البارت 22
وجع قلبي
بقلمي روسكان
لبيج قصص روسكان
سجاد ..اتعس يوم بحياتي ..دخلت البيت راجع من وكت من شغلي مشتاق لجمانتي استلمتني امي تحجي ع جمانه وتقصير جمانه ..
ظليت استمع لكلامهه ..اعرفهه تدور حجج ع جمانه ومادافعت عن جمانه و#موبصالح جمانه ادافع عنهه كدام امي لان راح تكول لاعبه بعقله لعب وفارة دماغه وراح تزيد اذيتهن لجمانه ففضلت اسكت احسن واذا صدوك عد جمانه تقصير اصعد للشقه واستفسر منهه عن صحه الموضوع ..
صح سكتت وامي تهين بزوجتي بس مو معناتهه راضي لان اني اعرف جمانه شنو وبنفس الوقت اعرف امي وسوالفهه .
بس الي متوقعته ولاحسبتله حساب جمانه جانت موجوده وسمعت اهانه امي واجتي بعصبيه عاتبتهه وتحجي بحرگه دم ..
جمانه فقيرة ومو ملعبه الي بكلبهه ع لسانهه ولو بدى وكأنه تجاوز بس اني اعرف مجانت قاصده تتجاوز بس امي حته بادارة وقياده الحوار ملعبه وعدهه قدرة استفزاز مو طبيعيه بحيث تحور الكلام وتشوفني شي ماشايفه بجمانه وعود تكولي شوف كدامك لسان مرتك الطويل وتجاوزهه وقلة ادبهه ويه امك ..شوف بعينك ..
لعبه امي عرفتهه وجمانه ظلت تحجي صحت بيهه تسكت وتصعد ماسمعت الكلمه ..
من ثبتت عليهه تهمه قلة الادب والتجاوز وبصوت ثاني مني ياله سكتت وصعدت ..
غلط منهه تخليني بموقف بينهه وبين امي وتنتظر مني اختارهه ..لان هاي امي شماغلطت بحقي تبقه امي وواجبي احترمهه ..
صعدت وراهه سمعت صوتهه من ورة الباب تبحي وتشاهك بالبجي ظليت دقايق ورة الباب من سكتت ياله دخلت ..
صحتهه ردت بهدوء اعاتبهه واحاسبهه ع الي صار ويه امي اعرفهه هادئه ورزنه شجاهه وتصرفت بهيج تهور ..
حجيت وياهه بهدوء حاجتني بعصبيه ..
اكثر شي اذاني عتبهه عليه وخيبه املهه ..
استفزتني وحجيت كلام مو قاصده والله شاهد عليه نسيته وبديت صفحه جديده من رجعتهه امي ..
وهي هم ماقصرت بالرد عليه بجسارة ..ماكو شي ماكالته ..جنت لحد الان عاذرهه بس وصلت بيهه تكول امجد رجال ؟؟لعد واني شنو ؟؟ مو بعينهه ؟؟
انمدت ايدي عليهه وبلحظه عصبيه اندم عليهه طول عمري طلكتهه ..
عفتهه ومن عصبيتي كسرت الغراض وصارت كبالي مكينه الخياطه مالتهه ردت احرك كلبهه مثل ماحركت كلبي وكسرتهه ..
يعني حبي ودلالي الهه مو بعينهه ؟
يعني تقبلتهه وهي اجتني بليله عرسي مو بنيه هذا مو بعينهه ؟ مو دا اعير بيهه بس اني سويت الي ميرضه رجال يسويه لان هي غلطت من فتحت الباب لخطيبهه الغلط جان من البدايه .
داست ع كلبي مرات مو مرة ..جان لازم تتحمل ..جان لازم تمشي ورايه وهي مغمضه واني اجيبلهه حقهه بس مو بهالطريقه ..مو بطريقه تخيرني بينهه وبين امي وتتوقعني اختارهه واذا ما اختارهه تطلع طلقه ابوهه براسهه ارحم من العيشه وياي ..
وراهه اتصلت ع اخوهه ضرغام واجه اخذهه ..
شفتهه لمحتني من الشباك ودارت وجهه ..يمكت هاي اخر مرة اشوفج بيهه ..
شيرين جانت توصل اخبارهه لامي وامي تجي تسولفلي بس بطريقه مستفزه علمود اكرهه علمود اشك بيهه علمود تصغرهه بعيني علمود اقتنع هي طلعت عن شوري وعاندتني ورجعت للدوام ..
وبقت تقنعني اكسرهه بمرة وارجع طليقتي واني مصدوم من كم الحقد الي شايلته امي ع جمانه ..
ظلت تلح واني بعد ماستحملت الوضعيه ..
تعاركت ويه امي ..الظاهر بر الوالدين امي فهمته ضعف مني وكامت تتجاسر ع اعراض الناس وبكيفهه تفصل واني البس ع هواهه ..نست اني طلكت بنت اختهه من ورة مشاكلهه هي ويه بنت اختهه مو من ورة مشاكلي ويه البنيه لان البنيه لسه علاقتي طيبه بيهه وبخالتي ..
بعد ماتعاركت ظليت يومين انام بالماركت مالتي مارجعت للبيت ..
وراهه خابروني اصدقائي سولفتلهم ع وضعيتي ونفسيتي التعبانه كالوا تعال يمنه لاربيل ارتاحلك اسبوع كلبتهه للسالفه الماركت بيد العمال وعمالي امينين ليش لا اخذلي اسبوع هم ارتاح وهم يصفه بالي وافكر شراح اسوي ويه جمانه ..اني شاريهه مبايعهه ..
ثاني يوم رجعت للبيت لميت ملابسي بجنطه صغيرة واخذت مستمسكاتي وماخبرت احد بس امجد وطلعت بوجهي لاربيل ..
خلصت الاسبوع ورجعت وبنفس اليوم صارت مصيبه بالبيت اني جنت مموجود رحت بوجهي للماركت.
امجد سامع عبير تحجي بالتلفون ويه ولد وماخذ مبايلهه وعارف الولد طلع ابن خالتي اخو طليقتي ..
صار مهادد وضرب ومشاكل اخويه هد ع بيت خالته وكالوا راح يلمون السالفه ويجون يخطبون عبير ..
والتهيت بالمشاكل ..
بهالاثناء جانت شيرين يمنه لزمتهه كتلهه انتي شنو سالفتج شنو مقيمه هنا كالت لا زعلانه وسولفتلي القصه بما انزلت ..
عرفت شصاير بابو جمانه من ورة لسان شيرين ومشاكلهه واني مو قليل اصل رغم المشاكل احنه نبقه اهل ..
ثاني يوم فتحت الماركت من الصبح وخليته بيد العمال ورحت للمستشفى شفت عمي ابو جمانه ..ماعرف بيا عين اروحله خجلان منه هم طلكت بنته وهم من ورة اختي هو انجلط ..
طبيت شفته حالته تكسر الخاطر وميكدر يحجي ..
من طلعت شفتهه ..اي شفت جمانه من بعيد .. كلبي رفرف عليهه ..لوبيدي اخذهه لحض
تكمله البارت 22
لوبيدي احضنهه لحد ماتتكسر ضلوعهه بين احضاني ..
تقربت مني تصيح ..
انت شجايبج هنا ماكفاكم الي سويتو بينه ..
قربهه ..عطرهه ..عيونه المتروسه دموع ..حراره راحه ايدهه من ضربتني ع صدري تطرد بيه ..لوعني شوگي الهه ..ودي احضنهه ولا اهدهه ..ودي ابجي بحضنهه من فراگهه ..يصير اشكي منك ..الك ؟
يصير اشكيلك من الشوگ شيسوي بيه من يمر ..
رجعيلي ياواهسي يانبض گلبي .. يا رويحتي ..رجعيلي ياجمانتي ..
خليتهه براحتهه تصيح وعفتهه وطلعت ..عيني منهه وروحي متعلگه بيهه وگلبي يريدهه ..
ربي سببلي الاسباب ورجعهه لحضني ..
جنت ناويه من البارحه اكتب بارت بلسان سجاد واجتني طلبات من متابعات انو اكتبهه القصه بلسان سجاد واتمنه ماقصرت طلباتكم اوااامر ..بعد اكو بارت اليوم ..
