الضلال البعيد

8

#الضلال_البعيد

بقلمي السيدة العلوية

الجزء 8

بعد فترة صرت اتردد لمكان اني وحسام ... كوفي شوب ... اني جنت عادي اشرب بس موكلش مدمن ..بس صرت اتعود اروح واشرب الدخان بهذا المكان بالذات ..

حسام : اكو كروري خل نجرب هالنركيلة كلش تعدل المزاج

كرار: اي والله يحتاجلنا كعدة حلوة .. الجو ملل وكأبة .. من رحنا جان المكان جدا غريب .. اشوف الولد والزلم الكبار كلها كعداتهم غريبة وشكولهم اغرب .. اني ماجان عندي معرفة بالمخدر شنو .. اني كل الاثام الي وصلتلها ..

حسام : اهنا النركيلة توصلك للسما ..

كرار : شعجب

حسام : لان بيها فد سر يخليك تحس بالسعادة والنشوة

كرار: شنو هي نركيلة يمعود .. واجانا الولد وطلبنا اثنين .. وبديت استنشق اول ذرة دخان .. وماعرفت هذه ذرات الشيطان دخلت لكياني ..كل حناني وكل وجداني وكل الانسان الي بداخلي انتى بمجرد مادخلني هذا الهوا .. بالبداية بديت اسولف واضحك واحجي كلام مامفهموم مثل الي يهلوس .. كلام مامترابط .. ساعة اضحك ساعة النكات عندي واشوف حسام وجماعتي يضحكون ويضحكون وجان الامر عندي روعة بالبداية

ليث : من تكون كتلة مشاعر .. وتكون رجفات وخوف وقلق ولهفة اخ لاخوانه .. وتتوقع المثل وتتوقع الكل راح يجازيك بنفس الطبع .. من تشيل اخوانك على جف الموت حتى لا احد يأذيهم وتخاف عليهم لااحد يوجعهم وتحرص عليهم وتحاول تنهش اي واحد يريد بيهم السوء وتنصحهم واول ماتبدي تنصح .. تلكة واحدهم يصرخ بيك .. شعليك .. توكع ساعتها من الثريـا .. ساعتها السما والارض ماتلمك .. ساعتها الجروح ماتفهم من اي مكان تبدي .. ومن تريد تنسى وتحاول تخلي المركب تمشي وحتى لاتوجع احد ثالث .. وتكول خلي اروح واطيب خاطرة .. وواول مابديت الصلح .. لكيته جلمود مايحن .. ااااااااااااااااخ ياروحي شلون ذلوج .. كرار هيج خليتني ومرضتني ..

المشكلة روحي تريد ولفها الجابته امي .. ولفها الي لاعبني ولاعبته من جنة اطفال .. ولفي الي ضحكنا سوية .. ولفي الي اول ماصرنا شباب وراهقنا وطكت شواربنا فرحنا سوية .. وين راح ولفي .. حسرتي صارت حسرة المجبود ... واكول ياكرار ارجع مثل قبل وادري ماترجع .. لان بديت استغربك واستغرب طبايعك ويومية براي ويومية بطبع جديد

جان السكر كلش مضوجني ومتعبني وهواي ابر الانسولين جانت تغثني لان حالتي النفسية ابد ابد مااستقرت ..

الاب : ليوثي حبيبي ابد ماعاجبني

ليث : والله مااعرف بابا .. بس حيل مالي خلك والسكر كلش متعبني ..

الاب : دير بالك على روحك ولاتعب نفسك بالمحل .. خلي العمال وانته ارجع من وكت

ليث : شلون أأمن بيهم

الاب: يحترك المحل عساه .. المهم انت واخوك ... شتفيد الفلوس ..

كرار : فاتيما انتي ليش تتأخرين عليا

فاتيما : لان احنا بمخيم ولازم بس ساعتين اقضيهم هنا .. محتاج مساعدة .. اذا تحتاج شي اكدر ابلغ استاذ توماس يبلغ الممرضين يهتمون اكثر بيك ..

كرار : لا بس احتاج احد اسولف وياه لان المكان كلش ضوجة .. واحس بكأبة قوية

فاتيما : حاول تشغل وقتك ..لان هاي الاثار الانسحابية مال المخدر

كرار: بيش مثلا

فاتيما: راح ابقي كتابي يمك

كرار: ههههه كتابج بالبرتغالي مافهمك لغتكم

فاتيما : لا بالعربي .. ارجع كملي عنك .. شنو جنت تحس ..بدينا يوم بعد يوم نروح لنفس الكوفي شوب ومرات جنت اروح لوحدي .. تعودت وادمنت وتعرفت على ولد بالكوفي شوب ..

الولد: كروري اكو كعدة حلوة بشقة ولد صاحبي سمير

كرار : شبي سمير ..

الولد:هناك المزاج عالي وونسة

كرار: اوكي بال6 نتلاكة ..

رحت وياهم .. جنت اول مرة اشوف هالشي بحياتي .. بحياتي ماشفت هيج الا بالمسلسلات .. يعني حتى بالخيال ماجنت اتوقع انه اسوي هالشي .. مكان غريب وشقة وشخة وناس مدمنين وكعدات غريبة .. وبديت اصير مدمن مخدرات .. وبديت اتعاطي المخدرات

بالبداية جنت احس الوضع حلو كلش وجان الوضع سهل ومامنتبه انه سهل ليش .. وليش اني بالذات المخدر كدامي يجي بسهولة رغم التشدد بالبلد نوعا ما بس جنت بسهولة الكاه حتى اصناف دوليا واحس براحة قوية ونشوة وافقد افقد ومااعرف شاسوي مااسوي واخربط هواي واتندم من اتذكرها ..

فاتيما : جنت اشوف كرار من يحجي عن الماضي مالته بدأ يصير عصبي وبدأت الاوردة مالته تضهر وخفت كلش من عنده تراجعت ليورة وهو مستمر يرجع بذكرياته واني منظره واعصابه وبدأ ماينتبه على نفسه وحيل خفت جنت اريد اضغط على زر المخصص للخطر .. حتى الامن يدخلون .. بس خفت عليه وخفت من عنده بنفس الوقت

كرار : جنت مندمج احجي ويه فاتيما واشوفها بدأت تخاف وترجع لحد ماصوت اصطدامها بالحايط فززني .. ضليت صافن على شكلها لاول مرة انتبه لملامحها الغريبة .. نصف شرقية ونصف غريبة ..ورأساً كلتلها .. انتي خفتي مني !!