البارت 9
وجع قلبي
بقلمي روسكان
لبيج قصص روسكان
جمانه ..امي اتصلت ع ام سجاد وبلغتهم بموافقتي واني من ثاني يوم قررت اسولف لصديقتي مدرسه وياي اختهه طبيبه نسائيه ..كافي بجي البجي مراح يسويلي شي ولا راح يحل الي المشكله قويت نفسي وبدرس شاغر حجيتلهه كولشي وقبلهه حلفتهه بكتاب الله متحجي لاحد وتساعدني .
وصدوك بساعتهه كالت ناخذ اجازة زمنيه ونروح لاختهه نلكاهه هسه مداومه بالمستشفى ..
قريت ع الانترنيت انو اذا ماكو ممارسه ممكن غشاء البكارة يرجع يلم خلال سنه او سنتين واني صار سنه ونص ع سالفتي هاي ..
طلعنه من المدرسه وصار سجاد كبالي ابتسم بوجهي اني ارتبكت بس صديقتي شهلاء (المدرسه الي جانت وياي )اخذت ايدي وصعدنه تكسي ورحنه للمستشفى
وصلنه وعرفتني شهلاء ع اختهه دكتورة ريام الي رحبت بيه ودخلتنه غرفتهه وسولفتلهه شهلاء قصتي وكالتلي يله ع الفحص واني دكات كلبي تقرة الف وكانه طبل امل وخوف بلكي الغشاء ملتئم واذا لاء شراح اسوي بارب عيني ..
فحصتني وكالت ماكو غشاء بكارة رايح ..جنت واكفه ع شعرايه بس حجت هيج الدكتورة اني طكيتهه بجي وماسكتت ابجي بحركه ع حظي الماكعد فد يوم بعد ان هدأت اقترحت عليه تسويلي ترقيع بس تخدير عام مو موضعي معناتهه يوم كامل لازم ابقه بالمستشفى ماكدرت اوافق الخوف تملكني وشأكول لاهلي وين رحت ووين بتت ..
اخير شي شهلاء كالت نخلي غشاء صيني دكتورة ريام مانصحتنه بي كالت هواي زلم كاموا يميزون وجوده ..
واني ظليت محتارة اخير شي سويت الي كالت عليه شهلاء .
رجعنه للمدرسه صارت عيني ع الماركت دورته لسجاد بعيوني ماشفته دخلنه للكدرسه جان باقيلي درس واحد اديته وطلعت للبيت ..
رجعت للبيت بدلت وكعدت اتغده كالت امي مشيه الزلم وعقد السيد بيوم واحد يعجبج هيج ؟ كتلهه يوم بكيفج ..
ماجان عندي اي امال لهذا الزواج صح وافقت برضاتي بس ...بس علمود لا اكسر خاطر اخويه وفرحته وع الاكثر زواجي وزواج ضرغام راح يصير بيوم واحد حسب ماسمعت ..
مرت ايامي عادي الشي المو عادي بيهه البيت كوله مخبوص يحضرون لزواجي وزواج اخويه واني احس نفسي ضايعه بعالم مو عالمي ..
سجاد ماحاول يتواصل وياي واني تمنيت اصارحه بالحقيقه وما اغشه ..
تفاجأت من كالوا زواجنه بعد شهر واخويه كلي ماعنده فلوس يتزوج عن قريب فصار الاتفاق يصير الحنه والزفه بيوم واحد وبدون فندق حجز قاعه وهاي السوالف بس مجرد نروح نفتر بسيارة العروسه وناخذ صور للعرسان وكلمن يرجع لبيته اهلي يفرغون بيتنه للعرسان هالليله واهل سجاد كذلك يعني زواجتين بيوم واحد وباقل التكاليف ..
والي اقترح هالفكرة سجاد مادري ليش مستعجل ..
مر الشهر بسرعه ..اجه اليوم الموعود ..يوم زواجي ..
ماعشت اي شي يخص فترة الخطوبه بس كضيتهه ركض بركض بتجهيز نفسي والتحضيرات جنت اطلع من المدرسه للسوك ومن السوك للبيت لان تجهيزاتي مو بس جهاز عروس سجاد عازل عن اهله بمشتمل بالطابق الثاني يعني راح نكعود بمشتمل هاي اذا طولت كعدتي اكثر من ليله يم سجاد ..صح جنت اطلع ويه سجاد نشتري واسلوبه حلو وحنون وهادئ بس ابد ماصار مجال نصير وحدنه ..ليش اطلع لنفسي اعذار لان وصلت ليوم زواجي واني كولشي مكايلتله جان هو طول الوكت قريب عليه جنت اكدر اطلع من دوامي اروحله للماركت واطلب منه ياخذنه لمكان معين واسولفله بس اني جبااانه ..جبااانه ..جان املي جبير الله يسترني ويعدي ليلتي ويه سجاد ع خير ..هنا حته الامل طمع ..وانتظار رحمه الله هم جان طمع مني ع كم الشعور بالذنب الي جنت شايلته ..ذنب حملنياه مجتمع ظالم مو حرام رب العالمين ..
الخوف قوة هائله هي الي جانت تسيرني وتمشيني بطريقي خفت وتأملت وطلب الستر مو حرام ولا هواي ع بنيه مثلي ماغلطت بحق رب العالمين بس غلطت بحق مجتمع ..يمكن هاي ضريبه جان لازم ادفعهه لان نزلت راس اهلي حتلو محد يدري اني ادري وشعور الذنب اخذ مني حيل فوك طاقه تحملي .
جانت مهله اختباري شهر ..شهر ويصير زواجي ..واني يوم بعد يوم ينقضي وينست من بين ايدي اخسر فرصتي واخسر جرأتي ويزداد الخوف والجبن داخلي وخلص الشهر وماصارحت سجاد بشي وهذا ذنب ثاني بخوف سويته وعقوبته لسه مابدت لان سجاد ميستاهل مني هالتصرف والشهاده لله ماقصر وياي بشي واني من شعوري بالذنب ماطلبت ع لساني شي كولشي ع ذوقه وكولشي بامرة .
