نفيسة بنوتة وحيدة ....قاعدة مع حبوبتا السرة ام ابوها....وجدها اللحو ابو ابوها .... بعد ابوها الكان برضو وحيد والديهو اتوفى ....وامها عرست راجل تاني ....بعد ابو نفيسة مات .....حاج اللحو اصر انو بت ولدو لازماااا تكون عائشة معاهو في بطن بيتو ...بدل تعيش مع امها وراجل امها .... البعتبرو حاج اللحو غريب علي نفيسة ...وماصاح تسكن معاهو في بيتا واحد .....
جدها كان خائف عليها شدييييد بعد البسمعو عن الجرائم البقت تحصل كل يوم من رجال الامهات
..ومااا اكترا في الزمن الصعب دا .....
والزاد خوف حاج اللحو ....لما كان بسمع كلام ماطيب عن راجل ام نفيسة ....وانو زول وسخ مابخاف الله شغال سمسار ... كان عبد القرش ...مابخدم خدمة ولو صغيرة الا بفائدة .....لو كان الخدمة تخص امو وابوهو ....
جد نفيسة بخاف عليها شديييد ....وبعتبرا امانة ولدو المات ....وعرض لزول متوفي... لازماااا يصونو ويحافظ عليهو اكتر من عيونو.....
والذاد خوف حاج اللحو سماحة نفيسة ...ورغم انها بت الاطناشر سنة ....بس كانت جميلة ...طويلة... وسمرا ....سمار الخمر البعطش داك...وجسم مقسم قادر الله البشوف نفيسة يديها كم وعشرين سنة ... مش اطناشر بس....
يلا نفيسة نوع البنات المابحبن القراية ....وموضوع قومة الصباح ...والسباق قبل جرس الطابور ...والحصص وواجب ودق المتأخرين ....دا كلوووو مااااا واقع لنفيسة وشايفة الموضوع دا عذاب ساي ....
نفيسة كانت مابتفارق حبوبتا لحظة ...والعجب من تسمع في عرس في الحلة ... تطير تقوم وتقع في التجهيزات.... وتجتهد اكتر من اصحاب المناسبة نفسهم.....
وتصر علي حبوبتا الا تمش معاها للعرس من دق الريحة للجرتق.....
ومن عمرها عشرة سنة هي في الحالة دي ...نفيسة وصلت مرحلة بقت تصرفاتا سابقة سنها ....محكرررررة ...
ومقدرة ...بتعرف اااي شئ حق النسوان الكبار ...كيف ماتعرف اي شئ وهي تربية حبوبات.....
وطووول النهار مغزوزة في نصهن ... نفيسة كانت لما تطلع للمدرسة وتمشي مع بنات فصلها ... وبي شكلها تتشاف اكبر منهن ...رغم انو عمرها هي اصغر بكتيير من رفيقاتا....وبتلقا معاكسات في الشارع وفي المدرسة ...والشفع مسمنها العجل المباري الغنم ...وفي المدرسة كانت في توزيع الكنب ...وعشان هي طويلة بتتوزع في ااااخر الفصل .. وعاشرت ناس الكنب الورا ...وماادراك ما ناس ورا ...فوضة ...واهمال ...وعدم رغبة في التعليم ...ماكلهم بس الاغلبية ..
وكانت دي اسباب كاااافية تخلي نفيسة ماحابة فكرة تتم تعليما ...وزاد الطين بلة قعدتا مع الحبوبات صحبات حبوبتا ..... نفيسة متريسة ترتيبات قعدة الحبوبات ...وطلعتن... عشان اخفة وحدة فيهن ....وقامن اعتمدن عليها ...تمش ليهن السوق مع ااي وحدة فاضية تلم وتشتري معاها حاجات القهوة ...وحاجات الدخان والمشاط ...ااي كانن حبوبات فالحاااات ...نشيطات فيهن البتدخن ومجيهه طول اليوم ....وياحلات الحنة السادة وحنة خم الفحم في يديهن...مشاءالله .. ونفيسة
عاملة عليهن مس... تصبغ وتحنن ليهن شعرن ....وتخلط ليهن خلطة الودك والشمع للدخان ...وتعمل الكركار للشعر ...كانن فيهن البتتمشط مشاط بالسلا...وفيهن البتسوي مساير ....ياخ صلاة النبي عليهن ... والساعة الما يتلمن للقهوة مشاءالله ...نفيسة تقوم من بددري
تشرب الشاي هي وحبوبتا وجدها ....وجدها اللحو يطلع علي شغلتو ....حاجة السرة تطبخ كللل الاكل فطور وغدا سرررعة سرعة ....ونفيسة تنضف البيت ...وتمش علي الراكوبة تنضفا..وترشها ...زمن ماكان في مراوح حوش.. ولاغيرو ...وضل الشجرة طاقي ونازل في الراكوبة ...مظلل الراكوبة ومبردا ...وتفرش نفيسة ديك يالعناقريب الهباب ...وتخت كمممم بنبر وتجيب البرش تفرشو فوق الواطة ...وتولع الحفرة لي حبوبتا... بتتدخن بالدوم عشان الرطوبة ...وتجيب قفة الجبنة الماخمج فوقا كللللل مستلزمات القهوة وتجيب المخرز والمسلة والمراية ...للمشاطة ...والنسوان وبعد يتمن شغلتن في بيوتن .... ويجرن جري علي بيت حاجة السرة حبوبة نفيسة ...والنسوان كلهن يجن .....والبتجي شايلة خدرة تورق فيها مع الونسة..... والبتجيب العجين بتاع الكسرة تعوسو في صاج السرة الفوق الراكوبة ....ويلا اتلمن الحبوبات .....ونسة وضحك وحكاوي وودع وجيهه وشغل بيت ....يفطرن وما يطلعن الا الضهر يأذن ...نفيسة تضاير راكوبة حبوبة السرة ...وتصلي وترقد حبة ....والعصرية كانت بتمش مع بنات الجيران اجيبن اللبن من حوش البلولة ...عندو بقر لبنن نضيييف وسمح ...وكان في الحلة شاب زي ماقالن سمح وجذاب ...بمش البندر يووومي اصلا حلة ناس نفيسة مابعيدة من الخرطوم.... الشاب بقعد تحت الشجرة الجمب حوش البلولة يووومي ....وبحسب ليهو في شئ علي الدفاتر مامعروف شنو ...نفيسة وبنات الحلة بجن مارات فوقو ...واضحكن نفيسة كانت بتنهر البنيات ...وفي يوم
يتبع....
