البارت 2
وجع قلبي
بقلمي روسكان
لبيج قصص روسكان
بدلت ورجعت كعدت بالاستقبال واهله فتحوا الدي جي ورگص وهلاهل شويه ودخل عليه يزن فدوة لطوله ..يزن اسمر طويل اطول مني بهواي عيونه حلوة بنيه بيهه جرة والرموش طاخه بالحاجب ومعقوفه شكله هندي يطي شبه لهريثيك روشان الممثل الهندي دخل عليه لابس قاط رصاصي اول مرة اشوفه لابس قاط شكد حلو طالع ..
نسيت كولشي وفرحت بحبيبي الي صار خطيبي وزوجي ..
كعد يمي مبتسم ومبين الفرح ع وجهه واني فرحت لفرحه باركلي وباسني من راسي وصافن عليه واني صفنت بعيونه ..
لبسني الحلقه والنيشان ووكلني ووكلته وواحد شرب الثاني عصير وجوري تاخذلنه صور وخالاته وخواته يركصن وامه همين سبحان الله شتان بين ام يزن اليوم وام يزن البارحه جانت لابسه الوجه بالمكلوبي تذكرت حجايه خالتي تكول ماخذتهه قاعده بالحياة من زواجات بناتهه العمه الي ترگص بزواج ابنهه تعرس ع الجنه بعدين وتشوفهه نجوم الظهر ضحكت بعد شسوي اني تورطت ..جنت دا اعدل بآسقيات البدله مالتي لان الصدر مو كاعد وصدر البدله جبير فعدلت القطن والكلينس الي جنت حاطته انتبهلي يزن وانتبهتلي خالته الصغيرة شكد خجلت بس غلست وشفت يزن يباوعلي ويضحك ..
نص عليه وشاورني هو مبتسم ..
طلعتي نافخته بالكلينس ..
متت بخجلي وهو عينه عليه ..
كالي ..بس هو شلون قطعه ..ثللللج ..
كافي يزن ..
ههههه باع الخدود شلون صارن حمر عبالك طماطه .
شويه وطلع من يمي رجع يم الزلم وورة ساعه او اكثر راحوا اهله وكرايبي كولهم وبقه بس يزن معزوم يمنه ع العشه..
رحت بدلت ملابسي لبست نفنوف محجبات اوف وايت مطعم بذهبي طويل وذبيت ع راسي شال بدون ما الفه مضبوط ورجعت للاستقبال لكيت بابا وضرغام كاعدين يسولفون ويه يزن ومندمجين سوالف سياسه ووضعيه البلد عفتهم ورحت اساعد ماما وجوري بتحضير العشا .
مرت الايام واحنه نتخابر وايامنه مثل العسل نتعارك ونتصالح بسرعه فترات ينشغل عني وفترات نظل نحجي من الصبح لليل ونسهر ..
يزن تعين بأجر يومي الراتب كولش قليل بس احسن من ماكو ..
مرت اشهر ع عقدنه وبدينه نجهز غرفتنه واغراضهه وغرفه الاخشاب طلعنه سوة اختاريناهه وبديت احسه يضايق من طلباتي وميهتملي يعني جنت اشتاقله ويبقه اسبوعين و3اسابيع ميجيني يشوفني الا اتعارك وياه ياله يجي ماجنت اعرف شديدور بداخله او بشنو يفكر كولشي مكام يسولفلي كلت يمكن دوامه متعبه بس طلع اهله ديضغطون عليه ميريدونه يستعجل بزواجنه ماعرف ليش شنو قصدهم .
من صدوك حسيت بابتعاده عني حته من جنه نتخابر يمكن مرة او مرتين باليوم ولازم تنتهي المكالمه بمشكله او كلام يغثني ..
صار يردد عبارة امي تكول كلما اطلب شي منه رغم طلباتي مشروعه مثل اي عروس اشوف البنات يطلعن ويه خطيبهن يوم جمعه او عيد او اي مناسبه اني مر عليه عيدين ما اجه شافني ولا طلعني ..
من اطلب منه فد شي حتلو طلب معنوي مو مادي يوافق عليه بس ميسويه ..
كام يفتح ويايه موضوع انو يتقربلي او يبوسني جنت ماحب هيج مواضيع مااعرف ليش رغم ما اني احب يزن بس مو بس استحي احجي وياه بموضوع المقاربه بين المزوجين او شراح يصير بيناتنه بليله عرسنه همين ماحب ينفتح هذا الموضوع كدامي جان يكول عليه باارده وجنت انقهر وهو يزعل ويروح ومن سولفت لصديقاتي نصحني انو اجاريه من يفتح هيج موضوع هو بعد صار زوجي يمكن بهاي الطريقه من يفتح هيج موضوع وياي يحاول يكسر حاجز الخجل البيناتنه فكمت اسمحله يفتح هيج موضوع بس مااتحمل التفاصيل الي يسولفلي بيهه فكنت اسد الخط بوجهه واغلق مبايلي واذا سالني من يتصل غير مرة اتحجج انو جهازي خلص شحن وكم مرة سويتهه هو كام يعرف اني متعمده هيج اسوي لان مارتاح ينفتح هذا الموضوع وصارحني بهالكلام واني انحرجت ومانكرت ظليت ساكته ..
ولان احبه جاريته وتعودت اتجرع تفاصيل اكره اسمعهه عن الجنس وعن كولشي يصير بين المزوجين وبعد فترة كام يطلب مني اسوي شغلات بنفسي وكمت اتعارك وياه واسده بوجهه ماقبل ولانفسيتي تسمحلي وابتعدنه ..
وصارت مشاكلنه تطول ونظل 5ايام او اسبوع منحجي ومرات ام يزن تتدخل بيناتنه وتخابرني تكولي شبيج ويه ابني شالعه كلبه وتحاجي امي وامي تظل تحجي عليه وتزن براسي وانجبر اصالحه ..
يزن تغير وصرت ماعرف طبعه ..
عبالك الشخص الحبيته واختاريته شريك حياتي جان لابس قناع ومن طلعنه من الكليه وخطبني وصرت اله وخر هذا القناع ..
صار يوعد ميوفي بالوعد واني صرت افكر شلون اسلم نفسي وحياتي بيد هيج شخص ماله امان .
بديت امهد لامي بمشاكلنه وكثرتهه وتغيير طبع يزن وشخصيته وتغيير تصرفاته وتعامله وياي ردت اخليهه بالصورة واخيرا فتحت وياهه موضوع انو اريد افصخ الخطوبه .
كومت الدنيا عليه وماكعدتهه ..ورفضت هذا الموضوع رفض قاطع خوفا من كلام الناس شيكولون عليه شبيهه وعافهه ششاف عليهه ..
استمر وضعي ويه يزن مخربط يوم نحجي واسبوع زعلانين وامه تخابر امي سوة امه عليه ورقه ضغط صارت تخابر امي
تكمله البارت 2
وجع قلبي
بقلمي روسكان
لبيج قصص روسكان
وتجي امي ترزل بيه وتلوم بيه تكولي الرجال طفل قشمريه بحجايه حلوة واسلوب حلو بضحكه وسالفه وجيبيه للطريق .
اني شاسوي للرجال اذا هو بيد امه .
نتفق ع شغلات ويوافق هو بس تعرف الماما ثاني يوم ينلغي هذا الموضوع واني مليت صرت ما اهتم تعبت نفسيتي وفتحت موضوع فصخ خطوبتي ويه امي هم ماقبلت .
وحته مرات تهددني تضربني وتحاربني محاربه نفسيه اذا فتحت هذا الموضوع مرة ثانيه وماجريت عدل ويه يزن.
اخير شي قررت افتح الموضوع كدام بابا وصدوك تشجعت وسويتهه وكتله باباخلصني منه احسه تغير.. تفكيرة مو مثل تفكيري احس اني بوادي وهو بوادي ثاني طموحاتنه تختلف عن طموحاتي وكل حجايه والثانيه امي كالت وامي حجت وشتكول امه يسوي تعبت منه بابا وماطولنه بعدنه ع البر فكوني منه .
بابا رغم بساطه شهادته بس هو انسان مثقف بتفكيرة من اسولفله ع طموحاتي هو يسمعلي بانتباه وامي تستهزأ بكلامي وكانه اني مو بنتهه وراحتي مو مهمه عدهه بس تريد تشمرني ..
عجزت من الكلام وياهه عجزت اقنعهه وبابا بس ساكت هيج طبعه هادئ وميدور مشاكل وكوة تطلع الحجايه منه وماما مستلمتني وصدوك بدت تحاربني حرب نفسيه حبستني بالبيت باب الشارع بعد ماشوفه وممنوع اتواصل ويه صديقاتي لان برأيهه هنه ديقرن براسي شغلات تخرب علاقتي بيزن ويزن صار يعرف طبع امي ويتشمت بيه مرات مجبورة اتصل بي يضحك عليه باستهزاء ويكولي الظاهر خالتي سوت شغلهه (يعرف امي تحاربني محاربه نفسيه الى ان اسوي الي تريده هي غصبن ماعليه )
من ضيمي منهه سألتهه مرة كتلهه يمه اني مضايقتكم بشي ؟لگمتي زايده عليكم ؟
كالتلي تريد مصلحتي ..
نار بكلبي مشتعله هي امي اقرب الناس اليه المفروض ومتعرف مصلحتي اني القليله الخبرة بالناس بسبب تربيه اهلي الصعبه وبسبب انو خانكينه بالتربيه وبالمراقبه وكل شي ممنوع عرفت هاي العائله وهذا الرجال ميناسبني وكل شويه تكولي هذا اختيارج تحملي نتيجه اختيارج .
ياناس ياعالم اعرف هذا اختياري واكتشفت اني ماعندي خبرة بالحياة واختاريت غلط وبعدني ع البر الولد مداخل بيه مصاير زواج فعلي خلصوني ..
بست ايدهه تخلصني بس هي فضلت العيب وكلام الناس ع سعادتي ..
فضلت تشمرني بالنار وتكولي حتلو مداخل بيج يكتبون بظهر جنسيتج مطلقه ..
تعبببت ياعالم اني اختاريت يزن بغباء من الخنكه الي جنت عايشتهه فكرته هو الخلاص الي من حياتي ويه اهلي كولشي ممنوع وكولشي حرام وجنت حته محرومه من الطلعه غير روحة الدوام بالجامعه حته فكرت منو راح يخطبني بعد التخرج غير كرايب امي الي اني اكرهم واشوفهم معقدين وكرايب ابويه امي تكرههم يعني حتلو ردت احد بيهم لو اموت متقبل بي كائن من يكون لان بعد التخرج مراح يشوفني احد وخفت اكثر لان جنت انخطب من كرايب امي اكثر شي وحته من جانت تروح ماما زيارة او سفرات للائمه المعصومين متاخذني وياهه هيج جانت حربهه او هو هذا اسلوبهه من قبل ماتبدي مشاكلي ويه يزن الي كمت اشوفه يمتلك كم من الحقارة مشايفته ببشر ماصرت احسه رجال ويصيرلي ستر وظهر وسند باجر لان ابد ماكدر اامن بي ..
تعبت من كل النواحي ولا اكو احد يسمعلي .
امي جان دلالهه النه مادي مو معنوي شنحتاج كل شي مادي هي توفرة بمجرد ما نطلبه بس احنه عطشانين لحنان امنه لحظنهه وللكلمه الدافيه منهه .
وللحكايه بقيه ..
والله العظيم البارت متعب موكثرة الكلام والاحداث متعبني بس كم القهر الموجود بالقصه يتعب الاعصاب ويفور الدم ..
رجاااءاا طلب اخوي من صاحبه القصه لاتدعون ع والدتهه .
