مسائكم رحمه ..
البارت 5
وجع قلبي
بقلمي روسكان
لبيج قصص روسكان
مرت ايامي عاديه بالبيت ونتخابر اني ويزن وعلاقتنه تحسنت ومر اسبوع وهو مملتحق ويوميه يأجلون موعد التحاقهم اسبوع ومر شهر وخلص شهر الخامس وبدة الجو يصير حار ..
تقريبا صار ع خطوبتي 8اشهر ..
يوم 8/6/2014 خابرني يزن كالي باجر من ال 6الصبح نروح نلتحق لتكريت ..
اني رغم ماجنت انتظر التحاقه بفارغ الصبر بس من گلي باجر التحق ضجت حيل وخفت عليه ..
ظلينه طول اليوم نتخابر متفاركنه وكالي بالليل اجي اشوفج وصدوك صار الليل ورة العشه اجه شافني وشاف اهلي وودعنه وظليت اسولف وياه شويه بالحديقه بعدين راح ..
من رجع لبيتهم هم تخابرنه وظلينه سهرانين نسولف لحد ماصارت الساعه 3كالي اروح اناملي ساعتين علمود اكعود ابدل واتريك واروح وبالطريق هم نتخابر كتله ماشي ..
بليلتهه اني مانمت ظليت كاعده للفجر صليت ودكيت عليه علمود اكعده ..كعد رفضه وكمل شغلاته وطلع ..
الطريق طويل ..وظليته طول الطريق نحجي حسيته خطيه من تعب الطريق ولان منايم البارحه سهران ويايه نام واني داحجي وياه صحت باسمه يزن يزن ماجاوب وسمعت انفاسه منتظمه سديت التلفون عرفته نام ..
واني هم نمت ماحسيت بروحي للظهر اتصل عليه يزن اخر اتصال قبل دخوله لقاعده سبايكر طمني انو وصلوا للقاعده وراح يسلمون مبايلاتهم وبسرعه راح لان راد يتصل باهله يطمنهم بانه هو وصل قبل لايسلم المبايل .
مر يومين و3ايام ويزن اسمع صوته بالليل دقايق اطمئن عليه ويروح ..
ماانسه هذا التاريخ المشؤوم ابد 12/6/2014
كعدنه الصبح ع خبر سقوط تكريت بيد الدواعش شلون وليش سقطت وين الشرطه ووين الجيش وشلون الاهالي مادافعوا عن ارضهم ..محد يجاوب الظاهر مبيوعه السالفه ومدسترة والخيانه صايرة من العشاير اهلنه نفسهم باعوا ولدنه لداعش وهمه دخلوهم واطوهم الضوة الاخضر ..
وموبس تكريت سقطت ..6محافظات ..اولهن الموصل وصارت عاصمه لدوله الخرافه داعش ..
بمصباح ذاك اليوم كعدنه ع كابوس ..
والشعب ياغافلين الكم الله ..
قاعده سبايكر قاعده عسكريه تصير باطراف تكريت ..
تضاربت الاخبار صرنه نسمع بالاخبار انو تكريت وباقي المحافظات سقطت بيد داعش وكامت قنوات الاخبار تنشر فديوات عن داعش والجنود بسبايكر القاعده الي فرغت من ضباطهه قبل يوم من دخول داعش الهه ..
رعب نفسي عشنه بي اني البارحه مجنت سامعه صر وت يزن مخابرني واهله كذلك ..
بعد ماسمعنه الاخبار ظلينه نتصل عليه ماكو ميرد اتصلت ع خالتي ام يزن نفس الشي ..كلبهه وكلبي مثل الجمر ع يزن ..انتشرت فديوات شلون يقتلون الشباب وشلون نهر دجله صار ميه احمر من دمهم ..
المشاهد فضيعه الاهالي ثارت كامت الدنيا وماكعدت نريد ولدنه نريد اخبار عن ولدنه عايشين نريدهم ميتين نريد جثثهم ..الامهات وصلت للبرلمان ..وماكو لاجثث ولا اخباربس فديوات خبلت العالم ماظل عقل بالراس ..
خالتي تخربطت ضربتهه جلطه واني بس صافنه دموعي جمدت بعيوني ..اويلي يالقهر ..
1700شاب انغدر مثل الورود هذا الرقم الي انعلن من الحكومه بس الارقام وصلت ل 4000جندي بسبايكر اختفوا ماكو الهم اثر ..
اني صرت العايشه الميته بس جسد ويمشي مادري ابجي ع يزن العافني لو ابجي ع ضيمي شلون بيه وشراح اسوي ..
مرت الايام وداعش مسيطرة ع 6محافظات ماكدرنه نحصل خبر اكيد استشهد انغدر لو ... الله اعلم .
السيد علي السستاني اطى فتوى الجهاد الكفائي وبدت الشباب تتطوع .
مرت فترة بسيطه وبدت معارك التحرير ..صرنه نسمع قصص شباب من قاعدة سبايكر رجعوا لاهلهم حمتهم العوائل الشريفه الي بقت ببيوتهه وبعدين وصلوهم لسامراء الي جانت تحت سيطرة القوات العراقيه ومناك لاهلهم سالمين .
جنه كلما نسمع خبر جندي من سبايكر راجع لاهله بابا واخويه وعمي ابو يزن يروحون يستفسرون منه عسى ولعل يعرف مصير يزن او عنده معلومات عنه بس بدون فايده .. كل مرة جانوا يرجعون خايبين بالنسبه الي قطعت الامل لو عايش جان رجع وخالتي ام يزن من بعد الي صار ماصحت ابد صارت عايشه ع المغذي وماواعيه لحياتهه وواقعهه واني مو احسن منهه صرت مومياء من الضعف اكلي قليل القهر اخذ من حيلي حيل نوم قليل التفكير نهشني نهش حرمني اغمض عيوني براحه وهاي الكوابيس مافاركتني احلم اشوف يزن من بعيد مادلي ايده يصيحلي اركض وراه واتعثر واوكع وارجع اكوم اركض وراه واصيح باسمه وهو مستمر بالابتعاد عني الى ان يختفي واظل واكعه بالكاع وابجي واصيح يزن يزن لايسمعني ولايرجعلي وافز مخنوكه وميته بجي وعركانه وكانه حقيقه موكابوس ..
صارت امنيتي اناملي ساعه براحه بدون ميجيني هالحلم ..
مرت اشهر واهل يزن بعد ما ايسوا من رجعه ابنهم سووله فاتحه رمزيه لان ماكو خبر عنه ..
حته الشباب ع عدموهم ع نهر دجله اختفت جثثهم اكلهه السمج لو نهشتهه الحيوانات وماكوعدهم جنسيه او مستمسك يعرفوهم منه وسالفه الDNA بالعراق تطول سنين .
هيج صار البشر رخيص بالعراق ..
يكولون اكرام الميت دفنه ..صارت حسرة علينه نحصل جثث اعزازنه وندفنهم حتى وكت منشتاك الهم نروحلهم ..
ورة الفاتحه مال يزن بشكم يوم خالتي ام يزن ودعت الحياة ..توفت ..من الاول هي ماتحملت الصدمه ع ابنهه وبعد ماصحت وسلمت امانتهه وراحت لدار حقهه .
اتسميت ارمله واني لسه مشفت شي من حياتي
الحزن رافقني بحياتي ودخلت مرحله طويله من اليأس والكآبه اسودت الدنيا بعيني صرت عبارة عن جثه وتمشي ع الكاع ..
حاولوا اهلي يطلعوني من حاله الحزن والكآبه الجنت بيهه بس ماعرفوا شلون كاموا يطلعوني ونروح زيارات بس كولشي عندي نفس الشي ..
ذبيت نفسي وحيلي ع شغل البيت اطلع لنفسي شغلات من جوة الكاع التهي بيهن.
جنت ابقه وحدي بالبيت وكلمن ملتهي بدوامه بس بابا وياي وبابا رجعت صحته تدهورت يمكن من قهري اي يشوفني مكسورة متعبته كسرتي واني ماكدر احط عيني بعينه لان اعرف بروحي نزلت راسه ..
بهالفترة مرت 6اشهر ع احداث سبايكر وداعش وذاك اليوم المشؤوم بدوا اهلي يلحون عليه اتزوج واطلع من حزني وكآبتي وجانوا ناس يتقدمولي جيران وكرايب من بعيد واني دوم ارفض ..
قررت ما اتزوج واستر ع نفسي ..
ظليت اقرة معلومات ع النت عن الموضوع انو غشاء البكارة ممكن خلال سنه او سنتين يرجع يلم وينبني اذا ماكو ممارسه وقريت اشياء ثانيه مثل عمليات الترقيع وكولهه تخوف وبيهه بنج عام واني اصلا طلعتي من البيت ولوحدي صعبه وقريت اشياء عن الغشاء الصيني وطلع حل فاشل اذا الرجال خبرة ويعرف بهيج سوالف فجان احسن حل اليه استر ع نفسي وابقه بدون زواج وجنت ارفض كل واحد يتقدملي بدون حتى ماعرف هو منو واصله وفصله ..
وللحكايه بقيه ..
عذروني تاخرت وماكدرت اكتب اكثر .
