اها طبعا النعمة عذبت نفيسة عذاب شدييييد ....بالتعامل الجاف والشين والمحرج داك ... والنسيبات نوع النعمة دا كتيييراات جدا في مجتمعنا دا...
نفيسة رغم صغرها بس كبر العقل بالحكمة ماااا داير سن معين ....
يلا نفيسة فكرت كتيرررر ..
وخاصة بعد لمات القهوة و الونسة مع نسوان الحلة ...
نفيسة عرفت وفهمت من القصص والونسة مع الحريم ....انو الام البتحب ولدا وخاصة لو بقا ولدا دا نور عيونا وركازة البيت ...
وانو من اتولد بحب امو وبرايها شديييد... يلا الولد دا اول ما يعرس بتقوم تزيد مسؤلياتو ...وزمنو الكان زمان للشغل وامو .... ببقا مقسم لتلات اتجاهات بدل اتجاهين ... ...والاتجاه التالت بكون العروس ....وبتبقا العروس دي زي الدخيل ...ومن هنا .. ام الراجل بتشوف العروس سرقت منها ولدا خاصة لوبقا العريس دا عرس مرتو دي عن حب ...... وبعامل المرا قدام اهلو برومانسية ظاااهرة ....
وبتبدا تغير الام من العروس ...
وبكون جواها نوع من الكره ..ونظرة كدا كيف كيف ....تحسها نظرة قرف قرف كدا....والام ببقا لا بعجبا العجب ولا صيام في رجب....
يلا ماكل الامهات بكونو كدا في امهات عاقلات وفاهمات الواحدة فاهمة دي سنة الحياة ... وانو ولدا دا اكيد ما بكون تحت جناحا طول عمرو .....وبتكون الام واثقة انو ولدا دا بجيهو يوم بأسس فيهو اسرة قائمة بي زاتا .....
زي ماحصل معاها هي ...وعارفة هي زاااتا في يوم خطفت ابو اولادا من امو واهلو ...
والنوع الفاهم من الامهات ديل ....تعاملن مع عروسات اولادن....بكون بالعكس كل ما شافت ولدا مبسوط مع العروس ...هنا الام بزيد اعجابا بالعروس ...وبتقوم بتحبها اكتر واكتر ..
زي ماغنت ندي القلعة بريدتو الحبيب العظمة الكلو هيبة ....
يعني في امهات بقدر ريدتا لولدا البتحبو اول ما يتزوج الولد دا بتقوم الام تريد مرتو زي مابتريد ولدا بالضبط.... نظام دي الغالية مرت الغالي ...
والعروس بتبقا في نظام من جاه الملوك نلوك ...
اما نوع النسيبة الزي النعمة دا لو اتمادن في الغيرة دي ممكن تصل لكره وحقد علي العروس ....
كل الكلام دا بقت تفكر فيهو نفيسة ...
واتزكرت كلام وحدة من نسوان الحلة لما حكت قصة مرا ...بتحب ولدا ولما عرس بدت الغيرة منها علي العروس ..ووصلت الغيرة دي ل مرحلة وهم .....وبقت الام تتوهم انو ولدا بدأ يكرها ....عشان العروس بتحرشو عليها ....وبتحاول تخليهو يميل عليها اكتهر من امو....ويجيب ليها كل شئ ....ونساها هي عديييل ... والجهل والتخلف لعب دور لما جات ست الودع وقالت ليها ولدك بقا ما بطيقك ... وبقا مابجيب ليكم من خيراتو شئ ....عشان مرتو كتبتو عند الفكي ...وعملت ليهو سحر ...والسحر بخليهو انو تاني ما يشوفك ولا يعبرك ...والام الحقد والكره لعروس ولدا عمى بصيرتا ...وخلاها تعمل حاجات لا ترضي الله ولا ترضى الرسول ...وتدخل في زنب كبييير شديييد
لانها هي زاااتا مشت لفكي تكتب مرة ولدا ..ايوة فكي
عشان
يعمل ليها سحر يرجع محبة ولدا ليها ....ويرجع يستشيرا زي زمان في كل صغيرة وكبيرة ....وما يخطي خطوة الا يكلما هي بالاول... وترجع تتمتع بخيرو ليها كاامل زي زمان ..مامقسوم مع المرا... وبكدا تكون بتغيظ العروس وتهريها ....
والام بعملتا دي ... ماعارفة انها هي بضر في ولدا وتدمرو ...
وما اكتر المشعوذين والدجالين البستعينو بالجن السفلي عشان يدمرو البشر ...
وفعلا الام دمرت ولدا بطريقة غير مباشرة ...بدون قصد وفهم...
وبقا ولدا زي الحبل الانقطع .. لانو كانت الام بتجر بطرف الحبل ... والزوجة بتجر بالطرف التاني ...ومرض الراجل لما مات .....ايوووةمات من الشد والجذب...
وكتير من قصص النسيبات ...البحاولن بطرق مختلفة انهن يرجعن زمام امور اولادن ليهن ....ويبقن هن المتسلطات في العريس ولدا ومرتو واولادو فيما بعد....
النسيبة نوعين كعب وكويس ...وكل نوع عندو الف اسلوب ...
النوع الكعب داك اسلوبو بكون مختلف ...وكلو شر....
فيهن النسيبة البتستعين بالفكي ...وفي النسيبة البتستعين ببناتا يعني الحموات ...يعملن عصابة علي مرت الولد ....وفي البتستعين بالقوة والقهر ...وتزل مرة الولد لما تتروض وتبقا تحت امرتا ... ديل كلللهن كوووم ...وليهن اساليب فنون مختلفة ....
اما النوع التاني النسيبة الكويسة
ودي النسيبة الواعية ...وفي منهن البتبعد من ولدا بمجرد ما يعرس وتخليهو علي راحتو ...وفي النسيبة البتبعد من حياة ولدا الجديدة وتكون جمبو من غير تدخل في حياتو الجديدة دي...وفي البتزيد دعمها عشان تدعم ولدا ومرتو واحفادا فيما بعد...
ومااا كل العروسات زي نفيسة ...
نفيسة الحاولت انها تقتل غيرة النعمة قبل تطور وتصل مراحل صعبة ...اول شئ عملتو نفيسة خلت عباس يكون مع امو احلا من زمان ....يعني قبل العرس ... وااي شئ مادي يجيبو لنفيسة يجيب لي امو كمان زيو بالضبط... طبعا بس الحاجات البتجي مع عمرالنعمة ... اكل لبس ...وبدت نفيسة تقرب من النعمة وتخليها تحبها ....
نفيسة بقت تقعد للنعمة في العنقريب تعصر ليها كرعينا ...وتحننا ...وتجيب من كركارا وصندليتا تمسحا ...وتمش معاها السوق وتختار معاها تيابا وتشاورا في طقم التياب......
ولو النعمة جات طالعة نفيسة تراجع ليها لبسا وتقيف معاها ....وتساعدا في شغل المطبخ ...وتعمل الحاجات البتحبها النعمة ...وتحاول بقدر الامكان تتفادا الحاجات البضايقا ...
نظرية نفيسة كانت ناجحة ...نفيسة كسرت عين النعمة بالتعامل السمح والاحترام ....والنعمة بقت بمرور الزمن تبادل نفيسة نفس التعامل ....
وبالعكس بقا لما عباس يجيب لي الامو حاجة سمحة تقول ليهو دي ماحقت عجائز ...وبتقوم وتديها لنفوس وتقول ليهم دي شبابية لبتي نفيسة ....
نفيسة قدرت تغييير نسيبتا مية وتسعين درجة .... واحسن حاجة عملتا نفيسة خلت النعمة ترجع علاقتا من ناس الحلة ....وكل الناس اندهشو في سحر نفيسة الغير النعمة كدا دا ....
وفعلا كل بني ادم جواهو بزرة خير ولو كانت صغيرة ...لو سقيناها احترام واتعاملنا معاها بحكمة بتكبر ....وثمرتا بيكون تغيير كامل ...وللاحسن
نفيسة
يتبع......
