النعمة ... رغم انو قعدة الشاي عجبتا..... بس حست انو نفيسة داخلة علي تسلط ....النعمة من نوع النسوان المتسلطااات ديلك ....النوع البحب المعاهو يستأذنو في كل صغيرة وكبيرة داك.... وحازمة شوية كدا....جااادة يعني ...
وداخلة في قصة انها حجت ...وبقت تتعصب في كل شئ ....نفيسة ما انتبهت لي تغيير حاجة النعمة ...بس اولادا حسو ...لانو عارفين نفيسة اتعدت طقوس مملكة السلطانة نعيمة....بس فرحووووو بالقعدة ...وشديد كمان.... وطلعو العيال للمدرسة ...وطلع عباس بعد قدمتو نفيسة وكالعادة ودعو بعض بحضن ...وبوسة يومية من عباس في رأس نفوس ...
بعدها نفيسة مشت بيتا نضفت وفرشت وبخرت البيت ...وعملت دلكتا ادلكت...وطلعت ...جات لقت المرا نضفت البيت ....وبتغسل في الهدوم.... والنعمة بتفرفر جوة في دولابا ...نفيسة جات دخلت المطبخ ...طلعت الخضار ...نضفتو وغسلتو ورجعتو التلاجة ....وقعدت تورق في خدرة لقتا قاعدة من امس ما اتنضفت..... والمرا الشغالة تعين لنفيسة ساااي ...النعمة طلعت من اوضتا .. بعد سمعت كركبة في العريشة برة....شافت نفيسة مبسوووطة تدندن وتنضف في الخدرة ....النعمة بعد شافت نفيسة ...سكتت وعينت ليها سااااي .... وقعدت في العنقريب....
نفيسة بكل براءة قالت ليها اها يمه النعمة ....نعمل الفطور شنو الليلة ؟؟...
النعمة ردت بقرف كدا... انا عملتو قبيل وقت مشيتي علي بيتك بهناك .... شوية وجات حاجة نعمات كمان شايلة كبكبي جاية تنضفو مع الونسة ... قامت نفوس رصت الفطور وجات ختتو.... والنعمة تعين ساااااي ....ويلا لمت عدة الفطور غسلتا ... وجات تساعد في حاجة نعمات في نضافة الكبكبي .... نعمات بتعين لنفيسة وقالت لنعمة مشاءالله بت نجيضة وفااالحة مشاءالله ... قبل نفيسة تجي تساعد نعمات .....وجات مواعيد القهوة ....نفيسة حبت تغير الروتين بنظامها داك.... خلت البن الجاهز ...وقلت بن جديد قلوة حلللوة ...و ...نضفت الحتة ..وعملت البخور ...وختت القهوة في جو حبوبااات ظرريف ...نعمات اتكيفت شديييد من نفيسة بس النعمة ما كان عاجبا الوضع ....ويلا نعمات طلعت مشت بيتا بعد القهوة .. نفيسة شافت النعمة راقدة جات عصرت ليها رجلينا .. وقالت ليها ماشة اصلي الضهر واجي ...نفوس مشت صلت ...واخدت ليها نومة وقت قامت ...لقت العصر باذن ....مشت استحمت ...وقشرت .....
عباس جا من الشغل ادتو العصير رقد شوية .... مع حبة دلع وونسة وقصص ...
والمسا قامت نفوس رصت الغدا العملتو النعمة الصباح...و اتغدو كلهم مع بعض....ونفيسة غسلت عدة الغدا ... ومشت تتدخن ...عباس طلع الشارع مع شاب الحلة ...ساعة ودخل للمغرب ....نفيسة مشت جهزت عشا خفيف ....خلت لي النعمة والعيال صحن وشالت هي وعباس صحن ...واتعشو اتونسو لما نامو ....وبقا دا البرنامج بتاع كل يوم ....
وفي يوم جو نسوان الحلة جارات نعمات بالقهوة لنفيسة ...بعد سمعو نعمات بتشكر في نفيسة طواااالي....وشجعتن امشن عليها .. رغم انو نسوان الحلة طووولن مادخلن بيت النعمة ... اظن من النعمة جات من الحج.....وفعلا النسوان جن بقهوتن ...ونعمات كلمت نفيسة من قبل يوم ...ونفيسة عملت احلا واجب مع الحريم ...ونفيسة لاحظت انو النعمة كانت فظة وعاملت الحريم تعامل شين ... وفي قعدة القهوة ديك ...وحدة من النسوان بهظار قالت للنعمة ...اها جاتك وحدة تمسك الراية يالنعمة وضحكت ...اتاري النعمة كانت مشهورة في الحلة بانها مرة متسلطة وقوية في التعامل ... نفيسة فهمت القصة ...وبقت تبادل النسوان الزيارات ...بس كانت بتوفق بين واجباتا وزياراتا للجيران......
النعمة بدت تغير من نفيسة .. ايوة تغير ... الغيرة والواااحدة دي ...
بالذات لما تشوف عباس بدلع في نفيسة . وبهاديها ...ولما تشوف نفيسة كل يوم بتتملك عباس اكتر ...
تتملك دي حسب شوف النعمة طبعا ...
وبقت تحاول تجر عباس وترجعو جناحا لانها حست عباس بقا ماااا زي زمان ..رغم انو عباس نفس تعاملو الاول ...ياهو هوا هوا بس وقتو اتقسم مابين الشغل ونفيسة وامو ....وبقعد تحت رجلين امو يووومي ويتونس معاها هو ونفيسة ...لما تنعس بمشو بيتم اتعشو وينومو .... والكويس النعمة بتنوم بدري....
وبقت النعمة تحاول تبعد نفيسة من تدخلا في امور البيت والمطبخ بالتحديد .... نفيسة حاولت تسمع بس الكلمة وتمشي البتقولو النعمة ...ونفيسة محترماها كل يوم زيادة ...لدرجة انها ماكلمت امها السرة اللاحظت لتصرفات النعمة مع نفيسة متغيرة .....كل ما تجيهم مرة بعد مرة فوق البيت ...وكل ما تسأل نفيسة نفيسة كانت بتبرر ...وتقنع حبوبتا انو الوضع عادي ... نفيسة مرة مرة بتحس بالاحراج وتتضايق من تصرف النعمة ..بس كانت بتتسحب وتمش بيتا ...وتشغل نفسها باي شئ ...واول ما يجي عباس بتنسى ااي شئ ...
وعباس كل يوم بريد نفيسة زيادة ...صحي الريد ماليهو اخر ...
وفي يوم نفيسة مشت لجارتم تتونس وتجي تسوي القهوة للنعمة ونعمات ...
قامت المرة قال لي نفيسة...بدور اسألك يانفيسة انتي عائشة كيفن للان مع النعمة دي؟؟؟... وانتي بت طيبة وظريفة !!!...
نفيسة ردت بكل ادب وقالت هي زاااتا طيبة وظريفة ...المرا ضحكت .. قالت ليها والله نسيبتك دي فيها لسان وقف كرعين حريم الحلة من بيتا ...بس بعد حجت لسانا اتقرص حبببة ...نفيسة قالت ليها بس عشان ماقربتو منها قلبها ابيض زي اللبن ...وضحكو ...طلعت نفيسة ...وجات لقت النعمة مادة بوز ...النعمة قالت لي نفوس بقيتي لافحة توبك يووومي وطالعة ...نفيسة ضحكت وقالت ليها معليش يمة النعمة ...اها نعمل القهوة ..ونفيسة عملت القهوة ..
ومشت بيتا.....نعمات عجبا رد نفيسة واحتراما للنعمة رغم اسلوب النعمة الشين معاها ... ونعمات احترمت نفوس شديد .....وتاني يوم ....
يتبع.....
