الضلال البعيد

3

#الضلال_البعيد

بقلمي السيدة العلوية

الجزء 3

بعد ان رجعت وية والدي من هذه الزيارة وهذا المكان الي اول مرة اسمع عنه في البرتغال .. رغم انه اني عمري كله في البرتغال والمفروض ماخليت مكان يعتب عليه والفضل كله لماريانا الي تحب تكتشف ونروح مخيمات كشافة .. رجعت واني كمية تساؤلات عظيمة في بالي .. عن العراق وعن والدي وعن الاسلام .. وعن هذا الاسم الغريب الي اسمي مقترن بي .. اني متوقعه كنت انه اسمي هو مشتق او تابع لربما لاسم جدتي او احدى قريبات والدي ..

كلارا: مصطفى بدأت استغرب وضع فاتيما اكو شي ؟؟

مصطفى: لا بس فاتيما حالياً جاي تمر بمرحلة انتقالية مهمة بحياتها وحان الوقت انه احجي وياج بيها ..

كلارا: احجي مصطفى قلقتني على طفلتي بيها شي .. هل تعرضت لحادث هل احد اعتدى عليها في الشارع ؟؟

مصطفى: شبيج كلارا .. اهدأي ليش هيج اكشن افكارج ... لا بس فاتيما حاليا كبرت .. ومثلما تعرفين احنا من تزوجنا اتفقتي معي انه مااتدخل بمعتقدك كمسيحية وهذا الامر عندي عادي لكن فاتيما لازم تكون ديانتها مثلي .. تتبع والدها ..

كلارا : هل هو بالاجبار يامصطفى .. فاتيما بنت تختلف عنك وعني وبالتأكيد سترفض مسألة الدين والتدين والالهـة .. الصغار مو مثلنا لا يفهمون هذه الامور يعتقدونها غير مهمة .. مع انها اساس الحياة

مصطفى: اني طول عشرتي وياج هم اجة يوم وجبرتج على شي يخص دينج او ديني ؟؟ هل اجة يوم وكتلج صلي مثلي او هكذا او هكذا ...ياكلارا دينا جدا سمح .. الاسلام جدا بسيط لكن جدا دقيق والي مايفهمة مايكدر يعرف قيمته .. معظم اللي تشوفيهم يسيئون للاسلام هم ماخذين من الاسلام مجرد قشور ..

كلارا : يعني مايجي يوم وتجبر بنتي انه تتزوج شخص غصب عنها ..

مصطفى وهو يطلق ضحك ويقوم باحتضان زوجته : منو كالج انه المسلم هيج افكاره ؟؟

كلارا : مرة من المرات في السوبر ماركت سمعت اثنين مسلمات يحجون هيج ..

مصطفى :اكيد وحتماً اكو خطأ بشخصيتهم لان للبنت حقوق وواجبات والاسلام كفل للكل حق .. يمعودة شكد تحبين تسولفين حضري وجبة العشاء لان جدا جوعان ..

من بعد مارجعت بدأت اطلع بحوث وكتب عن {السيدة ذات المسبحة } ردت اعرف هي منو .. واخيرا .. عرفتها وعرفت انه هي بنت رسول الاسلام الخاتم محمد صلى الله عليه واله وسلم .. وبديت اقرأ قصتها وبدأت احس بحب وشوق الها .. شخصية وعمرها كان مقارب لعمري .. اوصافها كانت نحيلة ضعيفة من التعب والتعبد ولكن كانت زوجة مخلصة ..

صحيح بعض الكلمات ماكدرت اعرفهن وماعرفت انطقهم عدل بس استعانيت بوالدي لان جانت عندي رغبة اتعلم لغة والدي ولهجته العراقية وتمر اسابيع واني بدأت اتعمق .. واتعمق .. بهذه الفترة ماريانا وجاستينا بلغوني انه الاستاذ توماس وزعنا على مجاميع للمخيم الكشفي الصيفي واني بالمجموعة الاولى الى راح يشرف عليها الاستاذ توماس بنفسه وهو اقارب ماما ..

بعد اكثر من شهر .. وقت العصر جان والدي بالمكتب خابرته كتله عندك شي لو اكدر امر عليك ..

مصطفى : فاتيما خير اكو شي باباتي

فاتيما : لا بس جبت ايس كريم وكلت من تكمل من العمل نتمشى عندي موضوع مهم

مصطفى: حاضر .. انتضريني 10 دقايق واكمل .. وفعلا كملت واخذت بنتي ورحنا للبارك اخذت سيارتي ورحنا تمشينا ..

فاتيما : بابا اوكف هنا يم البحيرة

مصطفى : موافق وجيبي الايس كريم خلي اصبر بي روحي بينما نرجع

فاتيما بضحك : تفضل

مصطفى : كولي حبيبتي

فاتيما : بابا اني راح احجي بس لاتقاطعني .. اسمعني ارجوك .. واسمعني جيدا لان مترددة وخائفة من ردة فعلك ... اني موافقة .. اصير مسلمة .. لكن ..

مصطفى بأستغراب : لكن شنو

فاتيما : وهي كالطفل تحرك فمها مااكدر البس حجاب !!

مصطفى: ضليت ساكت .. ومااعرف شلون اجاوب ..

فاتيما : بابا اكيد عندي اسبابي افهمني ارجوك ..

مصطفى: كوليهم اسبابك يجوز اقتنع ويجوز اقنعك

فاتيما : بابا من بعد احداث اميريكا والارهاب الي انتشر بالعالم الناس كامت تكره المسلمين وتعتبرهم اساس لكل مصيبة تصير وخصوصا الي يلبسون الزي الاسلامي

مصطفى: دنكت راسي ألماً .. يابا احنه مو مثل الناس ومعلينه بغيرنا وهذا دينا شلون

فاتيما : بابا راح يكولون عني غريبة الاطوار صدكني وراح كل صديقاتي يتركوني وراح اكون عرضة للسخرية ..

مصطفى : والحل شلون ..

فاتميا : البس قبعة تغطي شعري مثل الولد .. عادي اني اصلا تصرفاتي غريبة خلي ازيدها غرابة ..

مصطفى: هههههههه .. لكن عندي سؤال

فاتميا : كول بابا

مصطفى: يعني انتي قبلتي عن اقتناع

فاتيما : عن حب وعن اقتناع وعن دمائي الي انته مو تكول اني دمائي دماء مسلمة ..

مصطفى: المن حبيتي

فاتيما : السيدة ذات المسبحة

مصطفى : اه تقصدين {السيدة الزهراء .. }

يتبع