بارت 23
وجع قلبي
بقلمي روسكان
لبيج قصص روسكان
مرت اسبوعين وبابا بده يتحسن وكمنه نجيبله معالج فيزيائي للبيت علمود يسوي تمارين حته يرجع يحرك اديه ورجليهه وبده يسولف بس كلامه ممفهوم يكتبلنه شيريد اكثر شي ومرات بس امي تفهم كلماته لان حلكه بعده مندار شويه ع الجهه الثانيه ..بس الحمدلله احسن بهواي وديتحسن ..
جنت احس امي تراقبني من امشي من اتحرك ثكل جسمي طريقه مشيي ..
فد يوم جنه بالمطبخ اني واكفه ع السنك اغسل مواعين وهي واكفه تگلب بالاكل وجنت لابسه دشداشه ضيگه شويه ..
حسيتهه تباوع عليه وتتفحص جسمي ..
فجأه مدت ايدهه ع بطني اني باعتلهه باستغراب ..
هاي شنو بطنج ماما ..
كلبي كام يدوك من الخوف قابل لشوكت ابقه ظامه الموضوع عنهه اكيد راح تعرف لان بطني دتكبر مو تصغر ..
سويتهه عادي وضحكت ..كتلهه ..
سمنانه ..مكرشه ..شسوي من اكل التمن ..
هي ماضحكت ..مرة جايبه 4اطفال يعني صاير حامل 4مرات فالمعرفه العدهه بهيج مواضيع تتعده الخبرة ..
صفنت بوجهي وكانه عرفت اكو بالموضوع ان ..
سألتني ..
صارلهه شكد گاطعتج الشهريه ؟
مگاطعتني ..عادي ذاك الشهر اجتي ..
متأكده ؟
اي ..
خوش لعد اني ممتأكده ..والعصر اخذج للطبيبه واحللج ..
تنهدت وسديت المي ونشفت اديه ..گتلهه ..
ماكو داعي للطبيب ولا التحليل ..
سألتني بخباثه ..
ليش ؟بيج شي ضامته عني ؟
اي اني حامل ..
شهكت امي وضربت ع صدرهه ..
وليش يمعزايه متحجين ؟
ليش احجي ؟ علمود ترجعوني للضيم والله لان حامل ؟
حتلو مارجعتي لزوجج باعتبار هسه انتي زعلانه مو مطلقه لان طلاق الحامل باطل وهمين هو كالهه بلحظة عصبيه ..
صفنت بوجهه ..هذا كل همهه ..
يمه ماريد احد يعرف ..
شلون وبطنج شنكول وشنحجي وبعدين ليش يمه تريدين خراب بيتج ..
بلكت الله من يعرف سجاد بحملج يحنن گلبه عليج ..
ومنو گالج اريد سجاد يحن گلبه عليه ؟منو كالج اريد ارجع لضيم سجاد واهله ..
يمه ماريد ..رحميني ..عوفيني بحالي معليج بيه .
اي مو هي بكيفج ..
لعد بكيفمن ؟؟ هي مو حياتي هاي لو اني غلطانه ؟
لو كولشي عندج يمشي بالاجبار ..هالمرة ماطاوعج عذريني يمه ..
اشكال تحملنه من العيال ومن الرجال بس لخاطركم ولخاطر متتبهذلون ..
واني عندي وظيفه اطمئني مراح اتبهذل لا اني ولا الطفل ..
ليش الطفل يحتاج بس صرف فلوس ؟
لو اشتغلتي منو يدير باله عليه ؟؟ ها جاوبيني ..الطفل يريد وكت وتربيه واهتمام ..وانتي تريدين تصرفين عليه من وظيفتج عبالج ال 350الف التاخذيهه تكفي مصاريف طفل ..
هو علمود هاي اني ضميت عليج السالفه ..راح نرجع لنفس الموال ..
تصايحنه وع صوت صياحنه اجه ضرغام جايب ابويه بالكرسي المتحرك ..
خيركم شكو صوتكم واصل لسابع جار ..
امي نبت ع اخويه كالتله ..
تعال شوف اختك ..
شبيهه ؟
حامل ومتحجي ..
صفن اخويه ..
ولج منين حامل ؟
ضحكت اني ..
صارلج 4اشهر كاعده يمنه ..
امي جاوبته ..
اي هو صارلهه 4اشهر حامل ..
باوعلي ضرغام ..
صحيح هذا الكلام ؟
هزيت راسي اي ..
ابتسم ابتسامه خفيفه وراح ..ماعرفت قصده ولاكدرت افسر ابتسامته ..
رحت لابويه حضنته واخذته للغرفه صبيتله اكل وكعدت اوكله وبعد ماخلص غسلتله ورتبتله مكان نومته ماقبل ينام لزم الورقه والقلم مالته وكتبلي ..
يابه سجاد خوش رجال ..لاتضيعيه من ايدج ..
قريت شكتبلي ..بجيت وبست ايده لابويه ..
كتله ..
بابا الله يخليك لاتجبرني ع الرجعه ..
كتبلي ..براحتج بابا ..
وظليت كاعده بالكاع ع ركبي وراسي بحضنه بجيت الى ان ارتاحيت وهو طول الوكت يطبطب ع ظهري ويمسد بشعري ..
ابويه يريدني ارجع لسجاد ..وامي عرفت بحملي ..يعني راح يبدي مسلسل الضغط عليه الى ان توصلني لمرحله بحيث اني اخابر سجاد واتوسل بي حته يرجعني ..والله اليهود مايجون لعقل امي بالتخطيط والتنفيذ .
ضرغام كاسر خاطري طول الوكت كاعد وحده بالغرفه وغرفته بصف غرفتي ..
طبيت عليه لكيته كاعد صافن ..
كتله ..
عادي افوت ..
باوعلي كال ..
انتي بعد فتي ..
تقربت كعدت يمه ع الجربايه ..
شنو الي مصفنك ؟
ماكو شي ..
خاف مشتاقلهه ..
لمنو مشتاق ؟
شيرين اكو غيرهه بعد ..
شيرين خلصت سالفتي وياهه ..
شنو قصدك ؟
ننفصل ..اطلكهه ..
هيج الطلاك عدكم سهل ؟
لعد شسويلهه عجزت منهه ..
لعد شكو سويتو طفل اذا اكو مشاكل بيناتكم ..؟
شمدريني بعد هيج صار ..
استهدي بالرحمن وروح رجعهه ..
التفتلي راسآ باوعلي بنظرة ..
شلون ارجعهه ابويه انجلط من وراهه ..عبالج تأدبت لو راح تتغير هوهو نفسه اللسان والصوت العالي و24ساعه مشاكل ..
مو لخاطرهه لخاطر الطفل ..
مو سبب كافي ..
ليش مو سبب كافي ..هسه مو اهلك ديلحون عليه ارجع لزوجي علمود الطفل ..
صفن عليه وسكت ..
بعدين كالي ..
وانتي ؟
اني شبيه بعد ؟
تقبلين ارجعهه ؟
ابتسم كلبي قبل وجهي ..
يعني انت متقبل ترجعهه علمودي ؟
اني اكثر واحد كسرتج ..من اجيت وكتلج وافقي بسجاد لان خاف يحرموني من شيرين ..
ضحكت والدمعه بعيوني ..
ياحبيبي يااخويه ..
.
تكمله بارت 23
جنت اعرف ..اعرف بيك شعور الذنب ماكلك اكل ..جاوبني مدنك ..
اي والله ..
مسحت الدمعه الخانتني ونزلت وحضنته لاخويه وهو عصرني كتله ..
وخرر يمعود لاتموت الطفل هسه امك تذبحني ..
ضحك هو ..
معليج بامي سوي الي يريحج ..
توكف بصفي اذا سويت الي يريحني ..؟
اي اوكف ..بس هو شنو الي يريحج ؟
ماريد ارجعله ..
بس سجاد خوش رجال ..ماشفتي وكفته ويانه بالمستشفى من وكع ابويه ..
شفته اجه مرة وحده ..
لا ظل ويانه يومين وحته رايح للحسابات دافع الحساب الباقي الي علينه من طلعنه ابويه من المستشفى ..
لعد شو اني ماشفته بس مرة ..
ضحك كالي ..
هو يبتعد من تكونين موجوده ومن ادزج للبيت يجي ..
طلعت انت متفق وياه ..
اجه اعتذر مني وكالي الي صار بلحظه عصبيه وحجيتله ع اخته كتله سمعتهه تخابر امهه وتحجي بشرف اختي لان ان توسطتلهه ورجعت تداوم بالمدرسه ..
وليش يعتذر منك انت ويطلعلك اعذار ..هو اذاني اليه ..
عفى الله عما سلف ..
ماكو بعد عفى الله عما سلف ..شيرين واخذتهه شتريد بعد شنو مصلحتك ..
ع كيفج ع كيفج اكلتيني وشربتيني ..دا اتشاقه شبيج .
يايابه صايره مچلوبه بعد مينحجي وياج ..
ضربته بقوة ع جتفه ..
اخ ولج ..وقويه همين.
هسه رسيني شلون ارجع الطركاعه ..
هاها اشتاقيتلهه اعترف اشتاقيتلهه ؟؟
ضحك وخجل ..
انجبي ..
ههههههه ..
هو مو صوجج صوج الي يسولفلج ..
هههههههه صار وجهه احمر ..
كافي شقه واحجي ..
انت شنو مشكلتلك وياهه بالضبط ؟
تلفوناتهه المتخلص لاهلهه جريده الصباح يوميه تنقلهه وتطيهه امهه نصائح وخطط جهنميه ..
خو من يخلص رصيدهه عندي عيد ..تاخذلهه يومين تجر عدل ..
سهله ..امنع عنهه المبايل ..
مو حل هذا جمانه هم حرام عليه هيج اسوي احرمهه نهائيا من اهلهه يصير ميصير ..
ومنو كالك راح تحرمهه من اهلهه ؟
لعد ؟
خلي تخابرهم من جهازك وكدام عينك شغله سلام شلونكم شلون صحتكم وتسده ..
امممممم ..
اي جربهه فترة اذا تحسنت علاقتكم وقلت المشاكل اكعود واحجي وياهه بالمنطق تشوفهه اذا تجاوبت وياك واقتنعت بكلامك انو تطلع اهلهه من بيناتكم لان بسببهم دتخرب علاقتكم ..فترة ورجعلهه المبايل ..
وانت من ترجعهه لاتقصر وياهه دلال وحنيه ماتحتاج توصيه انت كلبك رهيف بسرعه تحن ..
وهالساعتين هاي ويه اصدقائك مو يوميه خلي يومين بالاسبوع الهه لو كل نهايه اسبوع طلعهه لمطعم منتزه حديقه خليهه تبتعد عن اهلهه وفك عنهه هذا التعلق بامهه ..
والله طلعتي تفتهمين ..
ضحكت ..
لعد شعبالك ..
وانتي شناويه تسوين ؟
اني سولفت لبابا ..وكالي براحتج ..
شنو الي كلتيله ياه ؟
نفس الكلام الي حجيته وياك .
يعني ماكو امل ؟
أيس ..منطق سجاد ميناسبني ..اسكتي ع الاهانه والمذله ..اسكتي واني اجيبلج حقج ميصرفلي ..وفوكاهه اخدم ببيتي وبيت عيالي ومعاجبهن واذا جنت فارغه قبل فهسه اني مو فارغه هم حملي وهم وظيفتي وهم الخياط ..
بكيفج خيتي ..انتي أعرف .
يله اني نعست ..حروح انام ..ومثل ماوصيتك ع شيرين ..
ضحك كال ..هاهيه وصل ..كلامج اوامر ..
بسته براسه وكمت رحت لغرفتي تمددت ..شويه ظليت افكر نوعا ما فرحانه باخويه وعلموده ولان ساعدته ..فدوة لعمرة ميقبل يرجع مرته علمودي خاف اني اتأذه ..
جنت اشوف بنظراته انكسار وشعور بالذنب بس معبالي لهل درجه ..
من هواي نواحي ربي عوضني وجبر بخاطري بعد كل هالتعب والظلم ..
نمت فرحانه نوعا ما ..
شاركوني توقعاتكم للبارت الجاي ..
