البارت 17
وجع قلبي
بقلمي روسكان
لبيج قصص روسكان
صبينه عشه وسوالف وضحك ..عائله ..كضينه وقت عائلي تمنيتهم ع طول هيج شيصير يعني ..
تعاونه اني ومها ع غسل المواعين ولملمنه وكملنه مها وامجد رجعوا لبيتهم واني صعدت لشقتي بدلت ملابسي كلهه ريحه طبخ وباوعت لوجهي بالمرايه حطيت كحل رشيت عطر مامتأمله منه شي بس هو رجعني لسبب يمكن اكو امل بيناتنه بس الاكيد اكو شي بكلبي ناحيته ..
سجاد ..اطيت الاوكي لامي علمود ترجع جمانه اخجل
اعترف لنفسي اني ضعت بدونهه هاليومين ذني ..
امثل الجمود واللا مبالاة بس اني مو هيج اني كلبي مثل الجمر ..كلبي بين نارين نار حبي لجمانه ونار كرامتي ..
الرجال كولشي ولا احد يدوس طرف كرامته .
واذا وصلت الشغله للكرامه ادوس ع كلبي وحبي علمودهه .
جان اكو فرح بداخلي و ابتسامه خفيه اكره اعترف لنفسي رغم كبر وفداحة غلطهه وياي بعدني احبهه ..بعدني اريدهه ..بعدني اعشق نظرات عيونهه ..بعدني احب برائتهه وهدوئهه .. بعدني احن واشتاق ..مو نار بعدهه الي يلوعني لا هذا نار قربهه جمرات تحرك بكلبي حلالي واتمناهه ومو ممكن اتقربلهه لازم اتحمل خلي يطلعلهه كلب لازم تضوگ لمحات من عذابي لازم تعرف الي سجاد يختارهه شريكه لحياته
شلون لازم تكون خليهه تحرم تكذب عليه .
خلصت شغلي من وكت ملهوف ارجع للبيت واشوفهه ..
ملهوف للملگه الهادئ احس من هدوئهه شكد طبعهه ملكي ..
متحجي ولاتكول شلونك ولا الله يساعدك بس نظرة من عيونهه تمسح تعب يوم كامل ..
ياناس احبهه بس قصررررت حييييل وياي .
دخلت البيت ب 9:30 اوكت من يوميه والبيت هدوء رأسا صعدت لشقتي ..
والله ثم والله كلبي ركض قبلي للباب يريد يفتحهه ويفوت ..
دخلت للشقه صارت جمانه بوجهي التقت عيونه ..
دنكت ماسيطرت ع ابتسامتي بس دنكت ماردتهه تشوفهه ضميتهه وعقدت حاجبي ورفعت راسي ..
شلونج ..؟
الحمدلله بخير ..
وجهه متفح الخدود حمر العيون مرسومه الشفايف من الله عذاااب عبالك وديتهه لاهلهه حته تزود عذابي ..
انت شلونك ؟
تنهدت براحه ..جاوبتهه ..
برحمة الله ..
طبيت للغرفه تضوي ماستغربت اعرفهه نظيفه ونادرة ..
لحكتني للغرفه بدون كلام اخذت مني سترتي نزعتنياهه وعلكتهه وطلعتلي تراكسود ..
تسبح ؟
اي .
كعدت ع الجربايه اريد انزع حذائي كعدت هي بالكاع تريد تنزعني حذائي ..
جريت ايدهه كومتهه وبعدتهه عني وكتلهه بخزرة ..لأ ..
همست ..براحتك ..
حضرتلي الخاولي ..واخذت ملابسي ودخلت اسبح وهي مدري وين راحت ..
دقايق وطلعت واشتم ريحه سطرتني ..مال دولمه ..نشفت شعري ومشطته ورحت للمطبخ .. لكيتهه دتحضرلي بالعشه ..رفعت راسهه شافتني ابتسمت وسالتني ..
جوعان ؟
هاي شمسويه دولمه ؟
هزت راسهه اي ..
وكفت يمهه جانت تصب بالماعون.. قطعه قطعه تصفطهن بالماعون ..هيج انتبه ع ترتيبهه بس يعجبني اباوع ع كل تفاصيلهه وكل تفصيل تسويه
من كثر ما ريحه الاكل بديييعه تقربت منهه وكتلهه ..
شو اضوك ..
شالت قطعه بالخاشوكه وقدمتهه الي واني فتحت حلكي واستقبلت اللگمه ..
باوعتلي بتردد منتظرة مني ردة فعل ع طبخهه ..
ها طيبه ؟
تخبببببل ..
ابتسمت كالت ..بالعافيه ..
رجعت كعدت ع الميز انتظرهه تكمل تجهيز سفرة العشه ..
كملت ودتريد تعوفني اتعشه لوحدي مثل مموصيهه ..
وييين ؟
حجيتهه بصوت مسموع ..
رجعتلي ..
محتاج شي ؟
لا ..
وانتي ممتعشين ؟
خليك براحتك وبعدين اني اتعشه ..
تنهدت تصرفاتهه والتزامهه يحسسني بالذنب تجاهه ..
تنهدت ونصيت صوتي ..
تعشي وياي ...
خاف اضايقك ..
هزيت راسي .. لا ..
راحت صبت ماعون ثاني حطته كدامهه وكعدت كدامي وبدينه نتعشه ..
الهدوء سيد المكان بس الشفايف ماتحركت بس العيون جانت تحجي من تلتقي بعيونهه ..
لسان حالي يحجي ..
حسي فيني وبحنيني ..
فيك مافيك احتويني ..
انت عيني وكل نظرهه ..
ظلمه من دونك سنيني ..
ياحبيبي ياطبيبي انسى اسمي من تجيني ..
كالتلي بدون مقدمات ..
شكرا ..
ع شنو ؟
لان رجعتني .
مو اني رجعتج ..
اعرف عمتي رجعتني بس اكيد جانت ماخذه الاوكي منك واجتي ..
نكرت معرفتي برجعوهه اصلا ..
لاماجنت ادري راح ترجعج بس يمكن لان نريد نعزم شيرين هي وزوجهه فراحت رجعتج ..
شفتهه ابتسمت ودنكت ..
ليش ضحكتي ؟
هيج ولاشي .
احجي ..
لعد ليش راجع من وكت ؟
اهاا والله ؟مامنتبه .
اوك.
شكد حرجتني ..كملنه العشه ولملمت وغسلت مواعين واني رحت للغرفه تمددت وظليت اكلب بالتلفزيون صارت الشقه هدوء وهي ماطبت للغرفه ..
كمت طلعت دورت عليهه لكيتهه كاعده بالهول ..
شدتسوين ؟
ماسوي شي .
تقربت اشوف بشنو مشغوله لكيت بيدهه مثل دفتر المذكرات صغير وقلم ..
شنو هذا ؟
دفتر ..
جريتهه منهه يمكن دتكتب مذكراتهه او دفتر مذكرات قديم ..
شفت مرسوم بي ..
شنو هذا ؟
فصالات مال فساتين ودشاديش ..
شتسوين بيهن ؟
اتعلم تفصيل وخياطه ..
تريدين تصيرين خياطه ..
اريد اتعلم ..
باوعتلهه نظراتهه مثل الطفله تحاجيني ببراءة وعفويه ..
ليش ناقصج شي ؟
لا .
لعد ؟
.
