البارت 11
وجع قلبي
بقلمي روسكان
لبيج قصص روسكان
ثاني يوم الصبح كعدت ع صوت باب الشقه هو الباب صاير بدايه الدرج من فوك لان ويه غرفتنه والصحيات ماخذين البيتونه وبانين بيهه مطبخ وهول .
الباب جان ديندك شلت راسي باوعت ساعه ب 9وسجاد نايم ..
شلت الفراش كفيته بسرعه وسجاد كعد ع صوت دكه الباب ردت اطلع افتح كالي سجاد ..
وين ؟؟
دا افتح الباب ..
رجعي اني افتح ..
رجعت وهو كام من فراشه لبس دشداشه بيضه جانت معلكه بالزاويه وديطلع يفتح الباب التفت عليه كالي ..
البسيلج شي مال عرس حته ننزل نتريك جوة .
صار.
عافني وطلع ..
رحت غسلت وجهي ولبست دراعيه لونهه كريمي وحطيت شويه مكياج يخفي اثار البجي والورم بعيوني ..
رجعلي سجاد كال ..
اهلج اجوي وجايبين ريوك وياهم ..
اي لحظات .
لفيت الشال لفه حلوة ورشيت عطر وسجاد منتظرني برة ..
رحتله كالي ..
مااوصيج بعد حجايه زياده ناقصه ماريد .
اي ..
امشي كدامي يله ..
نزلت قبله ..تلكيت اهلي ..ماما وبابا جايين ..تصنعت الفرح ورسمت ضحكه هادئه ع وجهي ..
استقبلتهم وسلمت عليهم ..باركولي ماما حضنتني وباركتلي وكذلك بابا بس حضن بابا غير بحضنه خنكتني العبرة بس قاومت الشعور ومابجيت ..
وخرت عنه حته اسوي مجال لسجاد يسلم عليه خانتني دمعه نزلت مسحتهه بسرعه بس سجاد شافهه وخزرني ..
رجعت ابتسامتي المصطنعه ..باركولي عيالي وبوستني عمتي واطتني صباحيتي ..
عمتي كالت اكعدي يم زوجج ..
وكعدت يم سجاد اسمي كاعده يمه اعرفه ماطايقني وكوة متحمل وجودي يمه واحاول من اتحرك ما انطخ بي ولا اتقرب زياده عن اللزوم وكعدنه كوليتنه سويه حته اهلي كعدنه نتريك سوة ..
ارتاحت نفسيتي شويه ع شوفة اهلي ..
امي كعدت تسولفنه انو البارحه بعد ما زفونه لهنا زفوا اخويه ضرغام وعروسته لبيتنه ومناك راحوا باتوا يم بيت خالتي واليوم من الصبح جابوا ريوك وبوجهم علينه يعني لسه مرايحين لبيتنه وهسه بس يطلعون من يمنه يرجعون لبيت خالتي ياخذون ليث ولينا وخالتي وبناتهه ويرحون لبيتهم علمود يباركون لضرغام بزواجه ..
وعمتي كالت بس يطلعون تروح تودي ريوك العرسان
اخذولهم نص ساعه وترخصوا يطلعون ..
امي اخذتني ع صفحه كالتلي ..
بشري شلونج ؟
كتلهه ..تمام ..
خلصت شغلتكم ؟
اي يوم كولشي تمام .
كالت ..الف الحمدلله ياربي ..البارحه هم ضرغام خابرني بشرني كملت شغلتهم ..
ضحكت فرحت لاخويه ع الاقل خلي واحد بينه ينسعد دعيت ربي يسعده ويرزقه بالولد الصالح ..
راحوا اهلي ورة شويه خالتي لبست عبايتهه واخذهه حمايه امجد تبارك لبتهه ووصت البنات يسون غده ..
سجاد صعد فوك واني بقيت جوة يم مها ..
ومن خوات سجاد مجان موجود احد بس الصغيرة تبارك سالت مها لعد عبير وين البارحه شفتهه كالتلي خيه التحقت ...
ضحكت اني شنو التحقت قابل هي جندي ..كالتلي انكس والله الله لايثردلج وياهه ماتنجرع نسخه من عمتي ..
صفنت ع كلامه وخفت ..شمنتظرني ..
هي عبير من اول ماشافتني شو اني ماعاجبتهه وهي مدري ع شنو شايله خشمهه ..
مها ..تكول عدهه امتحانات سوت عليهم عزة من الصبح لمت غراضهه ومسواكهه واخذت فلوس وامجد وداهه للكراج ومناك هي وحدهه تصعد سيارات وتروح للقسم الداخلي ..
ماعرف شلون اهلهه هيج يأمنون يدزوهه بطريق طويل وحيدهه حتلو متعوده بس تبقه الشغله خطرة ومو مال تطلع البنيه وحيدهه ..يوووه واني شعليه ..
مها هم عدهه مشتمل بنفس البيت مال عيالي بانين الحديقه مشتمل ..مستقلين عن اهل زوجهه ومامستقلين لازم تجي يوميه هنا تخلص شغلهه تنظيف وترتيب وطبخ ياله تروح ع بيتهه ومبينه ممرتاحه لان عمتي هواي تدخل بحياتهم وتريد شهريه من امجد وهو هم ياله يطلع مصرف بيته ودتلح عليه حته يتزوج ع مرته لان صارلهم سنتين مزوجين وماعدهم اطفال تكوله مرتك عاكر ..
صفنت ..اسوأ النماذج من الحموات والعمات موجوده بهذا البيت حرت شمنتظرني لعد ..
البيت نظيف كمت ويه مها نعزل سفرة الريوك واحنه دنسولف ردت اغسل المواعين ماقبلت كالت انتي عروس ولاحكج السرة لاتستعجلين وماخلتني اساعدهه بطبخ الغده..
غمزتلي ودفعتني كالت ..
روحي لزوجج ..
هي متدري اني شارده من زوجي من غير هو مو طايقني .
من لا چارة صعدت فوك وظليت كاعده بالهول ادري بي موجود بالغرفه وماردت افوت واضايقه ..
صارت الساعه ب 12 طلع للهول تفاجئ بوجودي باوعلي وفات يتجدد ودخل للغرفه يصلي بقت الباب مفتوحه واني اباوعله وهو. يصلي بعدين خلص ونزل لان صاحونه ع الغده اني رحت صليت ونزلت تغدينه كولنه سوة وهم كعدت يم سجاد وحاولت ماضايقه لان هو كالي كدام اهلي نتصرف عادي يعني حته الكلام مسموح بيناتنه كدامهم ..
كمت ساعدت مها تلم السفرة مال الغده وساعدتهه بترتيب المطبخ وهي غسلت المواعين ماقبلت اغسلهن وسوينه جاي وشربنه ..
صعد سجاد واني شويه ظليت اسولف ويه مها عمتي خزرتني وجرتني ع صفحه كالتلي ..
انتو هسه عرسان من زوجج يصعد اصعدي وراه .
وسالتني عنه ليش ضايج شبي ؟
كتلهه...
تكمله بارت 11
كتلهه مادري ..ماصار شي بيناتنه ..
كالتلي ..هم رايد يصير ..
وكامت تعوج بحلكهه وعافتني وراحت .
اني صعدت فوك هو جان متمدد بالغرفه يتفرج تلفزيون ..
اخذت تراكسود وطبيت للحمام ابدل وطلعت فرشت فراشي وتمددت بي وهو ابد مباوعلي ولا اني اهتميت
جان يباوع فلم اكشن و الصوت عالي اني غفيت اول ماحطيت راسي ع المخده وكل شويه افز من الصوت العالي وهو ولايمه عبالك ديحاربني حرب نفسيه ..
كمت اخذت المخده والغطه ورحت للهول نمت ع قنفه التخم ..
شويه واختفه الصوت الظاهر سده او نصاه للاخير عبالك بس جان يريد يهججني من الغرفه ..
التفكير ارقني وطارت النومه من عيني ..كمت للمطبخ مطبخي ..
فتحت الثلاجه متروسه مسواگ والكاونتر كذلك اشتهيت اسوي كيكه وبلشت اسويهه .
ساعه وربع او اكثر شويه وكملت الكيكه ..
ريحه الكيكه من طلعتهه من الفرن ترست المكان والريحه تشهي والغرفه طول الوكت هدوء عرفته نايم شويه وسمعت صوته طلع يغسل وجهه مبين عليه هستوهه كاعد من النوم .
رحت سويت جاي ..
هو رجع للغرفه دقايق وطلع كعد بالمطبخ يمكن ريحه الكيكه جابته ..
سالني بدون مقدمات ..
منو سواهه ؟
اني .
قدمتله صحن بي قطعتين كيك ..
بس حارة ديربالك ..
هز راسه اي
چاي ؟
ثواني ..
صبيتله جاي وطيته استكانه وحطيته كدامه ..
رحت قطعت قطعه كيك وصبيت جاي لنفسي واخذتهن ورحت للغرفه بدون ولا كلمه هو ميريدني اكل وياه تنسد نفسه من يشوفني هذا نص كلامه ..
طلعت مسلسل تركي اتفرج عليه شربت الجاي واكلت الكيكه هو شويه وطب للغرفه كمزت اني لان جنت كاعده ع الجربايه عفته ورجعت للمطبخ ..
وصلت باب الغرفه كالي ..
الجاي اشربه بالكوب وشكر قليل .
سمعته وكتله ماشي ورحت للمطبخ .
هو نزل وراهه واني بدلت ونزلت وراه العصريه اجونه خطار يباركولنه ابن عمه وزوجته واطفالهم شويه وراحوا ..
سوينه عشه وكالعاده ماقبلت مها احط ايدي بشغله ..
خلصنه صعدنه لشقتنه ..
طبيت للحمام بدلت ملابس مريحه تراك نوم ستن طويل ومستور بس نص ردان وفرشت فراشي وخليت راسي ع المخده الريمونت مال التلفزيون هو محتكرة رغم مبايله بيده والريمونت بالايد الثانيه جان مطلع فلم رومانسي اني احبه اني منتبهه عليه بس هو ممنتبه عينه بمبايله ..
شويه ودار القناه .. بدون وعي ولان مندمجه ويه الفلم صحت ..
لاااا سجاد رجعه ..
حسيت ع نفسي اني شسويت سكتت وهو ماهتم ولا رجع التلفزيون ع القناة الي اريدهه طلع اخبار واني شلون احب الاخبار تاليهه غطيت راسي ونمت ..سجاد ميحجي يفعل راسا بما معناه ماكالي نامي بس افعاله كالت نامي ..ونمت .
للحكايه بقيه ..
اعرف راح تكولون البارت مابي احداث بس هذا سرد متسلسل لتفاصيل روتين اول يوم زواج وباجر يبدي الحساب ..قراءة ممتعه ..متت جوع رغم ما متعشايه هي الكتابه تخلي الواحد يجوع لو اني اشتهيت كيكه ؟؟؟ههههه تصبحون ع ما تتمنون .
