نفيسة حاولت بالاول تقتنع بكلام جدها وتأجل الموضوع لما تعدي كم سنة .... بس لقت نفسها مااااقادرة تتحمل عدم شوفة عباس ....ولا قدرت تتخيل انها تبعد عنو ولو سنة حتي ...فكرت تتكلم مع جدها ...بس كان حتفقد ريدة جدها ليها ... واصلا مابتقدر تتكلم في الموضوع زي دا.....مع جدها ... لانو بعتبروهو نوع من قلة الادب البت تتكلم في موضوع عرسها ...بكل جرأة وعدم احترام.....
...وتتناقش كمان ..
يلا عموما هنا في الوضع دا البت ماعندها ااي حل غير انها تسكت وبس ....وفعلا نفيسة سكتت وقلبها واجعا ....وكل يوم تحلم بعباس ....وتسرح تاني يوم مع الحلم الشافتو .....
وفي يوم جد نفيسة جا من الشغل .... وحاجة السرة جهزت الغدا واتغدو مع بعض ...نفيسة متعودة تعمل الشاي بتاع المغرب لجدها كل يوم ...وكانت بتعملو في المطبخ ...بس المرة دي نفيسة طلعت الكانون وعدة الشاي .. الكفتيرة والكبابي والسكرية ومعلقة في صنية طلس صغيرونة .....وبالماشة لقطت ليها حتتتة جمرة من كمية رماد ... كانت مولعة في الكانون ... من باقي نار حقت الطبيخ ...الطبختو السرة ...نفيسة هزت الكانون من الرماد... وكبت الفحم وختت الجمرة وختت من فوق ليها فحمات ...وقعدت في البمبر تهب بالهبابة ... حبوبتا وجدها راقدين في العناقريب ويعينو لنفيسة .... وهي بين نهاية العنقريبين الراقدين فيهم جدها وحبوبتا ....حاجة السرة قالت ليها يابت دا شنو النظام دا الليلة ....نفيسة اتبسمت وماقالت شئ ...جدها عين ليها وهي تعباااانة تهبهب ساااي ... قال ليها يابتي الجمرة دي مابتولع ليك حتتعبك ساي.... قومي جيبي ليك جريد ولا جاز وولعي النار ....نفيسة ضحكت وسكتت ... ودنقرت تهب ...جدها استغرب فيها ... السرة قالت ليها ...نفيسة يابت ...مالك يابتي بدوري التعب لروحك ...جدها قال ليها ينفوس الجمرة دي صغيرة مابتولع ليك قالت ليهو الجمرة صغنتوتة قدري ياجدي صح.... واتبسمت ...وضحكو وبقو يتونسو ...وفي ونستم ديك الجمرة شالت ومسكت في الفحم وكل ماليها ماشة مولعة ...نفيسة ختت الكفتيرة فوق النار .....وكركبت في يد الكفتيرة عشان تلفت جدها ...واول ما عين قال ليها نفيسة دي الجمرة الصغيرة القبيل ولعت النار كدا ..
قالت ليهو بابتسامة وخجل ااي يا جدي حقرنا بيها عشان صغيرة.... واهدي ولعت نار تشربنا الشاي ....لو كنا اهملناها علي انها صغيرة كان ماتت ...جد نفيسة ضحك لما صوتو طلع برة البيت ....حاجة السرة فهمت قصد نفيسة وبقت تضحك .. قالت ليها صحي يابتي ماف شئ صغير ....نفيسة قالت ليهااا ااي والله يايمة...شربو الشاي .. وجدها البسمة مافارقت وشو .....وبعد الشاي ... صلو العشا ورقدو نامو بعد قفلو البيت ...وتاني يوم جد نفيسة عندو صاحبو معاهو في الشغل رفيقو من بدرررري ...وبحكي ليهو بكل شئ ...اول ما اتلاقو في الشغل ...وكل شوية اتونسو في كممممم موضوع...
اها فطرو وجابو ليهم الشاي ....جد نفيسة من شاف شاي الفطور ...اتزكر موقف نفيسة حق شي امس والجمرة ....قعد يضحك ...صاحبو قال ليهو ضحكنا معاك ... بدل تضحك براك كدا زي الماك نصيح ....وفعلا جد نفيسة حكا لرفيقو القصة حقت جمرة شاي المغرب امس....
