البارت 12
وجع قلبي
بقلمي روسكان
لبيج قصص روسكان
مرن يومين ع زواجنه بقه بيهه سجاد بالبيت واسلوبه وياي مثل ماهو وراهه سمعته يحجي ويه عمتي يكوللهه راح يرجع يروح لشغله بالسوبر ماركت شعده باقي بالبيت هوفاتح الماركت بس بيد العمال وميصير هالكد وقت يعوف حلاله بيد العمال وبلغهه اذا اجوي خطار يباركولنه عود يخابرون عليه ويجي رأسا .
ثاني يوم كعدت الصبح ب 7مالكيته موجود طالع لشغله ضجت يعني راح بدون ريوك ..
غسلت وجهي ونزلت جوة لكيت عمتي كاعده ..
صباح الخير عمه ..
هلا صباح النور ..
عمه شنو سجاد طلع ؟
اي لعد متدرين ..
لا مو هستوني كعدت ..
اي مسعده ..
تباوعلي وتعوج بحلكهه مارديت عليهه حته سبعتي لسه ماطالعه ..
كلت اكيد تريك ويه امه ..
ردت اصعد كالتلي عمتي ..
ها وين ؟
اصعد لشقتي غير ..
ليش تكملين نومتج تردين ..
صفنت عليهه سكتت ..
عمه محتاجه شي ؟
اي لسه بدون ريوك امشي سويلي ريوك .
اي عمه صار ..
استغربت لسه ممسوين ريوك رغم تبارك دوامهه صبحي يعني شنو صعبه عليهه تسوي جاي وتسلك بيضات وشويه جبن وخبز شنو صغيرونه صف ثالث متوسط ويعني سجاد رايح لشغله بدون ريوك ..
وانقهرت من اسلوب عمتي بالكلام وياي عبالك خدامه مو چنه وهاي سبعتي بعدهي ماطالعه هي اصلا ماعدهه اسلوب بالكلام .
سويتلهه الريوك وحضرت السفرة وصبيتلهه جاي وكعدت تريكت وياهه كلت بدل ما اصعد اسوي ريوك ثاني وهم ع الواهس وياهه اكلت ..
كملنه لميت السفرة وغسلت المواعين ورجعت كولشي لمكانه ..
عمه لعد شعجب مها لسه ما اجتي ؟
مو انتي موجوده شعدهه جايه ..
مافهمت قصد كلامهه سكتت وصعدت لشقتي ..
رجعت نمت للساعه 9:30 ياله گعدت .
وحدي والشقه هدوء والكهرباء طافيه كمت نضفت وشفت شنو عندي مسواك وطبخت غده تمن ومرگه والتهيت بشغلات تعزيل ماتعزيل رتبت غراض الكاونتر ع ذوقي بحيث من ادور الحاجه الكاهه ..
صار الظهر اذن الاذان بالعاده جنت عادي تتاخر صلاتي بس هاليومين الفاتن شفت سجاد ملتزم ويصلي ويه الاذان فاخذت هذا التعلوم منه ورحت صليت شكد ارتاح من اصلي كل وقت بوقته عبالك جبل هم وينزاح .
قربت تصير الساعه بالوحده الظهر واني متت جوع لان متريكه من وقت شويه وسمعت صوت صياح جوة طلعت من الشقه تقربت اريد اشوف شكو ..
سمعت صوت سجاد كيفت يعني اجه ..
كاللهه يمه لساتهه عروسه مو مها وتبارك يمج ..
ردت عليه انو تبارك بالدوام ومها ما اجتي اليوم والخاتون تريكت وصعدت وماشفت وجهه بعد ..
الخاتون يعني اني .
ركضت رحت للمطبخ وصرت ارجف من الخوف شبسرعه اشتغلت سوالف العمه والجنه وخفت من سجاد لايمد ايده عليه ..
سويت روحي دا اسوي زلاطه ..
هو فتح الباب ودخل رفعت راسي صارت عيني بعينه ماسلم وماتجرأت اسلم عليه هيج عبالك حيله واكفه من الخوف والله من اتذكر الضرب مالته اول ليله والراشديات جسمي يكوم يرجف خوب ظهري لسه يوجعني وماكدر انام عليه لان مكان الحديده مال الحزام لسه يوجعني ..
طب للغرفه بدل وسبح وطلع ..
اجه للمطبخ واني احمي بالاكل ..
ليش اليوم مطابخه ؟
درت وجهي عليه ..
سويت نفسي مادري شنو سبب الصياح الي صار بينه وبين امه جوة وكتله ..
شلون ماطابخه هذا الغده جاهز داحمي بي ثواني واصب ..
تعرفين قصدي ..
سكتت ودنكت ونصيت صوتي وحجيت ..
احنه مو عازلين عنهم يعني اسوي شغلي هنا واسوي شغل جوة ؟؟
والله هذا العندي .
موعاجبح ذاااك الباب .
واشرلي بيده ع باب شقتنه .
انهضمت ..بعدنه بالبدايه ماعيرني بس طردني ويدري ماكدر اروح زعلانه لاهلي وماصار يومين ع زواجي .. العيب عليه اني مو عليه ..
دمعت عيونه وظليت اباوعله بعيونه كتله ..
لا عاجبني ..
بلعتهه وسكتت جان كاعد ع الميز صبيتله غداه وجهزتله سفرة مرتبه وصبيت لنفسي ماعون تمن وفوكاه مركه واخذت خاشوكه ورحت للهول كعدت اتغده عفته وحده خطيه اكيد تعبان ماريد احرمه الاكل لان شوفة وجهي تسد نفسه ..
جنت اكرر كلماته لنفسي متعمده حته لا انسى انو هو مجملني وساتر عليه مو محبة بيه وثمن الستر ذلتي فماريد اتأمل انو يتعدل وياي ويكوم يحبني ويختار يكمل حياته وياي بدل ما يطلكني بعد شهرين تلاثه .
خلصت اكل اجيت دا اغسل ماعوني ..
كتله ..
الصبح بيش الساعه تروح لشغلك ؟
ب6 ..ليش ؟
هيج بس دا اسال .
خلص اكله وكام اني رحت لملمت السفرة ورجعت الاكل الباقي وهو لاعلق ولاكال شي ع اكلي لاعاشت ايدج ولااي شي غسلت مواعين ورتبت المكان وهو غسل وكالي ..
ب3:30كعديني ..
كتله ماشي ..
طب للغرفه نام واني طبيت وراه اخذت بطانيه ومخده ورحت للهول انام ..
دقايق وغمضت عيوني مستسلمه للنوم وحسيت بظل صار فوك راسي بين النايمه والكاعده فتحت عيوني لكيته سجاد واكف فوك راسي ..
نهضت بسرعه ..
هاا ؟
شنو ها شو هنا وتريدين تنامين ؟
خلصت شغلي غير ..
لعد اني شحجيت مو كتلج امي محد طابخلهه اليوم نزلي وديلهه غده ..
اي ماشي ..
كمت من مكاني وهو يراقبني شاسوي حميت الاكل مرة لخ وحضرتلهه صينيه اكل مرتبه..
تكملة بارت 12
نسيت الشال ..شلت الصينيه وردت انزل بيهه ..
صاح بيه سجاد ..
وييييين ؟
انرعبت من صوته ..
هااا ..
وعلا ..من تنزلين شالج مينزل من راسج .
اي اي نسيته ..
رجعت لبست شالي لفيته عدل وشلت الصينيه علمود انزل غده لعمتي ..
واني بداخلي ادردم هو منو قابل راح يشوفني هو بس امجد وامجد شيجيبه لبيت اهله غير عنده بيت يتغده بي ..
وديت الاكل لعمتي ..
هاج عمي تفضلي هذا الغده واني اسفه ع التاخير ..
باوعتلي صفح ..
بعد وكت انخرطت من الجوع ..
عمه مادري عبالي مها اجتي طبخت ..
ايا عيارة مو كتلج الصبح شعدهه جايه مها وانتي موجوده لو تسوين نفسج متسمعين ..
لاعمه مو هيج ...
ماخلتني اكمل ..
لاهيج ولا موهيج .. هاي شنو ؟؟
فززتني باوعت ع الصينيه ..
هاي شنو جايبه ماعون واحد وين يكفي اني وتبارك بدون غده ..
هميت اصعد اريد اصبلهه ماعون ثاني واجيبه جان تكولي ..
جيبي الكدر كوله ..
استغربت من طلبهه ..بس ماهتميت صعدت جبت كدر المركه كوله وخليته بالصينيه ورحت جبت ماعون اصب لتبارك غده وصحتلهه حته تجي تتغده لان قبل شويه رجعت من الدوام ..
كالتلي عمتي ..
خلص اصعدي انتي ..
لاعمه خلصي غداج علمود الم الاكل واغسل مواعين ياله اصعد ..
ردت عليه ..
شكلولج علينه بينه شلل كومي صعدي تبارك تغسل المواعين .
لاعمه حشاج ماجان قصدي هيج ..
دكومي كومي ..
اي عمه صار ..
ماعدهه اسلوب ..ابدددد ..
لعد من لا انتي ولابنتج مشلوله ماكمتن سويتن غده لرواحجن لو فالحه بس تحشين بالرجال ع زوجته ..اتنرفز من هيج نماذج ..لو اكطعهه قليل بحقهه ..
صعدت لغرفتي طليت ع الغرفه لكيت سجاد نايم رجعت تمددت بالهول ع القنفه صفنت ع السكف احس بالوحده احس اني عايشه وحدي هدووووء صح اني هادئه واحب الهدوء بس مو معناتهه سهله اتقبل اعيش ويه شخص ميحجي وياي واني ببيت اهلي صح متعوده ع الهدوء بس من باب انو اني مستمعه استمع اكثر مما اسولف .
صارت ب 3:30كمت سويت جاي وعندي باقي قطع من الكيكه وكعدت سجاد ..
سجاد ..سجاد ..
انده بي
اممممم ..
صارت ب 3ونص ..
رفع راسه باوعلي ونصه كالي ..
اي كعدت ..
عفته وطلعت من الغرفه ..صار الجاي طفيته و صبيت ورتبت الكيك بصحن وحضرتهن اله ع الميز ورحت للهول ..هو غسل وشاف شمحضرتله ع الميز كعد اكل بسرعه وبدل وطلع للماركت ..
اني ظليت وحدي بالشقه حاولت انام ماكدرت بعدين حضرت للعشا كباب گلي عجنته وغطيته ودخلت للغرفه رتبتهه ورتبت ملابسه كولشي رجعته لمكانه رغم ما سجاد مرتب بشكل ميذب شي بالكاع ..
شويه ونزلت جوة ماكو احد عمتي طالعه وتبارك بغرفتهه تقرة رحت فتحت الثلاجه ردت اشوف شنو عدهم مسواك علمود اجهز العشا ..
مالكيت غير الطماطه كلت احمس شويه بصل واسوي طماطه گلي ..
رحت نظفت البيت ولملمته وصار الاذان صعدت صليت ونزلت سويتلهم عشه وجهزته وعفتهم وصعدت ..ينتظرني عشه ثاني ..احس بروحي خدامه مو زوجه ..
گليت الكباب وجهزت كولشي وظليت انتظر سجاد يجي هاي اول يوم يروح بي للشغل فما اعرف شوكت يرجع ..اثناء انتظاري جعت سويت لفه واكلت وبقيت كولشي ع الميز ورحت فرشت فراشي وغفيت من التعب ماحسيت ع نفسي الا وصوت طكطكه بالغرفه باوعت سجاد راجع ..
كمت اريد اسويله العشه كالي ..
ماريد رجعي نامي ..
مارديت عليه جان كولشي جاهز والكباب بالاوفن حميته شويه وطلعته وبدون كلام رجعت لفراشي نمت ..
سمعته يطكطك بالمطبخ عرفته كعد يتعشى ..
لفلفت روحي ونمت ..
مرت ايامي عاديه ع نفس الروتين المتعب هذا ..قبطت 7ايام وماسوولي سبعه بس اهلي عزموني ع الغده واخذنه عمتي ورحنه لاهلي ..
اويلي شكد فرحت من شفت اهلي ..
