الضلال البعيد

7

 #الضلال_البعيد

بقلمي السيدة العلوية

الجزء 7

كرار : جنت بعدني مامصحصح.. وليث بس يلح وفوكاها كعدني برزالة وعرفت صاير حادث بالبيت .. يعني هسة المطلوب مني شنو .. ابقى حارس بالبيت ..احرم روحي من الطلعة شنو اني بنية .. طلعت واذا .. ماصارت حادثة وعدت وماطول محد تأذى ليش هالازعاج من الصبح .. الغريب اكو بداخلي .. معركة وانشقاقات واحزاب .. قلبي يرفض الي جاي ينطقة لساني ويكوله ويرفض يقتنعة بي .. قلبي يتبع ليث ويرف لاخوية ومايكدر يقاوم عيونه .. بس لساني وعقلي ومزاجي الي متحكم بي حسام وشهوتي ونزواتي .. صعب احد يكدر يرجعهم عن ثورتهم الا بمعجزة ..صعب من تتلفظ كلمات تدري كلش زين هي جاي تجرح المقابل وجاي تخلي يحس الكون ضيق والوجود مزعج بس لازم تكوله لان ماتكدر تتغير ومدمن انته على هيج .. بعدها سمعت عياط كلش قوي .. سمعت سرور وريتاج يتصارخون كدام غرفتي ..

ريتاج : بابا الحك بابا

سرور : كوم ليوثي عمري شبيك

كرار: ركضت واريد افتهم شنو صاير .. واشوف اخوية وحبيبي الماعمرة وكع .. اخوية اللي كله صحة وعافية .. واكع بالكاع ووجهة اصفر مثل ليمونه .. بسرعة شلته بية مابية وركضت للسيارة وابوية من الهبطة مايكدر يحجي .. بس كعد يمي بالسيارة واسمع امي تكول بس اخذوني

الام : ولك اخذني انتضروني

الاب بحزم : ام ليث ضلي يم البنات احنه نطمنج بالتلفون ..

اثاري انته يالي تدور على الاصدقاء برة البيت .. اثاري عندك صديق وانته مامهتمله .. اثاري صديقك واكع ومريض .. ها ياكرار .. ردلي جعلي النبض ليوثي .. طمني عليك .. وصلنا للمستشفى وسوينا التحاليل ودخلونا للطواريء وجان ليث صاير عنده مرض السكري ..

الاب : دكتور الله يخليك ابني ماعنده سكر

الطبيب : حجي هاي التحاليل وهاي غيبوبة سكر والحمدلله هسة كدرنا نتلاحك لابنك .. لان وضعه جان خطر ..

الاب : بس شلون .. لاحول ولاقوة الا بالله .. اوف ياليوثي

الطبيب : يجوز متعرض لحادث او ازمة مفاجئة هي الي كانت السبب ..

الاب : اي دكتور احنه بيتنا تعرض لحادث وجدا جان قلق على اخواته ..

الطبيب : بالتأكيد حالته النفسية السيئة كانت السبب

فاتيما : ياايتها السيدة ذات المسبحة .. ياايتها النور السماوي القدسي ..

كرار: منو هاي ..

فاتيما : كمل ..

كرار : ليش تبجين

فاتيما : لان الي تعرضله ليث كلش مؤلم .. الله يساعد قلب امه

كرار : دخلت على ليث جنا حاطينه بغرفة خاصة بالمستشفى .. دخلت واشوف اخوية والي يخاف علية مثل الطفل الزغير نايم على السرير مثلي واماكن الادوية والابر .. وعيونه اللي مغمضها .. والي ضوجني واستفزني انه احسه جان مستسلم للنوم كانما جان يكول اي اريد اهرب من الوجع والالم .. مااعرف يجوز بحلضتها كسرت خاطره ..اكيد كسرت خاطرة بس اكتشفت هالشي متأخر ..

بقينا بالمستشفى لحد الليل بعدها من استفاق ليث رجعنا للبيت ..

الاب : ليش هيج تهبطني عليك ياباباتي

الام: يمة وليدي تعال اشمك وبدت تحضن بليث وتشتم بي وريتاج وسرور مثلها واليوم كلها كاعدين يمه .. جان اليوم جدا حلو وادفي من شفت عائلتي ملتمة .. وساعة 7 بالليل اجه حسام ابن عمتي

ريتاج : حسام تفضل بابا وكرار كاعدين يم ليث

حسام : الحمدلله على سلامتك ليوثي حبيبي .. ازمة وعدت .. شنو هالاخبار الموحلوة .. اتصل بيكم ومحد كال وبعدين اتصل على هذا الخبل وماكال ..

كرار : لك عدل اسلوبك منو الخبل ابو راس

حسام : اي غير تكول جان لحكتكم للمستشفى خاف محتاجين شي .. يعني بربك هي هاي طلعة منك

الام: حسومي الوالدة شلونها

حسام : بخير عمة الله يسلمج باجر اجيبها تجي تشوف ليث وتتحمد على سلامتكم

ليث : مشكور حسومي ماتقصرون .. بابا اني صاعد بغرفتي انام ..

الاب : اي وليدي .. اخذت علاجك .. أبر الانسولين ؟؟ الادوية كاملة كلها

حسام : محتاجين شي ... نطلع هسة نجيب الادوية

ليث بزعل : لا حسام كلشي عندي ..

بعد فترة ..

كرار : اكول حسومي شو لاحس ولانفس

حسام : ملتهي وداعتك ....

صار لازم تعرفوني .. اني حسام {ابن عمة كرار .. بس عندي حقد وسواد مااكدر احدد له بدايـة ومااعرفله نهايـة .. سواد يخترق كل ذرة بحياتي .. عايشين سيارات وفلوس وبيت شعرضه وشكبرة .. وابوهم وضيفة تسد عين الشمس .. واني مو مثلهم ليش .. وخو هذا ليث عمره مااستلطفني ولا حسيته رايدلي الخير .. لهذا لازم ادمرهم واطشرهم ..امي كلش تحبهم بس اني كلش اكرهم واتلذذ من اشوفهم تعيسين .. كل واحد راسمله فكره بدماغي بس شعندي على مهلي اتسلى بيهم

.

فاتيما : كل الشر توقعته من جهـة هذا الشخص الي اسمه حسام لكن مااعرف ليش كرار مغرم بي وعنده ثقة بي .. اني معلية الي يعنيني انه احاول اساعد هذا الكرار واحاول اتعلم من عنده طبايع اهل العراق .. اهل والدي ..