بقا الجو الاسري حلوووو والوضع كلو فرح وسعادة ...واتفاق في كللل شئ صغير وكبير بين نفيسة ونسيبتا ....وفرحة كبيرة عائشنها كل افراد الاسرة....يقومو من الصباح ...اول يصحو نفيسة وعباس ...وعندهم روتين قبل ما يطلعو من بيتم .... بشربو عصير ...وبدلكو ويتونسو حبة ويطلعو للشاي...ونفيسة والنعمة يعملن الشاي في نفس المكان العملت فيهو نفيسة الشاي اول مرة داك...وبعد كدا عباس بطلع الشغل ...والعيال يمشو المدرسة ...وتجي المرا تنضف البيت وتغسل العدة ....والنعمة ونفيسة ينضفن الخضار يسون الفطور والغدا ... يفطرن.... وتجيهن حاجة نعمات ومرات السرة وكم مرا من نسوان الحلة ...ويشربن القهوة ...وقبل الضهر نفيسة بتاخد ليها نومة وشعيراتا مكعكات ... وماسحة بالزيت ... وتجلبط بالجلسرين لاكريم فسخ لا غيرو ...وتصحا تصلي ومرات تزاكر مع علي وعثمان ...قدر البتعرفو تفيد وتستفيد .... ومرات تمش تتونس مع الجيران هي والنعمة ...ومرات بجوهم ضيوف ...ومرات تمش بيت جدها ....ويوم تمش ناس جدها عباس بجيها بهناك ويرجو بيتم سوا ...
ولو مامشت ناس جدها ...اول مايصل عباس من الشغل ...اخر دلع وشوق يقعدو جمب بعض ....يتغدو ...واتونس مع النعمة ...وشاي المغرب ضروري يكون الاسرة كلها متلمة ... ...نفيسة تتدخل وتتمنجه..... ويعملو العشا يتعشو وبدري بدري يقفلو وينومو ...
استمر الحال كدا فترة من الزمن ....وطووول الفترة دي نفيسة ماظهر ليها حمل ... عباس قرر يمشو الخرطوم بعد ضغط من نفيسة والنعمة ...يعملو فحوصات ويقابلو دكاترة مختصين ...وفعلا حصل ...وعباس ما كان داير حاجة غير نفيسة بس ...بس النعمة كانت دايرة حفيد ليها ...
ونفيسة نفسها في طفل ...وهم في الخرطوم ...مع الدكتور .... جا داخل راجل .... ومعاهو مرة كبيرة شوية ...عندها مشكلة وجات تقابل الاخصائي ... وفعلااا ...دخلت قبلهم ... وفي الدفتر بتاع نمر الكشف ...الراجل شاف اسم ....وقادمو اسم عباس ...وسال البت عن صاحب النمرة اشرت ليهو علي عباس ... ومشى الراجل علي عباس ...وبائن علي الراجل الافترا والعنجهة ...وسلم علي عباس ...بالاول ماعرفو واول ما الراجل عرفو بنفسو ...عباس عرف انو دا عمو ايووووة ...عمو المفتري الساكن في الخرطوم..... سلم عليهو بكل برووود ...وكأنو اتلاقا معاهو الصباح ... ومشى ولا سألو من اهل ولا من قاعدين وين ...ولا من مالكم ....بس مرتو طلعت طيبة سألتو وعرفت انو ...نفيسة دي مرتو ...وجو الخرطوم عشان موضوع الولادة ...ومرة عمو عرفتم بنفسها ...وقالت لعباس لاقيتك صغيرررون عشان كدا ماعرفتني ..وعزمتم يجو بيتم ..وورتم العنوان ...واستأذنت ومشت منهم ...
ويلا ....عباس مافكر انو حتي يحفظ الوصف لانو عارف عمو مفتري ... مستحيل يمشو ليهو ....لانو عمو دا نوع البفتكر انو الناس بتجيهو دايرة شئ مادي منو ...وبربط ليهم وش وكدا ...
وعباس بعد خلصت الفحوصات مع الدكتور ...وبعد كمممم يوم طلعت النتيجة ...وكانت
انو ماف ااي خلل لافي فحص نفيسة ...ولا فحص عباس .. والدكتور اداهم منشطات ...وكم ارشادات في برنامج الجماع . وتغيير الجو وكدا ....عباس كان رومانسي جداااا مع نفوس باقي الايام فسحا فسح لماشبعت ... وقالت ليهو تعال نمش لعمك زيارة ....عباس رفض بحجة عمو دا مفتري ومتكبر وتعاملو مادي ....بس نفيسة اصرت عليهو قالت ليهو خليك انت الاحسن ...طالما جيت لي هنا ارح ...تكسب ثواب ....نفيسة ماخلت محاضرة دينية .. ولا حيلة النسوان الا وعملتا عشان تقنع عباس .... وعباس اتحجج انو مابعرف البيت .. نفيسة فاجأتو انها حفظت العنوان من مرت عمو ..... لما قالتو في العيادة ....وعشان خاطرا هي بس مشو ....
وفعلا ...عباس بعد عذاب اقتنع لنفيسة ...وقرر يمش ...بس كان كاااشي كدا من المشية دي ..و .....بعد وصلو الحي الوصفتو مرة عمو ...
ماكانو محتاجين جهد كبير يصلو للبيت ...وبس اول ما وصلو الحي الراقي الماخمج عرفو البيت ...بعد تفتيش بسيط وراقي ...لانو كل عمارة او فلة بالحي دا ..عليها لافتة مكتوب عليها اسم سيد المبنى ...ومكتوب اسم عمو واااضح ...ودقو الجرس ..وجات الحبشية فتحت ليهم ...وخلتم واقفين مشت كلمت ماما علي قول الحبشية ....عباس اتغاظ من الحركة بس سكت ....وجات مرت عمو بنفسها استقبلتم ودخلتم جوة ... واتونست معاهم وجابو ليهم عصير ...وبعد ساعة جا العم نازل من السلم ...وباين عليهو عارف انو عباس ومرتو معاهم بالبيت.....لانو ما اتفأجا بوجودهم..... زول غريب بقابل الضيوف بمزاجو ....سلم بطرف ايدو عليهم ... عباس كان عايز يمش طوالي بعد سلام عمو دا ...بس نفيسة جرتو من جلابيتو وقعد ...والعم كلامو كلو بقا عن اراضي ابوهو ... واسعار الاراضي في الحلة كيف..
.وشنو ...يعني كلام قروش في قروش ...وشوية العم قلب الكلام انو ماعندو شئ والظروف صعبة ...ومصاريف البيت تقيلة شديد ....وكأنو داير يوصل رسالة لعباس انو ماتشحدني لو جاي لمساعدة ...لدرجة انو الكلام استفز عباس ...وعباس بسرعة وقال لي عمو وبدون مقدمات انو شغال مترجم تبع شركة اجنبية وبقبض المرتب بالدولار....
العم قلوظ عيونو وسكت ... وبدأ يتكشم ....شوية كلامو بدأ يتعدل ...واستأذن وطلع ...قال ليهم خليكم قاعدين بمش المكتب وبجي المسا ... اتغدو معانا وامشو ....عباس استحقر عمو شديييد بكلامو دا....واول ما طلع العم من البيت ...وبعد نص ساعة عباس استأذن مرة عمو الكانت ظررريفة جداااا معاهم ...ونفيسة ماحبت تضغط اكتر علي عباس الظهر الزعل في عيونو ...وعوها . وطلعو مشو ....وفضلت نفيسة طول الليل تهدئي في عباس وتحاول تخليهو ينسى اليوم دا....وندمت انها اقنعتو يمش لعمو الفقر دا ...وتاني يوم رجعو الحلة ...ونسو كل الحصل ... وبشرو حاجة النعمة انو الولادة ماف مرض ولا شئ موقفا ...ورجعو لبرنامجهم وروتينم اليومي داك ...والنعمة كلها شوق لعباس ونفيسة.... وكل يوم تحكي قصص الحلة الفاتت عباس ونفيسة ايام سافرو الخرطوم....
ونفيسة كانت برضو بتحكي لي النعمة بمشيتم حقت الخرطوم ...لحدي ماحكت للنعمة بملاقاتم لي بعم عباس .... وزيارتم ليهو بالبيت ...
بس النعمة اضايقت شديييد وقالت الله يستر ..
يتبع.....
