البارت 28
وجع قلبي
بقلمي روسكان
لبيج قصص روسكان
مرت ايامنه حلوة بس وحيدنه سوة واحد مداري الثاني وواحد مدلل الثاني وملتزمه بدوامي سجاد يوديني ويجيبني يمكن شروطي ماگال موافق عليهن بس نفذهن عزلنه عن اهله بس طلب مني جمعه وسبت اروح لبيت اهله اسوي شغلات بسيطه حسب الي اكدر عليه وجنت مقررة اسمع كلامه لخاطرة وتبقه هي عمتي مرة حبيرة وام زوجي ورغم كل مساوئهه من واجبي احترامهه ..
جان يوم جمعه وبعد ماتريكت ورتبت بيتي وسجاد حضرتله ريوكه وعفته نايم رحت لبيت عيالي اشوف شعدهم شغل طبيت للبيت فارغ اعرف بتبارك ع طول بغرفتهه لو نايمه لو تقرة وصوت بسبسه بغرفة عمتي عبالي تحجي بالتلفون ومن البارحه كال سجاد انو امه مريضه نايمه بالفراش ضغطهه صاعد روحي شوفيهه شمحتاجه ..
اول ماطبيت للبيت عادي مثل ممتعوده الوصخ بالگاع لعبت روحي ..لملمت الكواغد وگشور الموز والگلاصات وطبيت للغرف شكو ماعون شكو گلاص مخمر صارله ايام طلعته وكبل للسنك ويه مواعين الريوك وفتحت عليهن المي الحار حته يتنكعن لان مو مال يوم ويومين ..استغفر الله ربي ماشايفه اني هيج بشر وصخه (ماكو اي مبالغه بوصف وصاخه العيال ).. لعبت نفسي من الوضعيه بس لخاطر سجاد ..
فرحت دكيت الباب لكيت المرة عمتي متمدده ع جربايتهه ويمهه عبير الظاهر اليوم جايه من عيالهه ..
صباح الخير عمه ..حمدلله ع سلامتج ..
الله يسلمج ..
تقربت ع عبير دا اسلم عليهه ..
هلو عبير شلونج ..
طبعا من تزوجت لسه واني من رجعت لسجاد ابد ماشفتهه ..هاي اول مرة ..
دارت وجهه عني ماباستني ..فشلتني ..
كالتلي ..
هاي سجاد رجعج ..
ماحجيت ولا رديت ..بس كلامي وجهته لعمتي ..
عمه شسوي غده ؟
اكو فاصوليه مسلوكه ومجمده طلعيهه ووياهه لحم وسويلنه مركه وتمن ..
ماشي عمه ..
خليت وطلعت ..
طلعت اللحم حطيته ع النار حته ينسلگ وطلعت الفاصوليا نكعتهه بمي حار حته يموع الثلج عنهه وكفيت المواعين ورتبت المطبخ وشنو يصير كدامي انظفه كاونتر ثلاجه طباخ وبعدين بلشت اطبخ ..
لميت الملابس الوصخه تعمدت اغسل ملابس عمتي فقط وبدلت جرجف جربايتهه وشغلت الغساله ..
ساعه ساعه ونص كولشي كمل ..
باوعت للطارمه والله بعد مابيه حيل رجليه صارت خيوط وظهري انكسر خليهه ع باجر عود اغسلهه ..
طبيت اريد اطفي الكدروه حته اروح لكيت عبير بالمطبخ ..
هاا شنو راح تروحين ماشفناج ..
خلصت شغلي ..
ياشغل هذا والبيت لسه وصخ ..
اي حبي البركه بيج انتي موجوده نظفي البيت اني ماكدر الحمل متعبني ..
اووووي شنو ممصدكه بروحج حامل ..شنو نخيس والله شنو انتي حامل ..
تقربت منهه كتلهه ..
خالتج شلونهه ..طبختي ونظفتي وغسلتي مواعين لو جابوج بكتله مسحوله كالعاده ..
حاجيتهه بصوت ناصي وابتعدت ادور مبايلي وين ..
كتلهه ..
انتي بيج حيل نظفي بيت اهلج ووياج الطارمه صارلهه شهر محد جايسهه لان اني بعد ماكدر تعرفين بعد حامل ..
ظليت اتماوع من احجي وعود اني حامل ولازمه ظهري وهي نار وشبت بيهه ..لكيت مبايلي وهي ظلت تصيح وتغلط واني هزيت ايدي ورحت ..
مها مرات تسولفلي شيسوي بيهه رجلهه ع اتفه الاسباب غير انو يوميه يجي يشكي لاخوهه ع وصاختهه يكوله اذا نضيع الماعون نلكاه جوة جربايه عبير شكد ضحكت بوكتهه من سولفتلي مها ولا ستخطيتهه اي شمتانه بيهه وشيحجون عليه خل يحجون مو جمانه الي تسكت بعد عن حقهه .
طلعت والهوى بظهري ..
رجعت لبيتي لكيت سجاد متريك وخطيه حته المواعين غاسلهن ..
هاحبيبي ..عاشت ايدك ..
اشرتله ع المواعين ..
لعد شعجب رجعتي ؟
خلصت شغلي بعد شسوي باقيه ..
شفته تضايق من كلامي سكتت .
عبالي نتغده هناك ..
بكيفك ..اني عاجنه كباب وهناك سويت مرگه فاصوليه وتمن .
يم يم ..
امي شلونهه شفتيهه ؟
اي خطيه بعدهي نايمه بالفراش .
بدلتلهه ملابسه وغسلتهن وجراجف جربايتهه همين تبديل وغسل ..
اي عاشت ايدج .
عفت عبير يمهه .
هاا عبير موجوده ؟
اي ..موجوده ..
لعد نلتم كولنه سوة ونتغده خلي الكباب للعشه ..
لاحبيبي روح انت اتغده اني هنا اكل اي شي ..
صفن عليه وباوع لوجهي ..
ليش ..احد اذاج بحجايه ؟
لا ..بس هيج عادي يعني ممشتهيه اكل هسه ..
هااا ..
شويه وعافني وراح لاهله ..
ربع ساعه ورجعلي ..
ليش ماكتيلي متعاركه وياج عبير ؟
سجاد عوف هالسوالف ليش تضوج روحك بيهه .
شكالتلج ؟
حبيبي انسه ..اني ممهتمه انت ليش تهتم ..
هي غير تحجي ..
اي ليش عصبي انت دا اكولك ماكو شي ..حجت ع التنظيف ..
شبي التنظيف ؟
مو اني بس طبخت وغسلت مواعين وهدوم عمتي كتلهه بقه عليج التنظيف ..
سجاد لو اكدر جان نظفت انت تدري حته البيت بالمكناسه الكهربائيه انظفه وهم احس ينكطم ظهري .
لاتبرريلي حبيبي ليش ماعرفهن اني ..
وامي شحجت وياج ؟
لا الشهاده لله عمتي ماحجت شي ولاعافت فراشهه خطيه ..
هالمرة امي حيل تعبانه وذني خواتي كلمن حايرة بنفسهه ولادايراتلهه بال .
هي يمنه بعد اني اتكفل باكلهه وخلي بس التنظيف ع تبارك لانريد شغل من عبير ولا.
تكمله بارت 28
هي يمنه بعد احنه نتكفل باكلهه ويبقه بس التنظيف ع تبارك لانريد شغل من عبير ولاشي ..
رحت لغرفتي تمددت تعبانه اجه يمي سجاد ..
خوماضايجه ؟
لاحبيبي ع شنو اضوج اهم شي انت متتأثر بهالكلام وكولشي يهون لخاطرك ..
عادي باجر نروح لاهلي نتغده يمهم ؟
ليش شعدهم ؟
ماعدهم شي زيارة عاديه ..
هاهيه غدانه يمهم ..
تقرب عليه حضني واني شلت راسي خليته ع صدرة الي احسه هذا مكاني الطبيعي ..
ظليت العب بشعر صدرة ادخل ايدي من جوة ملابسه هاي صارت عاده عندي ومرات حتلو اديه بارده يكزبر جلده جوة ايدي ويهمسلي مجرمه ..اني اضحك اكوله انت مالتي ..
وارجع العب بلحيته وشعرة لان اسود وثخين وبي شيبات ..
انت معجز ..
ليش ولج ؟
هاك شوف شعرك متروس شيب .
واذا ..متروس شيب وكُلي حيل وقوة ..
شوماشفنه شي من القوة مالتك .
ولج ملعونه غير اخاف عليج والله ماهون بيج ..
هههههه خاف تجعص النونو ..
جوووعااان ..
ههههههه ..
واريييييييد ..
هههههههههه ..
والله ضجت شوكت تجيبين .
مطوله ياله اجيب بس العتب عليك انت شوكت تحس .
حاس والله ههههههه يمه طالع لسانج ..
غير اشتاقلك ياحبيبي ..
والله انتي متقصده ..ادري شبساع صرتي حامل اني لحكت اتهنه ..
مشكلتك .. متريد نور اني اريدهه ..
نور منو ؟
بنوتتنه .
مختارتلهه اسم من ورايه ..
لا مو من وراك هسه دا اكولك .
يعني اصير ابو نور ..
اي ترة حلوو ..
نور سجاد ..
هههههههه فدوة شلون اسم حلو .
يعني عجبك ؟
اي حلو ..هاهيه متفقين عليه .
باوعت لشفايفهه بعدين كلت ..
بس بعدني مو كولش مقتنع ..
هي بسرعه افتهمت عليه ولفت اديهه ع رگبتي وكالتلي ..
اي بله علمني شلون اقنعك ؟
هيج فد 200بوسه وفد 300شمه وحضن من هسه للصبح ..
ممممممم اذا بديت بالبوسات هسه الحك منا للغده ؟
ها ايييي بعد هواي ع الغده بلشي بلشي ..
دنكت عليهه بست شفايفهه ووووو....
گمنه تغدينه ورجعنه واحد بحضن الثاني ..
ويمكن ظلينه لليل هيج ...
للحكايه بقيه ..
