شقيقي المزيف

Part 22

فتحت عيني لقيتني على سرير وحسة ان حد ماسك ايدي , ببص جمبي لقيت دونجهي ماسك ايدي ودموعه نازلة عليها ,

شديت ايدي وقومت وانا مفزوعة ونزلت من عالسرير روحت وقفت ف ركن الحيطة وانا بقوله بعصبية : انا فين !! ازاي انا وانت ف مكان واحد - فين سونجمين !! ,

دونجهي قام مخضوض من تصرفي : ا اهدي بس انتي ف شقتي ,

برأت : ايه اللي جابني هنا؟ خطفتني تاني؟ ,

دونجهي بص ف الارض وهو متضايق : لا اخوكي قالي اخدك معايا بعد معرف اننا متجوزيـ ,

صرخت ف وشه : متكملهاش ,

دونجهي باصصلي بحزن : مكنش قصدي انا كنت هقطع الورقة دي بـ ,

قلبت وشي وضيقت عيني بغضب : انا هروح لاخويا دلوقتي حالا وانت مش هتمنعني ,

دونجهي بهدوء : محدش يقدر يمنعك بس فكرك لو هو عايزك ايه اللي خلاه يقولي اخدك ويسيبني اخرج بيكي ,

بصيتله وانا متعصبة وفكرت ف كلامه ,

دونجهي : انتي هتقعدي هنا لحد منشوف حل ,

ضحكت بسخرية وقولتله : بعينك اقعد معاك ف نفس المكان ,

دونجهي بعصبية : كفاية يا امنية حرام عليكي اديني فرصة ادافع عن نفسي ,

انا بصوت عالي : هتدافع تقول ايه خبطتني بعرابيتك ولا لأ ؟؟ اخدتني شقة بعيد وعيشتني ف كدبة ولا لأ ؟؟ بعد مأخويا رجعلي خليته يغضب عليا ويطردني من البيت انت السبب ولا لأ ؟؟ ,

دونجهي : ايوة عندك حق ف كل اللي قولتيه ,

انا : يبقا ليا حق اكرهك ولا لأ ,

دونجهي : انتي مبتكرهنيش ,

بنبرة مخنوقة رديت عليه : خليك عايش ف اوهامك دي والايام هتثبتلك أد ايه بكرهك والموت اهونلي من اني ابقا معاك ,

دونجهي : ده ميلغيش حقيقة انك هتفضلي قاعدة معايا لحد مأخوكي يرضا عنك ,

انا : طلقني ,

دونجهي بصلي وهو مصدوم ,

انا : ايه اتطرشت؟؟ بقولك طلقني وهات الورقة اللي معاك احرقها ,

دونجهي بثقة : لأ ,

برأتله : لأ؟؟؟ (ضحكة سخرية) انا كل يوم بكتشف فيك جانب حقير ,

دونجهي : لو الورقة دي هي الحاجة الوحيدة اللي هتخليني اقرب منك يبقا هتمسك بيها ,

انا نظرة استحقار : نجوم السما اقربلك مني انا هدفي ف الحياة بقا اني انتقم منك واكرهك ف حياتك - وصدقني انت مشوفتش حاجة لسة ,

دونجهي : انتي مش من النوع اللي ممكن اصدق انه يأذي ,

بابتسامة لئيمة رديت : لا متتخدعش بمظهري ومتستهونش بيا - اما خليتك تطلقني مبقاش انا ,