البارت 24
وجع قلبي
بقلمي روسكان
لبيج قصص روسكان
سجاد ..كعدت من الصبح وجنت ناوي افتح الماركت واروح لبيت عمي ابو جمانه اعرفهه هسه بالدوام واني ماردتهه موجوده بالبيت ردت اروح احاجي عمي هو يتدخل ويقنعهه لان اعرفهه عنيده ..
فتت بفرعهم شفت بنيه لابسه نقاب طلعت من بيتهم ..صفنت ..منو من بناتهم مبوشه لينا شايفهه بس حجاب وجمانه تلبس عبايه ..
بس الهيئه هيئه جمانه والطول همين زوجتي مو تايه عنهه ..
صعدت بسيارة الخط ..
لحكت السيارة اني ردت اشوفهه ليوين توصل ..
وصلت قريب للماركت مالتي ونزلن مجموعه بنات ع الاكثر مدرسات بالثانويه الاهليه الي يم الماركت مالتي ..
نزلت وياهن المنقبه ودخلت ..
انتظرتهه تدخل للمدرسه ونزلت سألت الحارس منو هاي البنيه المنقبه گالي هاي مدرسه الانكلش ست جمانه ..
رجعت للسيارة ..ليش منقبه ؟؟
هي يمكن صارلهه 3اشهر من رجعت لدوامهه ورجعت لنفس مدرستهه القديمه ..
ههههههههه ضحكت من كلبي ..مرتي شارده مني ..لابسه نقاب حته ماشوفهه ولا اعرفهه ..والله ملعونه شلون سالفه ولاتخطر ع البال .
استداريت بالسيارة ورجعت لبيت عمي دكيت الباب طلعلي ضرغام مبدل ويريد يروح للدوام ووياه لينا يوصلهه بطريقه ..
هلا بالنسيب ..صباح الخير ..
هلا ضرغام ..شلونك ..
تمام ..تفضل ..
زاد فضلك ..الوالد هنا ؟
اي موجود ..ليش ؟
عندي موضوع وياه ..
اي تفضل البيت بيتك ..امي موجوده جوة ..اني تعذرني عندي دوام اترخص منك ..
براحتك حبيبي مرخوص ..
صاح ضرغام من الباب ..
يوووم اجه سجاد ..
طلعت ام جمانه تهلي وترحب بيه ..
صاح ضرغام من يمه ..
في امان الله ..
الله وياك حبيب ..
هلا خاله شلونج ..
طبيت ..
هلا هلا يمه شلونك ..
الحمدلله بخير انتي شلونج عمي شلونه ..؟
برحمه الله ..
ونعم بالله ..موجود عمي ؟
اي تفضل ..
دخلت للهول طبت خالتي طلعت عمي من الغرفه تسحب بالكرسي المتحرك ..
كمت لعمي ..سلمت وبسته براسه وكعدت ..راحت خالتي تسويلنه ريوك رغم كتلهه متريك ..
كعدت احجي ويه عمي ع وضعيتي اني وجمانه وكتله عمي اريد ارجع زوجتي بعدني رايدهه وشاريهه وممفرط بيهه ..واعتذرت منه ع الي بدر مني وكتله عمي والله الي صار بلحظه عصبيه يعني باطل ..
ظلينه نحجي بهواي شغلات اني اسولف وهو يكتبلي ووصاني ع جمانه وكالي هو موافق ترجعلي بس لازم اقنعهه لان هي قافله متريد ترجعلي .
اجتي خالتي وبيدهه صينيه الريوك حطتهه بالكاع وكعدنه نتريك ..
يمكن لاول مرة اتريك بواهس وشهيه مفتوحه .
واني دا اكل خالتي كالت ..
يخاله بالمبارك عليك ..
ع شنو خاله ؟
مو جمانه حامل ..ماكالك عمك ..
حشرت اللكمه ببلعومي ..
شنووو؟
تحجين صدوك خاله ؟
ضحكت خالتي ..اي خاله .. رحنه حللنالهه 4اشهر عليهه .
الدنيا ماسايعه فرحتي 33سنه عمري مو صغير واتمنه ريحه الطفل ..
كملت ريوكي بواهس وامل وفرحه وترخصت منهم وطلعت ..
رجعت للماركت مالتي
انتظرت الوكت الي يطلعون بي من المدرسه ووكفت بالباب ..
طلعت جمانه شافتني ارتبكت ودنكت ماباوعت بعيوني وكملت طريقهه ..
مشيت وراهه ..صحت وراهه ..
جمانه ..جمانه ..
مااهتمتلي ..
جمانه اوكفي ..
لزمتهه من زندهه فزت والتفتت عليه ..
لخاطر شرايد مني بعد ؟
مارايد شي بس نحجي ..
والي يريد يحجي هيج يفضح العالم يجرهم كدام الناس لو انت متعود ؟؟
رفعتلهه تك حاجب تذكرت قبل زواجنه من ظلبت واكف وياهه اسولف وحرجتهه فرزلتني ..ابد ماتنسى ..
ابتسمت ودنكت ..
اصعدي بالسيارة دنحجي ..
خطي راح يعوفني ..
اني اوصلج ..اصعدي ..
صعدت سيارتي مجبورة ..
واني الضحكه تارسه وجهي ..
كعدتهه بالصدر وصعدت سيارتي وسقتهه لمكان هادئ بالفروع ..
مانطقت ولاسالت ولاخافت ولاكالت وين ماخذني بس ساكته ..
طبكت ع صفحه وكفت السيارة وطفيتهه ..
التفتت عليهه ..
شلونج جمانه ؟
اباوع العيون چتاله مخطوطه بالكحل ومسحوبه ليفوك موسعه العين ولون عيونهه البنيه ضارب عليهه ضوة الشمس وطالعات لون فاتح عسلي ..
تنهدت ..كالت ..زينه .
رفعي البوشي ..
رفعتهه كالبه الوجه ..الشفه عذاب ..
كتلهه ..
اشتعلواا ..
شبيك ؟
نزليهه ..
نزلت البوشي وحسيتهه ضحكت لان عيونهه الطالعات من النقاب صغرن ..
دارت وجهه للجامه الجانبيه مال السيارة ورجعت باوعتلي مثل واحد مسح ضحكته ..
شرايد مني ؟
مشتاق لزوجتي ..
طلكتني ..ماعدت زوجتك ..
لالا ممحسوب جان بلحظه عصبيه وماكو شهود ..
جان وجهي مبتسم طول الوقت ..
ظليت اباوع لوجهه افكر مبتسم اخليهه تعرف انو اني ادري بحملهه لو لا ؟
لااراديا مديت ايدي ع بطنهه ..فرت ورجعت ليورة ..
شكد صارلج حامل ؟
مو حامل ..كرش هذا ..
لاتجذبين عليه ..ابني بداخل هل كرش .
منو گلك ؟
يهمج تعرفين منو كلي بس ميهمج تخبريني بهيج موضوع ؟
مو من حقك تسال وتعتب وتحاسب .
ليش بله ؟
لان انت الي عفتني وماسالت عليه ..
بهاي حقج ..بس صيري احسن مني وكوليلي يابه ترة اني حامل منك وانتي تعرفيني ميت ع ريحه الطفل ..
مجان اكو داعي اكولك .
تكمله بارت 24
بس هو ابني ..
واني ما استجدي منك طريقه ترجعني بيهه ..مو جمانه مال زمن اول ..
من الاخير بدون لا اتعبك ولاتعبني مراح ارجعلك اني اريد اتطلك منك .
اي مو هي بكيفج ..
طبعا بكيفي ..باجر اخذ ضرغام واروح للمحكمه اقدم طلب ..
طلبج مرفوض من هسه دا اكولج وطلاك ماكو ..
يجي باجر اقدم واريد اشوف منو يمنعني ؟
اوك طلبي الطلاك ..واني اطلبج لبيت الطاعه .
ماطاوعك ..
انشزج ..
يعني شنو ؟
يعني المرة الي متطيع زوجهه وترجعله ببيت الطاعه ينشزوهه يعني تظل 10سنوات متتزوج ومالهه حقوق كولشي ينوخذ منهه حته المتقدم لازم ترجعيلي نصه وفوك كل هذا الطفل اني اخذه مالج حق بحضانته ..
صفنت بوجهي بعدين كالت ..
ماكو هيج قانون انت بس تريد تخوفني ..
لا والله اكو ..شنو انتي بس سامعه عن الطلاك مسامعه عن ذني ..؟
مسامعه وماكو هيج قانون ..
ماشي متصدكيني روحي باجر واسألي محامي وشوفي شيكولج .
وصلني للبيت ..
ابتسمت بخباثه ..
لبيتنه يعني ؟
لااا لبيت اهلي ..تحلم ادخل بيتك بعد ..
شغلت السيارة وطلعت بيهه لمطعم وطلبت منهه تنزع النقاب بالعكس تصير بي احلا تجذب العيون عليهه ..
وين ؟
عازمج ..نزلي نتغده ..
مجوعانه .
ابني جوعان ..مو علمودج علموده ..شنو تريدين تجوعينه .
نزلت وياي طبينه مطعم نزلنه غده مشويات مشكل ..
تغدينه بهدوء وكملنه وعيني ماشلتهه عنهه متغيرة وحليانه ..
ليش متقبلين ترجعيلي ؟
لان ماريد ..
اذا علمود الطلاك فطلاكنه باطل ..
ادري بي باطل ..بس ماريد ارجعلك .
محتاجج اني ..وبيناتنه طفل ..
بشنو محتاجني ؟لخدمه اهلك ..
احترمي نفسج واحجي عدل ..
اي طبعا كلام الحق ميعحبك وعمرك مادافعتلي واخذت حقي من كل الي اتجاوزا عليه وهانوني ولاراح تاخذ وانت تعرف جمانه شنو وهمه شنو ..
لا الظاهر اني هواي اطيتج مجال ..امشي كومي يله اوديج للبيت ..
كمنه دفعت الحساب وهي سبقتني للسيارة صعدنه واني عصبي ..بسهوله صرت اتعصب وكلامهه كوله استفزاز ..
يكون بعلمج طليقتي راح ارجعهه وانتي تحلمين اطلكج ..
هه شنو مثلا راح اغارعليك لو انقهر لو كلتلي ترجع طليقتك ترة بعد ميهمني ..انت بعد متهمني ..هنااا ماظل شي الك ..
واشرت ع گلبهه ..وكملت كلامهه ..
ولا راح اسكت عن اي واحد يتجاوز عليه لو ياخذ حقي ..
طالعلج لسان ..
من ظلمك .
هسه صرت اني ظالم ..؟
تعرف بنفسك كولش زين ظلمتني ..واتمنه تكمل جميلك للاخير وتطلكني ..
ابني ببطنج وترديني اطلكج تحجين كل عقلج انتي ؟؟
سكتت اني وسكتت هي ..وصلنه نفسنه لطريق غلط مرة ثانيه ..اني رايدهه هي ..ماريد اخسرهه بس الفكرة الوصلتلهه هي اني مااقبل اطلكهه علمود الطفل .
ماشي عندي اقتراح الج ..
باوعتلي باهتمام ..
تبقين ع ذمتي منا لمن يصير وقت ولادتج تولدين الطفل اخذه واطلكج وكل حقوقج توصلج ..
شنووو؟؟
ليش تاخذه مني ؟
اشو حته بالقانون حضانة الطفل من حقي .
ابني واريده وانتي تريدين تتطلكين ..
شوكت صار ابنك ؟ترة انت هستوك دريت بحملي ..هستوك سألت عليه صارلك 4اشهر شامرني ..وين جنت عني وهسه جاي تطالب بابنك ..
ظلينه الطريق كوله نتعارك وماوصلنه لنتيجه ..يراد كعده ثانيه علمود تطلع كل الكلام العدهه .. كل الي شايلته بگلبهه ..يمكن ترتاح وهذا الحقد والعصبيه يروح منهه ..
للحكايه بقيه ..
شاركوني توقعاتكم شلون راح يقنعهه ترجعله التهديد الظاهر ميفيد ب جمانه ..
#خطي
