البارت 29
وجع قلبي
بقلمي روسكان
لبيج قصص روسكان
گعدنه ثاني يوم الصبح الجو مطر والدنيا رغم صبح بس ظلمه ..
رحت صليت ودا افكر شكد حلو هيج جو تگضيه بالبيت بحضن حبيبك فكرت مادام وماخلي سجاد يروح لشغله كبرت براسي فد مرة ..سويت ريوك وكعدنه نتريك وفجأه دك تلفونه ..
منو ؟
واحد من العمال ..
دشوفه خاف ناسي مفتاحه او ديبلغك شي ..
طلع من المطبخ جاوبه ..
ورة دقيقه اجه يركض وبوجهه ع الغرفه بدل ركض ركض كمت وراه راسآ ..
ياستار هاي شكو ..
سجاد احجي شكو شبيك ؟
الماركت صاير بي تماس كهربائي وديحترك ..
يااااا ياربي استر ..وانت وين رايح هسه ..
رايح اشوف حلالي غير ..
طلع ركض واني اردد ياستار استر هو الجو اليوم يخوف دائما المحولات تضرب يصير بيهه تماس كهربائي هاي كهربائنه التعبانه ..
ورة ربع ساعه حسبتله المفروض هسه وصل اتصلت عليه ميرد ظليت اتصل ماكو رد ..
خابرت اخوه امجد جان موجود نازل وسولفتله وراسا بس كتله ذب التلفون من ايده وراح للماركت ركض وطلبت منه يطمني بس يوصل لان سجاد مديرد ..
مرت ساعه ساعه وربع واني حال الضيم ياحالي صارو ثنينهم ميردون لا سجاد ولا امجد لبست عبايتي اريد اطلع اشوف اتصل عليه امجد كالي ..
الماركت احترك صاير بي تماس كهربائي وسجاد داخل يطلع عامل محصور بالمخزن واثناء مديطلعه واكعه عليه خشبه من الرفوف جانت تحترگ وحارگه ظهره ..
ضربت ع وجهي ..صخام الصخمج جمانه بياوجه صبحتي ..
كالي نقلناه للمستشفى وشكم عامل وياه صاير عدهم اختناق ..
بس عرفت اسم المستشفى لبست عبايتي ورحت كلت لعمتي ظلت اتدك وتلطم تمنيت ماكايلتلهه لان المرة عدهه ضغط بس اول وتالي لازم تعرف اخذنه سيارة تكسي ورحنه للمستشفى ..
طبينه لكيت امجد بالطوارئ ..
ليش هنا لعد وين سجاد ..
كال ديعالجوه ..
ظهره حيل متضرر ..
من محترك ظهرة الملابس مايعه ع جسمه وجان لابس قمصله مطريه نايلون هي هاي اكثر شي مأذيته ولازكه ع جلده وديوخرون بيهه ..
وسجاد من الالم يصرخ واخوه مكادر بتحمل المنظر ويبقه ..
رحت يم الغرفه الديعالجوه بيهه ..هو يصرخ واني املخ بروحي وابجي يارب ساعده يارب عينه ..مالي غيرة ..
كاموا يصلخون الجلد المتضرر المحروك حته يعرفون الحرق من يادرجه وهو يصرخ والصريخ مالته بكلبي وابجي وادعيله ربي يخفف عنه الالم ماخليت ايه ولاخليت دعاء ماقريته اخير شي فقد من كثر الالم اغمى عليه وشكلوله مغذي وحطوه ع جهاز المراقبه يخافون هسه خاف يصير عنده تسمم بالدم لان ظهره كوله متضرر ..
عمتي فقدت صعد ضغطه ووكعت وابنهه حار بيهه واني ظليت مكابله غرفه سجاد وكاعده بس ابجي وادعي ..يارب لااسالك رد القضاء وانما اللطف فيه ..
ظل نايم ع ظهره ..
ساعات مرت صعبه علينه واني مكابله باب غرفته وكاعده مالي گلب افوت ماعرف شأگوله ولا اعرف شلون اخفف عنه ..
الصراخ مالته مرد كلبي وشل تفكيري عاجزه اساعده عاجزة اسويله شي يخفف عنه الالم ..
طلعت التحاليل ورة ساعات الحمدلله ماكو تسمم بالجسم والتضرر بس بالجلد وزالوه الجلد المتضرر.
ظل 3ايام فاقد الوعي بمساعدة الادويه المنومه علمود يخف الالم لان صلخوا الجلد المتضرر وهذا الم منو يكدر يستحمله.
اهلي كولهم اجووا وكرايب سجاد واصدقائه والي يعرف سجاد من كرايبي والجوارين لان كولهه تمدح بي ميستاهل وحته عائله العامل الي طب وطلعه من المخزن ابنهم مابي شي بس اختناق صاير عده من ورة الدخان بات ليله بالمستشفى وطلع سلامات ..
مادري ألوم منو هو بعد قدر ويريد يصير وين چِنه ووين صرنه ..المكتوب ع الجبين لازم تشوفه العين ..
عمتي ام سجاد هم من ورة ابنهه ضربتهه جلطه انشلت وبعد متكدر تحجي وحايرين بينهه وبين سجاد ..
ع طول منيمينه ع بطنه وعلاجه ابر قويه كولهه ياخذهه بالمغذي بس الالم بعده مينطاق فاكثر الادويه منومه علمود يقللون عليه قدر الامكان حد الالم ..
تكمله بارت 29
يمكن الله طلعه من الموت علمود طفلته الي ببطني ..
ماعفت دوامي واجتني عدله الدوام كوله صباحي اطبخ الغده من الليل او الفجر وعبير تسوي الريوك وتريگه وبعدين وكت الغده تغديه وانوبينه اجي اني اتغده اني وعمتي غداهه عليه ..
اكف المواعين وتنظيف مالي شغل بي اروح لبيتي واشغل الغساله ع ملابسه وارتاح شويه وللعصر ارجع لعيالي اسوي العشه واعشي الحجيه وعبير تعشي سجاد وبعدها احير بغده باجر وهلمه هكذا يوميه هالروتين ينعاد وامجد متكفل بالمسواك ومن بيروح لدوامه يتولى ضرغام المسؤوليه واحنه ع هالحال صارلنه شهرين ..
واي مكان يتواجد بي سجاد اني ما اوصله هو طلب لان بعد ميريد يشوفني ..
اتفقت ويه امجد ع نزلته الجايه نروح للمارحت مالة سجاد نروح نشوفه شيحتاج علمود نطلعله عمال علمود يرجعوه مثل الاول واحسن وامجد ماقبل اني ادفع التكاليف مال العمال والبناء صارت عليه واني عندي سلفه ع راتبي الجاي مليون يطونياهه اول وحده كلت انطيهه لامجد يترس الماركت بيهه مسواك ونرجع العمال يلزمون الماركت بين ما يوكف سجاد ع حيله وهاي اشياء وصى بيهه الطبيب كال اذا عنده وظيفه خلي يرجعلهه خلي يرجع يمارس حياته الطبيعيه ويرجع يندمج بروتين الاهل والعائله .
وبس اجه راس الشهر امجد بنزلته سوة المتفقين عليه واني استلمت المليون من المدرسات وسلمته لامجد وراح تسوك بي وفتحنه الماركت بيد العمال وامجد طول ماهوة موجود مشرف عليهم ومنتظرين سجاد يقتنع ويلزم الماركت مالته .
دخلت بحملي الشهر الثامن وثكلت حيل وتعبانه حيل اخذ ابر مقويات وماكو ودخلنه الشهر الثالث ع ازمه سجاد واخيرا لزم الماركت مالته وطلع من الحبسه مال البيت الي جانت مسويتله عقده ..عقدة مواجهه الناس وجانت رده الفعل كولش حلوة كولهه تتحمدله بالسلامه من شافوه واكف ع طوله متعافي واني سويت غده لام البنين شكدنخيتهه بجاهه عد رب العالمين ماقصرت ولا قصر ربي وياي حاشاع الكريم سويت الغده عد عيالي ع سلامته وطلعته من البيت وعزمت اهله وكرايبه واهلي ومن كعدنه ناكل سويه صرت كباله اباوعله صاير مثل الغريب عليه عيونه شارده وسرحانه ومبين مو بيه ..
حراماات ..صعب هالشعور سترج وغطاج تحسيه غريب عنج ميباوع لوجهج .
