بشر.
مرة من المرات رحت للطبيبه فحصت سونر لان مدا احس بكلشي بس مجرد مكرشه كرش صلب صغيروني فكالتلي الطبيبه حملي وصل 14اسبوع يعني تقريبا 3اشهر ونص وصرت اخذ مثبتات ومقويات لان بنيه جسمي ضعيفه رغم الكرش ..
ابويه بدة يتحسن بس صار ع كرسي متحرك وميكدر يحجي ..
خاف امي ابويه بحيله وهي الي مسيطرة هسه سيطرت وتجبرت بعد اكثر لان صار ابويه لاحول ولاقوة بس اسمه عايش ونفسه بهالدنيا وهم نكول الف شكر الك ياربي يكفيني نفسه بالدنيا ..
الخاتون شيرين محد رجعهه من اهلهه لسه يمهم وضرغام مصمم يطلكهه ومحد معارضه لان هي اذت الكل ..
اهلهه دزوا خبر انو شيرين حامل ..هنا ضرغام سكت ..
للحكايه بقيه ..
الظهر سحلتلكم عبير وبالليل سحلتلكم شيرين بعد شتريدون
شاركوني توقعاتكم ضرغام بعد خبر الحمل يطلك شيرين لو تراجع عن قراره ؟؟
